ਘਰ ਜਾਂ ਦਫ਼ਤਰ ਵਿੱਚ ਕਿਹੜੀ ਸਿਮ ਦੇਵੇਗੀ ਸੁਪਰਫਾਸਟ ਇੰਟਰਨੈੱਟ? TRAI ਦੇ ਨਵੇਂ Network Anubhav ਰਾਹੀਂ ਮਿੰਟਾਂ ’ਚ ਕਰੋ ਚੈੱਕ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : ਟੈਲੀਕਾਮ ਰੈਗੂਲੇਟਰੀ ਅਥਾਰਟੀ ਆਫ਼ ਇੰਡੀਆ (TRAI) ਨੇ ਹਾਲ ਹੀ ਵਿੱਚ ‘Network Anubhav’ ਲਾਂਚ ਕੀਤਾ ਹੈ। ਇਹ ਇਕ ਅਜਿਹਾ ਆਨਲਾਈਨ ਪਲੇਟਫਾਰਮ ਹੈ, ਜਿਸ ਰਾਹੀਂ ਤੁਸੀਂ ਵੱਖ-ਵੱਖ ਥਾਵਾਂ ਤੋਂ ਯੂਜ਼ਰ ਟੈਸਟ ਡੇਟਾ ਅਤੇ ਸੁਤੰਤਰ ਡਰਾਈਵ ਟੈਸਟ ਡੇਟਾ ਦੇਖ ਸਕਦੇ ਹੋ।

ਇਹ ਪਲੇਟਫਾਰਮ TRAI ਦੀਆਂ MySpeed ਅਤੇ MyCall ਐਪਸ ਦੇ ਨਾਲ-ਨਾਲ TRAI ਵੱਲੋਂ ਕੀਤੇ ਜਾਂਦੇ ਸੁਤੰਤਰ ਡਰਾਈਵ ਟੈਸਟਾਂ ਰਾਹੀਂ ਇਕੱਠੇ ਕੀਤੇ ਗਏ ਡੇਟਾ ਨੂੰ ਦਿਖਾਉਂਦਾ ਹੈ। ਇਸ ਪਲੇਟਫਾਰਮ ਨੂੰ ਇਸ ਤਰ੍ਹਾਂ ਤਿਆਰ ਕੀਤਾ ਗਿਆ ਹੈ ਕਿ ਯੂਜ਼ਰ ਵੱਖ-ਵੱਖ ਥਾਵਾਂ ’ਤੇ ਹੋਰ ਲੋਕਾਂ ਦੇ ਨੈੱਟਵਰਕ ਅਨੁਭਵ ਨੂੰ ਸਮਝ ਸਕਣ। ਇਸ ਤੋਂ ਇਲਾਵਾ, ਇਹ ਡੇਟਾ ਟੈਲੀਕਾਮ ਕੰਪਨੀਆਂ ਨੂੰ ਉਨ੍ਹਾਂ ਥਾਵਾਂ ਦੀ ਪਛਾਣ ਕਰਨ ਵਿੱਚ ਵੀ ਮਦਦ ਕਰ ਸਕਦਾ ਹੈ, ਜਿੱਥੇ ਨੈੱਟਵਰਕ ਸੇਵਾਵਾਂ ਵਿੱਚ ਸੁਧਾਰ ਦੀ ਲੋੜ ਹੈ।

ਇਹ ਨਵਾਂ ਪਲੇਟਫਾਰਮ ਆਨਲਾਈਨ ‘Do Not Disturb’ (DND) ਸੇਵਾਵਾਂ ਦੀ ਸਹੂਲਤ ਵੀ ਦਿੰਦਾ ਹੈ। ਆਓ ਜਾਣਦੇ ਹਾਂ Network Anubhav ਪਲੇਟਫਾਰਮ ਬਾਰੇ।

Network Anubhav : ਯੂਜ਼ਰ ਕੀ ਕੁਝ ਕਰ ਸਕਦੇ ਹਨ ਚੈੱਕ?

