ਦੁਲਹਨ ਬਣੇਗੀ ਜਾਨ੍ਹਵੀ ਕਪੂਰ ਦੀ ਮਤਰੇਈ ਭੈਣ ਅੰਸ਼ੁਲਾ, ਪ੍ਰੀ-ਵੈਡਿੰਗ ਸੇਰੇਮਨੀ ’ਚ ਕਪੂਰ ਫੈਮਿਲੀ ਨੇ ਬੰਨ੍ਹਿਆ ਰੰਗ

ਬੀ-ਟਾਊਨ ਅਦਾਕਾਰਾ ਜਾਨ੍ਹਵੀ ਕਪੂਰ ਦੀ ਮਤਰੇਈ ਭੈਣ ਅੰਸ਼ੁਲਾ ਕਪੂਰ ਜਲਦ ਹੀ ਵਿਆਹ ਦੇ ਬੰਧਨ ਵਿੱਚ ਬੱਝਣ ਜਾ ਰਹੀ ਹੈ। ਫ਼ਿਲਮ ਨਿਰਮਾਤਾ ਬੋਨੀ ਕਪੂਰ ਦੀ ਬੇਟੀ ਅਤੇ ਅਦਾਕਾਰ ਅਰਜੁਨ ਕਪੂਰ ਦੀ ਭੈਣ ਹੋਣ ਕਰਕੇ, ਅੰਸ਼ੁਲਾ ਦਾ ਵਿਆਹ ਇਸ ਵੇਲੇ ਸੁਰਖੀਆਂ ’ਚ ਬਣਿਆ ਹੋਇਆ ਹੈ। ਵਿਆਹ ਤੋਂ ਪਹਿਲਾਂ ਉਨ੍ਹਾਂ ਦੀਆਂ ਪ੍ਰੀ-ਵੈਡਿੰਗ ਰਸਮਾਂ ਸ਼ੁਰੂ ਹੋ ਚੁੱਕੀਆਂ ਹਨ।

ਇਨ੍ਹਾਂ ਰਸਮਾਂ ਵਿੱਚ ਕਪੂਰ ਪਰਿਵਾਰ ਦੇ ਮੈਂਬਰਾਂ ਨੇ ਮਿਲ ਕੇ ਜਸ਼ਨ ਮਨਾਇਆ ਹੈ। ਇਸ ਦੌਰਾਨ ਦੀਆਂ ਤਾਜ਼ਾ ਤਸਵੀਰਾਂ ਸੋਸ਼ਲ ਮੀਡੀਆ 'ਤੇ ਸਾਹਮਣੇ ਆਈਆਂ ਹਨ, ਜਿਨ੍ਹਾਂ ਵਿੱਚ ਅੰਸ਼ੁਲਾ ਕਪੂਰ ਦੇ ਪ੍ਰੀ-ਵੈਡਿੰਗ ਫੰਕਸ਼ਨ ਵਿੱਚ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰ ਰੰਗ ਬੰਨ੍ਹਦੇ ਹੋਏ ਨਜ਼ਰ ਆ ਰਹੇ ਹਨ।

ਅੰਸ਼ੁਲਾ ਕਪੂਰ ਦੇ ਪ੍ਰੀ-ਵੈਡਿੰਗ ਫੰਕਸ਼ਨ

ਆਪਣੇ ਸਕੇ ਭਰਾ ਅਰਜੁਨ ਕਪੂਰ ਅਤੇ ਮਤਰੇਈ ਭੈਣ ਜਾਨ੍ਹਵੀ ਕਪੂਰ ਵਾਂਗ ਅੰਸ਼ੁਲਾ ਕਪੂਰ ਨੇ ਅਦਾਕਾਰੀ ਵਿੱਚ ਆਪਣਾ ਕਰੀਅਰ ਨਹੀਂ ਬਣਾਇਆ ਪਰ ਇਸ ਦੇ ਬਾਵਜੂਦ ਅੰਸ਼ੁਲਾ ਆਪਣੀ ਨਿੱਜੀ ਜ਼ਿੰਦਗੀ ਨੂੰ ਲੈ ਕੇ ਆਏ ਦਿਨ ਚਰਚਾ ਵਿੱਚ ਰਹਿੰਦੀ ਹੈ, ਖ਼ਾਸ ਕਰਕੇ ਆਪਣੇ ਲੌਂਗ-ਟਾਈਮ ਬੁਆਏਫ੍ਰੈਂਡ ਰੋਹਨ ਠੱਕਰ ਨਾਲ ਅਫੇਅਰ ਨੂੰ ਲੈ ਕੇ।

