ਕਦੋਂ ਠੀਕ ਹੋਵੇਗਾ ਮਾਈਕ੍ਰੋਸਾਫਟ ਦਾ ਸਰਵਰ? ਕੰਪਨੀ ਨੇ ਮੰਨਿਆ- ਉਮੀਦ ਮੁਤਾਬਕ ਕੰਮ ਨਹੀਂ ਕਰ ਰਹੇ ਸੁਧਾਰ ਲਈ ਕੀਤੇ ਬਦਲਾਅ

ਡਿਜੀਟਲ ਡੈਸਕ, ਵਾਸ਼ਿੰਗਟਨ: ਮਾਈਕ੍ਰੋਸਾਫਟ ਵਿੱਚ ਚੱਲ ਰਹੀ ਆਊਟੇਜ (ਸੇਵਾਵਾਂ ਵਿੱਚ ਰੁਕਾਵਟ) ਨੂੰ ਠੀਕ ਹੋਣ ਵਿੱਚ ਉਮੀਦ ਨਾਲੋਂ ਵੱਧ ਸਮਾਂ ਲੱਗ ਸਕਦਾ ਹੈ। ਇੱਕ ਤਾਜ਼ਾ ਅਪਡੇਟ ਵਿੱਚ ਕੰਪਨੀ ਨੇ ਕਿਹਾ ਹੈ ਕਿ ਸਮੱਸਿਆ ਨੂੰ ਸੁਧਾਰਨ ਲਈ ਕੀਤੇ ਜਾ ਰਹੇ ਯਤਨ ਉਮੀਦ ਮੁਤਾਬਕ ਸਫ਼ਲ ਨਹੀਂ ਹੋ ਰਹੇ। ਇਸ ਲਈ ਕੰਪਨੀ ਹੁਣ ਹੋਰ ਬਦਲਵੇਂ ਤਰੀਕਿਆਂ ਦੀ ਭਾਲ ਕਰ ਰਹੀ ਹੈ, ਜਿਨ੍ਹਾਂ ਨੂੰ ਲਾਗੂ ਕੀਤਾ ਜਾ ਸਕੇ।

ਮਾਈਕ੍ਰੋਸਾਫਟ 365 ਸਟੇਟਸ ਨੇ ਆਪਣੇ ਤਾਜ਼ਾ ਅਪਡੇਟ ਵਿੱਚ ਐਕਸ ’ਤੇ ਦੱਸਿਆ, "ਅਸੀਂ ਸੇਵਾ ਨੂੰ ਬਿਹਤਰ ਬਣਾਉਣ ਲਈ ਕੀਤੇ ਗਏ ਬਦਲਾਵਾਂ ਦੀ ਸਥਿਤੀ ਦੀ ਜਾਂਚ ਕੀਤੀ ਹੈ ਅਤੇ ਪਾਇਆ ਹੈ ਕਿ ਇਹ ਬਦਲਾਅ ਉਮੀਦ ਮੁਤਾਬਕ ਕੰਮ ਨਹੀਂ ਕਰ ਰਹੇ।" ਕੰਪਨੀ ਨੇ ਅੱਗੇ ਕਿਹਾ, "ਅਸੀਂ ਅਜਿਹੇ ਬਦਲਵੇਂ ਤਰੀਕਿਆਂ ਦੀ ਭਾਲ ਕਰ ਰਹੇ ਹਾਂ, ਜਿਨ੍ਹਾਂ ਨੂੰ ਲਾਗੂ ਕਰ ਕੇ ਸਮਰੱਥਾ ਵਧਾਈ ਜਾ ਸਕੇ ਅਤੇ ਟ੍ਰੈਫਿਕ ਮੈਨੇਜਮੈਂਟ ਵਿੱਚ ਆ ਰਹੀਆਂ ਲਗਾਤਾਰ ਸਮੱਸਿਆਵਾਂ ਨਾਲ ਨਜਿੱਠਿਆ ਜਾ ਸਕੇ।"

'ਉਮੀਦ ਮੁਤਾਬਕ ਨਹੀਂ ਮਿਲੇ ਨਤੀਜੇ'

ਪੋਸਟ ਵਿੱਚ ਕਿਹਾ ਗਿਆ, "ਅਸੀਂ ਸੇਵਾ ਨੂੰ ਬਿਹਤਰ ਬਣਾਉਣ ਲਈ ਕੀਤੇ ਗਏ ਬਦਲਾਵਾਂ ਦੀ ਸਥਿਤੀ ’ਤੇ ਨਜ਼ਰ ਰੱਖੀ ਹੈ ਅਤੇ ਪਾਇਆ ਹੈ ਕਿ ਉਹ ਉਮੀਦ ਮੁਤਾਬਕ ਕੰਮ ਨਹੀਂ ਕਰ ਰਹੇ। ਅਸੀਂ ਅਜਿਹੇ ਹੋਰ ਬਦਲਾਂ ’ਤੇ ਕੰਮ ਕਰ ਰਹੇ ਹਾਂ, ਜਿਨ੍ਹਾਂ ਨਾਲ ਟ੍ਰੈਫਿਕ ਮੈਨੇਜਮੈਂਟ ਵਿੱਚ ਆ ਰਹੀਆਂ ਲਗਾਤਾਰ ਸਮੱਸਿਆਵਾਂ ਦੇ ਵਿਚਕਾਰ ਸੇਵਾ ਦੀ ਸਮਰੱਥਾ ਵਧਾਈ ਜਾ ਸਕੇ।"

ਆਊਟੇਜ ਕਾਰਨ ਕੀ-ਕੀ ਹੋਇਆ ਪ੍ਰਭਾਵਿਤ?

