'ਕਿਰਪਾ ਕਰਕੇ ਕੁਝ ਕਰੋ', ਨਿਊਯਾਰਕ ’ਚ ਜਹਾਜ਼ ਹਾਦਸੇ ਤੋਂ ਪਹਿਲਾਂ ਪਾਇਲਟਾਂ ਨੇ ਦਿੱਤੀ ਸੀ ਚਿਤਾਵਨੀ

"ਕਿਰਪਾ ਕਰਕੇ ਕੁਝ ਕਰੋ..."

ਪਿਛਲੇ ਦੋ ਸਾਲਾਂ ਦੇ ਸਰਕਾਰੀ ਰਿਕਾਰਡਾਂ ਅਤੇ ਨਾਸਾ ਦੀਆਂ ਹਵਾਬਾਜ਼ੀ ਸੁਰੱਖਿਆ ਰਿਪੋਰਟਾਂ ਅਨੁਸਾਰ, ਇੱਕ ਪਾਇਲਟ ਨੇ ਪਿਛਲੀ ਗਰਮੀਆਂ ਵਿੱਚ ਨਾਸਾ ਦੀ ਸੁਰੱਖਿਆ ਰਿਪੋਰਟਿੰਗ ਪ੍ਰਣਾਲੀ ਨੂੰ ਭੇਜੀ ਗਈ ਲਗਪਗ ਇੱਕ ਦਰਜਨ ਰਿਪੋਰਟਾਂ ਵਿੱਚੋਂ ਇੱਕ ਵਿੱਚ ਬਹੁਤ ਹੀ ਗੰਭੀਰ ਚਿਤਾਵਨੀ ਦਿੰਦੇ ਹੋਏ ਲਿਖਿਆ ਸੀ— "ਕਿਰਪਾ ਕਰਕੇ ਕੁਝ ਕਰੋ"

ਇਸ ਰਿਪੋਰਟ ਵਿੱਚ ਪਾਇਲਟ ਨੇ ਇੱਕ ਅਜਿਹੀ ਘਟਨਾ ਦਾ ਜ਼ਿਕਰ ਕੀਤਾ ਸੀ ਜਿਸ ਵਿੱਚ ਜਹਾਜ਼ ਟਕਰਾਉਣੋਂ ਵਾਲ-ਵਾਲ ਬਚਿਆ ਸੀ। ਪਾਇਲਟ ਨੇ ਦੱਸਿਆ ਕਿ ਉਸ ਸਮੇਂ ਏਅਰ ਟ੍ਰੈਫਿਕ ਕੰਟਰੋਲਰ ਇੱਕੋ ਵੇਲੇ ਕਈ ਜਹਾਜ਼ਾਂ ਨੂੰ ਸਹੀ ਦਿਸ਼ਾ-ਨਿਰਦੇਸ਼ ਦੇਣ ਵਿੱਚ ਪੂਰੀ ਤਰ੍ਹਾਂ ਅਸਫਲ ਰਿਹਾ ਸੀ।

ਪਾਇਲਟ ਨੇ ਚਿਤਾਵਨੀ ਦਿੰਦੇ ਹੋਏ ਕਿਹਾ ਸੀ ਕਿ, “ਤੂਫ਼ਾਨੀ ਦਿਨਾਂ ਵਿੱਚ, LGA (ਲਾਗੁਆਰਡੀਆ) ਦਾ ਮਾਹੌਲ ਬਿਲਕੁਲ ਉਸੇ ਤਰ੍ਹਾਂ ਦਾ ਲੱਗਣ ਲੱਗ ਪੈਂਦਾ ਹੈ ਜਿਵੇਂ ਜਨਵਰੀ 2025 ਵਿੱਚ ਵਾਸ਼ਿੰਗਟਨ ਡੀਸੀ ਦੀ ਪੋਟੋਮੈਕ ਨਦੀ ਦੇ ਉੱਪਰ ਹੋਈ ਹਵਾਈ ਟੱਕਰ ਤੋਂ ਪਹਿਲਾਂ DCA (ਰੋਨਾਲਡ ਰੀਗਨ ਨੈਸ਼ਨਲ ਏਅਰਪੋਰਟ) ਦਾ ਸੀ, ਜਿਸ ਵਿੱਚ 60 ਤੋਂ ਵੱਧ ਲੋਕ ਮਾਰੇ ਗਏ ਸਨ।”

ਕਦੋਂ ਹੋਇਆ ਹਾਦਸਾ?