ਤਿੰਨ ਸਾਲਾਂ ਤੱਕ ਇੱਕ-ਦੂਜੇ ਨਾਲ ਦੋਸਤੀ ਦਾ ਰਿਸ਼ਤਾ ਨਿਭਾਉਣ ਤੋਂ ਬਾਅਦ, ਅੰਸ਼ੁਲਾ ਅਤੇ ਰੋਹਨ ਹੁਣ ਵਿਆਹ ਦੇ ਬੰਧਨ ਵਿੱਚ ਬੱਝਣ ਲਈ ਪੂਰੀ ਤਰ੍ਹਾਂ ਤਿਆਰ ਹਨ। ਕਰੀਬ 8 ਮਹੀਨੇ ਪਹਿਲਾਂ ਇਸ ਜੋੜੇ ਨੇ ਮੰਗਣੀ ਕੀਤੀ ਸੀ ਅਤੇ ਹੁਣ ਉਹ ਆਪਣੇ ਰਿਸ਼ਤੇ ਨੂੰ ਵਿਆਹ ਦਾ ਨਾਂ ਦੇਣ ਜਾ ਰਹੇ ਹਨ।

ਇਸੇ ਤਹਿਤ ਅੰਸ਼ੁਲਾ ਕਪੂਰ ਦੀ ਪ੍ਰੀ-ਵੈਡਿੰਗ ਸੇਰੇਮਨੀ ਦਾ ਆਗਾਜ਼ ਹੋ ਗਿਆ ਹੈ। ਇਸ ਦੀਆਂ ਤਸਵੀਰਾਂ ਅੰਸ਼ੁਲਾ ਦੀ ਚਚੇਰੀ ਭੈਣ ਅਤੇ ਅਦਾਕਾਰਾ ਸ਼ਨਾਇਆ ਕਪੂਰ ਨੇ ਆਪਣੇ ਆਫ਼ੀਸ਼ੀਅਲ ਇੰਸਟਾਗ੍ਰਾਮ ਹੈਂਡਲ 'ਤੇ ਸਾਂਝੀਆਂ ਕੀਤੀਆਂ ਹਨ। ਤਸਵੀਰਾਂ ਨੂੰ ਦੇਖ ਕੇ ਇਹ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ ਕਿ ਇਨ੍ਹਾਂ ਫੰਕਸ਼ਨਾਂ ਦੀ ਸ਼ੁਰੂਆਤ 'ਮਾਤਾ ਕੀ ਚੌਕੀ' ਨਾਲ ਹੋਈ ਹੈ।

ਇਸ ਦੌਰਾਨ ਅਦਾਕਾਰ ਸੰਜੇ ਕਪੂਰ, ਉਨ੍ਹਾਂ ਦੀ ਪਤਨੀ ਮਹੀਪ ਕਪੂਰ, ਬੇਟੀ ਸ਼ਨਾਇਆ ਕਪੂਰ ਅਤੇ ਭਤੀਜੀ ਜਾਨ੍ਹਵੀ ਕਪੂਰ ਨੇ ਆਪਣੇ ਡਾਂਸ ਮੂਵਜ਼ ਨਾਲ ਅੰਸ਼ੁਲਾ ਕਪੂਰ ਦੇ ਪ੍ਰੀ-ਵੈਡਿੰਗ ਫੰਕਸ਼ਨ ਵਿੱਚ ਖ਼ੂਬ ਰੰਗ ਜਮਾਇਆ। ਇਸ ਤੋਂ ਇਲਾਵਾ ਅਰਜੁਨ ਕਪੂਰ ਨੇ ਵੀ ਆਪਣੀ ਭੈਣ ਦੇ ਵਿਆਹ ਤੋਂ ਪਹਿਲਾਂ ਦੀਆਂ ਰਸਮਾਂ ਵਿੱਚ ਧੂਮ ਮਚਾਈ। ਸੋਸ਼ਲ ਮੀਡੀਆ 'ਤੇ ਇਨ੍ਹਾਂ ਦੀਆਂ ਤਸਵੀਰਾਂ ਤੇਜ਼ੀ ਨਾਲ ਵਾਇਰਲ ਹੋ ਰਹੀਆਂ ਹਨ।

ਕਦੋਂ ਹੋਵੇਗਾ ਅੰਸ਼ੁਲਾ ਕਪੂਰ ਅਤੇ ਰੋਹਨ ਠੱਕਰ ਦਾ ਵਿਆਹ

ਜੇਕਰ ਅੰਸ਼ੁਲਾ ਕਪੂਰ ਅਤੇ ਰੋਹਨ ਠੱਕਰ ਦੇ ਵਿਆਹ ਦੀ ਤਰੀਕ ਦੀ ਗੱਲ ਕਰੀਏ, ਤਾਂ 6 ਜੁਲਾਈ ਨੂੰ ਇਹ ਦੋਵੇਂ ਮੁੰਬਈ ਵਿੱਚ ਵਿਆਹ ਦੇ ਸੱਤ ਫੇਰੇ ਲੈਣਗੇ। ਇਸ ਵਿਆਹ ਸਮਾਗਮ ਵਿੱਚ ਅੰਸ਼ੁਲਾ ਅਤੇ ਰੋਹਨ ਦੇ ਪਰਿਵਾਰ ਤੋਂ ਇਲਾਵਾ ਹੋਰ ਨਜ਼ਦੀਕੀ ਦੋਸਤ ਅਤੇ ਫ਼ਿਲਮੀ ਜਗਤ ਦੀਆਂ ਨਾਮਵਰ ਹਸਤੀਆਂ ਦਾ ਇਕੱਠ ਦੇਖਣ ਨੂੰ ਮਿਲੇਗਾ।