ਬਜ਼ੁਰਗਾਂ ਲਈ ਖ਼ਾਸ ਫੋਨ ਲਾਂਚ: SOS ਬਟਨ ਤੋਂ ਲੈ ਕੇ ਹਿੰਦੀ 'ਚ ਪੜ੍ਹ ਕੇ ਸੁਣਾਏਗਾ, ਕੀਮਤ ਵੀ ਕਾਫ਼ੀ ਘੱਟ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : itel ਨੇ ਭਾਰਤੀ ਬਾਜ਼ਾਰ 'ਚ ਬਜ਼ੁਰਗਾਂ ਨੂੰ ਧਿਆਨ 'ਚ ਰੱਖਦਿਆਂ ਨਵਾਂ itel Care ਮੋਬਾਈਲ ਲਾਂਚ ਕੀਤਾ ਹੈ। ਕੰਪਨੀ ਨੇ ਇਸ ਡਿਵਾਈਸ ਨੂੰ ਖ਼ਾਸ ਤੌਰ 'ਤੇ ਸੀਨੀਅਰ ਨਾਗਰਿਕਾਂ ਲਈ ਤਿਆਰ ਕੀਤਾ ਹੈ, ਤਾਂ ਜੋ ਉਨ੍ਹਾਂ ਨੂੰ ਕਾਲ ਕਰਨ, ਮੈਸੇਜ ਪੜ੍ਹਨ ਅਤੇ ਐਮਰਜੈਂਸੀ ਦੇ ਸਮੇਂ ਮਦਦ ਲੈਣ 'ਚ ਆਸਾਨੀ ਹੋ ਸਕੇ। ਮੋਬਾਈਲ 'ਚ ਵੱਡੀ ਡਿਸਪਲੇ, ਵੱਡੇ ਬਟਨ, ਵਾਇਸ ਗਾਈਡੈਂਸ ਅਤੇ ਡੈਡੀਕੇਟਿਡ SOS ਬਟਨ ਵਰਗੇ ਫੀਚਰ ਮਿਲ ਰਹੇ ਹਨ। ਖ਼ਾਸ ਗੱਲ ਇਹ ਹੈ ਕਿ ਇਸ ਫੋਨ ਦੀ ਕੀਮਤ ਸਿਰਫ਼ 1,499 ਰੁਪਏ ਹੈ। ਆਓ ਇਸ ਡਿਵਾਈਸ ਦੇ ਫੀਚਰਜ਼ 'ਤੇ ਇੱਕ ਨਜ਼ਰ ਮਾਰਦੇ ਹਾਂ...

itel Care ਫੀਚਰ ਫੋਨ ਦੇ ਸਪੈਸੀਫਿਕੇਸ਼ਨ

ਸਪੈਸੀਫਿਕੇਸ਼ਨ ਦੀ ਗੱਲ ਕਰੀਏ ਤਾਂ itel Care ਫੋਨ 'ਚ 2 ਇੰਚ ਦੀ ਮੈਗਨੀਫਾਈਡ ਡਿਸਪਲੇ ਮਿਲ ਰਹੀ ਹੈ। ਇਸ ਦੇ ਨਾਲ ਫੋਨ 'ਚ ਵੱਡੇ ਬਟਨ ਅਤੇ ਵੱਡੇ ਇੰਟਰਫੇਸ ਆਈਕਨ ਵੀ ਦਿੱਤੇ ਗਏ ਹਨ, ਜਿਸ ਨਾਲ ਨੰਬਰ ਦੇਖਣ ਅਤੇ ਟਾਈਪ ਕਰਨ 'ਚ ਆਸਾਨੀ ਹੋਵੇਗੀ। ਮੋਬਾਈਲ ਦੀ ਫੋਨਬੁੱਕ 'ਚ 500 ਕਾਂਟੈਕਟ ਸੇਵ ਕੀਤੇ ਜਾ ਸਕਦੇ ਹਨ ਅਤੇ ਕਾਂਟੈਕਟ ਦੇ ਨਾਲ ਉਨ੍ਹਾਂ ਦੀ ਤਸਵੀਰ ਵੀ ਲਗਾਈ ਜਾ ਸਕਦੀ ਹੈ। ਇਸ ਨਾਲ ਬਜ਼ੁਰਗ ਵਿਅਕਤੀ ਆਸਾਨੀ ਨਾਲ ਪਛਾਣ ਸਕਣਗੇ ਕਿ ਕਿਸ ਦਾ ਫੋਨ ਆ ਰਿਹਾ ਹੈ।

