8000mAh ਤੱਕ ਦੀ ਬੈਟਰੀ ਵਾਲੇ OPPO ਦੇ ਦੋ ਨਵੇਂ 5G ਫੋਨ ਕੱਲ੍ਹ ਹੋਣਗੇ ਲਾਂਚ, ਮਿਲੇਗਾ 200MP ਕੈਮਰਾ ਤੇ ਸਨੈਪਡ੍ਰੈਗਨ ਪ੍ਰੋਸੈਸਰ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : OPPO ਕੱਲ੍ਹ ਯਾਨੀ 16 ਨਵੰਬਰ ਨੂੰ ਚੀਨ ਵਿਚ ਆਪਣੀ ਨਵੀਂ Reno 17 ਸੀਰੀਜ਼ ਲਾਂਚ ਕਰਨ ਜਾ ਰਿਹਾ ਹੈ। ਇਸ ਸੀਰੀਜ਼ ਤਹਿਤ ਕੰਪਨੀ ਦੋ ਨਵੇਂ ਫੋਨ Oppo Reno 17 ਅਤੇ Oppo Reno 17 Pro ਪੇਸ਼ ਕਰੇਗੀ। ਕੰਪਨੀ ਚੀਨ ਦੇ ਸਮੇਂ ਮੁਤਾਬਕ ਸ਼ਾਮ 7 ਵਜੇ ਅਤੇ ਭਾਰਤੀ ਸਮੇਂ ਅਨੁਸਾਰ ਸ਼ਾਮ 4:30 ਵਜੇ ਇਕ ਈਵੈਂਟ ਦੌਰਾਨ ਇਨ੍ਹਾਂ ਨਵੇਂ ਫੋਨਾਂ ਤੋਂ ਪਰਦਾ ਚੁੱਕੇਗੀ। ਦੋਵੇਂ ਸਮਾਰਟਫੋਨਾਂ ਦੀ ਚੀਨ ਵਿਚ ਪ੍ਰੀ-ਆਰਡਰ ਬੁਕਿੰਗ ਵੀ ਸ਼ੁਰੂ ਹੋ ਗਈ ਹੈ। ਇਸ ਈਵੈਂਟ ਵਿਚ ਕੰਪਨੀ Oppo Pad Air 6 ਟੈਬਲੇਟ ਅਤੇ Oppo Watch 5 ਵੀ ਪੇਸ਼ ਕਰ ਸਕਦੀ ਹੈ।

ਲਾਂਚ ਤੋਂ ਪਹਿਲਾਂ ਕੰਪਨੀ ਨੇ Reno 17 ਸੀਰੀਜ਼ ਦੇ ਡਿਜ਼ਾਈਨ ਅਤੇ ਕੁਝ ਖ਼ਾਸ ਸਪੈਸੀਫਿਕੇਸ਼ਨਜ਼ ਦਾ ਖੁਲਾਸਾ ਕਰ ਦਿੱਤਾ ਹੈ। ਫੋਨ ਦਾ ਕੈਮਰਾ ਮੋਡਿਊਲ ਕਾਫ਼ੀ ਹੱਦ ਤੱਕ ਪਿਛਲੇ ਮਾਡਲ Oppo Reno 16 ਵਰਗਾ ਦਿਖਾਈ ਦੇ ਰਿਹਾ ਹੈ। ਹਾਲਾਂਕਿ, ਇਸ ਵਾਰ ਕੰਪਨੀ Adventure Cat ਨਾਂ ਦਾ ਇਕ ਖ਼ਾਸ ਕਲਰ ਵੇਰੀਐਂਟ ਵੀ ਪੇਸ਼ ਕਰਨ ਜਾ ਰਹੀ ਹੈ। ਆਓ ਜਾਣਦੇ ਹਾਂ ਦੋਵਾਂ ਫੋਨਾਂ ਦੇ ਸੰਭਾਵਿਤ ਫੀਚਰਜ਼ ਬਾਰੇ।

Oppo Reno 17 ਅਤੇ Reno 17 Pro ਦੇ ਸੰਭਾਵਿਤ ਸਪੈਸੀਫਿਕੇਸ਼ਨਜ਼

ਸਪੈਸੀਫਿਕੇਸ਼ਨਜ਼ ਦੀ ਗੱਲ ਕਰੀਏ ਤਾਂ ਰਿਪੋਰਟਾਂ ਮੁਤਾਬਕ Oppo Reno 17 ਵਿਚ 6.56 ਇੰਚ ਦੀ 1.5K ਫਲੈਟ ਡਿਸਪਲੇਅ ਮਿਲ ਸਕਦੀ ਹੈ। ਫੋਨ ਵਿਚ Snapdragon 7 Gen 4 ਪ੍ਰੋਸੈਸਰ ਦਿੱਤਾ ਜਾ ਸਕਦਾ ਹੈ। ਇਸ ਤੋਂ ਇਲਾਵਾ ਬਿਹਤਰ ਬੈਟਰੀ ਬੈਕਅਪ ਲਈ ਇਸ ਵਿਚ 8000mAh ਤੱਕ ਦੀ ਵੱਡੀ ਬੈਟਰੀ ਮਿਲਣ ਦੀ ਸੰਭਾਵਨਾ ਹੈ, ਜੋ 80W ਫਾਸਟ ਚਾਰਜਿੰਗ ਨੂੰ ਸਪੋਰਟ ਕਰ ਸਕਦੀ ਹੈ।

