ਸਮ੍ਰਿਤੀ ਮੰਧਾਨਾ ਤੋਂ ਬਾਅਦ ਪਲਾਸ਼ ਮੁਛੱਲ ਨੇ ਮੁੜ ਕੀਤੀ ਚੀਟਿੰਗ? ਇਲਜ਼ਾਮਾਂ 'ਤੇ ਦਿੱਤੀ ਸਫ਼ਾਈ

ਮਨੋਰੰਜਨ ਡੈਸਕ, ਨਵੀਂ ਦਿੱਲੀ: ਮਿਊਜ਼ਿਕ ਕੰਪੋਜ਼ਰ ਅਤੇ ਫਿਲਮ ਮੇਕਰ ਪਲਾਸ਼ ਮੁਛੱਲ ਇੱਕ ਵਾਰ ਫਿਰ ਵਿਵਾਦਾਂ ਵਿੱਚ ਘਿਰ ਗਏ ਹਨ। ਪਿਛਲੇ ਸਾਲ ਭਾਰਤੀ ਕ੍ਰਿਕਟਰ ਸਮ੍ਰਿਤੀ ਮੰਧਾਨਾ ਨਾਲ ਉਨ੍ਹਾਂ ਦਾ ਵਿਆਹ ਰੱਦ ਹੋਣ ਤੋਂ ਬਾਅਦ ਉਹ ਸੁਰਖੀਆਂ ਵਿੱਚ ਆਏ ਸਨ। ਇਸ ਤੋਂ ਤੁਰੰਤ ਬਾਅਦ ਉਨ੍ਹਾਂ 'ਤੇ ਧੋਖਾਧੜੀ ਦੇ ਕਈ ਇਲਜ਼ਾਮ ਲੱਗੇ। ਹੁਣ ਨਵੇਂ ਦਾਅਵੇ ਸਾਹਮਣੇ ਆਏ ਹਨ ਅਤੇ ਇਸ ਵਾਰ ਮਾਮਲਾ ਪੁਲਿਸ ਤੱਕ ਪਹੁੰਚ ਗਿਆ ਹੈ।

ਕੀ ਹੈ ਪੂਰਾ ਮਾਮਲਾ?

ਅਦਾਕਾਰ ਅਤੇ ਨਿਰਮਾਤਾ ਵਿਗਿਆਨ ਮਾਨੇ ਨੇ ਮਹਾਰਾਸ਼ਟਰ ਦੇ ਸਾਂਗਲੀ ਜ਼ਿਲ੍ਹੇ ਵਿੱਚ ਪੁਲਿਸ ਤੱਕ ਪਹੁੰਚ ਕੀਤੀ ਅਤੇ ਪਲਾਸ਼ 'ਤੇ 'ਨਜ਼ਰੀਆ' ਨਾਮ ਦੀ ਫਿਲਮ ਦੇ ਸਿਲਸਿਲੇ ਵਿੱਚ ਧੋਖਾ ਦੇਣ ਦਾ ਇਲਜ਼ਾਮ ਲਗਾਇਆ। ਦੱਸਿਆ ਜਾ ਰਿਹਾ ਹੈ ਕਿ ਵਿਗਿਆਨ ਨੇ ਐਸ.ਪੀ. (SP) ਨੂੰ ਇੱਕ ਅਰਜ਼ੀ ਦੇ ਕੇ ਮਿਊਜ਼ਿਕ ਕੰਪੋਜ਼ਰ ਦੇ ਖਿਲਾਫ਼ ਐਫ.ਆਈ.ਆਰ (FIR) ਦਰਜ ਕਰਨ ਦੀ ਮੰਗ ਕੀਤੀ ਸੀ।

ਪਲਾਸ਼ 'ਤੇ ਲੱਗੇ ਧੋਖਾਧੜੀ ਦੇ ਇਲਜ਼ਾਮ

ਨਿਊਜ਼ ਏਜੰਸੀ (PTI) ਮੁਤਾਬਕ, ਪਲਾਸ਼ ਅਤੇ ਵਿਗਿਆਨ 5 ਦਸੰਬਰ 2023 ਨੂੰ ਸਾਂਗਲੀ ਵਿੱਚ ਮਿਲੇ ਸਨ, ਜਿੱਥੇ ਵਿਗਿਆਨ ਨੇ ਫਿਲਮ ਨਿਰਮਾਣ ਵਿੱਚ ਨਿਵੇਸ਼ (Investment) ਕਰਨ ਵਿੱਚ ਦਿਲਚਸਪੀ ਦਿਖਾਈ ਸੀ। ਇਲਜ਼ਾਮ ਹੈ ਕਿ ਪਲਾਸ਼ ਨੇ ਉਨ੍ਹਾਂ ਨੂੰ ਦੱਸਿਆ ਕਿ ਉਹ 'ਨਜ਼ਰੀਆ' ਵਿੱਚ ਨਿਰਮਾਤਾ ਵਜੋਂ ਜੁੜ ਸਕਦੇ ਹਨ ਅਤੇ ਭਰੋਸਾ ਦਿੱਤਾ ਕਿ OTT ਪਲੇਟਫਾਰਮ 'ਤੇ ਫਿਲਮ ਰਿਲੀਜ਼ ਹੋਣ ਤੋਂ ਬਾਅਦ ₹25 ਲੱਖ ਦੇ ਨਿਵੇਸ਼ 'ਤੇ ₹12 ਲੱਖ ਤੱਕ ਦਾ ਮੁਨਾਫ਼ਾ ਹੋਵੇਗਾ। ਵਿਗਿਆਨ ਨੂੰ ਕਥਿਤ ਤੌਰ 'ਤੇ ਇਸ ਪ੍ਰੋਜੈਕਟ ਵਿੱਚ ਇੱਕ ਰੋਲ ਵੀ ਪੇਸ਼ ਕੀਤਾ ਗਿਆ ਸੀ।