Network Anubhav ਵਿੱਚ ਕਈ ਵਿਸ਼ੇਸ਼ਤਾਵਾਂ ਹਨ, ਪਰ ਇਸ ਪਲੇਟਫਾਰਮ ਦੀਆਂ ਮੁੱਖ ਖ਼ਾਸੀਅਤਾਂ ਵਿੱਚੋਂ ਇਕ ਜਿਓਸਪੇਸ਼ੀਅਲ ਮੈਪਸ ਹਨ। ਇਨ੍ਹਾਂ ਰਾਹੀਂ ਯੂਜ਼ਰ ਪੂਰੇ ਭਾਰਤ ਵਿੱਚ ਸੈਲੂਲਰ ਜਾਂ ਫਿਕਸਡ ਬ੍ਰਾਡਬੈਂਡ ਨੈੱਟਵਰਕ ਦੇ ਨਤੀਜੇ ਦੇਖ ਸਕਦੇ ਹਨ।

ਤੁਸੀਂ ਸਰਵਿਸ ਪ੍ਰੋਵਾਈਡਰ ਅਤੇ ਤਕਨਾਲੋਜੀ ਦੇ ਆਧਾਰ ’ਤੇ ਕਨੈਕਸ਼ਨਾਂ ਨੂੰ ਫਿਲਟਰ ਕਰ ਸਕਦੇ ਹੋ। ਇਸ ਤੋਂ ਇਲਾਵਾ, ਡਾਊਨਲੋਡ ਅਤੇ ਅਪਲੋਡ ਸਪੀਡ ਦੇ ਆਧਾਰ ’ਤੇ ਵੀ ਨੈੱਟਵਰਕ ਦੀ ਤੁਲਨਾ ਕਰ ਸਕਦੇ ਹੋ।

ਇਹ ਪਲੇਟਫਾਰਮ ਯੂਜ਼ਰਾਂ ਨੂੰ ਟੈਸਟ ਦੇ ਨਤੀਜਿਆਂ ਦੀ ਲੋਕੇਸ਼ਨ ਅਤੇ ਵੰਡ ਦੀ ਜਾਂਚ ਕਰਨ ਲਈ ਨਕਸ਼ੇ ਨੂੰ ਜ਼ੂਮ ਕਰਨ ਅਤੇ ਵੱਖ-ਵੱਖ ਥਾਵਾਂ ’ਤੇ ਦੇਖਣ ਦੀ ਸਹੂਲਤ ਵੀ ਦਿੰਦਾ ਹੈ।

ਇਸ ਤੋਂ ਇਲਾਵਾ, ਇਹ ਪਲੇਟਫਾਰਮ ਕਿਸੇ ਖੇਤਰ ਵਿੱਚ ਕੀਤੇ ਗਏ ਟੈਸਟਾਂ ਦੇ ਆਧਾਰ ’ਤੇ ਸਪੀਡ ਦੇ ਤਿੰਨ ਪੱਧਰ ਵੀ ਦਿਖਾਉਂਦਾ ਹੈ। ਇਹ ਇਸ ਤਰ੍ਹਾਂ ਹਨ :

- P50 (ਮੱਧਮ ਸਪੀਡ) : ਅੱਧੇ ਟੈਸਟਾਂ ਵਿੱਚ ਇਹ ਸਪੀਡ ਜਾਂ ਇਸ ਤੋਂ ਵੱਧ ਸਪੀਡ ਦਰਜ ਕੀਤੀ ਗਈ।

- P80 (ਮੋਬਾਈਲ ਬ੍ਰਾਡਬੈਂਡ) : ਉਹ ਸਪੀਡ, ਜੋ 80 ਫ਼ੀਸਦੀ ਟੈਸਟਾਂ ਵਿੱਚ ਹਾਸਲ ਕੀਤੀ ਗਈ ਜਾਂ ਇਸ ਤੋਂ ਵੱਧ ਰਹੀ।

- P90 (ਫਿਕਸਡ ਬ੍ਰਾਡਬੈਂਡ) : ਉਹ ਸਪੀਡ, ਜੋ 90 ਫ਼ੀਸਦੀ ਟੈਸਟਾਂ ਵਿੱਚ ਹਾਸਲ ਕੀਤੀ ਗਈ ਜਾਂ ਇਸ ਤੋਂ ਵੱਧ ਰਹੀ।