ਜ਼ਿਕਰਯੋਗ ਹੈ ਕਿ ਐਤਵਾਰ ਦੇਰ ਰਾਤ ਲਾਗੁਆਰਡੀਆ ਏਅਰਪੋਰਟ 'ਤੇ ਏਅਰ ਕੈਨੇਡਾ ਦਾ ਜਹਾਜ਼ ਇੱਕ ਫਾਇਰ ਟਰੱਕ ਨਾਲ ਟਕਰਾ ਗਿਆ। ਇਹ ਦੁਰਘਟਨਾ ਰਨਵੇਅ 'ਤੇ ਉਦੋਂ ਵਾਪਰੀ ਜਦੋਂ ਫਾਇਰ ਟਰੱਕ ਨੂੰ ਰਨਵੇਅ ਪਾਰ ਕਰਨ ਦੀ ਇਜਾਜ਼ਤ ਦਿੱਤੀ ਗਈ ਸੀ। ਹਾਲਾਂਕਿ ਅਖੀਰ ਵਿੱਚ ਟਰੱਕ ਨੂੰ ਰੋਕਣ ਦੀ ਪੂਰੀ ਕੋਸ਼ਿਸ਼ ਕੀਤੀ ਗਈ, ਪਰ ਉਦੋਂ ਤੱਕ ਬਹੁਤ ਦੇਰ ਹੋ ਚੁੱਕੀ ਸੀ ਅਤੇ ਜਹਾਜ਼ ਟਰੱਕ ਨਾਲ ਜਾ ਟਕਰਾਇਆ।

ਆਪਸ ਵਿੱਚ ਟਕਰਾ ਗਏ ਦੋ ਜਹਾਜ਼

ਦੱਸ ਦੇਈਏ ਕਿ ਬੀਤੇ ਸਾਲ ਅਕਤੂਬਰ ਵਿੱਚ ਟੈਕਸੀ-ਵੇਅ 'ਤੇ ਡੇਲਟਾ ਏਅਰਲਾਈਨਜ਼ ਦੇ ਦੋ ਜਹਾਜ਼ ਆਪਸ ਵਿੱਚ ਟਕਰਾ ਗਏ ਸਨ, ਜਿਸ ਵਿੱਚ ਇੱਕ ਵਿਅਕਤੀ ਜ਼ਖ਼ਮੀ ਹੋ ਗਿਆ ਸੀ। ਇੰਨਾ ਹੀ ਨਹੀਂ, ਇਸੇ ਹਫ਼ਤੇ ਨੇਵਾਰਕ ਵਿੱਚ ਵੀ ਇੱਕ ਅਜਿਹਾ ਹੀ ਭਿਆਨਕ ਹਾਦਸਾ ਹੁੰਦੇ-ਹੁੰਦੇ ਬਚਿਆ, ਜਦੋਂ ਦੋ ਜਹਾਜ਼ ਆਪਸ ਵਿੱਚ ਮਿਲਦੇ ਹੋਏ ਰਨਵੇਅ 'ਤੇ ਉਤਰਨ ਦੀ ਕੋਸ਼ਿਸ਼ ਕਰ ਰਹੇ ਸਨ।

ਸੀਐਨਐਨ ਦੀ ਰਿਪੋਰਟ ਅਨੁਸਾਰ, ਐਤਵਾਰ ਨੂੰ ਹੋਏ ਇਸ ਘਾਤਕ ਹਾਦਸੇ ਤੋਂ ਪਹਿਲਾਂ ਦੇ ਦੋ ਸਾਲਾਂ ਵਿੱਚ, ਲਾਗੁਆਰਡੀਆ ਵਿੱਚ ਕਈ ਅਜਿਹੇ ਮਾਮਲੇ ਸਾਹਮਣੇ ਆਏ ਸਨ ਜਿਨ੍ਹਾਂ ਵਿੱਚ ਟੱਕਰ ਹੁੰਦੇ-ਹੁੰਦੇ ਬਚੀ ਸੀ। ਇਹ ਘਟਨਾਵਾਂ ਸਿੱਧੇ ਤੌਰ 'ਤੇ ਏਅਰਲਾਈਨਜ਼ ਕਰਮਚਾਰੀਆਂ ਅਤੇ ਪ੍ਰਬੰਧਕਾਂ ਦੀ ਲਾਪਰਵਾਹੀ ਨੂੰ ਉਜਾਗਰ ਕਰਦੀਆਂ ਹਨ।