'ਅਸੀਂ ਕਿਸੇ ਐਲੀਅਨ ਨੂੰ ਸੱਦਾ ਦੇ ਰਹੇ ਹਾਂ'!, OpenAI ਤੇ Anthropic ਦੇ ਸਾਬਕਾ ਰਿਸਰਚਰ ਜੈਕਬ ਕਾਕਸਨ ਨੇ AI ਨੂੰ ਲੈ ਕੇ ਦਿੱਤੀ ਚਿਤਾਵਨੀ

ਡਿਜੀਟਲ ਡੈਸਕ, ਵਾਸ਼ਿੰਗਟਨ : AI ਦੇ ਵਿਕਾਸ ’ਤੇ ਰੋਕ ਲਗਾਉਣ ਦੀਆਂ ਚਰਚਾਵਾਂ ਵਿਚਕਾਰ OpenAI ਤੇ Anthropic ਦੇ ਸਾਬਕਾ ਰਿਸਰਚਰ ਜੈਕਬ ਕਾਕਸਨ ਨੇ ਹੈਰਾਨ ਕਰਨ ਵਾਲੀ ਚੇਤਾਵਨੀ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ AI ਬਣਾਉਣ ਵਾਲੇ ਲੋਕ ਖੁਦ ਪੂਰੀ ਇਮਾਨਦਾਰੀ ਨਾਲ ਮੰਨਦੇ ਹਨ ਕਿ ਇਹ ਤਕਨਾਲੋਜੀ ਇਸ ਦਹਾਕੇ ਦੇ ਅੰਤ ਤੱਕ ਪੂਰੀ ਮਨੁੱਖਤਾ ਨੂੰ ਖਤਮ ਕਰ ਸਕਦੀ ਹੈ।

ਕਾਕਸਨ ਦੀ ਤਾਜ਼ਾ ਚੇਤਾਵਨੀ ਮੁਤਾਬਕ ਸੁਪਰ-ਇੰਟੈਲੀਜੈਂਟ AI ਬਣਾਉਣ ਦੀ ਕੋਸ਼ਿਸ਼ ਕਿਸੇ ਐਲੀਅਨ ਪ੍ਰਜਾਤੀ ਨੂੰ ਸੱਦਾ ਦੇਣ ਵਰਗੀ ਹੈ। ਇਹ ਇੱਕ ਅਜਿਹਾ ਦਿਮਾਗ ਹੋਵੇਗਾ ਜਿਸ ਨੂੰ ਅਸੀਂ ਪੂਰੀ ਤਰ੍ਹਾਂ ਸਮਝ ਨਹੀਂ ਸਕਦੇ ਤੇ ਜਿਸ ’ਤੇ ਸਾਡਾ ਕੋਈ ਕੰਟਰੋਲ ਵੀ ਨਹੀਂ ਹੋ ਸਕਦਾ। ਉਨ੍ਹਾਂ ਨੇ ਹਾਲ ਹੀ ’ਚ ਡਾਰਿਓ ਅਮੋਦੇਈ ਦੀ ਅਗਵਾਈ ਵਾਲੀ ਕੰਪਨੀ Anthropic ਨੂੰ ਛੱਡਿਆ ਹੈ, ਜੋ Claude AI ਬਣਾਉਂਦੀ ਹੈ।

'ਅਸੀਂ ਕਿਸੇ ਐਲੀਅਨ ਨੂੰ ਸੱਦਾ ਦੇ ਰਹੇ ਹਾਂ'

ਇੱਕ ਟੀਵੀ ਸ਼ੋਅ ਦੌਰਾਨ ਉਨ੍ਹਾਂ ਕਿਹਾ, "ਸੁਪਰਇੰਟੈਲੀਜੈਂਸ ਦੇ ਸੰਕਲਪ ਦੀ ਤੁਲਨਾ ਕਿਸੇ ਐਲੀਅਨ ਪ੍ਰਜਾਤੀ ਨੂੰ ਸੱਦਾ ਦੇਣ ਨਾਲ ਕੀਤੀ ਗਈ ਹੈ। ਇਸ ਲਈ ਕਿਸੇ ਅਜਿਹੇ ਐਲੀਅਨ ਦਿਮਾਗ ਬਾਰੇ ਸੋਚਣਾ, ਜਿਸ ਨੂੰ ਅਸੀਂ ਪੂਰੀ ਤਰ੍ਹਾਂ ਨਹੀਂ ਸਮਝਦੇ, ਬਿਨਾਂ ਕਿਸੇ ਠੋਸ ਸਥਿਤੀ ਦੇ ਵੀ ਕਾਫੀ ਡਰਾਉਣਾ ਹੈ।"

ਕਾਕਸਨ ਅਸਲ ’ਚ ਇਸ ਗੱਲ ਨੂੰ ਲੈ ਕੇ ਚਿਤਾਵਨੀ ਦੇ ਰਹੇ ਹਨ ਕਿ ਅਜਿਹੀ ਐਲੀਅਨ ਇੰਟੈਲੀਜੈਂਸ ਬਣਾਉਣਾ ਜਿਸ ਨੂੰ ਕੰਟਰੋਲ ਨਾ ਕੀਤਾ ਜਾ ਸਕੇ, ਆਪਣੇ ਆਪ ’ਚ ਹੀ ਬਹੁਤ ਡਰਾਉਣਾ ਹੈ। ਭਾਵੇਂ ਤੁਸੀਂ ਦੁਨੀਆ ਦੇ ਖਤਮ ਹੋਣ ਵਰਗੀ ਕਿਸੇ ਸਥਿਤੀ ਬਾਰੇ ਨਾ ਵੀ ਸੋਚੋ।

