K. Bhagyaraj Dies : ਤਾਮਿਲ ਸਿਨੇਮਾ ਦੇ ਦਿੱਗਜ ਅਦਾਕਾਰ-ਨਿਰਦੇਸ਼ਕ ਕੇ. ਭਾਗਿਆਰਾਜ ਦਾ 73 ਸਾਲ ਦੀ ਉਮਰ 'ਚ ਦਿਲ ਦਾ ਦੌਰਾ ਪੈਣ ਕਾਰਨ ਦੇਹਾਂਤ

ਐਂਟਰਟੇਨਮੈਂਟ ਡੈਸਕ, ਨਵੀਂ ਦਿੱਲੀ : ਤਾਮਿਲ ਸਿਨੇਮਾ ਦੇ ਜਾਣੇ-ਪਛਾਣੇ ਫਿਲਮਮੇਕਰ, ਅਦਾਕਾਰ ਅਤੇ ਸਕ੍ਰੀਨਰਾਈਟਰ ਕੇ. ਭਾਗਿਆਰਾਜ ਦਾ ਸ਼ਨੀਵਾਰ ਨੂੰ ਚੇਨਈ ਵਿੱਚ ਹਾਰਟ ਅਟੈਕ ਨਾਲ ਨਿਧਨ ਹੋ ਗਿਆ। ਉਹ 73 ਸਾਲਾਂ ਦੇ ਸਨ। ਉਨ੍ਹਾਂ ਦੇ ਦੇਹਾਂਤ ਨਾਲ ਤਾਮਿਲ ਸਿਨੇਮਾ ਦੇ ਇੱਕ ਯੁੱਗ ਦਾ ਅੰਤ ਹੋ ਗਿਆ ਹੈ।

ਕੇ. ਭਾਗਿਆਰਾਜ ਨੂੰ ਬਿਹਤਰੀਨ ਕਹਾਣੀ ਸੁਣਾਉਣ, ਸਕ੍ਰੀਨਪਲੇਅ ਲਿਖਣ ਅਤੇ ਮੱਧ-ਵਰਗੀ ਪਰਿਵਾਰਾਂ ਲਈ ਮਨੋਰੰਜਕ ਫਿਲਮਾਂ ਬਣਾਉਣ ਵਿੱਚ ਉਨ੍ਹਾਂ ਦੇ ਯੋਗਦਾਨ ਲਈ ਬਹੁਤ ਸਲਾਹਿਆ ਜਾਂਦਾ ਸੀ। ਉਨ੍ਹਾਂ ਦੇ ਅੰਤਿਮ ਸਸਕਾਰ ਬਾਰੇ ਅਜੇ ਹੋਰ ਜਾਣਕਾਰੀ ਦੀ ਉਡੀਕ ਹੈ।

ਭਾਗਿਆਰਾਜ ਆਪਣੇ ਪਿੱਛੇ ਪਤਨੀ, ਅਦਾਕਾਰਾ ਪੂਰਣਿਮਾ ਭਾਗਿਆਰਾਜ ਅਤੇ ਆਪਣੇ ਬੱਚਿਆਂ - ਅਦਾਕਾਰ ਸ਼ਾਂਤਨੂ ਭਾਗਿਆਰਾਜ ਅਤੇ ਧੀ ਸਾਰਣਿਆ ਭਾਗਿਆਰਾਜ ਵਰਗਾ ਪਿਆਰਾ ਪਰਿਵਾਰ ਛੱਡ ਗਏ ਹਨ।

ਖੁਸ਼ਬੂ ਸੁੰਦਰ ਦੀ ਧੀ ਦੇ ਵਿਆਹ 'ਚ ਹੋਏ ਸਨ ਸ਼ਾਮਲ

ਦਿੱਗਜ ਫਿਲਮ ਨਿਰਮਾਤਾ ਹਾਲ ਹੀ ਤੱਕ ਜਨਤਕ ਜੀਵਨ ਵਿੱਚ ਸਰਗਰਮ ਰਹੇ ਅਤੇ ਆਪਣੀ ਮੌਤ ਤੋਂ ਕੁਝ ਦਿਨ ਪਹਿਲਾਂ ਗੋਆ ਵਿੱਚ ਅਦਾਕਾਰਾ-ਸਿਆਸਤਦਾਨ ਖੁਸ਼ਬੂ ਸੁੰਦਰ ਦੀ ਧੀ ਦੇ ਵਿਆਹ ਵਿੱਚ ਸ਼ਾਮਲ ਹੋਏ ਸਨ।

