ਧਰਮਿੰਦਰ ਦੀਆਂ ਯਾਦਾਂ ਨਾਲ ਸਜਿਆ ਹੈ ਹੇਮਾ ਮਾਲਿਨੀ ਦਾ 54 ਸਾਲ ਪੁਰਾਣਾ ਘਰ, ਬੇਟੀ ਈਸ਼ਾ ਨੇ ਦਿਖਾਇਆ 'ਅਦਵਿਤੀਅ' ਦਾ ਇਕ-ਇਕ ਕੋਨਾ

ਅਦਾਕਾਰਾ ਤੋਂ ਸਿਆਸਤਦਾਨ ਬਣੀ ਹੇਮਾ ਮਾਲਿਨੀ ਨੇ ਆਪਣੇ ਮੁੰਬਈ ਵਾਲੇ ਘਰ ਦੇ ਦਰਵਾਜ਼ੇ ਖੋਲ੍ਹ ਦਿੱਤੇ ਹਨ ਅਤੇ ਪ੍ਰਸ਼ੰਸਕਾਂ ਨੂੰ ਉਸ ਘਰ ਦੀ ਇੱਕ ਖ਼ਾਸ ਝਲਕ ਦਿਖਾਈ ਹੈ, ਜਿਸ ਨੂੰ ਉਨ੍ਹਾਂ ਨੇ ਪੰਜ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਪਿਆਰ ਨਾਲ ਸੰਭਾਲ ਕੇ ਰੱਖਿਆ ਹੈ। ਇਸ ਘਰ ਵਿੱਚ ਉਨ੍ਹਾਂ ਦੇ ਡਾਂਸ ਰਿਹਰਸਲ ਤੋਂ ਲੈ ਕੇ, ਐਕਸਕਲੂਸਿਵ ਵੈਜੀਟੇਰੀਅਨ ਰਸੋਈ ਅਤੇ ਮਰਹੂਮ ਅਦਾਕਾਰ ਧਰਮਿੰਦਰ ਦੀਆਂ ਯਾਦਾਂ ਤੱਕ ਦੀ ਝਲਕ ਦਿਖਾਈ ਦਿੰਦੀ ਹੈ।

ਹੇਮਾ ਮਾਲਿਨੀ ਦਾ ਇਹ ਘਰ 54 ਸਾਲ ਪੁਰਾਣਾ ਹੈ, ਜਿਸ ਦੀ ਸੈਰ ਉਨ੍ਹਾਂ ਦੀ ਬੇਟੀ ਈਸ਼ਾ ਦਿਓਲ ਨੇ ਹਾਲ ਹੀ ਵਿੱਚ ਕਰਵਾਈ। 'ਕਰਲੀ ਟੇਲਜ਼' ਦੇ ਨਾਲ ਘਰ ਦੇ ਟੂਰ ਵਾਲੇ ਇੱਕ ਹਾਲੀਆ ਵੀਡੀਓ ਵਿੱਚ, ਉਨ੍ਹਾਂ ਦੀ ਧੀ ਈਸ਼ਾ ਦਿਓਲ ਨੇ ਘਰ ਦੇ ਸ਼ਾਨਦਾਰ ਅਤੇ ਕ੍ਰਿਏਟਿਵ ਇੰਟੀਰੀਅਰ ਨੂੰ ਦਿਖਾਇਆ ਅਤੇ ਦੱਸਿਆ ਕਿ ਇਹ ਸਭ ਉਨ੍ਹਾਂ ਦੇ ਪਿਤਾ, ਸੁਪਰਸਟਾਰ ਧਰਮਿੰਦਰ ਦੀ ਸ਼ਖ਼ਸੀਅਤ ਦੀ ਝਲਕ ਕਿਵੇਂ ਦਿਖਾਉਂਦਾ ਹੈ।

