ਹੋਰਮੁਜ਼ ਤੋਂ ਭਾਰਤ ਲਈ ਆਈ ਗੁੱਡ ਨਿਊਜ਼, US-ਈਰਾਨ ਡੀਲ ਹੁੰਦੇ ਹੀ ਪਹਿਲਾ LNG ਟੈਂਕਰ 'ਦਿਸ਼ਾ' ਗੁਜਰਾਤ ਪੁੱਜਾ

ਡਿਜੀਟਲ ਡੈਸਕ, ਨਵੀਂ ਦਿੱਲੀ: ਅਮਰੀਕਾ ਅਤੇ ਈਰਾਨ ਵਿਚਾਲੇ ਹੋਏ ਸ਼ਾਂਤੀ ਸਮਝੌਤੇ ਤੋਂ ਤੁਰੰਤ ਬਾਅਦ ਭਾਰਤ ਦੇ ਊਰਜਾ ਖੇਤਰ ਲਈ ਇੱਕ ਬਹੁਤ ਵੱਡੀ ਗੁੱਡ ਨਿਊਜ਼ ਸਾਹਮਣੇ ਆਈ ਹੈ। ਵੀਰਵਾਰ ਨੂੰ LNG ਟੈਂਕਰ 'ਦਿਸ਼ਾ' ਸਟ੍ਰੇਟ ਆਫ਼ ਹੋਰਮੁਜ਼ ਨੂੰ ਸਫ਼ਲਤਾਪੂਰਵਕ ਪਾਰ ਕਰ ਗਿਆ, ਜਿਸ ਤੋਂ ਬਾਅਦ ਅੱਜ ਯਾਨੀ ਸ਼ੁੱਕਰਵਾਰ ਨੂੰ ਗੁਜਰਾਤ ਵਿੱਚ ਭਰੂਚ ਦੇ ਦਹੇਜ ਬੰਦਰਗਾਹ 'ਤੇ ਸੁਰੱਖਿਅਤ ਪਹੁੰਚ ਗਿਆ ਹੈ।

ਈਰਾਨ-ਅਮਰੀਕਾ ਸ਼ਾਂਤੀ ਸਮਝੌਤੇ ਤੋਂ ਬਾਅਦ ਭਾਰਤ ਆਉਣ ਵਾਲਾ ਇਹ ਪਹਿਲਾ ਲਿਕਵੀਫਾਈਡ ਨੈਚੁਰਲ ਗੈਸ (LNG) ਜਹਾਜ਼ ਹੈ, ਜੋ ਸਟ੍ਰੇਟ ਆਫ਼ ਹੋਰਮੁਜ਼ ਪਾਰ ਕਰਕੇ ਭਾਰਤ ਪਹੁੰਚਿਆ ਹੈ। ਹਜ਼ਾਰਾਂ ਟਨ ਐੱਲਐੱਨਜੀ ਭਾਰਤ ਆਉਣ ਨਾਲ ਪਿਛਲੇ ਸਾਢੇ ਤਿੰਨ ਮਹੀਨਿਆਂ ਤੋਂ ਸਮੁੰਦਰ ਵਿੱਚ ਜਹਾਜ਼ਾਂ ਦੇ ਫਸੇ ਹੋਣ ਕਾਰਨ ਪੈਦਾ ਹੋਇਆ ਊਰਜਾ ਸੰਕਟ ਹੁਣ ਖ਼ਤਮ ਹੋ ਜਾਵੇਗਾ।

ਦਹੇਜ ਪੋਰਟ 'ਤੇ ਐੱਲਐੱਨਜੀ ਨਾਲ ਲੱਦੇ ਸ਼ਿਪ ਦਾ ਸੁਰੱਖਿਅਤ ਪਹੁੰਚਣਾ ਭਾਰਤ ਲਈ ਊਰਜਾ ਦੇ ਖੇਤਰ ਵਿੱਚ ਇੱਕ ਵੱਡੀ ਉਪਲਬਧੀ ਵਜੋਂ ਦੇਖਿਆ ਜਾ ਰਿਹਾ ਹੈ। LNG ਟੈਂਕਰ 'ਦਿਸ਼ਾ' 62,370 ਮੀਟ੍ਰਿਕ ਟਨ ਲਿਕਵੀਫਾਈਡ ਨੈਚੁਰਲ ਗੈਸ (LNG) ਲੈ ਕੇ ਆਇਆ ਹੈ। ਇਸ ਨਾਲ ਭਾਰਤੀ ਊਰਜਾ ਬਾਜ਼ਾਰ ਨੂੰ ਵੱਡੀ ਰਾਹਤ ਮਿਲੇਗੀ।

2 ਮਾਰਚ ਤੋਂ ਹੀ ਫਸਿਆ ਹੋਇਆ ਸੀ ਇਹ ਜਹਾਜ਼

ਦੱਸ ਦੇਈਏ ਕਿ 2 ਮਾਰਚ ਤੋਂ ਕਤਰ ਦੇ ਰਾਸ ਲਾਫਾਨ ਪੋਰਟ 'ਤੇ 62,370 ਮੀਟ੍ਰਿਕ ਟਨ LNG ਨਾਲ ਲੱਦਿਆ ਇਹ ਸ਼ਿਪ ਫਸਿਆ ਹੋਇਆ ਸੀ। ਹੋਰਮੁਜ਼ ਵਿੱਚ ਲੱਗੀ ਈਰਾਨੀ ਪਾਬੰਦੀ ਮਗਰੋਂ ਹਾਲਾਤ ਇੰਨੇ ਖ਼ਰਾਬ ਹੋ ਗਏ ਸਨ ਕਿ ਇਹ ਜਹਾਜ਼ ਕਦੋਂ ਭਾਰਤ ਪਹੁੰਚੇਗਾ, ਇਸ ਦਾ ਪਤਾ ਨਹੀਂ ਸੀ। ਪਰ ਈਰਾਨ-ਅਮਰੀਕਾ ਵਿਚਾਲੇ ਹੋਈ ਪੀਸ ਡੀਲ ਤੋਂ ਬਾਅਦ ਇਹ ਜਹਾਜ਼ 15 ਜੂਨ ਨੂੰ ਹੋਰਮੁਜ਼ ਦੇ ਰਸਤੇ ਅੱਗੇ ਵਧਿਆ ਅਤੇ ਅੱਜ ਸੁਰੱਖਿਅਤ ਭਾਰਤ ਪਹੁੰਚ ਗਿਆ।

ਜ਼ਿਕਰਯੋਗ ਹੈ ਕਿ ਅਮਰੀਕਾ-ਇਜ਼ਰਾਈਲ ਅਤੇ ਈਰਾਨ ਵਿਚਾਲੇ ਜਾਰੀ ਤਣਾਅ ਕਾਰਨ ਇਹ ਜਹਾਜ਼ ਕਰੀਬ ਸਾਢੇ ਤਿੰਨ ਮਹੀਨੇ ਤੱਕ ਫਸਿਆ ਰਿਹਾ। ਅਮਰੀਕਾ-ਈਰਾਨ ਵਿਚਾਲੇ ਹੋਏ ਸ਼ਾਂਤੀ ਸਮਝੌਤੇ ਤੋਂ ਬਾਅਦ ਸਟ੍ਰੇਟ ਆਫ਼ ਹੋਰਮੁਜ਼ ਤੋਂ ਲੰਘਣ ਵਾਲਾ ਇਹ ਪਹਿਲਾ LNG ਜਹਾਜ਼ ਹੈ।