ਤਾਮਿਲਨਾਡੂ ਦੇ ਇਰੋਡ ਜ਼ਿਲ੍ਹੇ ਵਿੱਚ ਕ੍ਰਿਸ਼ਨਾਸਵਾਮੀ ਭਾਗਿਆਰਾਜ ਦੇ ਤੌਰ 'ਤੇ ਜਨਮੇ ਭਾਗਿਆਰਾਜ ਨੇ ਫਿਲਮ ਇੰਡਸਟਰੀ ਵਿੱਚ ਆਪਣੇ ਸਫ਼ਰ ਦੀ ਸ਼ੁਰੂਆਤ ਮਸ਼ਹੂਰ ਫਿਲਮਮੇਕਰ ਭਾਰਤੀਰਾਜਾ ਦੇ ਅਸਿਸਟੈਂਟ ਵਜੋਂ ਕੀਤੀ ਸੀ ਅਤੇ ਬਾਅਦ ਵਿੱਚ ਆਪਣਾ ਇੱਕ ਸਫ਼ਲ ਕਰੀਅਰ ਬਣਾਇਆ।

ਮਿਡਲ ਕਲਾਸ ਕਹਾਣੀਆਂ ਲਈ ਮਿਲੀ ਪਛਾਣ

ਉਹ ਤਾਮਿਲ ਸਿਨੇਮਾ ਦੇ ਸਭ ਤੋਂ ਪ੍ਰਭਾਵਸ਼ਾਲੀ ਫਿਲਮਮੇਕਰ-ਲੇਖਕਾਂ ਵਿੱਚੋਂ ਇੱਕ ਬਣੇ। ਉਨ੍ਹਾਂ ਨੂੰ ਮਿਡਲ-ਕਲਾਸ ਫੈਮਿਲੀ ਡਰਾਮਾ ਦੇ ਆਪਣੇ ਖ਼ਾਸ ਅੰਦਾਜ਼, ਬਿਹਤਰੀਨ ਸਕ੍ਰੀਨ ਰਾਈਟਿੰਗ ਅਤੇ ਸਮਾਜਿਕ ਮੁੱਦਿਆਂ 'ਤੇ ਅਧਾਰਿਤ ਕਹਾਣੀ ਸੁਣਾਉਣ ਦੀ ਸ਼ੈਲੀ ਲਈ ਜਾਣਿਆ ਜਾਂਦਾ ਹੈ, ਜਿਸ ਨੇ 1980 ਅਤੇ 1990 ਦੇ ਦਹਾਕੇ ਵਿੱਚ ਤਾਮਿਲ ਸਿਨੇਮਾ ਦੇ ਇੱਕ ਦੌਰ ਨੂੰ ਪਰਿਭਾਸ਼ਿਤ ਕੀਤਾ।

