- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
OpenAI ਦੇ ਦਫ਼ਤਰ ’ਚ ਜਾਸੂਸੀ ਕਰ ਰਿਹਾ ਸੀ ਸਾਊਦੀ ਇੰਜੀਨੀਅਰ, ਕਾਨਫਰੰਸ ਰੂਮ ’ਚੋਂ ਮਿਲਿਆ ਗੁਪਤ ਰਿਕਾਰਡਿੰਗ ਡਿਵਾਈਸ
ਸਾਊਦੀ ਅਰਬ ਦੇ 35 ਸਾਲਾ ਇੰਜੀਨੀਅਰ ਅਬਦੁਲ ਰਹਿਮਾਨ ਅਲਫੋਜ਼ਾਨ ਨੂੰ 9 ਅਕਤੂਬਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਉਸ ’ਤੇ OpenAI ਦੇ ਦਫ਼ਤਰ ਦੇ ਕਾਨਫਰੰਸ ਰੂਮ ’ਚ ਲੱਗੇ ਟੈਲੀਵਿਜ਼ਨ ਦੇ ਪਿੱਛੇ ਟਾਇਲਟ ਪੇਪਰ ’ਚ ਲਪੇਟ ਕੇ ਇੱਕ ਗੁਪਤ ਰਿਕਾਰਡਿੰਗ ਡਿਵਾਈਸ ਲਗਾਉਣ ਦਾ ਦੋਸ਼ ਹੈ।
Posted By Paramjit Kaur
Publish Date: Wed, 14 Oct 2026 10:46 AM (IST)
Updated Date: Wed, 14 Oct 2026 10:50 AM (IST)
ਡਿਜੀਟਲ ਡੈਸਕ, ਵਾਸ਼ਿੰਗਟਨ। OpenAI ਦੇ ਸੈਨ ਫਰਾਂਸਿਸਕੋ ਸਥਿਤ ਦਫ਼ਤਰ ’ਚ ਜਾਸੂਸੀ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਸਾਊਦੀ ਇੰਜੀਨੀਅਰ ਨੂੰ ਗੁਪਤ ਰਿਕਾਰਡਿੰਗ ਡਿਵਾਈਸ ਲਗਾਉਣ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਦੇ ਖੇਤਰ ’ਚ ਦੁਨੀਆ ਭਰ ਦੀਆਂ ਕੰਪਨੀਆਂ ਵਿਚਾਲੇ ਚੱਲ ਰਹੀ ਮੁਕਾਬਲੇਬਾਜ਼ੀ ਦਰਮਿਆਨ AI ਕੰਪਨੀ OpenAI ਦੇ ਸੈਨ ਫਰਾਂਸਿਸਕੋ ਸਥਿਤ ਦਫ਼ਤਰ ’ਚ ਸੁਰੱਖਿਆ ’ਚ ਵੱਡੀ ਚੂਕ ਤੇ ਜਾਸੂਸੀ ਦੀ ਕੋਸ਼ਿਸ਼ ਦਾ ਮਾਮਲਾ ਸਾਹਮਣੇ ਆਇਆ ਹੈ।
ਅਮਰੀਕੀ ਨਿਆਂ ਵਿਭਾਗ ਤੇ ਫੈਡਰਲ ਸਰਕਾਰੀ ਵਕੀਲਾਂ ਮੁਤਾਬਕ, ਸਾਊਦੀ ਅਰਬ ਦੇ 35 ਸਾਲਾ ਇੰਜੀਨੀਅਰ ਅਬਦੁਲ ਰਹਿਮਾਨ ਅਲਫੋਜ਼ਾਨ ਨੂੰ 9 ਅਕਤੂਬਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਉਸ ’ਤੇ OpenAI ਦੇ ਦਫ਼ਤਰ ਦੇ ਕਾਨਫਰੰਸ ਰੂਮ ’ਚ ਲੱਗੇ ਟੈਲੀਵਿਜ਼ਨ ਦੇ ਪਿੱਛੇ ਟਾਇਲਟ ਪੇਪਰ ’ਚ ਲਪੇਟ ਕੇ ਇੱਕ ਗੁਪਤ ਰਿਕਾਰਡਿੰਗ ਡਿਵਾਈਸ ਲਗਾਉਣ ਦਾ ਦੋਸ਼ ਹੈ।
ਕਿਵੇਂ ਸਾਹਮਣੇ ਆਇਆ ਮਾਮਲਾ?
