3,500mAh ਬੈਟਰੀ ਤੇ 120Hz ਡਿਸਪਲੇਅ ਨਾਲ ਆ ਸਕਦੈ Apple iPhone Air 2, A20 ਪ੍ਰੋਸੈਸਰ ਤੇ ਡਿਊਲ ਰੀਅਰ ਕੈਮਰਾ ਸੈੱਟਅੱਪ ਵੀ ਮਿਲਣ ਦੀ ਉਮੀਦ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ: ਐਪਲ ਨੇ ਪਿਛਲੇ ਸਾਲ ਆਪਣਾ ਪਹਿਲਾ ਅਲਟਰਾ-ਸਲਿਮ iPhone Air ਲਾਂਚ ਕੀਤਾ ਸੀ। ਹੁਣ ਕੰਪਨੀ ਇਸ ਦੀ ਦੂਜੀ ਪੀੜ੍ਹੀ ਦੇ ਮਾਡਲ ’ਤੇ ਕੰਮ ਕਰ ਰਹੀ ਹੈ। ਰਿਪੋਰਟਾਂ ਮੁਤਾਬਕ ਨਵਾਂ ਏਅਰ ਮਾਡਲ ਬਿਹਤਰ ਕੈਮਰੇ ਅਤੇ ਵੱਡੀ ਬੈਟਰੀ ਨਾਲ ਲਾਂਚ ਕੀਤਾ ਜਾ ਸਕਦਾ ਹੈ। ਇਸ ਦੇ ਨਾਲ ਹੀ ਐਪਲ ਦੇ ਆਉਣ ਵਾਲੇ iPhone Air 2 ਬਾਰੇ ਕੁਝ ਹੋਰ ਜਾਣਕਾਰੀਆਂ ਵੀ ਆਨਲਾਈਨ ਸਾਹਮਣੇ ਆਈਆਂ ਹਨ। ਕੰਪਨੀ ਇਸ ਨੂੰ ਬਸੰਤ 2027 ਦੇ ਲਾਂਚ ਈਵੈਂਟ ਦੌਰਾਨ ਪੇਸ਼ ਕਰ ਸਕਦੀ ਹੈ।

iPhone Air 2 ਦੇ ਸੰਭਾਵਿਤ ਫੀਚਰ

ਸੋਸ਼ਲ ਮੀਡੀਆ ਪਲੇਟਫਾਰਮ Weibo ’ਤੇ ਟਿਪਸਟਰ Digital Chat Station ਨੇ ਆਉਣ ਵਾਲੇ iPhone Air 2 ਬਾਰੇ ਕੁਝ ਜਾਣਕਾਰੀਆਂ ਸਾਂਝੀਆਂ ਕੀਤੀਆਂ ਹਨ। ਰਿਪੋਰਟਾਂ ਮੁਤਾਬਕ ਇਸ ਨੂੰ ਵੱਡੀ ਬੈਟਰੀ ਅਤੇ ਦੋ ਰੀਅਰ ਕੈਮਰਿਆਂ ਨਾਲ ਪੇਸ਼ ਕੀਤਾ ਜਾ ਸਕਦਾ ਹੈ।

ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ iPhone Air 2 ਵਿੱਚ 6.55 ਇੰਚ ਦੀ ਫਲੈਟ OLED ਡਿਸਪਲੇਅ ਮਿਲ ਸਕਦੀ ਹੈ, ਜਿਸ ਦਾ ਰੈਜ਼ੋਲਿਊਸ਼ਨ 1.5K+ ਅਤੇ ਰਿਫ੍ਰੈਸ਼ ਰੇਟ 120Hz ਹੋਵੇਗਾ। ਇਸ ਮਾਡਲ ਵਿੱਚ LTPO ਡਿਸਪਲੇਅ ਪੈਨਲ ਦਿੱਤਾ ਜਾ ਸਕਦਾ ਹੈ।

