'ਬੁਆਏਫ੍ਰੈਂਡ ਦੀ ਡਿਊਟੀ ਵੀ ਨਿਭਾਉਣੀ ਪੈਂਦੀ ਹੈ...' ਕੈਨੇਡਾ ਦਾ ਮੈਚ ਛੱਡ ਗਰਲਫ੍ਰੈਂਡ ਕੈਟੀ ਪੇਰੀ ਦੇ ਸ਼ੋਅ 'ਚ ਪਹੁੰਚੇ ਜਸਟਿਨ ਟਰੂਡੋ

ਡਿਜੀਟਲ ਡੈਸਕ, ਓਟਾਵਾ : ਕੈਨੇਡਾ ਦੇ ਸਾਬਕਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਇਨੀਂ ਦਿਨੀਂ ਆਪਣੀ ਲਵ-ਲਾਈਫ਼ ਅਤੇ ਫੀਫਾ ਵਰਲਡ ਕੱਪ 2026 ਨੂੰ ਲੈ ਕੇ ਸੁਰਖੀਆਂ ਵਿੱਚ ਹਨ। ਦਰਅਸਲ ਵਰਲਡ ਕੱਪ ਦੇ ਪਹਿਲੇ ਹੀ ਦਿਨ ਕੈਨੇਡਾ ਦਾ ਮੈਚ ਛੱਡ ਕੇ ਆਪਣੀ ਗਰਲਫ੍ਰੈਂਡ ਅਤੇ ਮਸ਼ਹੂਰ ਪੌਪ ਸਟਾਰ ਕੈਟੀ ਪੇਰੀ ਦੀ ਲਾਈਵ ਪਰਫਾਰਮੈਂਸ ਦੇਖਣ ਅਮਰੀਕਾ ਦੇ ਸਟੇਡੀਅਮ ਪਹੁੰਚਣ 'ਤੇ ਟਰੂਡੋ ਨੂੰ ਸੋਸ਼ਲ ਮੀਡੀਆ 'ਤੇ ਭਾਰੀ ਆਲੋਚਨਾ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਸਟੇਡੀਅਮ ਵਿੱਚ ਕੈਟੀ ਪੇਰੀ ਦੀ ਪਰਫਾਰਮੈਂਸ ਤੋਂ ਬਾਅਦ ਦੋਵਾਂ ਦਾ ਸ਼ਰੇਆਮ ਇੱਕ-ਦੂਜੇ ਨੂੰ ਗਲੇ ਲਗਾਉਣ ਅਤੇ ਕਿਸ ਕਰਨ ਦਾ ਵੀਡੀਓ ਸੋਸ਼ਲ ਮੀਡੀਆ ’ਤੇ ਖੂਬ ਵਾਇਰਲ ਹੋ ਰਿਹਾ ਹੈ। ਕੁਝ ਯੂਜ਼ਰਸ ਨੇ ਉਨ੍ਹਾਂ ਦੇ ਇਸ ਫੈਸਲੇ 'ਤੇ ਸਵਾਲ ਚੁੱਕੇ ਹਨ ਅਤੇ ਦਲੀਲ ਦਿੱਤੀ ਹੈ ਕਿ ਦੇਸ਼ ਦੇ ਸਾਬਕਾ ਨੇਤਾ ਨੂੰ ਕੈਨੇਡਾ ਦੇ ਮੈਚ ਵਿੱਚ ਸ਼ਾਮਲ ਹੋਣ ਨੂੰ ਪਹਿਲ ਦੇਣੀ ਚਾਹੀਦੀ ਸੀ।