ਦੂਜੇ ਪਾਸੇ, ਸੀਰੀਜ਼ ਦੇ ਪ੍ਰੋ ਮਾਡਲ Oppo Reno 17 Pro ਵਿਚ ਵਧੇਰੇ ਕੰਪੈਕਟ ਡਿਜ਼ਾਈਨ ਮਿਲ ਸਕਦਾ ਹੈ। ਇਸ ਫੋਨ ਵਿਚ 6.32 ਇੰਚ ਦੀ 1.5K ਫਲੈਟ ਡਿਸਪਲੇਅ ਦਿੱਤੀ ਜਾ ਸਕਦੀ ਹੈ। ਪਰਫਾਰਮੈਂਸ ਲਈ ਇਸ ਵਿਚ MediaTek Dimensity 8550 Super ਚਿਪਸੈੱਟ ਮਿਲਣ ਦੀ ਉਮੀਦ ਹੈ। ਇਸ ਤੋਂ ਇਲਾਵਾ ਫੋਨ ਵਿਚ 7200mAh ਦੀ ਬੈਟਰੀ ਅਤੇ 80W ਫਾਸਟ ਚਾਰਜਿੰਗ ਸਪੋਰਟ ਮਿਲ ਸਕਦੀ ਹੈ।

Oppo Reno 17 ਅਤੇ Reno 17 Pro ਦੇ ਸੰਭਾਵਿਤ ਕੈਮਰਾ ਫੀਚਰਜ਼

ਫੋਟੋਗ੍ਰਾਫੀ ਲਈ Oppo Reno 17 ਅਤੇ Reno 17 Pro ਦੋਵਾਂ ਫੋਨਾਂ ਵਿਚ 200 ਮੈਗਾਪਿਕਸਲ ਦਾ ਪ੍ਰਾਇਮਰੀ ਕੈਮਰਾ ਮਿਲ ਸਕਦਾ ਹੈ। ਇਸ ਦੇ ਨਾਲ 50 ਮੈਗਾਪਿਕਸਲ ਦਾ ਅਲਟਰਾ-ਵਾਈਡ ਕੈਮਰਾ ਅਤੇ 50 ਮੈਗਾਪਿਕਸਲ ਦਾ ਪੈਰੀਸਕੋਪ ਟੈਲੀਫੋਟੋ ਕੈਮਰਾ ਦਿੱਤਾ ਜਾ ਸਕਦਾ ਹੈ। ਉੱਥੇ ਹੀ, ਸੀਰੀਜ਼ ਦੇ Reno 17 Pro ਵਿਚ ਸੈਲਫੀ ਅਤੇ ਵੀਡੀਓ ਕਾਲਿੰਗ ਲਈ 50 ਮੈਗਾਪਿਕਸਲ ਦਾ ਫਰੰਟ ਕੈਮਰਾ ਮਿਲਣ ਦੀ ਸੰਭਾਵਨਾ ਹੈ।

ਦੋਵਾਂ ਸਮਾਰਟਫੋਨਾਂ ਵਿਚ ਮੈਟਲ ਫਰੇਮ ਅਤੇ ਆਪਟੀਕਲ ਇਨ-ਡਿਸਪਲੇਅ ਫਿੰਗਰਪ੍ਰਿੰਟ ਸੈਂਸਰ ਮਿਲ ਸਕਦਾ ਹੈ। ਫੋਨਾਂ ਵਿਚ 12GB ਤੱਕ ਰੈਮ ਅਤੇ 512GB ਤੱਕ ਸਟੋਰੇਜ ਦਿੱਤੀ ਜਾ ਸਕਦੀ ਹੈ। ਸਾਫਟਵੇਅਰ ਦੀ ਗੱਲ ਕਰੀਏ ਤਾਂ ਇਨ੍ਹਾਂ ਵਿਚ Android 17 ’ਤੇ ਆਧਾਰਿਤ ColorOS 17 ਮਿਲਣ ਦੀ ਉਮੀਦ ਹੈ।

ਰਿਪੋਰਟਾਂ ਮੁਤਾਬਕ ਸਟੈਂਡਰਡ Oppo Reno 17 ਨੂੰ ਭਾਰਤ ਵਿਚ 2027 ਦੀ ਸ਼ੁਰੂਆਤ ਦੌਰਾਨ ਲਾਂਚ ਕੀਤਾ ਜਾ ਸਕਦਾ ਹੈ। ਇਸ ਦੇ ਨਾਲ Reno 17c ਮਾਡਲ ਵੀ ਪੇਸ਼ ਕੀਤਾ ਜਾ ਸਕਦਾ ਹੈ।