ਆਈਫੋਨ ਏਅਰ ਦੀ ਅਗਲੀ ਪੀੜ੍ਹੀ ਦੇ ਮਾਡਲ ਵਿੱਚ ਐਪਲ ਦੀ A20 ਸੀਰੀਜ਼ ਦਾ ਚਿਪਸੈੱਟ ਮਿਲਣ ਦੀ ਉਮੀਦ ਹੈ, ਜੋ 2nm ਪ੍ਰੋਸੈੱਸ ’ਤੇ ਤਿਆਰ ਕੀਤਾ ਗਿਆ ਹੈ। ਇਸ ਦੀ ਬੈਟਰੀ 3,500mAh ਹੋ ਸਕਦੀ ਹੈ। ਇਸ ਤੋਂ ਪਹਿਲਾਂ ਪਹਿਲੀ ਪੀੜ੍ਹੀ ਦੇ iPhone Air ਵਿੱਚ ਕੰਪਨੀ ਨੇ 3,149mAh ਦੀ ਬੈਟਰੀ ਦਿੱਤੀ ਸੀ। ਇਸ ਤਰ੍ਹਾਂ ਨਵੇਂ ਮਾਡਲ ਦੀ ਬੈਟਰੀ ਸਮਰੱਥਾ ਵਿੱਚ ਲਗਪਗ 11 ਫ਼ੀਸਦੀ ਦਾ ਵਾਧਾ ਹੋ ਸਕਦਾ ਹੈ। ਇਸ ਤੋਂ ਪਹਿਲਾਂ ਵੀ ਟਿਪਸਟਰ ਐਪਲ ਦੀ ਸਪਲਾਈ ਚੇਨ ਦੇ ਸੂਤਰਾਂ ਦੇ ਹਵਾਲੇ ਨਾਲ ਬੈਟਰੀ ਬਾਰੇ ਇਹੀ ਦਾਅਵਾ ਕਰ ਚੁੱਕਾ ਹੈ।

ਕੈਮਰਾ ਸੈੱਟਅੱਪ ਦੀ ਗੱਲ ਕਰੀਏ ਤਾਂ ਆਉਣ ਵਾਲੇ iPhone Air 2 ਵਿੱਚ 48 ਮੈਗਾਪਿਕਸਲ ਦੇ ਪ੍ਰਾਇਮਰੀ ਕੈਮਰੇ ਦੇ ਨਾਲ ਨਵਾਂ ਅਲਟਰਾ-ਵਾਈਡ ਕੈਮਰਾ ਮਿਲ ਸਕਦਾ ਹੈ। ਪਿਛਲੇ ਮਾਡਲ ਵਿੱਚ ਐਪਲ ਨੇ ਸਿਰਫ਼ ਇੱਕ ਰੀਅਰ ਕੈਮਰਾ ਦਿੱਤਾ ਸੀ। ਇਸ ਤੋਂ ਇਲਾਵਾ ਫੋਨ ਵਿੱਚ ਬਾਇਓਮੈਟ੍ਰਿਕ ਪ੍ਰਮਾਣਿਕਤਾ ਲਈ Face ID ਦੀ ਸਹੂਲਤ ਵੀ ਬਰਕਰਾਰ ਰਹੇਗੀ।

ਕਦੋਂ ਲਾਂਚ ਹੋਵੇਗਾ iPhone Air 2?

ਲਾਂਚ ਦੀ ਸਮਾਂ-ਸੀਮਾ ਦੀ ਗੱਲ ਕਰੀਏ ਤਾਂ iPhone Air 2 ਨੂੰ ਬਸੰਤ 2027 ਵਿੱਚ ਸਟੈਂਡਰਡ iPhone 18 ਅਤੇ iPhone 18e ਦੇ ਨਾਲ ਲਾਂਚ ਕੀਤਾ ਜਾ ਸਕਦਾ ਹੈ। ਐਪਲ ਨੇ ਪਹਿਲੀ ਪੀੜ੍ਹੀ ਦਾ iPhone Air ਪਿਛਲੇ ਸਾਲ ਸਤੰਬਰ ਵਿੱਚ 1,19,900 ਰੁਪਏ ਦੀ ਸ਼ੁਰੂਆਤੀ ਕੀਮਤ ’ਤੇ ਲਾਂਚ ਕੀਤਾ ਸੀ।