ਯੂਜ਼ਰਸ ਕਰ ਰਹੇ ਨੇ ਤਰ੍ਹਾਂ-ਤਰ੍ਹਾਂ ਦੇ ਕਮੈਂਟ

ਇੱਕ ਸੋਸ਼ਲ ਮੀਡੀਆ ਯੂਜ਼ਰ ਨੇ ਆਲੋਚਨਾ ਕਰਦੇ ਹੋਏ ਲਿਖਿਆ, "ਲੀਡਰਸ਼ਿਪ ਦਾ ਮਤਲਬ ਹੈ ਨਿੱਜੀ ਰਿਸ਼ਤਿਆਂ ਤੋਂ ਉੱਪਰ ਦੇਸ਼ ਨੂੰ ਰੱਖਣਾ।" ਜਦਕਿ ਕਈ ਹੋਰਾਂ ਨੇ ਇਸ ਕਦਮ ਨੂੰ ਮੰਦਭਾਗਾ ਦੱਸਿਆ। ਹਾਲਾਂਕਿ, ਕਈ ਸਮਰਥਕਾਂ ਨੇ ਇਸ ਆਲੋਚਨਾ ਨੂੰ ਖਾਰਜ ਕਰਦਿਆਂ ਆਪਣੀ ਪਾਰਟਨਰ ਨੂੰ ਸਪੋਰਟ ਕਰਨ ਦੇ ਟਰੂਡੋ ਦੇ ਫੈਸਲੇ ਦਾ ਬਚਾਅ ਵੀ ਕੀਤਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਵਿਰੋਧੀ ਇੱਕ ਨਿੱਜੀ ਮਾਮਲੇ 'ਤੇ ਲੋੜ ਤੋਂ ਵੱਧ ਪ੍ਰਤੀਕਿਰਿਆ ਦੇ ਰਹੇ ਹਨ।

ਇੱਕ ਯੂਜ਼ਰ ਨੇ ਹੌਸਲਾ ਵਧਾਉਂਦੇ ਹੋਏ ਲਿਖਿਆ, "ਤੁਹਾਨੂੰ ਸੱਚਮੁੱਚ ਕਿਸੇ ਨੂੰ ਕੋਈ ਸਫ਼ਾਈ ਦੇਣ ਦੀ ਲੋੜ ਨਹੀਂ ਹੈ। ਆਪਣੀ ਜ਼ਿੰਦਗੀ ਜੀਓ।"

ਇੱਕ ਹੋਰ ਯੂਜ਼ਰ ਨੇ ਲਿਖਿਆ, "ਤੁਸੀਂ ਇੱਕ ਆਜ਼ਾਦ ਇਨਸਾਨ ਹੋ ਅਤੇ ਕਾਨੂੰਨੀ ਤੌਰ 'ਤੇ ਜੋ ਚਾਹੋ ਉਹ ਕਰ ਸਕਦੇ ਹੋ। ਤੁਸੀਂ ਦੇਸ਼ ਦੀ ਸੇਵਾ ਕੀਤੀ ਹੈ ਅਤੇ ਤੁਹਾਨੂੰ ਇੰਟਰਨੈੱਟ ਵਾਰੀਅਰਜ਼ ਦੀ ਪਰਵਾਹ ਕੀਤੇ ਬਿਨਾਂ ਜ਼ਿੰਦਗੀ ਦਾ ਆਨੰਦ ਲੈਣ ਦਾ ਪੂਰਾ ਹੱਕ ਹੈ। ਮਜ਼ੇ ਕਰੋ।"

ਜਸਟਿਨ ਟਰੂਡੋ ਨੇ ਦਿੱਤਾ ਕਰਾਰਾ ਜਵਾਬ

ਇਸ ਆਲੋਚਨਾ 'ਤੇ ਖੁੱਲ੍ਹ ਕੇ ਜਵਾਬ ਦਿੰਦੇ ਹੋਏ ਜਸਟਿਨ ਟਰੂਡੋ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ X (ਪਹਿਲਾਂ ਟਵਿੱਟਰ) 'ਤੇ ਲਿਖਿਆ, "ਕਦੇ-ਕਦੇ ਇੱਕ ਸਪੋਰਟਿਵ ਬੁਆਏਫ੍ਰੈਂਡ ਦੀ ਡਿਊਟੀ ਵੀ ਨਿਭਾਉਣੀ ਪੈਂਦੀ ਹੈ ਪਰ ਤੁਸੀਂ ਸਾਰੇ ਜਾਣਦੇ ਹੋ ਕਿ ਮੈਂ ਦਿਲੋਂ ਕੈਨੇਡਾ ਦੀ ਜਿੱਤ ਦੀ ਹੀ ਦੁਆ ਕਰ ਰਿਹਾ ਹਾਂ।"

