- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਕੀ ਹਨ ਫਲਾਈਟ 'ਚ ਪਾਵਰ ਬੈਂਕ ਲਿਜਾਣ ਦੇ ਸਹੀ ਨਿਯਮ? ਇਕ ਗਲਤੀ ਨਾਲ ਮਚ ਸਕਦੀ ਹੈ ਹਫੜਾ-ਦਫੜੀ, ਪੜ੍ਹੋ DGCA ਦੀਆਂ ਗਾਈਡਲਾਈਨਜ਼
DGCA ਦੇ ਮੁੱਢਲੇ ਨਿਯਮ ਸਾਰੀਆਂ ਏਅਰਲਾਈਨਜ਼ 'ਤੇ ਲਾਗੂ ਹੁੰਦੇ ਹਨ, ਪਰ ਹਰੇਕ ਏਅਰਲਾਈਨ ਦੀਆਂ ਆਪਣੀਆਂ ਕੁਝ ਸ਼ਰਤਾਂ ਵੀ ਹੁੰਦੀਆਂ ਹਨ। ਇੰਡੀਗੋ, ਸਪਾਈਸਜੈੱਟ ਅਤੇ ਅਕਾਸਾ ਏਅਰ 100 Wh ਤੱਕ ਦੇ ਪਾਵਰ ਬੈਂਕ ਬਿਨਾਂ ਕਿਸੇ ਵਿਸ਼ੇਸ਼ ਇਜਾਜ਼ਤ ਦੇ ਅਤੇ 160 Wh ਤੱਕ ਦੇ ਪਾਵਰ ਬੈਂਕ ਵਿਸ਼ੇਸ਼ ਇਜਾਜ਼ਤ ਨਾਲ ਕੈਬਿਨ 'ਚ ਲਿਜਾਣ ਦੀ ਇਜਾਜ਼ਤ ਦਿੰਦੀਆਂ ਹਨ।
Posted By Seema Anand
Publish Date: Wed, 14 Oct 2026 12:10 PM (IST)
Updated Date: Wed, 14 Oct 2026 12:13 PM (IST)
ਲਾਈਫਸਟਾਈਲ ਡੈਸਕ, ਨਵੀਂ ਦਿੱਲੀ : ਸੋਚੋ, ਤੁਸੀਂ ਫਲਾਈਟ 'ਚ ਆਰਾਮ ਨਾਲ ਸਫ਼ਰ ਕਰ ਰਹੇ ਹੋਵੋ ਅਤੇ ਅਚਾਨਕ ਤੁਹਾਡੇ ਬਿਲਕੁਲ ਉੱਪਰ ਸਾਮਾਨ ਰੱਖਣ ਵਾਲੇ ਕੈਬਿਨ 'ਚੋਂ ਧੂੰਆਂ ਨਿਕਲਣ ਲੱਗ ਪਵੇ... ਅਜਿਹੀ ਸਥਿਤੀ 'ਚ ਘਬਰਾਹਟ ਹੋਣਾ ਸੁਭਾਵਿਕ ਹੈ। ਦਰਅਸਲ, 11 ਅਕਤੂਬਰ ਨੂੰ ਇੰਡੀਗੋ ਦੀ ਇਕ ਫਲਾਈਟ 'ਚ ਯਾਤਰੀਆਂ ਨਾਲ ਅਜਿਹੀ ਹੀ ਘਟਨਾ ਵਾਪਰੀ ਹੈ।