ਮਿਲੇਗਾ ਡੈਡੀਕੇਟਿਡ SOS ਬਟਨ

ਇੰਨਾ ਹੀ ਨਹੀਂ, ਇਸ ਨਵੇਂ itel Care ਫੋਨ ਦੇ ਪਿੱਛੇ ਇੱਕ ਖ਼ਾਸ ਲਾਲ SOS ਬਟਨ ਵੀ ਦਿੱਤਾ ਗਿਆ ਹੈ। ਇਸ ਨੂੰ ਕਰੀਬ ਦੋ ਸਕਿੰਟ ਦਬਾਉਣ 'ਤੇ ਫੋਨ ਪਹਿਲਾਂ ਤੋਂ ਸੇਵ ਕੀਤੇ ਵੱਧ ਤੋਂ ਵੱਧ ਪੰਜ ਕਾਂਟੈਕਟਸ ਨੂੰ ਐਮਰਜੈਂਸੀ ਅਲਰਟ ਮੈਸੇਜ ਭੇਜ ਦੇਵੇਗਾ। ਇਸ ਤੋਂ ਬਾਅਦ ਇਨ੍ਹਾਂ ਨੰਬਰਾਂ 'ਤੇ ਇੱਕ-ਇੱਕ ਕਰਕੇ ਕਾਲ ਵੀ ਜਾਵੇਗੀ। ਇਸ ਨਾਲ ਐਮਰਜੈਂਸੀ ਦੀ ਸਥਿਤੀ 'ਚ ਬਜ਼ੁਰਗ ਯੂਜ਼ਰ ਆਸਾਨੀ ਨਾਲ ਆਪਣੇ ਪਰਿਵਾਰ ਜਾਂ ਕਰੀਬੀ ਲੋਕਾਂ ਤੱਕ ਮਦਦ ਲਈ ਪਹੁੰਚ ਸਕਣਗੇ।

ਹਿੰਦੀ 'ਚ ਬੋਲੇਗਾ ਮੈਨਿਊ

ਇਸ ਤੋਂ ਇਲਾਵਾ ਇਸ ਫੀਚਰ ਫੋਨ 'ਚ King Voice ਨਾਮ ਦਾ ਵਾਇਸ ਅਸਿਸਟੈਂਟ ਵੀ ਮਿਲੇਗਾ। ਇਹ ਅਸਿਸਟੈਂਟ ਮੇਨੂ ਆਪਸ਼ਨ, ਆਉਣ ਵਾਲੇ ਮੈਸੇਜ ਅਤੇ ਇਨਕਮਿੰਗ ਕਾਲ ਦੀ ਜਾਣਕਾਰੀ ਆਵਾਜ਼ 'ਚ ਪੜ੍ਹ ਕੇ ਸੁਣਾਏਗਾ। ਇਸ 'ਚ ਹਿੰਦੀ ਅਤੇ ਇੰਗਲਿਸ਼ ਦੋਵਾਂ ਭਾਸ਼ਾਵਾਂ ਦਾ ਵਾਇਸ ਸਪੋਰਟ ਮਿਲ ਰਿਹਾ ਹੈ। ਇਹ ਫੀਚਰ ਖ਼ਾਸ ਤੌਰ 'ਤੇ ਘੱਟ ਦਿਖਾਈ ਦੇਣ ਵਾਲੇ ਜਾਂ ਕੁਝ ਪੜ੍ਹਨ 'ਚ ਦਿੱਕਤ ਮਹਿਸੂਸ ਕਰਨ ਵਾਲੇ ਯੂਜ਼ਰਾਂ ਲਈ ਮਦਦਗਾਰ ਹੋ ਸਕਦਾ ਹੈ।

ਵੱਡਾ ਸਪੀਕਰ ਅਤੇ ਵੱਡੀ ਬੈਟਰੀ ਵੀ

ਇਸ ਮੋਬਾਈਲ 'ਚ 2030 ਬਾਕਸ ਸਪੀਕਰ ਦੇ ਨਾਲ ਆਡੀਓ ਪਾਵਰ ਐਂਪਲੀਫਾਇਰ ਮਿਲ ਰਿਹਾ ਹੈ। ਕਾਲ ਦੌਰਾਨ ਆਲੇ-ਦੁਆਲੇ ਦੇ ਸ਼ੋਰ ਨੂੰ ਘੱਟ ਕਰਨ ਲਈ AI ENC ਸਪੋਰਟ ਵੀ ਦਿੱਤਾ ਗਿਆ ਹੈ, ਜੋ ਇਸ ਨੂੰ ਹੋਰ ਖ਼ਾਸ ਬਣਾਉਂਦਾ ਹੈ। ਫੋਨ 'ਚ 1,150mAh ਬੈਟਰੀ, USB Type-C ਚਾਰਜਿੰਗ ਪੋਰਟ ਅਤੇ VGA ਕੈਮਰੇ ਦੇ ਨਾਲ ਡਿਊਲ LED ਟਾਰਚ ਵੀ ਮਿਲ ਰਹੀ ਹੈ।

ਇਸ ਤੋਂ ਇਲਾਵਾ ਫੋਨ 'ਚ ਵਾਇਰਲੈੱਸ FM ਰੇਡੀਓ ਅਤੇ ਰਿਕਾਰਡਿੰਗ, ਬਲੂਟੁੱਥ ਅਤੇ 3.5mm ਹੈੱਡਫੋਨ ਜੈਕ ਵੀ ਦਿੱਤਾ ਗਿਆ ਹੈ। ਡਿਵਾਈਸ ਸਿੰਗਲ SIM ਸਪੋਰਟ ਦੇ ਨਾਲ ਆਉਂਦਾ ਹੈ ਅਤੇ 2G ਨੈੱਟਵਰਕ ਨੂੰ ਸਪੋਰਟ ਕਰਦਾ ਹੈ। ਇਸ ਦੇ ਨਾਲ ਹੀ microSD ਕਾਰਡ ਰਾਹੀਂ ਸਟੋਰੇਜ ਨੂੰ 32GB ਤੱਕ ਵਧਾਇਆ ਜਾ ਸਕਦਾ ਹੈ।