ਕੀ ਹੌਲੀ ਹੋਣ ਵਾਲਾ ਹੈ ਤੁਹਾਡਾ ਇੰਟਰਨੈੱਟ? ਸਮੁੰਦਰ ਹੇਠਾਂ ਜੰਗ ਨੇ ਵਧਾਈ ਭਾਰਤ ਦੀ ਚਿੰਤਾ, 60% ਟ੍ਰੈਫਿਕ ਖ਼ਤਰੇ 'ਚ!

ਤਕਨਾਲੋਜੀ ਡੈਸਕ, ਨਵੀਂ ਦਿੱਲੀ। ਮੱਧ ਪੂਰਬ ਵਿੱਚ ਅਮਰੀਕਾ, ਇਜ਼ਰਾਈਲ ਅਤੇ ਈਰਾਨ ਵਿਚਾਲੇ ਚੱਲ ਰਿਹਾ ਤਣਾਅ ਹੁਣ ਸਿਰਫ਼ ਜ਼ਮੀਨ ਜਾਂ ਅਸਮਾਨ ਤੱਕ ਸੀਮਤ ਨਹੀਂ ਰਿਹਾ। ਇਸ ਦਾ ਖ਼ਤਰਾ ਹੁਣ ਸਮੁੰਦਰ ਦੀਆਂ ਗਹਿਰਾਈਆਂ ਤੱਕ ਪਹੁੰਚ ਗਿਆ ਹੈ। ਦੁਨੀਆ ਭਰ ਦੇ ਇੰਟਰਨੈੱਟ ਟ੍ਰੈਫਿਕ ਨੂੰ ਸੰਭਾਲਣ ਵਾਲੀਆਂ 'ਅੰਡਰਸੀ ਫਾਈਬਰ-ਓਪਟਿਕ ਕੇਬਲਾਂ' ਹੁਣ ਇਸ ਜੰਗੀ ਮਾਹੌਲ ਵਿੱਚ ਸਭ ਤੋਂ ਵੱਡੀ ਚਿੰਤਾ ਦਾ ਵਿਸ਼ਾ ਬਣ ਗਈਆਂ ਹਨ।

ਸੰਵੇਦਨਸ਼ੀਲ ਇਲਾਕਿਆਂ ਵਿੱਚੋਂ ਗੁਜ਼ਰਦਾ ਇੰਟਰਨੈੱਟ ਦਾ ਜਾਲ

ਇੰਟਰਨੈਸ਼ਨਲ ਟੈਲੀਕਮਿਊਨੀਕੇਸ਼ਨ ਯੂਨੀਅਨ (ITU) ਅਨੁਸਾਰ, ਦੁਨੀਆ ਦੇ ਲਗਭਗ 99 ਫੀਸਦੀ ਇੰਟਰਨੈੱਟ ਟ੍ਰੈਫਿਕ ਦਾ ਆਦਾਨ-ਪ੍ਰਦਾਨ ਸਮੁੰਦਰ ਦੇ ਹੇਠਾਂ ਵਿਛੀਆਂ ਇਨ੍ਹਾਂ ਕੇਬਲਾਂ ਰਾਹੀਂ ਹੁੰਦਾ ਹੈ। ਇਹ ਕੇਬਲਾਂ ਹੋਰਮੁਜ਼ ਸਟ੍ਰੇਟ ਅਤੇ ਲਾਲ ਸਾਗਰ (Red Sea) ਵਰਗੇ ਬੇਹੱਦ ਨਾਜ਼ੁਕ ਇਲਾਕਿਆਂ ਵਿੱਚੋਂ ਲੰਘਦੀਆਂ ਹਨ, ਜਿੱਥੇ ਮੌਜੂਦਾ ਹਾਲਾਤ ਲਗਾਤਾਰ ਖ਼ਤਰਨਾਕ ਹੁੰਦੇ ਜਾ ਰਹੇ ਹਨ।

