ਜਦੋਂ ਨੀਂਦ ਖੁੱਲ੍ਹੀ ਤਾਂ ਅਜਨਬੀ ਮੇਰੇ ਨਾਲ ਜਬਰ-ਜਨਾਹ ਕਰ ਰਿਹਾ ਸੀ, ਕੋਲ ਖੜ੍ਹਾ ਪਤੀ ਲਾਈਵ ਸਟ੍ਰੀਮਿੰਗ ਕਰ ਰਿਹਾ ਸੀ; ਮਹਿਲਾ ਨੇ ਸੁਣਾਈ ਹੱਡਬੀਤੀ

ਡਿਜੀਟਲ ਡੈਸਕ, ਲੰਡਨ : ਬ੍ਰਿਟੇਨ ਤੋਂ ਇਨਸਾਨੀਅਤ ਨੂੰ ਸ਼ਰਮਸਾਰ ਕਰਨ ਵਾਲਾ ਇੱਕ ਦਿਲ ਦਹਿਲਾ ਦੇਣ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਇੱਕ ਵਿਅਕਤੀ ਨੇ ਆਪਣੀ ਹੀ ਪਤਨੀ ਨੂੰ ਨਸ਼ੀਲੀ ਦਵਾਈ ਦੇ ਕੇ ਬੇਹੋਸ਼ ਕਰ ਦਿੱਤਾ ਅਤੇ ਸੱਤ ਵੱਖ-ਵੱਖ ਅਜਨਬੀ ਮਰਦਾਂ ਨੂੰ ਘਰ ਬੁਲਾ ਕੇ ਘੱਟੋ-ਘੱਟ ਅੱਠ ਵਾਰ ਉਸ ਨਾਲ ਜਬਰ-ਜਨਾਹ ਕਰਵਾਇਆ।

ਪੀੜਤ ਮਹਿਲਾ ਨੇ ITV ਨਿਊਜ਼ ਨਾਲ ਇੱਕ ਇੰਟਰਵਿਊ ਦੌਰਾਨ ਪਹਿਲੀ ਵਾਰ ਆਪਣੀ ਪਛਾਣ ਜਨਤਕ ਕੀਤੀ। ਮਹਿਲਾ ਨੇ ਦੱਸਿਆ ਕਿ ਉਸ ਦੇ ਪਤੀ ਨੇ ਘੱਟੋ-ਘੱਟ ਅੱਠ ਵਾਰ ਸੱਤ ਵੱਖ-ਵੱਖ ਮਰਦਾਂ ਵੱਲੋਂ ਕੀਤੇ ਗਏ ਜਬਰ-ਜਨਾਹ ਦੀ ਲਾਈਵ ਸਟ੍ਰੀਮਿੰਗ ਵੀ ਕੀਤੀ ਸੀ। ਉਨ੍ਹਾਂ ਨੇ ਇਸ ਗੱਲ 'ਤੇ ਨਾਰਾਜ਼ਗੀ ਜਤਾਈ ਕਿ ਪੁਲਿਸ ਨੇ ਇਨ੍ਹਾਂ ਸਾਰੇ ਮੁਲਜ਼ਮਾਂ ਖ਼ਿਲਾਫ਼ ਕੋਈ ਠੋਸ ਕਾਰਵਾਈ ਨਹੀਂ ਕੀਤੀ।

ਪਤੀ ਘਰ 'ਚ ਕਰਦਾ ਸੀ ਬੇਰਹਿਮੀ

ਪੀੜਤਾ ਨੇ ਇੰਟਰਵਿਊ ਵਿੱਚ ਦੱਸਿਆ ਕਿ ਉਸ ਦਾ ਪਤੀ ਘਰ ਦੇ ਅੰਦਰ ਬੇਹੱਦ ਹਿੰਸਕ ਵਿਵਹਾਰ ਕਰਦਾ ਸੀ। ਉਹ ਆਪਣੀ ਪਤਨੀ ਦੀਆਂ ਦਵਾਈਆਂ 'ਤੇ ਪੂਰਾ ਕੰਟਰੋਲ ਰੱਖਦਾ ਸੀ ਅਤੇ ਉਸ ਦੇ ਪੀਣ ਵਾਲੇ ਪਦਾਰਥ ਵਿੱਚ 'GHB' ਵਰਗੀ ਖ਼ਤਰਨਾਕ ਨਸ਼ੀਲੀ ਦਵਾਈ ਮਿਲਾ ਕੇ ਉਸ ਨੂੰ ਬੇਹੋਸ਼ ਕਰ ਦਿੰਦਾ ਸੀ।

