- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
'ਸਿਰਫ਼ 10 ਮਿੰਟਾਂ 'ਚ ਈਰਾਨ ਨੂੰ ਕਰ ਦਿਆਂਗੇ ਤਬਾਹ', ਟਰੰਪ ਨੇ ਦਿੱਤੀ ਧਮਕੀ; ਮੋਜਤਬਾ ਖ਼ਾਮੇਨੇਈ ਨੇ ਬਦਲੀ ਟਾਰਗੇਟ ਲਿਸਟ
ਟਰੰਪ ਨੇ ਈਰਾਨ ਨੂੰ ਦੋ ਟੁੱਕ ਚਿਤਾਵਨੀ ਦਿੰਦੇ ਹੋਏ ਕਿਹਾ ਕਿ ਅਮਰੀਕਾ ਕੋਲ ਈਰਾਨ ’ਚ ਅਜੇ ਇੱਕ ਜਾਂ ਦੋ ਟਿਕਾਣੇ ਹੋਰ ਬਚੇ ਹਨ ਜਿਨ੍ਹਾਂ ਨੂੰ ਠੀਕ ਕਰਨ ਯਾਨੀ ਤਬਾਹ ਕਰਨ ਦੀ ਲੋੜ ਹੈ ਅਤੇ ਅਮਰੀਕਾ ਇਹ ਕੰਮ ਮਹਿਜ਼ 10 ਮਿੰਟਾਂ ਵਿੱਚ ਕਰ ਸਕਦਾ ਹੈ। ਟਰੰਪ ਦਾ ਇਹ ਬਿਆਨ ਅਜਿਹੇ ਸਮੇਂ ਆਇਆ ਹੈ ਜਦੋਂ ਈਰਾਨ ਦੇ ਨਵੇਂ ਸਰਵਉੱਚ ਨੇਤਾ ਮੋਜਤਬਾ ਖ਼ਾਮੇਨੇਈ ਨੇ ਅਮਰੀਕਾ ਅਤੇ ਇਜ਼ਰਾਈਲ ਨੂੰ ਨਵੇਂ ਹਮਲਿਆਂ ਦੀ ਖੁੱਲ੍ਹੀ ਚਿਤਾਵਨੀ ਦਿੱਤੀ ਹੈ।
Posted By Anuradha Bains
Publish Date: Sun, 01 Nov 2026 12:37 PM (IST)
Updated Date: Sun, 01 Nov 2026 12:39 PM (IST)
ਡਿਜੀਟਲ ਡੈਸਕ, ਵਾਸ਼ਿੰਗਟਨ। ਅਮਰੀਕਾ ਅਤੇ ਈਰਾਨ ਵਿਚਾਲੇ ਜਾਰੀ ਸੰਘਰਸ਼ ਦਿਨ-ਬ-ਦਿਨ ਹੋਰ ਭਿਆਨਕ ਹੁੰਦਾ ਜਾ ਰਿਹਾ ਹੈ। ਅਜਿਹੇ 'ਚ ਹੁਣ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇੱਕ ਵਾਰ ਫਿਰ ਈਰਾਨ ਖ਼ਿਲਾਫ਼ ਆਪਣਾ ਇਰਾਦਾ ਸਾਫ਼ ਕਰ ਦਿੱਤਾ ਹੈ।
ਟਰੰਪ ਨੇ ਈਰਾਨ ਨੂੰ ਦੋ ਟੁੱਕ ਚਿਤਾਵਨੀ ਦਿੰਦੇ ਹੋਏ ਕਿਹਾ ਕਿ ਅਮਰੀਕਾ ਕੋਲ ਈਰਾਨ ’ਚ ਅਜੇ ਇੱਕ ਜਾਂ ਦੋ ਟਿਕਾਣੇ ਹੋਰ ਬਚੇ ਹਨ ਜਿਨ੍ਹਾਂ ਨੂੰ ਠੀਕ ਕਰਨ ਯਾਨੀ ਤਬਾਹ ਕਰਨ ਦੀ ਲੋੜ ਹੈ ਅਤੇ ਅਮਰੀਕਾ ਇਹ ਕੰਮ ਮਹਿਜ਼ 10 ਮਿੰਟਾਂ ਵਿੱਚ ਕਰ ਸਕਦਾ ਹੈ। ਟਰੰਪ ਦਾ ਇਹ ਬਿਆਨ ਅਜਿਹੇ ਸਮੇਂ ਆਇਆ ਹੈ ਜਦੋਂ ਈਰਾਨ ਦੇ ਨਵੇਂ ਸਰਵਉੱਚ ਨੇਤਾ ਮੋਜਤਬਾ ਖ਼ਾਮੇਨੇਈ ਨੇ ਅਮਰੀਕਾ ਅਤੇ ਇਜ਼ਰਾਈਲ ਨੂੰ ਨਵੇਂ ਹਮਲਿਆਂ ਦੀ ਖੁੱਲ੍ਹੀ ਚਿਤਾਵਨੀ ਦਿੱਤੀ ਹੈ।