ਸ਼ਿਕਾਇਤ ਵਿੱਚ ਅੱਗੇ ਕਿਹਾ ਗਿਆ ਹੈ ਕਿ ਮਾਰਚ 2025 ਤੱਕ ਵਿਗਿਆਨ ਨੇ ਪਲਾਸ਼ ਨੂੰ ਕੁੱਲ ₹40 ਲੱਖ ਟ੍ਰਾਂਸਫਰ ਕੀਤੇ, ਪਰ ਪ੍ਰੋਜੈਕਟ ਅਧੂਰਾ ਰਹਿ ਗਿਆ। ਜਦੋਂ ਉਸਨੇ ਰਿਫੰਡ ਮੰਗਿਆ, ਤਾਂ ਉਸਨੂੰ ਕੋਈ ਜਵਾਬ ਨਹੀਂ ਮਿਲਿਆ। ਅਧਿਕਾਰੀਆਂ ਨੇ ਪੁਸ਼ਟੀ ਕੀਤੀ ਹੈ ਕਿ ਫਿਲਹਾਲ ਸ਼ੁਰੂਆਤੀ ਜਾਂਚ ਚੱਲ ਰਹੀ ਹੈ ਅਤੇ ਅਜੇ ਤੱਕ FIR ਦਰਜ ਨਹੀਂ ਕੀਤੀ ਗਈ।

ਪਲਾਸ਼ ਨੇ ਇਲਜ਼ਾਮਾਂ 'ਤੇ ਤੋੜੀ ਚੁੱਪ

ਸੋਸ਼ਲ ਮੀਡੀਆ 'ਤੇ ਖ਼ਬਰ ਫੈਲਣ ਤੋਂ ਬਾਅਦ ਪਲਾਸ਼ ਨੇ ਇੰਸਟਾਗ੍ਰਾਮ 'ਤੇ ਜਵਾਬ ਦਿੱਤਾ। ਉਨ੍ਹਾਂ ਨੇ ਲਿਖਿਆ, "ਵਿਗਿਆਨ ਮਾਨੇ ਨੇ ਮੇਰੇ 'ਤੇ ਜੋ ਇਲਜ਼ਾਮ ਲਗਾਏ ਹਨ, ਉਹ ਪੂਰੀ ਤਰ੍ਹਾਂ ਝੂਠੇ ਅਤੇ ਬੇਬੁਨਿਆਦ ਹਨ। ਇਹ ਸਭ ਮੇਰੀ ਸਾਖ (Reputation) ਨੂੰ ਖ਼ਰਾਬ ਕਰਨ ਲਈ ਕੀਤਾ ਜਾ ਰਿਹਾ ਹੈ। ਮੈਂ ਆਪਣੇ ਵਕੀਲ ਸ਼੍ਰੇਆਂਸ਼ ਮਿਠਾਰੇ ਰਾਹੀਂ ਇਸ ਦਾ ਕਾਨੂੰਨੀ ਤੌਰ 'ਤੇ ਸਾਹਮਣਾ ਕਰਾਂਗਾ।"

ਜ਼ਿਕਰਯੋਗ ਹੈ ਕਿ ਪਿਛਲੇ ਸਾਲ ਪਲਾਸ਼ ਉਦੋਂ ਚਰਚਾ ਵਿੱਚ ਆਏ ਸਨ ਜਦੋਂ ਸਮ੍ਰਿਤੀ ਮੰਧਾਨਾ ਦੇ ਪਿਤਾ ਦੇ ਬਿਮਾਰ ਹੋਣ ਕਾਰਨ ਵਿਆਹ ਦੀਆਂ ਯੋਜਨਾਵਾਂ ਟਾਲ ਦਿੱਤੀਆਂ ਗਈਆਂ ਸਨ ਅਤੇ ਬਾਅਦ ਵਿੱਚ ਕ੍ਰਿਕਟਰ ਨੇ ਪੁਸ਼ਟੀ ਕੀਤੀ ਸੀ ਕਿ ਵਿਆਹ ਕੈਂਸਲ ਹੋ ਗਿਆ ਹੈ।