ਇਸ ਤੋਂ ਬਾਅਦ ਉਹ ਅਣਜਾਣ ਮਰਦਾਂ ਤੋਂ ਉਸ ਨਾਲ ਜਬਰ-ਜਨਾਹ ਕਰਵਾਉਂਦਾ ਸੀ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਕਈ ਸਾਲਾਂ ਤੱਕ ਮਹਿਲਾ ਨੂੰ ਇਸ ਸਾਜ਼ਿਸ਼ ਦੀ ਕੋਈ ਜਾਣਕਾਰੀ ਨਹੀਂ ਸੀ।

ਇੱਕ ਰਾਤ ਖੁੱਲ੍ਹਿਆ ਖ਼ੌਫ਼ਨਾਕ ਸੱਚ

ਇਸ ਖ਼ੌਫ਼ਨਾਕ ਸਾਜ਼ਿਸ਼ ਦਾ ਖੁਲਾਸਾ ਇੱਕ ਰਾਤ ਉਸ ਸਮੇਂ ਹੋਇਆ, ਜਦੋਂ ਪਤੀ ਨੇ ਆਪਣੀ ਪਤਨੀ ਨੂੰ ਨਸ਼ੀਲਾ ਪਦਾਰਥ ਮਿਲਿਆ ਹੋਇਆ ਪੀਣ ਵਾਲਾ ਪਦਾਰਥ ਪਿਲਾਇਆ।

ਕੁਝ ਘੰਟਿਆਂ ਬਾਅਦ ਜਦੋਂ ਮਹਿਲਾ ਨੂੰ ਹੋਸ਼ ਆਇਆ ਤਾਂ ਉਸ ਨੇ ਇੱਕ ਅਜਨਬੀ ਵਿਅਕਤੀ ਨੂੰ ਆਪਣੇ ਨਾਲ ਜਬਰ-ਜਨਾਹ ਕਰਦੇ ਦੇਖਿਆ। ਉਸ ਦਾ ਪਤੀ ਦਰਵਾਜ਼ੇ ਕੋਲ ਖੜ੍ਹਾ ਇਹ ਸਭ ਦੇਖ ਰਿਹਾ ਸੀ।

ਮਹਿਲਾ ਨੂੰ ਹੋਸ਼ ਵਿੱਚ ਆਉਂਦਿਆ ਦੇਖ ਕੇ ਅਜਨਬੀ ਉੱਥੋਂ ਭੱਜ ਗਿਆ। ਇਸ ਮਾਮਲੇ ਵਿੱਚ ਆਪਣਾ ਜੁਰਮ ਕਬੂਲ ਕਰਨ ਤੋਂ ਬਾਅਦ ਅਦਾਲਤ ਨੇ ਮੁਲਜ਼ਮ ਪਤੀ ਨੂੰ 14 ਸਾਲ ਅਤੇ 8 ਮਹੀਨੇ ਦੀ ਕੈਦ ਦੀ ਸਜ਼ਾ ਸੁਣਾਈ।

ਪੀੜਤਾ ਨੇ ਖ਼ੁਦ ਇਕੱਠੇ ਕੀਤੇ ਸਬੂਤ

ਹਾਲਾਂਕਿ, ਪੀੜਤਾ ਦੀ ਲੜਾਈ ਇੱਥੇ ਖ਼ਤਮ ਨਹੀਂ ਹੋਈ। ਉਸ ਨੇ ਖ਼ੁਦ ਸਬੂਤ ਇਕੱਠੇ ਕਰਨੇ ਸ਼ੁਰੂ ਕਰ ਦਿੱਤੇ ਅਤੇ ਜੇਲ੍ਹ ਵਿੱਚ ਬੰਦ ਆਪਣੇ ਪਤੀ ਦੀਆਂ ਫ਼ੋਨ 'ਤੇ ਹੋਣ ਵਾਲੀਆਂ ਗੱਲਾਂ ਰਿਕਾਰਡ ਕਰਕੇ ਉਸ ਤੋਂ ਹੈਰਾਨ ਕਰਨ ਵਾਲਾ ਸੱਚ ਕਬੂਲ ਕਰਵਾਇਆ।