ਕਲਾਤਮਕ, ਸੱਭਿਆਚਾਰ ਅਤੇ ਅਧਿਆਤਮਿਕਤਾ ਨਾਲ ਸਜਿਆ ਘਰ

ਈਸ਼ਾ ਦਿਓਲ ਨੇ ਦੱਸਿਆ ਕਿ ਉਨ੍ਹਾਂ ਦਾ ਪਰਿਵਾਰ ਇਸ ਘਰ ਵਿੱਚ 54 ਸਾਲਾਂ ਤੋਂ ਰਹਿ ਰਿਹਾ ਹੈ। ਉਨ੍ਹਾਂ ਨੇ ਇਸ ਨੂੰ ਕਲਾ, ਸੱਭਿਆਚਾਰ ਅਤੇ ਅਧਿਆਤਮਿਕਤਾ ਨਾਲ ਡੂੰਘਾਈ ਨਾਲ ਜੁੜਿਆ ਹੋਇਆ ਘਰ ਦੱਸਿਆ। ਬੇਜ ਅਤੇ ਸੁਨਹਿਰੀ ਰੰਗਾਂ ਨਾਲ ਸਜਾਏ ਗਏ ਇਸ ਘਰ ਵਿੱਚ ਰਹਿਣ ਲਈ ਕਾਫ਼ੀ ਖੁੱਲ੍ਹੀ ਜਗ੍ਹਾ, ਸ਼ਾਨਦਾਰ ਫਰਨੀਚਰ ਅਤੇ ਚੋਣਵੀਆਂ ਕਲਾਕ੍ਰਿਤੀਆਂ ਹਨ, ਜੋ ਹੇਮਾ ਮਾਲਿਨੀ ਦੇ ਭਾਰਤੀ ਕਲਾਸੀਕਲ ਨਾਚ ਤੇ ਕਲਾ ਪ੍ਰਤੀ ਪਿਆਰ ਨੂੰ ਦਰਸਾਉਂਦੀਆਂ ਹਨ।

ਘਰ ਦਾ ਐਂਟਰੀ ਗੇਟ ਹੀ ਤੁਹਾਨੂੰ ਇੱਕ ਸ਼ਾਨਦਾਰ ਅਨੁਭਵ ਦਿੰਦਾ ਹੈ। ਇੱਥੇ ਲੱਗੀਆਂ ਮੂਰਤੀਆਂ ਅਤੇ ਕਲਾਕ੍ਰਿਤੀਆਂ ਕਲਾਸੀਕਲ ਡਾਂਸ ਦੀਆਂ ਮੁਦਰਾਵਾਂ ਨੂੰ ਦਰਸਾਉਂਦੀਆਂ ਹਨ, ਜੋ ਨਾਚ ਨਾਲ ਪਰਿਵਾਰ ਦੇ ਉਮਰ ਭਰ ਦੇ ਜੁੜਾਵ ਦਾ ਪ੍ਰਤੀਕ ਹਨ।

ਘਰ ਦੀਆਂ ਸਭ ਤੋਂ ਖ਼ਾਸ ਜਗ੍ਹਾਵਾਂ ਵਿੱਚੋਂ ਇੱਕ ਹੈ ਵੱਡਾ ਸਾਰਾ ਲਿਵਿੰਗ-ਕਮ-ਡਾਂਸ ਰੂਮ। ਈਸ਼ਾ ਦੇ ਅਨੁਸਾਰ, ਪਰਿਵਾਰ ਇਸ ਜਗ੍ਹਾ 'ਤੇ ਪੂਜਾ, ਹਵਨ ਅਤੇ ਮੈਡੀਟੇਸ਼ਨ ਸੈਸ਼ਨ ਕਰਦਾ ਹੈ, ਜਿਸ ਨਾਲ ਇਹ ਜਗ੍ਹਾ ਸੱਭਿਆਚਾਰਕ ਅਤੇ ਅਧਿਆਤਮਿਕ ਕੇਂਦਰ ਬਣ ਜਾਂਦੀ ਹੈ। ਉੱਥੇ ਹੀ ਪ੍ਰਸ਼ੰਸਕਾਂ ਵੱਲੋਂ ਦਿੱਤੀਆਂ ਗਈਆਂ ਤਸਵੀਰਾਂ ਨੂੰ ਵੀ ਘਰ ਵਿੱਚ ਖ਼ਾਸ ਜਗ੍ਹਾ ਦਿੱਤੀ ਗਈ ਹੈ।

ਇਸ ਕਮਰੇ ਵਿੱਚ ਹੇਮਾ ਮਾਲਿਨੀ ਦੇ ਡਾਂਸ ਪਰਫਾਰਮੈਂਸ ਦੀਆਂ ਤਸਵੀਰਾਂ, ਕਲਾਸੀਕਲ ਡਾਂਸ 'ਤੇ ਕਿਤਾਬਾਂ ਅਤੇ ਧਰਮਿੰਦਰ ਲਈ ਇੱਕ ਖ਼ਾਸ ਮੈਮੋਰੀਅਲ ਵੀ ਹੈ। ਦੱਸਿਆ ਜਾਂਦਾ ਹੈ ਕਿ ਹੇਮਾ ਮਾਲਿਨੀ ਲਗਾਤਾਰ ਪ੍ਰੈਕਟਿਸ ਕਰਦੀ ਰਹਿੰਦੀ ਹੈ ਅਤੇ ਕਮਰੇ ਦੀ ਲੱਕੜ ਦੀ ਫਲੋਰਿੰਗ ਦੀ ਵਜ੍ਹਾ ਕਰਕੇ ਇੱਕ ਵਾਰ ਵਿੱਚ ਲਗਭਗ 30 ਡਾਂਸਰ ਉੱਥੇ ਰਿਹਰਸਲ ਕਰ ਸਕਦੇ ਹਨ।