ਭਾਗਿਆਰਾਜ ਦਾ ਕਰੀਅਰ

ਆਪਣੇ ਸ਼ਾਨਦਾਰ ਕਰੀਅਰ ਦੌਰਾਨ ਭਾਗਿਆਰਾਜ ਨੇ 25 ਤੋਂ ਵੱਧ ਫਿਲਮਾਂ ਦਾ ਨਿਰਦੇਸ਼ਨ ਕੀਤਾ ਅਤੇ 75 ਤੋਂ ਵੱਧ ਫਿਲਮਾਂ ਵਿੱਚ ਅਦਾਕਾਰੀ ਕੀਤੀ। ਉਨ੍ਹਾਂ ਦੀਆਂ ਕੁਝ ਸਭ ਤੋਂ ਮਸ਼ਹੂਰ ਫਿਲਮਾਂ ਵਿੱਚ 'ਮੁੰਧਨਾਈ ਮੁਦਿਚੂ', 'ਅੰਧਾ 7 ਨਾਟਕਾਲ' ਅਤੇ 'ਡਾਰਲਿੰਗ, ਡਾਰਲਿੰਗ, ਡਾਰਲਿੰਗ' ਸ਼ਾਮਲ ਹਨ, ਜਿਨ੍ਹਾਂ ਨੂੰ ਅੱਜ ਵੀ ਕਲਾਸਿਕ ਮੰਨਿਆ ਜਾਂਦਾ ਹੈ। ਤਾਮਿਲ ਸਿਨੇਮਾ ਵਿੱਚ ਉਨ੍ਹਾਂ ਦਾ ਯੋਗਦਾਨ ਇੰਨਾ ਅਹਿਮ ਸੀ ਕਿ ਤਾਮਿਲਨਾਡੂ ਦੇ ਸਾਬਕਾ ਮੁੱਖ ਮੰਤਰੀ ਅਤੇ ਮਸ਼ਹੂਰ ਅਦਾਕਾਰ ਐੱਮ.ਜੀ. ਰਾਮਚੰਦਰਨ (MGR) ਨੇ ਸਭ ਦੇ ਸਾਹਮਣੇ ਭਾਗਿਆਰਾਜ ਨੂੰ ਫਿਲਮ ਇੰਡਸਟਰੀ ਵਿੱਚ ਆਪਣਾ ਉੱਤਰਾਧਿਕਾਰੀ ਐਲਾਨਿਆ ਸੀ।

ਹਿੰਦੀ ਸਿਨੇਮਾ 'ਚ ਵੀ ਕੀਤਾ ਕੰਮ

ਭਾਗਿਆਰਾਜ ਨੇ ਹਿੰਦੀ ਸਿਨੇਮਾ ਵਿੱਚ ਵੀ ਆਪਣੀ ਪਛਾਣ ਬਣਾਈ। ਉਨ੍ਹਾਂ ਨੇ 'ਆਖਰੀ ਰਾਸਤਾ' (1986) ਫਿਲਮ ਡਾਇਰੈਕਟ ਕੀਤੀ, ਜਿਸ ਵਿੱਚ ਅਮਿਤਾਭ ਬੱਚਨ ਨੇ ਜਯਾ ਪ੍ਰਦਾ, ਸ੍ਰੀਦੇਵੀ ਅਤੇ ਅਨੁਪਮ ਖੇਰ ਦੇ ਨਾਲ ਡਬਲ ਰੋਲ ਨਿਭਾਇਆ ਸੀ। ਬਦਲੇ ਦੀ ਕਹਾਣੀ ਵਾਲੀ ਇਹ ਫਿਲਮ ਉਸ ਦਹਾਕੇ ਦੀਆਂ ਅਹਿਮ ਹਿੰਦੀ ਫਿਲਮਾਂ ਵਿੱਚੋਂ ਇੱਕ ਬਣੀ ਅਤੇ ਇਸ ਨੇ ਤਾਮਿਲ ਸਿਨੇਮਾ ਤੋਂ ਇਲਾਵਾ ਵੀ ਭਾਗਿਆਰਾਜ ਦੀ ਕਹਾਣੀ ਸੁਣਾਉਣ ਦੀ ਕਾਬਲੀਅਤ ਨੂੰ ਦਿਖਾਇਆ।

ਕੇ. ਭਾਗਿਆਰਾਜ ਬਿਹਤਰੀਨ ਡਾਇਰੈਕਟਰ ਅਤੇ ਐਕਟਰ ਹੋਣ ਦੇ ਨਾਲ-ਨਾਲ ਕਮਾਲ ਦੇ ਸਕ੍ਰੀਨ ਰਾਈਟਰ, ਪ੍ਰੋਡਿਊਸਰ, ਕੰਪੋਜ਼ਰ, ਰਾਈਟਰ ਅਤੇ ਸਿਆਸਤਦਾਨ (ਪੌਲੀਟਿਸ਼ੀਅਨ) ਵੀ ਸਨ। ਉਹ ਆਪਣੇ ਪਿੱਛੇ ਕਲਾ ਦੀ ਇੱਕ ਵੱਡੀ ਵਿਰਾਸਤ ਛੱਡ ਗਏ ਹਨ ਜੋ ਹਮੇਸ਼ਾ ਉਨ੍ਹਾਂ ਦੀ ਯਾਦ ਦਿਵਾਉਂਦੀ ਰਹੇਗੀ।