TRAI ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਯੂਜ਼ਰ ਟੈਸਟਾਂ ਦੇ ਆਧਾਰ ’ਤੇ ਮਿਲਣ ਵਾਲੇ ਇਹ ਅੰਕੜੇ ਮਿਆਰੀ ਤਰੀਕਿਆਂ ਤਹਿਤ ਨੈੱਟਵਰਕ ਦੀ ਗੁਣਵੱਤਾ ਦਾ ਪੂਰਾ ਮੁਲਾਂਕਣ ਨਹੀਂ ਦਰਸਾਉਂਦੇ। ਹਾਲਾਂਕਿ, ਇਹ ਵੱਖ-ਵੱਖ ਥਾਵਾਂ ’ਤੇ ਹੋਰ ਯੂਜ਼ਰਾਂ ਦੇ ਅਨੁਭਵ ਅਤੇ ਸੁਤੰਤਰ ਡਰਾਈਵ ਟੈਸਟਾਂ ਦੇ ਨਤੀਜਿਆਂ ਬਾਰੇ ਜਾਣਕਾਰੀ ਦੇਣ ਵਿੱਚ ਮਦਦ ਕਰਦੇ ਹਨ।

ਇਹ ਪਲੇਟਫਾਰਮ ਖ਼ਪਤਕਾਰਾਂ ਅਤੇ ਟੈਲੀਕਾਮ ਕੰਪਨੀਆਂ ਲਈ ਕਿਵੇਂ ਹੋਵੇਗਾ ਮਦਦਗਾਰ?

ਯੂਜ਼ਰ ਇੰਟਰਨੈੱਟ ਦੀ ਸਪੀਡ ਚੈੱਕ ਕਰਨ ਅਤੇ ਸਪੈਮ ਕਾਲਾਂ ਦੀ ਰਿਪੋਰਟ ਕਰਨ ਲਈ TRAI ਦੀਆਂ ਐਪਸ ਦੀ ਵਰਤੋਂ ਕਰ ਸਕਦੇ ਹਨ। ਇਸ ਤੋਂ ਇਲਾਵਾ, ਇਹ ਡੈਸ਼ਬੋਰਡ MySpeed, MyCall, ਵੈੱਬ ਇੰਟਰਫੇਸ ਅਤੇ ਸੁਤੰਤਰ ਨੈੱਟਵਰਕ ਟੈਸਟਾਂ ਤੋਂ ਪ੍ਰਾਪਤ ਡੇਟਾ ਨੂੰ ਇਕੱਠਾ ਕਰਦਾ ਹੈ।

ਇਸ ਰਾਹੀਂ ਯੂਜ਼ਰ ਦੂਜੇ ਲੋਕਾਂ ਵੱਲੋਂ ਸਾਂਝੇ ਕੀਤੇ ਗਏ ਵੱਖ-ਵੱਖ ਥਾਵਾਂ ਦੇ ਟੈਸਟ ਨਤੀਜੇ ਵੀ ਦੇਖ ਸਕਦੇ ਹਨ।

ਟੈਲੀਕਾਮ ਸੇਵਾ ਪ੍ਰਦਾਤਾ ਵੀ ਕਾਲ ਦੀ ਗੁਣਵੱਤਾ, ਨੈੱਟਵਰਕ ਕਵਰੇਜ ਅਤੇ ਇੰਟਰਨੈੱਟ ਸਪੀਡ ਨਾਲ ਸਬੰਧਤ ਡੇਟਾ ਸੁਰੱਖਿਅਤ ਤਰੀਕੇ ਨਾਲ ਪ੍ਰਾਪਤ ਕਰ ਸਕਦੇ ਹਨ। ਇਸ ਡੇਟਾ ਵਿੱਚ ਲੋਕੇਸ਼ਨ, ਤਾਰੀਖ, ਸਮਾਂ ਅਤੇ ਤਕਨੀਕੀ ਨਤੀਜਿਆਂ ਵਰਗੇ ਵੇਰਵੇ ਸ਼ਾਮਲ ਹੋਣਗੇ।