ਇਸ ਪੂਰੀ ਹਫੜਾ-ਦਫੜੀ ਦਾ ਕਾਰਨ ਕੋਈ ਵੱਡੀ ਤਕਨੀਕੀ ਖ਼ਰਾਬੀ ਨਹੀਂ, ਸਗੋਂ ਇਕ ਆਮ ਜਿਹਾ ਪਾਵਰ ਬੈਂਕ ਸੀ, ਜਿਸ ਨੂੰ ਇਕ ਯਾਤਰੀ ਨੇ ਉੱਪਰ ਓਵਰਹੈੱਡ ਬਿਨ 'ਚ ਰੱਖ ਦਿੱਤਾ ਸੀ ਅਤੇ ਉਸ ਨੂੰ ਅਚਾਨਕ ਅੱਗ ਲੱਗ ਗਈ। ਇਸ ਇਕ ਛੋਟੀ ਜਿਹੀ ਗਲਤੀ ਕਾਰਨ ਜਹਾਜ਼ ਨੂੰ ਰਸਤੇ 'ਚੋਂ ਹੀ ਹੈਦਰਾਬਾਦ ਵੱਲ ਮੋੜਨਾ ਪਿਆ।
ਅੱਜਕੱਲ੍ਹ ਅਸੀਂ ਸਾਰੇ ਪਾਵਰ ਬੈਂਕ ਤੋਂ ਬਿਨਾਂ ਸਫ਼ਰ ਕਰਨ ਬਾਰੇ ਸੋਚ ਵੀ ਨਹੀਂ ਸਕਦੇ। ਹਾਲਾਂਕਿ, ਫਲਾਈਟ 'ਚ ਇਸ ਨੂੰ ਲਿਜਾਣ ਅਤੇ ਵਰਤਣ ਸਬੰਧੀ ਕੀਤੀ ਗਈ ਇਕ ਮਾਮੂਲੀ ਜਿਹੀ ਲਾਪਰਵਾਹੀ ਤੁਹਾਨੂੰ ਅਤੇ ਤੁਹਾਡੇ ਨਾਲ ਸਫ਼ਰ ਕਰ ਰਹੇ ਯਾਤਰੀਆਂ ਨੂੰ ਵੱਡੀ ਮੁਸੀਬਤ 'ਚ ਪਾ ਸਕਦੀ ਹੈ। ਇਸੇ ਗੱਲ ਨੂੰ ਧਿਆਨ 'ਚ ਰੱਖਦਿਆਂ ਹਵਾਬਾਜ਼ੀ ਰੈਗੂਲੇਟਰ DGCA ਅਤੇ ਏਅਰਲਾਈਨਜ਼ ਨੇ ਕੁਝ ਸਖ਼ਤ ਨਿਯਮ ਬਣਾਏ ਹਨ। ਆਓ ਜਾਣਦੇ ਹਾਂ ਕਿ ਪਾਵਰ ਬੈਂਕ ਨਾਲ ਸਫ਼ਰ ਕਰਦੇ ਸਮੇਂ ਤੁਹਾਨੂੰ ਕਿਹੜੀਆਂ ਗੱਲਾਂ ਦਾ ਧਿਆਨ ਰੱਖਣਾ ਚਾਹੀਦਾ ਹੈ।
ਫਲਾਈਟ 'ਚ ਜਾਨਲੇਵਾ ਸਾਬਤ ਹੋ ਸਕਦੀ ਹੈ ਇਹ ਗਲਤੀ
