- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਸੋਮਾਲੀਆ 'ਚ ਸਮੁੰਦਰੀ ਲੁਟੇਰਿਆਂ ਦਾ ਕਹਿਰ! ਰੈਸਕਿਊ ਤੋਂ ਪਹਿਲਾਂ 5 ਕਰੂ ਮੈਂਬਰਾਂ ਦੀ ਹੱਤਿਆ, ਮ੍ਰਿਤਕਾਂ 'ਚ ਇੱਕ ਭਾਰਤੀ ਵੀ ਸ਼ਾਮਲ
ਸੋਮਾਲੀਆ ਦੇ ਸਮੁੰਦਰੀ ਲੁਟੇਰਿਆਂ ਨੇ ਐਮਟੀ ਆਨਰ 25 ਟੈਂਕਰ ਦੇ ਪੰਜ ਕਰੂ ਮੈਂਬਰਾਂ ਦੀ ਹੱਤਿਆ ਕਰ ਦਿੱਤੀ, ਜਿਨ੍ਹਾਂ ’ਚ ਇੱਕ ਭਾਰਤੀ ਵੀ ਸ਼ਾਮਲ ਸੀ। ਇਹ ਘਟਨਾ ਪੁੰਟਲੈਂਡ ਦੇ ਸੁਰੱਖਿਆ ਬਲਾਂ ਵੱਲੋਂ ਉਨ੍ਹਾਂ ਨੂੰ ਬਚਾਉਣ ਤੋਂ ਪਹਿਲਾਂ ਵਾਪਰੀ।
Posted By Paramjit Kaur
Publish Date: Wed, 30 Sep 2026 11:46 AM (IST)
Updated Date: Wed, 30 Sep 2026 11:48 AM (IST)
ਡਿਜੀਟਲ ਡੈਸਕ, ਮੋਗਾਦਿਸ਼ੂ : ਸੋਮਾਲੀਆ ਦੇ ਪੁੰਟਲੈਂਡ ਦੇ ਅਧਿਕਾਰੀਆਂ ਨੇ ਮੰਗਲਵਾਰ ਨੂੰ ਦੱਸਿਆ ਕਿ ਸੁਰੱਖਿਆ ਬਲਾਂ ਵੱਲੋਂ ਬਚਾਏ ਜਾਣ ਤੋਂ ਪਹਿਲਾਂ ਸੋਮਾਲੀ ਸਮੁੰਦਰੀ ਲੁਟੇਰਿਆਂ ਨੇ ਅਗਵਾ ਕੀਤੇ ਗਏ ਐਮਟੀ ਆਨਰ 25 ਪੈਟਰੋਲੀਅਮ ਉਤਪਾਦ ਟੈਂਕਰ ਦੇ ਪੰਜ ਕਰੂ ਮੈਂਬਰਾਂ ਦੀ ਹੱਤਿਆ ਕਰ ਦਿੱਤੀ। ਪੁੰਟਲੈਂਡ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਮੰਗਲਵਾਰ ਨੂੰ ਇੱਕ ਹੋਰ ਜਹਾਜ਼ ਨੂੰ ਵੀ ਬਚਾਇਆ, ਜਿਸ ਨੂੰ ਮਈ ’ਚ ਅਗਵਾ ਕੀਤਾ ਗਿਆ ਸੀ। 17 ਕਰੂ ਮੈਂਬਰਾਂ ਵਾਲੇ ਇਸ ਜਹਾਜ਼ ’ਤੇ ਅਪ੍ਰੈਲ ’ਚ ਸਮੁੰਦਰੀ ਲੁਟੇਰਿਆਂ ਨੇ ਕਬਜ਼ਾ ਕਰ ਲਿਆ ਸੀ। ਇਹ ਉਹ ਸਮਾਂ ਸੀ ਜਦੋਂ ਸੋਮਾਲੀਆ ’ਚ ਸਮੁੰਦਰੀ ਲੁੱਟ ਦੀਆਂ ਘਟਨਾਵਾਂ ਮੁੜ ਵਧਣ ਲੱਗੀਆਂ ਸਨ।
16 ਸਮੁੰਦਰੀ ਲੁਟੇਰੇ ਵੀ ਕੀਤੇ ਗ੍ਰਿਫ਼ਤਾਰ