ਇਹ ਜਾਣਕਾਰੀ ਕੰਪਨੀਆਂ ਨੂੰ ਉਨ੍ਹਾਂ ਖੇਤਰਾਂ ਦੀ ਪਛਾਣ ਕਰਨ ਵਿੱਚ ਮਦਦ ਕਰੇਗੀ, ਜਿੱਥੇ ਨੈੱਟਵਰਕ ਸੇਵਾਵਾਂ ਨੂੰ ਬਿਹਤਰ ਬਣਾਉਣ ਦੀ ਲੋੜ ਹੈ। TRAI ਇਸ ਇਕੱਠੇ ਕੀਤੇ ਡੇਟਾ ਦੀ ਵਰਤੋਂ ਟੈਲੀਕਾਮ ਸੇਵਾਵਾਂ ਦੀ ਸਮੁੱਚੀ ਗੁਣਵੱਤਾ ਅਤੇ ਖ਼ਪਤਕਾਰਾਂ ਦੇ ਅਨੁਭਵ ਦੀ ਨਿਗਰਾਨੀ ਕਰਨ ਲਈ ਵੀ ਕਰ ਸਕਦਾ ਹੈ।

DND ਸੇਵਾਵਾਂ ਹੁਣ ਆਨਲਾਈਨ ਹੋਣਗੀਆਂ ਉਪਲਬਧ

ਇਹ ਪਲੇਟਫਾਰਮ ‘Do Not Disturb’ (DND) ਸੇਵਾਵਾਂ ਨੂੰ ਵੀ ਇਕ ਵੈੱਬ ਇੰਟਰਫੇਸ ’ਤੇ ਉਪਲਬਧ ਕਰਵਾਉਂਦਾ ਹੈ। ਇਸ ਰਾਹੀਂ ਖ਼ਪਤਕਾਰ ਵਪਾਰਕ ਸੰਦੇਸ਼ਾਂ ਅਤੇ ਕਾਲਾਂ ਸਬੰਧੀ ਆਪਣੀ ਪਸੰਦ ਤੈਅ ਕਰ ਸਕਦੇ ਹਨ।

ਇਸ ਤੋਂ ਇਲਾਵਾ, ਉਹ ਅਣਚਾਹੇ ਵਪਾਰਕ ਸੰਦੇਸ਼ਾਂ ਅਤੇ ਕਾਲਾਂ ਦੀ ਸ਼ਿਕਾਇਤ ਦਰਜ ਕਰਵਾ ਸਕਦੇ ਹਨ, ਆਪਣੀ ਸ਼ਿਕਾਇਤ ਦੀ ਸਥਿਤੀ (ਸਟੇਟਸ) ਜਾਣ ਸਕਦੇ ਹਨ ਅਤੇ ਸਾਰੀਆਂ ਸ਼ਿਕਾਇਤਾਂ ਜਾਂ ਸੇਵਾ ਪ੍ਰਦਾਤਾ ਦੇ ਆਧਾਰ ’ਤੇ ਦਰਜ ਸ਼ਿਕਾਇਤਾਂ ਦੇ ਵੇਰਵੇ ਦੇਖ ਸਕਦੇ ਹਨ।

ਇਸ ਤੋਂ ਇਲਾਵਾ, TRAI ਦਾ MySpeed ਸਾਫਟਵੇਅਰ ਡਿਵੈਲਪਮੈਂਟ ਕਿੱਟ (SDK) ਯੋਗ ਤੀਜੀ ਧਿਰ ਦੀਆਂ ਐਪਸ ਨੂੰ ਇੰਟਰਨੈੱਟ ਕਨੈਕਟੀਵਿਟੀ ਮਾਪਣ ਵਾਲੀਆਂ ਵਿਸ਼ੇਸ਼ਤਾਵਾਂ ਸ਼ਾਮਲ ਕਰਨ ਦੀ ਸਹੂਲਤ ਵੀ ਦਿੰਦਾ ਹੈ।

TRAI ਨੇ ਯੂਜ਼ਰਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਇਸ ਪਲੇਟਫਾਰਮ ਦੀ ਕਵਰੇਜ ਅਤੇ ਡੇਟਾ ਨੂੰ ਬਿਹਤਰ ਬਣਾਉਣ ਲਈ MySpeed ਅਤੇ MyCall ਦੋਵਾਂ ਐਪਸ ਰਾਹੀਂ ਨਿਯਮਿਤ ਤੌਰ ’ਤੇ ਨੈੱਟਵਰਕ ਟੈਸਟ ਕਰਨ ਅਤੇ ਆਪਣਾ ਯੋਗਦਾਨ ਪਾਉਣ।