ਮੁਲਜ਼ਮ ਨੇ ਮੰਨਿਆ ਕਿ ਉਸ ਨੇ ਵੈੱਬਸਾਈਟਾਂ ਰਾਹੀਂ ਸੱਤ ਅਜਨਬੀ ਮਰਦਾਂ ਨੂੰ ਘਰ ਬੁਲਾਇਆ ਸੀ। ਇਨ੍ਹਾਂ ਸਾਰੇ ਵਿਅਕਤੀਆਂ ਨੇ ਕੁੱਲ ਅੱਠ ਵਾਰ ਮਹਿਲਾ ਨਾਲ ਜਬਰ-ਜਨਾਹ ਕੀਤਾ ਸੀ।

ਪੰਜ ਸਾਲ ਬਾਅਦ ਵੀ ਸੱਤੋਂ ਮੁਲਜ਼ਮ ਫਰਾਰ

ਘਟਨਾ ਦੇ ਪੰਜ ਸਾਲ ਬੀਤ ਜਾਣ ਤੋਂ ਬਾਅਦ ਵੀ ਉਹ ਸੱਤੋਂ ਮੁਲਜ਼ਮ ਕਾਨੂੰਨ ਦੀ ਪਕੜ ਤੋਂ ਬਾਹਰ ਹਨ।

ਪੀੜਤਾ ਦਾ ਦੋਸ਼ ਹੈ ਕਿ ਪੁਲਿਸ ਨੇ ਘਟਨਾ ਵਾਲੀ ਰਾਤ ਜ਼ਬਤ ਕੀਤੀ ਗਈ ਬੈੱਡਸ਼ੀਟ ਦਾ DNA ਟੈਸਟ 20 ਮਹੀਨਿਆਂ ਬਾਅਦ ਕਰਵਾਇਆ। ਇਸ ਤੋਂ ਇਲਾਵਾ CCTV ਫੁਟੇਜ ਅਤੇ ਫਿੰਗਰਪ੍ਰਿੰਟ ਵਰਗੇ ਅਹਿਮ ਸਬੂਤ ਇਕੱਠੇ ਕਰਨ ਵਿੱਚ ਵੀ ਲਾਪਰਵਾਹੀ ਵਰਤੀ ਗਈ।

ਦੂਜੇ ਪਾਸੇ, ਪੁਲਿਸ ਦਾ ਕਹਿਣਾ ਹੈ ਕਿ ਇੱਕ ਵਿਸ਼ੇਸ਼ ਟੀਮ ਹੋਰ ਮੁਲਜ਼ਮਾਂ ਦੀ ਪਛਾਣ ਕਰਨ ਵਿੱਚ ਜੁਟੀ ਹੋਈ ਹੈ।

ਪੀੜਤਾ ਹੁਣ ਇਨ੍ਹਾਂ ਸਾਰੇ ਦਰਿੰਦਿਆਂ ਨੂੰ ਬੇਨਕਾਬ ਕਰਨ ਦੀ ਲੜਾਈ ਲੜ ਰਹੀ ਹੈ ਤਾਂ ਜੋ ਹੋਰ ਮਹਿਲਾਵਾਂ ਨੂੰ ਇਸ ਤਰ੍ਹਾਂ ਦੇ ਅਪਰਾਧਾਂ ਤੋਂ ਸੁਰੱਖਿਅਤ ਰੱਖਿਆ ਜਾ ਸਕੇ।

ਫਰਾਂਸ ਦੇ ਡੋਮਿਨਿਕ ਪੇਲਿਕੋਟ ਮਾਮਲੇ ਨਾਲ ਮਿਲਦੀ-ਜੁਲਦੀ ਘਟਨਾ

ਦੱਸਣਯੋਗ ਹੈ ਕਿ ਇਹ ਭਿਆਨਕ ਘਟਨਾ ਫਰਾਂਸ ਦੇ ਡੋਮਿਨਿਕ ਪੇਲਿਕੋਟ ਮਾਮਲੇ ਨਾਲ ਮਿਲਦੀ-ਜੁਲਦੀ ਹੈ। ਡੋਮਿਨਿਕ ਪੇਲਿਕੋਟ ਦੇ ਮਾਮਲੇ ਵਿੱਚ ਉਸ ਦਾ ਪਤੀ ਉਸ ਨੂੰ ਨਸ਼ੀਲੀ ਦਵਾਈ ਦੇ ਕੇ ਬੇਹੋਸ਼ ਕਰ ਦਿੰਦਾ ਸੀ ਅਤੇ ਅਜਨਬੀ ਮਰਦਾਂ ਦੇ ਸਾਹਮਣੇ ਛੱਡ ਦਿੰਦਾ ਸੀ, ਜੋ ਵਾਰ-ਵਾਰ ਉਸ ਨਾਲ ਜਬਰ-ਜਨਾਹ ਕਰਦੇ ਸਨ।