ਸਭ ਤੋਂ ਪਹਿਲਾ ਨਿਯਮ ਇਹ ਹੈ ਕਿ ਪਾਵਰ ਬੈਂਕ ਕਦੇ ਵੀ ਉਸ ਸੂਟਕੇਸ 'ਚ ਨਹੀਂ ਰੱਖਣਾ ਚਾਹੀਦਾ, ਜਿਸ ਨੂੰ ਕਾਰਗੋ ਯਾਨੀ ਜਹਾਜ਼ ਦੇ ਹੇਠਲੇ ਹਿੱਸੇ 'ਚ ਰੱਖਿਆ ਜਾਂਦਾ ਹੈ। ਇਸ ਨੂੰ ਹਮੇਸ਼ਾ ਆਪਣੇ ਨਾਲ ਕੈਬਿਨ ਬੈਗ ਜਾਂ ਹੈਂਡ ਬੈਗ 'ਚ ਹੀ ਰੱਖਣਾ ਚਾਹੀਦਾ ਹੈ। ਇਸ ਦੇ ਪਿੱਛੇ ਇਕ ਸਿੱਧਾ ਜਿਹਾ ਤਰਕ ਹੈ ਕਿ ਜੇਕਰ ਕਾਰਗੋ 'ਚ ਰੱਖੇ ਪਾਵਰ ਬੈਂਕ ਨੂੰ ਅੱਗ ਲੱਗ ਜਾਂਦੀ ਹੈ, ਤਾਂ ਕਰੂ ਮੈਂਬਰਾਂ ਲਈ ਤੁਰੰਤ ਉੱਥੇ ਪਹੁੰਚ ਕੇ ਅੱਗ ਬੁਝਾਉਣਾ ਅਸੰਭਵ ਹੋ ਜਾਵੇਗਾ।
ਓਵਰਹੈੱਡ ਬਿਨ 'ਚ ਰੱਖਣ ਦੀ ਗਲਤੀ ਕਦੇ ਨਾ ਕਰੋ
ਇੰਡੀਗੋ ਦੀ ਫਲਾਈਟ 'ਚ ਅੱਗ ਲੱਗਣ ਦੀ ਘਟਨਾ ਓਵਰਹੈੱਡ ਬਿਨ ਯਾਨੀ ਸੀਟ ਦੇ ਉੱਪਰ ਸਾਮਾਨ ਰੱਖਣ ਵਾਲੀ ਥਾਂ 'ਚ ਰੱਖੇ ਪਾਵਰ ਬੈਂਕ ਕਾਰਨ ਵਾਪਰੀ ਸੀ। ਨਿਯਮਾਂ ਮੁਤਾਬਕ, ਪਾਵਰ ਬੈਂਕ ਨੂੰ ਕਦੇ ਵੀ ਓਵਰਹੈੱਡ ਬਿਨ 'ਚ ਨਹੀਂ ਛੱਡਣਾ ਚਾਹੀਦਾ, ਕਿਉਂਕਿ ਉੱਥੇ ਧੂੰਆਂ ਨਿਕਲਣ 'ਤੇ ਤੁਰੰਤ ਨਜ਼ਰ ਨਹੀਂ ਪੈਂਦੀ।
ਇਸ ਲਈ, ਇਸ ਨੂੰ ਹਮੇਸ਼ਾ ਆਪਣੀਆਂ ਨਜ਼ਰਾਂ ਦੇ ਸਾਹਮਣੇ ਰੱਖੋ। ਤੁਸੀਂ ਇਸ ਨੂੰ ਆਪਣੇ ਸਾਹਮਣੇ ਵਾਲੀ ਸੀਟ ਦੀ ਜੇਬ 'ਚ ਜਾਂ ਆਪਣੀ ਸੀਟ ਦੇ ਹੇਠਾਂ ਰੱਖ ਸਕਦੇ ਹੋ। ਇਸ ਨਾਲ ਜੇਕਰ ਡਿਵਾਈਸ ਗਰਮ ਹੋਣ ਜਾਂ ਇਸ 'ਚੋਂ ਧੂੰਆਂ ਨਿਕਲਣ ਵਰਗੀ ਕੋਈ ਸਮੱਸਿਆ ਆਉਂਦੀ ਹੈ, ਤਾਂ ਇਸ ਦਾ ਤੁਰੰਤ ਪਤਾ ਲੱਗ ਸਕਦਾ ਹੈ।
ਟੇਕ-ਆਫ ਤੋਂ ਲੈਂਡਿੰਗ ਤੱਕ ਇਹ ਗਲਤੀ ਪੈ ਸਕਦੀ ਹੈ ਭਾਰੀ