ਇਹ ਅਤਿ-ਆਧੁਨਿਕ ਰਿਕਾਰਡਿੰਗ ਡਿਵਾਈਸ ਪਿਛਲੇ ਮਹੀਨੇ ਦੇ ਅਖੀਰ ’ਚ ਸੁਰੱਖਿਆ ਟੀਮ ਦੇ ਹੱਥ ਲੱਗਾ ਸੀ। ਇਸ ਤੋਂ ਬਾਅਦ ਮਾਮਲੇ ਦਾ ਖ਼ੁਲਾਸਾ ਹੋਇਆ ਤੇ ਜਾਂਚ ਸਿੱਧੇ ਐੱਫਬੀਆਈ (FBI) ਨੂੰ ਸੌਂਪ ਦਿੱਤੀ ਗਈ। ਮੁਲਜ਼ਮ ਵਿਰੁੱਧ ਇਲੈਕਟ੍ਰਾਨਿਕ ਡਿਵਾਈਸ ਰਾਹੀਂ ਮੀਟਿੰਗਾਂ ਦੀਆਂ ਗੱਲਾਂ ਸੁਣਨ ਦੇ ਦੋਸ਼ ਹੇਠ ਕੇਸ ਦਰਜ ਕੀਤਾ ਗਿਆ ਹੈ। ਦੋਸ਼ ਸਾਬਤ ਹੋਣ ’ਤੇ ਉਸ ਨੂੰ ਪੰਜ ਸਾਲ ਤੱਕ ਦੀ ਕੈਦ ਤੇ ਭਾਰੀ ਜੁਰਮਾਨਾ ਹੋ ਸਕਦਾ ਹੈ। ![naidunia_image]()
ਅਮਰੀਕੀ ਨਿਆਂ ਵਿਭਾਗ (DOJ) ਦੇ ਬਿਆਨ ਅਨੁਸਾਰ, 35 ਸਾਲਾ ਇੰਜੀਨੀਅਰ ਅਬਦੁਲ ਰਹਿਮਾਨ ਅਲਫੋਜ਼ਾਨ ਜੁਲਾਈ 2025 ਤੋਂ OpenAI ’ਚ ਕੰਮ ਕਰ ਰਿਹਾ ਸੀ। ਉਸ ਨੇ ਇੱਕ USB ਰਿਕਾਰਡਿੰਗ ਡਿਵਾਈਸ ਨੂੰ ਟਾਇਲਟ ਪੇਪਰ ’ਚ ਲਪੇਟ ਕੇ ਕੰਪਨੀ ਦੇ 'ਐਗਜ਼ੀਕਿਊਟਿਵ ਕਾਨਫਰੰਸ ਰੂਮ' ’ਚ ਲੱਗੇ ਟੈਲੀਵਿਜ਼ਨ ਦੇ ਪਿੱਛੇ ਲੁਕਾ ਦਿੱਤਾ ਸੀ।
ਸੁਰੱਖਿਆ ਕੈਮਰਿਆਂ ’ਚ ਅਲਫੋਜ਼ਾਨ ਨੂੰ ਕਈ ਵਾਰ ਉਸ ਕਾਨਫਰੰਸ ਰੂਮ ਦੇ ਆਲੇ-ਦੁਆਲੇ ਸ਼ੱਕੀ ਢੰਗ ਨਾਲ ਘੁੰਮਦੇ ਦੇਖਿਆ ਗਿਆ। ਉਸ ਨੂੰ ਉੱਥੇ ਹੋਣ ਵਾਲੀਆਂ ਉੱਚ ਪੱਧਰੀ ਮੀਟਿੰਗਾਂ ’ਚ ਸ਼ਾਮਲ ਹੋਣ ਦੀ ਇਜਾਜ਼ਤ ਨਹੀਂ ਸੀ। ਅਧਿਕਾਰੀਆਂ ਦੀ ਲੋਕੇਸ਼ਨ ਟ੍ਰੈਕ ਕਰਨ ਵਰਗੀ ਸੰਵੇਦਨਸ਼ੀਲ ਜਾਣਕਾਰੀ ਵੀ ਜੁਟਾ ਰਿਹਾ ਸੀ