ਮਾਈਕ੍ਰੋਸਾਫਟ 365 ਵਿੱਚ ਆਊਟੇਜ ਕਾਰਨ ਕੰਪਨੀ ਦੀਆਂ ਈਮੇਲ, ਵਰਕਪਲੇਸ ਕਮਿਊਨੀਕੇਸ਼ਨ ਅਤੇ ਕਲਾਊਡ ਆਧਾਰਿਤ ਸੇਵਾਵਾਂ ਪ੍ਰਭਾਵਿਤ ਹੋਈਆਂ ਹਨ। ਵੈੱਬਸਾਈਟ ਪ੍ਰਦਰਸ਼ਨ ਦੀ ਨਿਗਰਾਨੀ ਕਰਨ ਵਾਲੇ ਪਲੇਟਫਾਰਮ ਡਾਊਨਡਿਟੈਕਟਰ ਅਨੁਸਾਰ, ਇਸ ਸਮੱਸਿਆ ਦੇ ਸਿਖਰ ’ਤੇ ਦੁਨੀਆ ਭਰ ਦੇ ਲਗਪਗ 1,30,000 ਉਪਭੋਗਤਾਵਾਂ ਨੇ ਪਰੇਸ਼ਾਨੀਆਂ ਦੀ ਰਿਪੋਰਟ ਕੀਤੀ।

ਯੂਜ਼ਰਜ਼ ਨੇ ਆਊਟਲੁੱਕ ਤੱਕ ਪਹੁੰਚ ਕਰਨ, ਈਮੇਲ ਭੇਜਣ ਅਤੇ ਪ੍ਰਾਪਤ ਕਰਨ ਦੇ ਨਾਲ-ਨਾਲ ਇਨਬਾਕਸ ਲੋਡ ਕਰਨ ਵਿੱਚ ਦਿੱਕਤ ਆਉਣ ਦੀ ਜਾਣਕਾਰੀ ਦਿੱਤੀ। ਹਜ਼ਾਰਾਂ ਯੂਜ਼ਰਜ਼ ਨੇ ਟੀਮਜ਼, ਮਾਈਕ੍ਰੋਸਾਫਟ ਦੇ ਏਆਈ ਅਸਿਸਟੈਂਟ ਕੋਪਾਇਲਟ ਅਤੇ ਹੋਰ ਮਾਈਕ੍ਰੋਸਾਫਟ 365 ਐਪਲੀਕੇਸ਼ਨਾਂ ਵਿੱਚ ਵੀ ਰੁਕਾਵਟ ਆਉਣ ਦੀ ਸ਼ਿਕਾਇਤ ਕੀਤੀ।

ਆਊਟੇਜ ਬਾਰੇ ਆਪਣੀ ਸ਼ੁਰੂਆਤੀ ਪ੍ਰਤੀਕਿਰਿਆ ਵਿੱਚ ਮਾਈਕ੍ਰੋਸਾਫਟ ਨੇ ਕਿਹਾ ਸੀ ਕਿ ਉਹ ਉਨ੍ਹਾਂ ਰਿਪੋਰਟਾਂ ਦੀ ਜਾਂਚ ਕਰ ਰਿਹਾ ਹੈ, ਜਿਨ੍ਹਾਂ ਵਿੱਚ ਯੂਜ਼ਰਜ਼ ਨੂੰ ਵੱਖ-ਵੱਖ ਕਨੈਕਸ਼ਨ ਤਰੀਕਿਆਂ ਰਾਹੀਂ ਐਕਸਚੇਂਜ ਆਨਲਾਈਨ ਮੇਲਬਾਕਸ ਤੱਕ ਪਹੁੰਚਣ ਵਿੱਚ ਸਮੱਸਿਆ ਆ ਰਹੀ ਸੀ। ਬਾਅਦ ਵਿੱਚ ਸਾਫਟਵੇਅਰ ਕੰਪਨੀ ਨੇ ਪਾਇਆ ਕਿ ਕਨੈਕਟੀਵਿਟੀ ਸਬੰਧੀ ਗਲਤੀਆਂ ਦਾ ਸੰਭਾਵਿਤ ਕਾਰਨ ਉਸ ਦੇ ਇਨਫਰਾਸਟ੍ਰਕਚਰ ਦੇ ਇੱਕ ਹਿੱਸੇ ’ਤੇ ਵਧਿਆ ਹੋਇਆ ਲੋਡ ਸੀ।

