ਐਸ਼ਲੇ ਬਾਰਟੀ ਦਾ ਸੰਨਿਆਸ

ਆਸਟ੍ਰੇਲੀਆ ਦੀ ਸਟਾਰ ਖਿਡਾਰਨ ਐਸ਼ਲੇ ਬਾਰਟੀ ਨੇ ਤੀਜਾ ਗਰੈਂਡ ਸਲੈਮ ਜਿੱਤਣ ਦੇ ਦੋ ਮਹੀਨਿਆਂ ਦੇ ਅੰਦਰ 25 ਸਾਲ ਦੀ ਉਮਰ ਵਿਚ ਟੈਨਿਸ ਤੋਂ ਸੰਨਿਆਸ ਲੈ ਲਿਆ। ਉਸ ਨੇ ਆਲਮੀ ਦਰਜਾਬੰਦੀ ’ਚ ਪਹਿਲੇ ਸਥਾਨ ’ਤੇ ਰਹਿੰਦਿਆਂ ਟੈਨਿਸ ਨੂੰ ਅਲਵਿਦਾ ਕਹਿਣ ਦਾ ਫ਼ੈਸਲਾ ਲੈ ਕੇ ਖੇਡ ਪ੍ਰੇਮੀਆਂ ਨੂੰ ਹੈਰਾਨੀ ’ਚ ਪਾ ਦਿੱਤਾ। ਬਾਰਟੀ ਕੁੱਲ 121 ਸਪਤਾਹ ਵਿਸ਼ਵ ’ਚ ਨੰਬਰ ਇਕ ਰੈਂਕਿੰਗ ’ਤੇ ਰਹੀ ਜਿਨ੍ਹਾਂ ਵਿਚ ਪਿਛਲੇ 114 ਸਪਤਾਹ ਵੀ ਸ਼ਾਮਲ ਹਨ। ਬਾਰਟੀ ਨੇ ਸਿੰਗਲਜ਼ ’ਚ 15 ਟੂਰ ਪੱਧਰ ਦੇ ਅਤੇ 12 ਡਬਲ ਪੱਧਰ ਦੇ ਖਿਤਾਬ ਜਿੱਤੇ ਸਨ। ਉਸ ਨੇ ਪਿਛਲੇ 26 ਮੈਚਾਂ ’ਚੋਂ 25 ਜਿੱਤੇ ਸਨ। ਬਾਰਟੀ ਨੇ ਤਿੰਨ ਵੱਖ-ਵੱਖ ਕੋਰਟਾਂ ’ਤੇ ਗਰੈਂਡ ਸਲੈਮ ਟੂਰਨਾਮੈਂਟ ਜਿੱਤੇ। ਸੰਨ 2019 ’ਚ ਕਲੇਅ ਕੋਰਟ ’ਤੇ ਫਰੈਂਚ ਓਪਨ, ਪਿਛਲੇ ਸਾਲ ਗ੍ਰਾਸ ਕੋਰਟ ’ਤੇ ਵਿੰਬਲਡਨ ਤੇ ਇਸ ਸਾਲ ਹਾਰਡ ਕੋਰਟ ’ਤੇ ਆਸਟ੍ਰੇਲੀਅਨ ਓਪਨ ਦਾ ਖਿਤਾਬ ਆਪਣੇ ਨਾਮ ਕੀਤਾ ਸੀ। ਬਾਰਟੀ ਨੰਬਰ ਇਕ ਰੈਂਕਿੰਗ ’ਤੇ ਰਹਿੰਦਿਆਂ ਸੰਨਿਆਸ ਲੈਣ ਵਾਲੀ ਦੂਜੀ ਖਿਡਾਰਨ ਬਣ ਗਈ। ਇਸ ਤੋਂ ਪਹਿਲਾਂ ਜਸਟਿਨ ਹੈਨਿਨ ਨੇ ਮਈ 2008 ਵਿਚ ਨੰਬਰ ਇਕ ’ਤੇ ਰਹਿੰਦਿਆਂ ਟੈਨਿਸ ਨੂੰ ਅਲਵਿਦਾ ਕਿਹਾ ਸੀ। ਉਸ ਵਕਤ ਉਸ ਦੀ ਉਮਰ ਵੀ 25 ਸਾਲ ਸੀ। ਬਾਰਟੀ ਨੇ ਆਪਣੇ ਇੰਸਟਾਗ੍ਰਾਮ ’ਤੇ 6 ਮਿੰਟ ਦਾ ਵੀਡੀਓ ਪਾ ਕੇ ਸੰਨਿਆਸ ਦਾ ਐਲਾਨ ਕੀਤਾ। ਉਹ ਉਸ ਵਕਤ ਬਹੁਤ ਭਾਵੁਕ ਸੀ ਅਤੇ ਉਸ ਦੀ ਆਵਾਜ਼ ਲੜਖੜਾ ਰਹੀ ਸੀ। ਉਸ ਨੇ ਕਿਹਾ, ‘ਮੈਂ ਬਹੁਤ ਖ਼ੁਸ਼ ਹਾਂ। ਮੈਂ ਇਸ ਸਮੇਂ ਸਿਰਫ਼ ਆਪਣੇ ਦਿਲ ਦੀ ਸੁਣ ਰਹੀ ਹਾਂ ਅਤੇ ਮੈਂ ਜਾਣਦੀ ਹਾਂ ਕਿ ਇਹ ਸਹੀ ਫ਼ੈਸਲਾ ਹੈ’। ਬਾਰਟੀ ਨੇ ਆਪਣੀ ਸਾਬਕਾ ਜੋੜੀਦਾਰ ਕੇਸੀ ਡੇਲਾਕਵਾ ਨਾਲ ਇਕ ਗ਼ੈਰ-ਰਸਮੀ ਗੱਲਬਾਤ ਦੌਰਾਨ ਕਿਹਾ ਸੀ, ‘ਪਹਿਲੀ ਵਾਰ ਹੈ ਜਦੋਂ ਮੈਂ ਅਸਲੀਅਤ ’ਚ ਜਨਤਕ ਤੌਰ ’ਤੇ ਇਹ ਗੱਲ ਆਖੀ ਹੈ ਕਿ ਮੇਰੇ ਅੰਦਰ ਉਹ ਸਰੀਰਕ ਤਾਕਤ, ਉਹ ਇੱਛਾ ਸ਼ਕਤੀ ਅਤੇ ਉਹ ਸਾਰੀਆਂ ਗੱਲਾਂ ਨਹੀਂ ਹਨ ਜੋ ਸਿਖਰਲੇ ਪੱਧਰ ’ਤੇ ਖ਼ੁਦ ਨੂੰ ਚੁਣੌਤੀ ਦੇਣ ਲਈ ਲੋੜੀਂਦੀਆਂ ਹੁੰਦੀਆਂ ਹਨ’। ਬਾਰਟੀ ਨੇ ਕਿਹਾ ਕਿ ਹੁਣ ਹੋਰ ਸੁਪਨਿਆਂ ਨੂੰ ਪੂਰਾ ਕਰਨ ਦਾ ਸਮਾਂ ਆ ਗਿਆ ਹੈ’। ਇਸ ਟੈਨਿਸ ਖਿਡਾਰਨ ਦੀ ਪਿਛਲੇ ਸਾਲ ਨਵੰਬਰ ਵਿਚ ਗੋਲਫਰ ਗੈਰੀ ਕਿਸਿਕ ਨਾਲ ਮੰਗਣੀ ਹੋਈ ਸੀ। ਇਹ ਪਹਿਲਾ ਮੌਕਾ ਨਹੀਂ ਜਦੋਂ ਬਾਰਟੀ ਨੇ ਟੈਨਿਸ ਨੂੰ ਅਲਵਿਦਾ ਆਖਿਆ ਹੈ। ਉਹ 2011 ਵਿਚ 15 ਸਾਲ ਦੀ ਉਮਰ ਵਿਚ ਵਿੰਬਲਡਨ ਜੂਨੀਅਰ ਚੈਂਪੀਅਨ ਬਣੀ ਸੀ ਪਰ 2014 ਵਿਚ ਥਕਾਵਟ, ਦਬਾਅ ਤੇ ਲੰਬੀ ਦੂਰੀ ਦੇ ਸਫ਼ਰਾਂ ਕਾਰਨ ਦੋ ਸਾਲ ਤਕ ਟੈਨਿਸ ਤੋਂ ਦੂਰ ਰਹੀ ਸੀ। ਉਹ ਇਸ ਦੌਰਾਨ ਆਸਟ੍ਰੇਲੀਆ ’ਚ ਕਿ੍ਰਕਟ ਖੇਡਣ ਲੱਗ ਪਈ ਸੀ ਪਰ ਮਗਰੋਂ ਉਹ ਫਿਰ ਟੈਨਿਸ ਦੇ ਮੈਦਾਨ ’ਤੇ ਉਤਰ ਆਈ ਸੀ। ਬਾਰਟੀ ਨੇ ਆਸਟ੍ਰੇਲੀਆ ਓਪਨ ਜਿੱਤਣ ਤੋਂ ਬਾਅਦ ਕੋਈ ਮੈਚ ਨਹੀਂ ਖੇਡਿਆ। ਉਸ ਨੇ ਆਪਣੇ ਕਰੀਅਰ ਦੌਰਾਨ ਪ੍ਰਾਈਜ਼ ਮਨੀ ਵਜੋਂ 180 ਕਰੋੜ ਰੁਪਏ ਜਿੱਤੇ ਸਨ। ਉਸ ਨੇ ਚਾਰ ਸਾਲ ਦੀ ਉਮਰ ਤੋਂ ਟੈਨਿਸ ਖੇਡਣਾ ਸ਼ੁਰੂ ਕਰ ਦਿੱਤਾ ਸੀ।

-ਮੁਖ਼ਤਾਰ ਗਿੱਲ। ਮੋਬਾਈਲ : 98140-82217