ਜਾਣਕਾਰਾਂ ਦਾ ਮੰਨਣਾ ਹੈ ਕਿ ਇਸ ਦੀ ਇੱਕ ਵਜ੍ਹਾ ਈਰਾਨ ਜੰਗ ਦਾ ਪ੍ਰਭਾਵ ਹੈ, ਜਿਸ ਕਾਰਨ ਤੇਲ ਦੀਆਂ ਕੀਮਤਾਂ ’ਚ ਵਾਧਾ ਹੋਇਆ ਹੈ ਤੇ ਇਸੇ ਕਰਕੇ ਲੁਟੇਰੇ ਤੇਲ ਟੈਂਕਰਾਂ ਨੂੰ ਨਿਸ਼ਾਨਾ ਬਣਾ ਰਹੇ ਹਨ। ਪੁੰਟਲੈਂਡ ਦੇ ਸੂਚਨਾ ਮੰਤਰਾਲੇ ਨੇ ਇੱਕ ਬਿਆਨ ’ਚ ਕਿਹਾ ਕਿ ਰੈਸਕਿਊ ਆਪਰੇਸ਼ਨ ਦੌਰਾਨ ਜਹਾਜ਼ ਨੂੰ ਸਫਲਤਾਪੂਰਵਕ ਛੁਡਾ ਲਿਆ ਗਿਆ ਤੇ 16 ਸਮੁੰਦਰੀ ਲੁਟੇਰਿਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।
ਮਰਨ ਵਾਲਿਆਂ ’ਚ ਇੱਕ ਭਾਰਤੀ ਵੀ ਸ਼ਾਮਲ
ਬਿਆਨ ’ਚ ਕਿਹਾ ਗਿਆ, "ਆਪਰੇਸ਼ਨ ਸ਼ੁਰੂ ਹੋਣ ਤੋਂ ਪਹਿਲਾਂ ਜਹਾਜ਼ ’ਤੇ ਮੌਜੂਦ ਸਮੁੰਦਰੀ ਲੁਟੇਰਿਆਂ ਨੇ ਕਰੂ ਦੇ ਪੰਜ ਮੈਂਬਰਾਂ ਦੀ ਹੱਤਿਆ ਕਰ ਦਿੱਤੀ। ਮਾਰੇ ਗਏ ਲੋਕਾਂ ’ਚ ਤਿੰਨ ਪਾਕਿਸਤਾਨੀ, ਇੱਕ ਮਿਆਂਮਾਰ ਤੇ ਇੱਕ ਭਾਰਤੀ ਨਾਗਰਿਕ ਸ਼ਾਮਲ ਸੀ।" ਬਿਆਨ ਮੁਤਾਬਕ, ਕਰੂ ਦੇ ਚਾਰ ਮੈਂਬਰ—ਤਿੰਨ ਪਾਕਿਸਤਾਨੀ ਤੇ ਇੱਕ ਭਾਰਤੀ—ਜ਼ਖ਼ਮੀ ਹੋ ਗਏ।
ਇਹ ਰੈਸਕਿਊ ਆਪਰੇਸ਼ਨ ਪਿਛਲੇ ਹਫ਼ਤੇ ਹੋਏ ਇੱਕ ਹੋਰ ਬਚਾਅ ਅਭਿਆਨ ਤੋਂ ਬਾਅਦ ਕੀਤਾ ਗਿਆ ਹੈ। ਇਸ ਆਪਰੇਸ਼ਨ ’ਚ ਪੁੰਟਲੈਂਡ ਦੀ ਮੈਰੀਟਾਈਮ ਪੁਲਿਸ ਫੋਰਸ ਨੇ ਅਮਰੀਕਾ ਵੱਲੋਂ ਪਾਬੰਦੀਸ਼ੁਦਾ ਟੈਂਕਰ ਸਿਬੁ 1 ਨੂੰ ਛੁਡਾਇਆ ਸੀ। ਇਸ ਟੈਂਕਰ ਨੂੰ ਸੋਮਾਲੀ ਸਮੁੰਦਰੀ ਲੁਟੇਰਿਆਂ ਨੇ ਅਗਸਤ ’ਚ ਹਾਈਜੈਕ ਕਰ ਲਿਆ ਸੀ। ਇਨ੍ਹਾਂ ਦੋ ਰੈਸਕਿਊ ਆਪਰੇਸ਼ਨਾਂ ਤੋਂ ਬਾਅਦ ਅਗਸਤ ਦੇ ਅੰਤ ਤੱਕ ਸੋਮਾਲੀਆ ਦੇ ਤੱਟ 'ਤੇ ਸਮੁੰਦਰੀ ਲੁਟੇਰਿਆਂ ਦੇ ਕਬਜ਼ੇ ’ਚ ਰਹੇ ਛੇ ਜਹਾਜ਼ਾਂ ਵਿੱਚੋਂ ਕੁੱਲ ਪੰਜ ਜਹਾਜ਼ ਹੁਣ ਛੁਡਾਏ ਜਾ ਚੁੱਕੇ ਹਨ।
2008 ਤੋਂ 2014 ਦੇ ਦਰਮਿਆਨ ਸਮੁੰਦਰੀ ਲੁੱਟ ਦੀ ਪਿਛਲੀ ਲਹਿਰ ਨੇ ਦੁਨੀਆ ਦੇ ਸਭ ਤੋਂ ਵਿਅਸਤ ਸ਼ਿਪਿੰਗ ਰੂਟਾਂ ਵਿੱਚੋਂ ਇੱਕ ਨੂੰ ਪ੍ਰਭਾਵਿਤ ਕੀਤਾ ਸੀ। ਇਸ ਕਾਰਨ ਗਲੋਬਲ ਅਰਥਵਿਵਸਥਾ ਨੂੰ ਅਰਬਾਂ ਡਾਲਰ ਦਾ ਨੁਕਸਾਨ ਹੋਇਆ ਸੀ ਤੇ ਫਿਰੌਤੀ ਵਜੋਂ ਕਰੋੜਾਂ ਡਾਲਰ ਦਾ ਭੁਗਤਾਨ ਕਰਨਾ ਪਿਆ ਸੀ।