ਦਿੱਗਜ ਮਾਹਿਰ ਪਹਿਲਾਂ ਵੀ ਦੇ ਚੁੱਕੇ ਹਨ ਚਿਤਾਵਨੀ

ਉਹ ਅਜਿਹੇ ਪਹਿਲੇ ਵਿਅਕਤੀ ਨਹੀਂ ਹਨ ਜਿਨ੍ਹਾਂ ਨੇ ਦੁਨੀਆ ਦੇ ਖਤਮ ਹੋਣ ਵਾਲੇ 'ਡੂਮਸਡੇ ਸਿਨੇਰੀਓ' ਬਾਰੇ ਗੱਲ ਕੀਤੀ ਹੈ। ਕਈ ਮਾਹਿਰਾਂ ਦਾ ਕਹਿਣਾ ਹੈ ਕਿ ਜੇ AI ਦਾ ਵਿਕਾਸ ਇਸੇ ਰਫ਼ਤਾਰ ਨਾਲ ਜਾਰੀ ਰਿਹਾ ਤਾਂ ਆਖ਼ਰਕਾਰ ਇਹ ਸਾਡੇ ਸਾਰਿਆਂ ਲਈ ਖਤਰਾ ਬਣ ਸਕਦਾ ਹੈ।

ਹਾਲਾਂਕਿ, ਕਾਕਸਨ ਦੀ ਚਿਤਾਵਨੀ ਨੂੰ AI ਤਕਨਾਲੋਜੀ ਨਾਲ ਜੁੜੇ ਕਈ ਪ੍ਰਮੁੱਖ ਆਗੂਆਂ ਨੇ ਵੀ ਗੰਭੀਰਤਾ ਨਾਲ ਲਿਆ ਹੈ। Anthropic ਦੇ CEO ਡਾਰਿਓ ਅਮੋਦੇਈ, OpenAI ਦੇ CEO ਸੈਮ ਆਲਟਮੈਨ ਤੇ Grok ਦੇ ਮੁਖੀ ਐਲਨ ਮਸਕ ਨੇ ਵੀ AI ਦੇ ਵਿਕਾਸ ਦੀ ਰਫ਼ਤਾਰ ਨੂੰ ਕਿਵੇਂ ਹੌਲੀ ਕੀਤਾ ਜਾ ਸਕਦਾ ਹੈ, ਇਸ ਬਾਰੇ ਚਰਚਾ ਕੀਤੀ ਹੈ।

ਖੁਦ ਐਲਨ ਮਸਕ ਵੀ ਕਈ ਵਾਰ ਕਹਿ ਚੁੱਕੇ ਹਨ ਕਿ ਅਗਲੇ 10 ਸਾਲਾਂ ’ਚ AI ਵੱਲੋਂ ਮਨੁੱਖੀ ਅਸਤਿਤਵ ਨੂੰ ਖਤਮ ਕਰਨ ਦੀ 10 ਫੀਸਦੀ ਸੰਭਾਵਨਾ ਹੈ। ਨੋਬਲ ਪੁਰਸਕਾਰ ਜੇਤੂ ਕੰਪਿਊਟਰ ਵਿਗਿਆਨੀ ਜੈਫਰੀ ਹਿੰਟਨ, ਜਿਨ੍ਹਾਂ ਨੂੰ AI ਦਾ 'ਗੌਡਫਾਦਰ' ਮੰਨਿਆ ਜਾਂਦਾ ਹੈ, ਨੇ ਵੀ ਵਾਰ-ਵਾਰ ਚਿਤਾਵਨੀ ਦਿੱਤੀ ਹੈ ਕਿ AI ਕਾਰਨ ਮਨੁੱਖਾਂ ਦੇ ਖਤਮ ਹੋਣ ਦੀ 10 ਤੋਂ 20 ਫੀਸਦੀ ਸੰਭਾਵਨਾ ਹੈ।

ਹਿੰਟਨ ਦੇ ਨਾਲ-ਨਾਲ ਯੋਸ਼ੁਆ ਬੈਂਜਿਓ, ਯਾਨ ਲੇਕੁਨ, LinkedIn ਦੇ ਕੋ-ਫਾਊਂਡਰ ਰੀਡ ਹੌਫਮੈਨ, Google ਦੇ ਸਾਬਕਾ CEO ਐਰਿਕ ਸ਼ਮਿਟ, Google DeepMind ਦੇ ਕੋ-ਫਾਊਂਡਰ ਡੇਮਿਸ ਹਸਾਬਿਸ ਤੇ ਕਈ ਹੋਰ ਟੈਕ ਤੇ AI ਮਾਹਿਰਾਂ ਨੇ ਬੇਲਗਾਮ AI ਦੇ ਵਿਕਾਸ ’ਤੇ ਬਿਹਤਰ ਸੁਰੱਖਿਆ ਉਪਾਅ ਲਾਗੂ ਕਰਨ ਲਈ ਦੁਨੀਆ ਭਰ ’ਚ ਅਪੀਲ ਕੀਤੀ ਹੈ।