ਵੱਖ-ਵੱਖ ਮੰਜ਼ਿਲਾਂ 'ਤੇ ਰਹਿੰਦੇ ਹਨ ਪਰਿਵਾਰ ਦੇ ਮੈਂਬਰ

ਇਹ ਪਰਿਵਾਰ ਪੰਜ ਦਹਾਕਿਆਂ ਤੋਂ ਵੱਧ ਸਮੇਂ ਤੋਂ ਇਸ ਪ੍ਰਾਪਰਟੀ ਵਿੱਚ ਰਹਿ ਰਿਹਾ ਹੈ, ਪਰ 2005 ਵਿੱਚ ਮੁੰਬਈ ਵਿੱਚ ਆਏ ਭਿਆਨਕ ਹੜ੍ਹ ਤੋਂ ਬਾਅਦ ਇਸ ਅਸਲ ਬੰਗਲੇ ਵਿੱਚ ਵੱਡਾ ਬਦਲਾਅ ਕੀਤਾ ਗਿਆ। ਇਸ ਘਰ ਨੂੰ ਤਿੰਨ-ਚਾਰ ਮੰਜ਼ਿਲਾ ਇਮਾਰਤ ਵਜੋਂ ਦੁਬਾਰਾ ਬਣਾਇਆ ਗਿਆ, ਜਿਸ ਵਿੱਚ ਪਰਿਵਾਰ ਦੇ ਵੱਖ-ਵੱਖ ਮੈਂਬਰ ਹੁਣ ਵੱਖ-ਵੱਖ ਮੰਜ਼ਿਲਾਂ 'ਤੇ ਰਹਿੰਦੇ ਹਨ।

ਹੇਮਾ ਮਾਲਿਨੀ ਦੀ ਖ਼ਾਸ ਰਸੋਈ

ਇਸ ਟੂਰ ਦੌਰਾਨ ਸਭ ਤੋਂ ਦਿਲਚਸਪ ਗੱਲਾਂ ਵਿੱਚੋਂ ਇੱਕ ਘਰ ਦੀ ਰਸੋਈ ਸੀ। ਵੈਸੇ ਤਾਂ ਘਰ ਵਿੱਚ ਕਈ ਰਸੋਈਆਂ ਹਨ ਪਰ ਹੇਮਾ ਮਾਲਿਨੀ ਦੀ ਇੱਕ ਖ਼ਾਸ ਰਸੋਈ ਹੈ ਜਿੱਥੇ ਸਿਰਫ਼ ਸ਼ਾਕਾਹਾਰੀ ਖਾਣਾ ਹੀ ਬਣਦਾ ਹੈ।

ਸ਼੍ਰੀ ਸ਼੍ਰੀ ਰਵੀ ਸ਼ੰਕਰ ਨੇ ਦਿੱਤਾ ਘਰ ਨੂੰ ਨਾਮ

ਇਸ ਘਰ ਵਿੱਚ ਇੱਕ ਦਫ਼ਤਰ ਵੀ ਹੈ, ਜੋ ਪੇਂਟਿੰਗਜ਼, ਪਰਿਵਾਰਕ ਤਸਵੀਰਾਂ ਅਤੇ ਸਾਲਾਂ ਦੌਰਾਨ ਫੈਨਜ਼ ਵੱਲੋਂ ਮਿਲੇ ਤੋਹਫ਼ਿਆਂ ਨਾਲ ਸਜਿਆ ਹੋਇਆ ਹੈ। ਈਸ਼ਾ ਨੇ ਦੱਸਿਆ ਕਿ ਸ਼ੁਰੂ ਵਿੱਚ ਇਸ ਘਰ ਦਾ ਕੋਈ ਨਾਮ ਨਹੀਂ ਸੀ, ਪਰ ਅਧਿਆਤਮਿਕ ਗੁਰੂ ਸ਼੍ਰੀ ਸ਼੍ਰੀ ਰਵੀ ਸ਼ੰਕਰ ਨੇ ਇਸ ਨੂੰ 'ਅਦਵਿਤੀਅ' ਨਾਮ ਦੇਣ ਦਾ ਸੁਝਾਅ ਦਿੱਤਾ; ਸੰਸਕ੍ਰਿਤ ਵਿੱਚ 'ਅਦਵਿਤੀਅ' ਦਾ ਮਤਲਬ ਹੁੰਦਾ ਹੈ 'ਅਨੋਖਾ' ਜਾਂ 'ਜਿਸ ਵਰਗਾ ਕੋਈ ਹੋਰ ਨਾ ਹੋਵੇ'।