ਸਾਡੇ 'ਚੋਂ ਕਈ ਲੋਕਾਂ ਦੀ ਆਦਤ ਹੁੰਦੀ ਹੈ ਕਿ ਫਲਾਈਟ 'ਚ ਬੈਠਦੇ ਹੀ ਫ਼ੋਨ ਨੂੰ ਪਾਵਰ ਬੈਂਕ ਨਾਲ ਚਾਰਜ ਕਰਨ ਲੱਗ ਜਾਂਦੇ ਹਨ। ਹਾਲਾਂਕਿ, DGCA ਦੀ ਸਪੱਸ਼ਟ ਹਦਾਇਤ ਹੈ ਕਿ ਟੇਕ-ਆਫ ਤੋਂ ਲੈ ਕੇ ਲੈਂਡਿੰਗ ਤੱਕ, ਪੂਰੀ ਉਡਾਣ ਦੌਰਾਨ ਪਾਵਰ ਬੈਂਕ ਨੂੰ ਬੰਦ ਰੱਖਣਾ ਜ਼ਰੂਰੀ ਹੈ। ਤੁਸੀਂ ਨਾ ਤਾਂ ਇਸ ਨਾਲ ਆਪਣਾ ਫ਼ੋਨ ਚਾਰਜ ਕਰ ਸਕਦੇ ਹੋ ਅਤੇ ਨਾ ਹੀ ਜਹਾਜ਼ ਦੀ ਸੀਟ 'ਚ ਦਿੱਤੇ ਗਏ ਪਾਵਰ ਆਊਟਲੈੱਟ ਦੀ ਵਰਤੋਂ ਕਰਕੇ ਆਪਣੇ ਪਾਵਰ ਬੈਂਕ ਨੂੰ ਚਾਰਜ ਕਰ ਸਕਦੇ ਹੋ।
ਕਿੰਨੀ ਸਮਰੱਥਾ ਵਾਲੇ ਡਿਵਾਈਸ ਨੂੰ ਹੈ ਇਜਾਜ਼ਤ?
ਫਲਾਈਟ 'ਚ ਤੁਸੀਂ ਕਿਸੇ ਵੀ ਸਮਰੱਥਾ ਵਾਲਾ ਪਾਵਰ ਬੈਂਕ ਆਪਣੇ ਨਾਲ ਨਹੀਂ ਲਿਜਾ ਸਕਦੇ। ਇਸ ਲਈ ਕੁਝ ਮਾਪਦੰਡ ਤੈਅ ਕੀਤੇ ਗਏ ਹਨ:
- 100 Wh ਤੱਕ ਦੀ ਸਮਰੱਥਾ: ਇਸ ਸਮਰੱਥਾ ਵਾਲੇ ਪਾਵਰ ਬੈਂਕ ਨੂੰ ਆਮ ਤੌਰ 'ਤੇ ਨਾਲ ਲਿਜਾਣ ਦੀ ਇਜਾਜ਼ਤ ਹੁੰਦੀ ਹੈ।
- 100 Wh ਤੋਂ 160 Wh ਦੇ ਵਿਚਕਾਰ: ਇਸ ਲਈ ਯਾਤਰਾ ਤੋਂ ਪਹਿਲਾਂ ਆਪਣੀ ਏਅਰਲਾਈਨ ਤੋਂ ਵਿਸ਼ੇਸ਼ ਇਜਾਜ਼ਤ ਲੈਣੀ ਪਵੇਗੀ।
- 160 Wh ਤੋਂ ਵੱਧ: ਇਸ ਸਮਰੱਥਾ ਵਾਲੇ ਡਿਵਾਈਸ ਨੂੰ ਫਲਾਈਟ 'ਚ ਲਿਜਾਣ 'ਤੇ ਪੂਰੀ ਤਰ੍ਹਾਂ ਪਾਬੰਦੀ ਹੈ।
ਆਪਣੇ ਪਾਵਰ ਬੈਂਕ ਦੀ ਸਮਰੱਥਾ ਕਿਵੇਂ ਚੈੱਕ ਕਰੀਏ?
