ਅਮਰੀਕਾ ਨੂੰ ਕੋਈ ਕਾਹਲ ਨਹੀਂ, ਡੋਨਾਲਡ ਟਰੰਪ ਦੇ ਬਿਆਨ ਦਰਮਿਆਨ ਮੋਜਤਬਾ ਖ਼ਾਮਨੇਈ ਦੀ ਸਖ਼ਤ ਚਿਤਾਵਨੀ

ਏਐੱਨਆਈ ਨੇ ਅਲ ਅਰਬੀਆ ਦੇ ਹਵਾਲੇ ਨਾਲ ਦੱਸਿਆ ਕਿ ਖ਼ਾਕੇ ’ਚ ਸਮਝੌਤੇ ਨੂੰ ਲਾਗੂ ਕਰਨ ਤੇ ਉਸ ਦੀ ਨਿਗਰਾਨੀ ਲਈ ਚੀਨ ਨੂੰ ਗਾਰੰਟਰ ਬਣਾਉਣ ਦੀ ਤਜਵੀਜ਼ ਹੈ। ਇਸ ਦੇ ਨਾਲ ਹੀ ਅਮਰੀਕਾ ਤੇ ਈਰਾਨ ਵਿਚਾਲੇ ਸਿੱਧੀ ਗੱਲਬਾਤ ਇਸਤਾਂਬੁਲ ਦੀ ਥਾਂ ਕਤਰ ਦੀ ਰਾਜਧਾਨੀ ਦੋਹਾ ’ਚ ਕਰਵਾਉਣ ਦੀ ਗੱਲ ਕਹੀ ਗਈ ਹੈ। ਪ੍ਰਸਤਾਵਿਤ ਪ੍ਰਬੰਧ ਤਹਿਤ ਈਰਾਨ ਦੇ ਪਰਮਾਣੂ ਪ੍ਰੋਗਰਾਮ ਅਤੇ ਸਮੁੰਦਰੀ ਸੁਰੱਖਿਆ ਨਾਲ ਜੁੜੇ ਕਦਮਾਂ ਦੇ ਬਦਲੇ ਅਮਰੀਕਾ ਪਾਬੰਦੀਆਂ, ਨਾਕਾਬੰਦੀ ਅਤੇ ਆਰਥਿਕ ਰੋਕਾਂ ’ਚ ਢਿੱਲ ਦੇਵੇਗਾ। ਸਮਝੌਤੇ ਦੇ ਹਰੇਕ ਪੜਾਅ ਨੂੰ ਲਾਗੂ ਕਰਨ ਤੋਂ ਪਹਿਲਾਂ ਇਕ ਸੁਤੰਤਰ ਜਾਂਚ ਪ੍ਰਣਾਲੀ ਇਹ ਪਰਖੇਗੀ ਕਿ ਦੋਵਾਂ ਧਿਰਾਂ ਨੇ ਆਪਣੀਆਂ ਸ਼ਰਤਾਂ ਪੂਰੀਆਂ ਕੀਤੀਆਂ ਹਨ ਜਾਂ ਨਹੀਂ। ਕਿਸੇ ਵਿਵਾਦ ਜਾਂ ਉਲੰਘਣਾ ਦੀ ਸਥਿਤੀ ਵਿਚ ਵਿਚੋਲੇ ਅਤੇ ਗਾਰੰਟਰ ਦੇਸ਼ ਹੱਲ ਲੱਭਣ ’ਚ ਮਦਦ ਕਰਨਗੇ। ਜੰਗਬੰਦੀ ਬਹਾਲ ਕਰਨ ਦੀਆਂ ਕੋਸ਼ਿਸ਼ਾਂ ਤਹਿਤ ਕਤਰ ਦਾ ਇਕ ਵਫ਼ਦ ਸ਼ੁੱਕਰਵਾਰ ਨੂੰ ਤਹਿਰਾਨ ਪਹੁੰਚਿਆ।