ਕਿਵੇਂ ਸ਼ੁਰੂ ਹੋਇਆ ਇਹ ਵਿਵਾਦ

ਜ਼ਿਕਰਯੋਗ ਹੈ ਕਿ ਇਹ ਪੂਰਾ ਵਿਵਾਦ 12 ਜੂਨ ਨੂੰ ਕੈਲੀਫੋਰਨੀਆ ਦੇ ਇੰਗਲਵੁੱਡ ਵਿੱਚ ਸੋਫੀ ਸਟੇਡੀਅਮ ਵਿਖੇ 2026 FIFA ਵਰਲਡ ਕੱਪ ਦੀ ਓਪਨਿੰਗ ਸੈਰੇਮਨੀ ਵਿੱਚ ਟਰੂਡੋ ਦੇ ਸ਼ਾਮਲ ਹੋਣ ਨਾਲ ਸ਼ੁਰੂ ਹੋਇਆ। ਯੂਨਾਈਟਿਡ ਸਟੇਟਸ ਬਨਾਮ ਪੈਰਾਗੁਏ ਮੈਚ ਤੋਂ ਪਹਿਲਾਂ ਹੋਏ ਇਸ ਈਵੈਂਟ ਵਿੱਚ ਕੈਟੀ ਪੇਰੀ ਮੁੱਖ ਕਲਾਕਾਰ ਸੀ; ਉਨ੍ਹਾਂ ਨੇ ਪਿੱਚ 'ਤੇ 10 ਸਾਲ ਦੇ ਨਾਰਵੇਜੀਅਨ ਸਿੰਗਰ ਟਿਅਸ ਲੁਕਾ ਨਾਲ ਆਪਣਾ ਸੁਪਰਹਿੱਟ ਗੀਤ "ਵੰਡਰ" ਗਾਇਆ।

ਪਰਫਾਰਮੈਂਸ ਦੌਰਾਨ ਟਰੂਡੋ ਨੂੰ ਸਟੇਡੀਅਮ ਦੇ ਇੱਕ ਕਿਨਾਰੇ ਖੜ੍ਹੇ ਹੋ ਕੇ ਕੈਟੀ ਦਾ ਉਤਸ਼ਾਹ ਵਧਾਉਂਦੇ ਹੋਏ ਦੇਖਿਆ ਗਿਆ। ਸ਼ੋਅ ਖ਼ਤਮ ਹੋਣ ਤੋਂ ਬਾਅਦ ਪੇਰੀ ਦੌੜ ਕੇ ਉਨ੍ਹਾਂ ਦੀਆਂ ਬਾਂਹਾਂ ਵਿੱਚ ਆ ਗਈ ਅਤੇ ਦੋਵਾਂ ਨੇ ਸਭ ਦੇ ਸਾਹਮਣੇ ਕਿਸ ਕੀਤਾ। ਬਾਅਦ ਵਿੱਚ ਉਨ੍ਹਾਂ ਨੂੰ ਸਟੈਂਡਸ ਵਿੱਚ ਇੱਕ-ਦੂਜੇ ਦਾ ਹੱਥ ਫੜੇ ਹੋਏ ਵੀ ਦੇਖਿਆ ਗਿਆ। ਇਹ ਪਲ ਸੋਸ਼ਲ ਮੀਡੀਆ 'ਤੇ ਜੰਗਲ ਦੀ ਅੱਗ ਵਾਂਗ ਵਾਇਰਲ ਹੋ ਗਏ।