ਜਾਂਚ ਰਿਪੋਰਟ ਮੁਤਾਬਕ, ਉਸ ਨੇ OpenAI ਦੀਆਂ ਇਮਾਰਤਾਂ, ਮੀਟਿੰਗ ਰੂਮਾਂ, ਕੈਲੰਡਰਾਂ, ਮੀਟਿੰਗਾਂ ਦੇ ਸ਼ਡਿਊਲ ਤੇ ਸੀਨੀਅਰ ਅਧਿਕਾਰੀਆਂ ਦੀ ਲੋਕੇਸ਼ਨ ਟ੍ਰੈਕ ਕਰਨ ਵਰਗੀ ਸੰਵੇਦਨਸ਼ੀਲ ਜਾਣਕਾਰੀ ਇਕੱਠੀ ਕਰਨ ਲਈ ਇੱਕ ਵਿਸ਼ੇਸ਼ 'ਪ੍ਰੋਡਕਟੀਵਿਟੀ ਟੂਲ' ਦੀ ਵਰਤੋਂ ਕੀਤੀ ਸੀ। ਹਾਲਾਂਕਿ, ਹਾਲੇ ਇਹ ਸਪੱਸ਼ਟ ਨਹੀਂ ਹੋ ਸਕਿਆ ਕਿ ਰਿਕਾਰਡਿੰਗ ਡਿਵਾਈਸ ਰਾਹੀਂ ਕੋਈ ਜਾਣਕਾਰੀ ਇਕੱਠੀ ਕੀਤੀ ਜਾ ਸਕੀ ਸੀ ਜਾਂ ਨਹੀਂ। ਇੰਨਾ ਹੀ ਨਹੀਂ, ਅਲਫੋਜ਼ਾਨ ਦੇ ਜੀਵਨ ਸਾਥੀ ਨਾਲ ਜੁੜੇ ਇੱਕ ਚੈਟਬੋਟ ਖਾਤੇ ਦੀ ਜਾਂਚ ਦੌਰਾਨ ਰਿਮੋਟ ਆਡੀਓ ਰਿਕਾਰਡਿੰਗ ਤੇ ਮੈਮੋਰੀ ਕਾਰਡ ਦੇ ਡੇਟਾ ਨੂੰ ਐਨਕ੍ਰਿਪਟ ਕਰਨ ਨਾਲ ਸਬੰਧਤ ਸਵਾਲਾਂ ਦੀ ਸਰਚ ਹਿਸਟਰੀ ਵੀ ਮਿਲੀ ਹੈ।
OpenAI ਨੇ ਕੀ ਕਿਹਾ?
OpenAI ਨੇ ਇੱਕ ਬਿਆਨ ’ਚ ਕਿਹਾ, “ਫਿਲਹਾਲ ਸਾਡੇ ਕੋਲ ਅਜਿਹਾ ਕੋਈ ਸੰਕੇਤ ਨਹੀਂ ਹੈ ਕਿ ਇਸ ਵਿਅਕਤੀ ਨੇ ਮਾਡਲ ਵੈਟਸ, ਸੋਰਸ ਕੋਡ ਜਾਂ ਗਾਹਕਾਂ ਦੇ ਡੇਟਾ ਤੱਕ ਗ਼ਲਤ ਤਰੀਕੇ ਨਾਲ ਪਹੁੰਚ ਬਣਾਈ ਜਾਂ ਉਨ੍ਹਾਂ ਨੂੰ ਚੋਰੀ ਕੀਤਾ ਹੋਵੇ।” ਅਲਫੋਜ਼ਾਨ ਨੂੰ 19 ਅਕਤੂਬਰ ਨੂੰ ਫੈਡਰਲ ਅਦਾਲਤ ’ਚ ਸੁਣਵਾਈ ਲਈ ਪੇਸ਼ ਹੋਣਾ ਹੈ।