ਇੰਟਰਨੈੱਟ ਬੁਨਿਆਦੀ ਢਾਂਚੇ 'ਤੇ ਖ਼ਤਰੇ ਦੇ ਬੱਦਲ

ਹਾਲਾਂਕਿ ਈਰਾਨ ਵੱਲੋਂ ਸਿੱਧੇ ਤੌਰ 'ਤੇ ਕੋਈ ਧਮਕੀ ਨਹੀਂ ਦਿੱਤੀ ਗਈ, ਪਰ ਲਾਲ ਸਾਗਰ ਵਿੱਚ ਸਰਗਰਮ ਹੂਤੀ ਵਿਦਰੋਹੀਆਂ ਨੇ ਕਈ ਵਾਰ ਇਨ੍ਹਾਂ ਕੇਬਲਾਂ ਨੂੰ ਕੱਟਣ ਦੀ ਚਿਤਾਵਨੀ ਦਿੱਤੀ ਹੈ। ਇਹ ਕੇਬਲਾਂ ਫਾਈਬਰ-ਓਪਟਿਕ ਕੋਰ, ਤਾਂਬੇ ਦੀ ਵਾਇਰਿੰਗ ਅਤੇ ਕਈ ਸੁਰੱਖਿਆ ਪਰਤਾਂ ਨਾਲ ਬਣੀਆਂ ਹੁੰਦੀਆਂ ਹਨ, ਜੋ ਹਰ ਸਕਿੰਟ ਭਾਰੀ ਮਾਤਰਾ ਵਿੱਚ ਡਾਟਾ ਟ੍ਰਾਂਸਫਰ ਕਰਦੀਆਂ ਹਨ। ਇਨ੍ਹਾਂ ਨੂੰ ਨੁਕਸਾਨ ਪਹੁੰਚਣ ਦਾ ਮਤਲਬ ਹੈ ਗਲੋਬਲ ਸੰਚਾਰ ਪ੍ਰਣਾਲੀ ਦਾ ਹਿੱਲ ਜਾਣਾ।

ਭਾਰਤ ਲਈ ਚਿੰਤਾਜਨਕ ਸਥਿਤੀ

ਭਾਰਤ ਲਈ ਇਹ ਅਲਰਟ ਬਹੁਤ ਮਹੱਤਵਪੂਰਨ ਹੈ ਕਿਉਂਕਿ ਦੇਸ਼ ਦਾ ਲਗਭਗ 60 ਫੀਸਦੀ ਇੰਟਰਨੈੱਟ ਟ੍ਰੈਫਿਕ ਮੁੰਬਈ ਤੋਂ ਯੂਰਪ ਜਾਣ ਵਾਲੇ ਉਸੇ ਸਮੁੰਦਰੀ ਰੂਟ 'ਤੇ ਨਿਰਭਰ ਹੈ, ਜੋ ਇਸ ਜੰਗੀ ਖੇਤਰ ਵਿੱਚੋਂ ਗੁਜ਼ਰਦਾ ਹੈ। ਬਾਕੀ ਬਚਿਆ ਟ੍ਰੈਫਿਕ ਚੇਨੱਈ ਤੋਂ ਸਿੰਗਾਪੁਰ ਅਤੇ ਪ੍ਰਸ਼ਾਂਤ ਮਹਾਂਸਾਗਰ ਰਾਹੀਂ ਜਾਂਦਾ ਹੈ। ਅਜਿਹੇ ਵਿੱਚ ਭਾਰਤ ਦੀ ਇੰਟਰਨੈੱਟ ਕਨੈਕਟੀਵਿਟੀ ਦਾ ਵੱਡਾ ਹਿੱਸਾ ਸਿੱਧੇ ਤੌਰ 'ਤੇ ਭੂ-ਰਾਜਨੀਤਿਕ ਜੋਖਮ ਦੇ ਘੇਰੇ ਵਿੱਚ ਆ ਗਿਆ ਹੈ।

ਕੀ ਇੰਟਰਨੈੱਟ ਦੀ ਰਫ਼ਤਾਰ ਹੋਵੇਗੀ ਹੌਲੀ?

ਜੇਕਰ ਇਨ੍ਹਾਂ ਕੇਬਲਾਂ ਨੂੰ ਕੋਈ ਨੁਕਸਾਨ ਪਹੁੰਚਦਾ ਹੈ, ਤਾਂ ਇੰਟਰਨੈੱਟ ਪੂਰੀ ਤਰ੍ਹਾਂ ਬੰਦ ਨਹੀਂ ਹੋਵੇਗਾ ਕਿਉਂਕਿ ਨੈੱਟਵਰਕ ਕਈ ਬਦਲਵੇਂ ਰਸਤਿਆਂ ਨਾਲ ਜੁੜਿਆ ਹੁੰਦਾ ਹੈ। ਹਾਲਾਂਕਿ, ਟ੍ਰੈਫਿਕ ਨੂੰ ਦੂਜੇ ਰਸਤਿਆਂ 'ਤੇ ਡਾਇਵਰਟ ਕਰਨ ਨਾਲ ਬਾਕੀ ਨੈੱਟਵਰਕਾਂ 'ਤੇ ਦਬਾਅ ਵਧ ਜਾਵੇਗਾ, ਜਿਸ ਕਾਰਨ ਇੰਟਰਨੈੱਟ ਦੀ ਰਫ਼ਤਾਰ ਬਹੁਤ ਜ਼ਿਆਦਾ ਹੌਲੀ ਹੋ ਸਕਦੀ ਹੈ। ਇਹ ਸਥਿਤੀ ਡਿਜੀਟਲ ਬੈਂਕਿੰਗ, ਆਈ.ਟੀ. ਸੇਵਾਵਾਂ ਅਤੇ ਆਮ ਉਪਭੋਗਤਾਵਾਂ ਲਈ ਵੱਡੀ ਮੁਸੀਬਤ ਖੜ੍ਹੀ ਕਰ ਸਕਦੀ ਹੈ।