ਟਰੰਪ ਦਾ ਵੱਡਾ ਦਾਅਵਾ- ਪਿਕਐਕਸ ਮਾਊਂਟੇਨ ਨਿਸ਼ਾਨੇ 'ਤੇ
ਫਲੋਰੀਡਾ ’ਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਕਿਹਾ ਕਿ ਉਨ੍ਹਾਂ ਨੇ ਈਰਾਨ ਦੇ ਪਰਮਾਣੂ ਪ੍ਰੋਗਰਾਮਾਂ ਨੂੰ ਪਹਿਲਾਂ ਹੀ ਵੱਡਾ ਝਟਕਾ ਦਿੱਤਾ ਹੈ ਪਰ ਕੁਝ ਸਾਈਟਾਂ ਜਿਵੇਂ ਪਿਕਐਕਸ ਮਾਊਂਟੇਨ ਨੂੰ ਅਜੇ ਨੇਸਤਨਾਬੂਦ ਕਰਨਾ ਬਾਕੀ ਹੈ।
ਜਦੋਂ ਉਨ੍ਹਾਂ ਤੋਂ ਪੁੱਛਿਆ ਗਿਆ ਕਿ ਕੀ ਅਮਰੀਕਾ ਇਸ ਹਫ਼ਤੇ ਹੀ ਈਰਾਨ 'ਤੇ ਕੋਈ ਫ਼ੌਜੀ ਹਮਲਾ ਕਰ ਸਕਦਾ ਹੈ ਤਾਂ ਉਨ੍ਹਾਂ ਨੇ ਬੇਹੱਦ ਤਿੱਖੇ ਅੰਦਾਜ਼ ਵਿੱਚ ਜਵਾਬ ਦਿੱਤਾ ਕਿ ਤੁਸੀਂ ਅਜਿਹਾ ਮੂਰਖਤਾਪੂਰਨ ਸਵਾਲ ਕਿਉਂ ਪੁੱਛ ਰਹੇ ਹੋ? ਮੰਨ ਲਓ ਜੇਕਰ ਮੈਂ ਹਮਲਾ ਕਰਨ ਵਾਲਾ ਵੀ ਹੋਵਾਂ, ਤਾਂ ਕੀ ਮੈਂ ਤੁਹਾਨੂੰ ਦੱਸ ਦਿਆਂਗਾ? ਹਾਲਾਂਕਿ, ਇਸਦੇ ਨਾਲ ਹੀ ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਈਰਾਨ ਨਾਲ ਗੱਲਬਾਤ ਠੀਕ-ਠਾਕ ਚੱਲ ਰਹੀ ਹੈ ਪਰ ਉਹ ਬਹੁਤ ਜ਼ਿਆਦਾ ਭਰੋਸੇਮੰਦ ਨਹੀਂ ਹਨ।
ਮੋਜਤਬਾ ਖ਼ਾਮੇਨੇਈ ਦੀ ਪਹਿਲੀ ਫ਼ੌਜੀ ਬੈਠਕ ਅਤੇ ਚਿਤਾਵਨੀ
ਦੂਜੇ ਪਾਸੇ, ਈਰਾਨ ਦੇ ਨਵੇਂ ਸਰਵਉੱਚ ਨੇਤਾ ਮੋਜਤਬਾ ਖ਼ਾਮੇਨੇਈ ਨੇ ਪਹਿਲੀ ਵਾਰ ਚੋਟੀ ਦੇ ਫ਼ੌਜੀ ਕਮਾਂਡਰਾਂ ਨਾਲ ਬੈਠਕ ਕੀਤੀ ਹੈ। ਇਸ ਦੌਰਾਨ ਖ਼ਾਮੇਨੇਈ ਨੇ ਕਮਾਂਡਰਾਂ ਨੂੰ ਸਖ਼ਤ ਨਿਰਦੇਸ਼ ਦਿੱਤੇ ਹਨ ਕਿ ਅਮਰੀਕਾ-ਇਜ਼ਰਾਈਲ ਦੁਸ਼ਮਣ ਦੀ ਹਰ ਛੋਟੀ-ਵੱਡੀ ਜਾਇਦਾਦ ਨੂੰ ਈਰਾਨ ਦੀ ਨਵੀਂ ਟਾਰਗੇਟ ਲਿਸਟ ਵਿੱਚ ਸ਼ਾਮਲ ਕੀਤਾ ਜਾਵੇ। ਉਨ੍ਹਾਂ ਨੇ ਦੋ ਟੁੱਕ ਕਿਹਾ ਕਿ ਕਿਸੇ ਵੀ ਤਰ੍ਹਾਂ ਦੀ ਧਮਕੀ ਦਾ ਜਵਾਬ ਤੁਰੰਤ, ਅਸਰਦਾਰ ਅਤੇ ਬਿਨਾਂ ਕਿਸੇ ਭੂਗੋਲਿਕ ਸੀਮਾ ਦੇ ਦਿੱਤਾ ਜਾਵੇਗਾ।
ਕੀ ਮਿਡਟਰਮ ਚੋਣਾਂ ਤੋਂ ਬਾਅਦ ਈਰਾਨ 'ਤੇ ਹਮਲਾ ਕਰੇਗਾ ਅਮਰੀਕਾ?