ਰਿਪੋਰਟ ਮੁਤਾਬਕ, ਆਟੋਮੇਟਿਡ ਹੈਲਥ ਚੈੱਕ ਫੇਲ੍ਹ ਹੋਣ ਤੋਂ ਬਾਅਦ ਕਈ ਸਰਵਰਾਂ ਨੇ ਅਚਾਨਕ ਕੰਮ ਕਰਨਾ ਬੰਦ ਕਰ ਦਿੱਤਾ, ਜਿਸ ਕਾਰਨ ਬਾਕੀ ਬਚੇ ਇਨਫਰਾਸਟ੍ਰਕਚਰ ’ਤੇ ਵਾਧੂ ਟ੍ਰੈਫਿਕ ਦਾ ਬੋਝ ਪੈ ਗਿਆ। ਆਪਣੇ ਅਪਡੇਟ ਵਿੱਚ ਮਾਈਕ੍ਰੋਸਾਫਟ ਨੇ ਸਪੱਸ਼ਟ ਕੀਤਾ ਕਿ ਵਧਿਆ ਹੋਇਆ ਲੋਡ ਟ੍ਰੈਫਿਕ ਵਿੱਚ ਕੁੱਲ ਵਾਧੇ ਕਾਰਨ ਨਹੀਂ, ਸਗੋਂ ਸਰਵਰਾਂ ਦੀ ਉਪਲਬਧਤਾ ਘਟਣ ਕਰਕੇ ਸੀ।

ਸਰਕਾਰੀ ਵਿਭਾਗ ਵੀ ਹੋਏ ਪ੍ਰਭਾਵਿਤ

ਚੱਲ ਰਹੀ ਆਊਟੇਜ ਕਾਰਨ ਕਈ ਏਜੰਸੀਆਂ ਨੇ ਨੋਟਿਸ ਜਾਰੀ ਕਰ ਕੇ ਦੱਸਿਆ ਹੈ ਕਿ ਇਸ ਸਮੱਸਿਆ ਕਾਰਨ ਉਨ੍ਹਾਂ ਨੂੰ ਕੋਈ ਵੀ ਸੁਨੇਹਾ ਜਾਂ ਸੂਚਨਾ ਪ੍ਰਾਪਤ ਨਹੀਂ ਹੋ ਰਹੀ।

ਵਿਦੇਸ਼ ਮਾਮਲੇ ਅਤੇ ਵਪਾਰ ਵਿਭਾਗ (DFAT) ਨੇ ਆਪਣੀ ਵੈੱਬਸਾਈਟ ’ਤੇ ਬਿਆਨ ਜਾਰੀ ਕਰਦਿਆਂ ਕਿਹਾ, "ਮਾਈਕ੍ਰੋਸਾਫਟ ਵਿੱਚ ਆਈ ਵਿਸ਼ਵਵਿਆਪੀ ਖਰਾਬੀ ਕਾਰਨ ਪਾਬੰਦੀਆਂ (ਸੈਂਕਸ਼ਨ) ਨਾਲ ਸਬੰਧਤ ਸਾਰੀਆਂ ਜ਼ਰੂਰੀ ਪੁੱਛਗਿੱਛਾਂ ਲਈ ਆਸਟ੍ਰੇਲੀਅਨ ਸੈਂਕਸ਼ਨਜ਼ ਦਫ਼ਤਰ ਨਾਲ ਫੋਨ ਰਾਹੀਂ ਸੰਪਰਕ ਕਰੋ।"

ਖੇਤੀਬਾੜੀ, ਮੱਛੀ ਪਾਲਣ ਅਤੇ ਵਣ ਵਿਭਾਗ (DAFF) ਨੇ ਇੱਕ ਨੋਟਿਸ ਵਿੱਚ ਕਿਹਾ, "ਸ਼ੁੱਕਰਵਾਰ, 13 ਨਵੰਬਰ 2026 ਨੂੰ ਮਾਈਕ੍ਰੋਸਾਫਟ D365 ਵਿੱਚ ਆਈ ਖਰਾਬੀ ਕਾਰਨ DAFF ਦੀਆਂ ਮੈਸੇਜਿੰਗ ਸੇਵਾਵਾਂ ਵਿੱਚ ਵੱਡੇ ਪੱਧਰ ’ਤੇ ਰੁਕਾਵਟ ਆਈ ਹੈ। ਇਸ ਕਾਰਨ ਗਾਹਕ ਵਿਭਾਗ ਦੇ ਸਿਸਟਮ ’ਤੇ ਨਾ ਤਾਂ ਈਮੇਲ ਭੇਜ ਪਾ ਰਹੇ ਹਨ ਅਤੇ ਨਾ ਹੀ ਉੱਥੋਂ ਈਮੇਲ ਪ੍ਰਾਪਤ ਕਰ ਸਕਦੇ ਹਨ।"