AI ਕਾਰਨ ਮਹਿੰਗੇ ਹੋਣਗੇ ਸਸਤੇ ਸਮਾਰਟਫੋਨ, ਕੀਮਤਾਂ 'ਚ 30 ਫ਼ੀਸਦੀ ਤੱਕ ਵਾਧੇ ਦਾ ਅਨੁਮਾਨ

ਪੀਟੀਆਈ, ਨਵੀਂ ਦਿੱਲੀ : ਗਲੋਬਲ ਰਿਸਰਚ ਫਰਮ ਜੈਫਰੀਜ਼ ਨੇ ਆਪਣੀ ਤਾਜ਼ਾ ਰਿਪੋਰਟ ਵਿੱਚ ਕਿਹਾ ਹੈ ਕਿ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (AI) ਦੀ ਵਧਦੀ ਮੰਗ ਕਾਰਨ ਮੈਮੋਰੀ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋ ਰਿਹਾ ਹੈ। ਇਸ ਨਾਲ ਸਸਤੇ (ਲੋਅ-ਐਂਡ) ਸਮਾਰਟਫੋਨ ਦੀਆਂ ਕੀਮਤਾਂ ਵਿੱਚ ਲਗਪਗ 30 ਫ਼ੀਸਦੀ ਤੱਕ ਵਾਧਾ ਹੋ ਸਕਦਾ ਹੈ। ਇਸ ਕਾਰਨ ਗਾਹਕ ਨਵੇਂ ਫੋਨ ਖਰੀਦਣ ਵਿੱਚ ਦੇਰੀ ਕਰ ਸਕਦੇ ਹਨ ਜਾਂ ਪੁਰਾਣੇ ਫੋਨ ਨਾਲ ਹੀ ਕੰਮ ਚਲਾ ਸਕਦੇ ਹਨ।

2027 ਵਿੱਚ ਵੀ ਜਾਰੀ ਰਹੇਗੀ ਚਿੱਪਾਂ ਦੀ ਕਮੀ

ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ AI ਨਾਲ ਜੁੜੀ ਮੰਗ ਕਾਰਨ ਵਿਸ਼ਵ ਪੱਧਰੀ ਸਪਲਾਈ ਦਾ ਵੱਡਾ ਹਿੱਸਾ ਇਸੇ ਖੇਤਰ ਵਿੱਚ ਖਪਤ ਹੋ ਰਿਹਾ ਹੈ, ਜਿਸ ਕਾਰਨ ਮੈਮੋਰੀ ਦੀਆਂ ਕੀਮਤਾਂ ਵਿੱਚ ਭਾਰੀ ਉਛਾਲ ਆਇਆ ਹੈ। ਅਨੁਮਾਨ ਹੈ ਕਿ ਕੈਲੰਡਰ ਸਾਲ 2027 ਵਿੱਚ ਮੈਮੋਰੀ ਦੀ ਕੁੱਲ ਮੰਗ ਦਾ ਲਗਪਗ 60 ਫ਼ੀਸਦੀ ਹਿੱਸਾ AI ਲਈ ਹੋਵੇਗਾ। ਇਸ ਦੇ ਨਾਲ ਹੀ ਉਸੇ ਸਾਲ AI ਕੰਪਨੀਆਂ ਵੱਲੋਂ ਲਗਪਗ 1.5 ਟ੍ਰਿਲੀਅਨ ਡਾਲਰ ਦਾ ਪੂੰਜੀਗਤ ਖਰਚ ਕੀਤੇ ਜਾਣ ਦੀ ਉਮੀਦ ਹੈ। ਇਸ ਕਾਰਨ ਆਉਣ ਵਾਲੀਆਂ ਕਈ ਤਿਮਾਹੀਆਂ ਤੱਕ ਮੈਮੋਰੀ ਦੀਆਂ ਕੀਮਤਾਂ ਉੱਚੀਆਂ ਰਹਿ ਸਕਦੀਆਂ ਹਨ।

ਰਿਪੋਰਟ ਮੁਤਾਬਕ, ਕੈਲੰਡਰ ਸਾਲ ਦੇ ਮੱਧ ਤੱਕ ਮੈਮੋਰੀ ਦੀਆਂ ਕੀਮਤਾਂ ਆਪਣੇ ਸਿਖਰਲੇ ਪੱਧਰ 'ਤੇ ਪਹੁੰਚ ਸਕਦੀਆਂ ਹਨ। ਹਾਲਾਂਕਿ, ਸਮਾਰਟਫੋਨ ਨਿਰਮਾਤਾ ਕੰਪਨੀਆਂ, ਖ਼ਾਸ ਕਰਕੇ ਕਿਫਾਇਤੀ ਸੈਗਮੈਂਟ ਵਿੱਚ ਕੰਮ ਕਰਨ ਵਾਲੀਆਂ ਕੰਪਨੀਆਂ, ਪਹਿਲਾਂ ਹੀ ਉਪਕਰਨਾਂ ਦੀਆਂ ਵਧਦੀਆਂ ਕੀਮਤਾਂ ਦਾ ਅਸਰ ਮਹਿਸੂਸ ਕਰ ਰਹੀਆਂ ਹਨ। ਰਿਪੋਰਟ ਵਿੱਚ ਦੱਸਿਆ ਗਿਆ ਹੈ ਕਿ ਪ੍ਰਤੀ ਯੂਨਿਟ ਮੈਮੋਰੀ ਦੀ ਲਾਗਤ ਵਿੱਚ ਲਗਪਗ ਤਿੰਨ ਗੁਣਾ ਵਾਧਾ ਹੋਇਆ ਹੈ।

ਕੈਲੰਡਰ ਸਾਲ 2025 ਵਿੱਚ ਮੈਮੋਰੀ ਦੀ ਅਨੁਮਾਨਿਤ ਕੀਮਤ 20 ਡਾਲਰ ਸੀ, ਜੋ ਹੁਣ ਵਧ ਕੇ ਲਗਪਗ 60-65 ਡਾਲਰ ਤੱਕ ਪਹੁੰਚ ਗਈ ਹੈ। ਇਸ ਦਾ ਸਭ ਤੋਂ ਵੱਧ ਅਸਰ 200 ਡਾਲਰ ਤੋਂ ਘੱਟ ਕੀਮਤ ਵਾਲੇ ਐਂਡਰਾਇਡ ਸਮਾਰਟਫੋਨਾਂ 'ਤੇ ਪੈ ਰਿਹਾ ਹੈ। ਇਨ੍ਹਾਂ ਫੋਨਾਂ ਦੀ ਕੁੱਲ ਨਿਰਮਾਣ ਲਾਗਤ ਵਿੱਚ ਮੈਮੋਰੀ ਦਾ ਹਿੱਸਾ ਲਗਪਗ 60 ਫ਼ੀਸਦੀ ਹੋਣ ਦਾ ਅਨੁਮਾਨ ਹੈ।