ਜ਼ਿਕਰਯੋਗ ਹੈ ਕਿ ਅਮਰੀਕੀ ਮੀਡੀਆ ਰਿਪੋਰਟਾਂ ਅਤੇ ਖ਼ੁਦ ਟਰੰਪ ਦੇ ਪਿਛਲੇ ਬਿਆਨਾਂ ਤੋਂ ਸੰਕੇਤ ਮਿਲ ਰਹੇ ਹਨ ਕਿ ਅਮਰੀਕਾ ਮੱਧ-ਮਿਆਦੀ ਚੋਣਾਂ (Midterm Elections) ਤੋਂ ਬਾਅਦ ਈਰਾਨ ਖ਼ਿਲਾਫ਼ ਇੱਕ ਵਾਰ ਫਿਰ ਵੱਡੀ ਫ਼ੌਜੀ ਮੁਹਿੰਮ ਛੇੜ ਸਕਦਾ ਹੈ।
'ਦ ਵਾਲ ਸਟ੍ਰੀਟ ਜਰਨਲ' ਦੀ ਰਿਪੋਰਟ ਮੁਤਾਬਕ, ਵਾਸ਼ਿੰਗਟਨ ਨੇ ਖਾੜੀ ਦੇ ਕਈ ਅਰਬ ਦੇਸ਼ਾਂ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਉਹ ਅਮਰੀਕਾ ਦੀਆਂ 3 ਨਵੰਬਰ ਦੀਆਂ ਚੋਣਾਂ ਤੋਂ ਬਾਅਦ ਈਰਾਨ ਖ਼ਿਲਾਫ਼ ਇੱਕ ਛੋਟੀ ਅਤੇ ਤੇਜ਼ ਫ਼ੌਜੀ ਮੁਹਿੰਮ ਲਈ ਤਿਆਰ ਰਹਿਣ।
ਮਾਰਕੋ ਰੂਬੀਓ ਨੇ ਵੀ ਦਿੱਤੇ ਸੰਕੇਤ
ਦੂਜੇ ਪਾਸੇ, ਅਮਰੀਕੀ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨੇ ਵੀ ਸ਼ਨੀਵਾਰ ਨੂੰ ਚੇਤਾਵਨੀ ਦਿੰਦੇ ਹੋਏ ਕਿਹਾ ਕਿ ਅਮਰੀਕਾ ਜਦੋਂ ਚਾਹੇ ਆਪਣੇ ਫ਼ੌਜੀ ਉਦੇਸ਼ਾਂ ਨੂੰ ਹਾਸਲ ਕਰ ਸਕਦਾ ਹੈ, ਹਾਲਾਂਕਿ ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਕਿ ਰਾਸ਼ਟਰਪਤੀ ਟਰੰਪ ਨੇ ਅਜੇ ਤੱਕ ਨਵੇਂ ਹਮਲਿਆਂ 'ਤੇ ਕੋਈ ਅੰਤਿਮ ਫ਼ੈਸਲਾ ਨਹੀਂ ਲਿਆ ਹੈ। ਇਸਦੇ ਨਾਲ ਹੀ ਉਨ੍ਹਾਂ ਨੇ ਈਰਾਨ 'ਤੇ ਵਪਾਰਕ ਜਹਾਜ਼ਾਂ ਨੂੰ ਨਿਸ਼ਾਨਾ ਬਣਾਉਣ ਦਾ ਵੀ ਗੰਭੀਰ ਦੋਸ਼ ਲਗਾਇਆ।