ਤੁਹਾਡੇ ਪਾਵਰ ਬੈਂਕ 'ਤੇ ਇਸ ਦੀ ਸਮਰੱਥਾ 'mAh' 'ਚ ਲਿਖੀ ਹੁੰਦੀ ਹੈ। ਇਸ ਨੂੰ 'Wh' 'ਚ ਬਦਲਣ ਲਈ ਇਕ ਸੌਖਾ ਫਾਰਮੂਲਾ ਹੈ:
(mAh × 3.7) ÷ 1000 = Wh
ਉਦਾਹਰਨ ਲਈ, ਜੇਕਰ ਤੁਹਾਡਾ ਪਾਵਰ ਬੈਂਕ 20,000 mAh ਦਾ ਹੈ, ਤਾਂ ਇਸ ਦੀ ਸਮਰੱਥਾ 74 Wh ਹੋਵੇਗੀ, ਜੋ 100 Wh ਦੀ ਸੀਮਾ ਦੇ ਅੰਦਰ ਹੈ। ਉੱਥੇ ਹੀ, 30,000 mAh ਦੇ ਪਾਵਰ ਬੈਂਕ ਦੀ ਸਮਰੱਥਾ 111 Wh ਹੋਵੇਗੀ, ਜਿਸ ਨੂੰ ਲਿਜਾਣ ਲਈ ਏਅਰਲਾਈਨ ਦੀ ਇਜਾਜ਼ਤ ਜ਼ਰੂਰੀ ਹੋਵੇਗੀ।
ਇੰਡੀਗੋ ਬਨਾਮ ਏਅਰ ਇੰਡੀਆ: ਕੀ ਨਿਯਮਾਂ 'ਚ ਹੈ ਕੋਈ ਫ਼ਰਕ?
DGCA ਦੇ ਮੁੱਢਲੇ ਨਿਯਮ ਸਾਰੀਆਂ ਏਅਰਲਾਈਨਜ਼ 'ਤੇ ਲਾਗੂ ਹੁੰਦੇ ਹਨ, ਪਰ ਹਰੇਕ ਏਅਰਲਾਈਨ ਦੀਆਂ ਆਪਣੀਆਂ ਕੁਝ ਸ਼ਰਤਾਂ ਵੀ ਹੁੰਦੀਆਂ ਹਨ। ਇੰਡੀਗੋ, ਸਪਾਈਸਜੈੱਟ ਅਤੇ ਅਕਾਸਾ ਏਅਰ 100 Wh ਤੱਕ ਦੇ ਪਾਵਰ ਬੈਂਕ ਬਿਨਾਂ ਕਿਸੇ ਵਿਸ਼ੇਸ਼ ਇਜਾਜ਼ਤ ਦੇ ਅਤੇ 160 Wh ਤੱਕ ਦੇ ਪਾਵਰ ਬੈਂਕ ਵਿਸ਼ੇਸ਼ ਇਜਾਜ਼ਤ ਨਾਲ ਕੈਬਿਨ 'ਚ ਲਿਜਾਣ ਦੀ ਇਜਾਜ਼ਤ ਦਿੰਦੀਆਂ ਹਨ।
ਦੂਜੇ ਪਾਸੇ, ਏਅਰ ਇੰਡੀਆ ਦੇ ਨਿਯਮ ਥੋੜ੍ਹੇ ਜ਼ਿਆਦਾ ਸਖ਼ਤ ਹਨ। ਏਅਰ ਇੰਡੀਆ ਇਕ ਯਾਤਰੀ ਨੂੰ ਵੱਧ ਤੋਂ ਵੱਧ 2 ਪਾਵਰ ਬੈਂਕ ਹੀ ਨਾਲ ਲਿਜਾਣ ਦੀ ਇਜਾਜ਼ਤ ਦਿੰਦੀ ਹੈ ਅਤੇ ਉਹ ਵੀ 100 Wh ਦੀ ਸੀਮਾ ਦੇ ਅੰਦਰ ਹੋਣੇ ਚਾਹੀਦੇ ਹਨ।
ਅਗਲੀ ਵਾਰ ਜਦੋਂ ਵੀ ਤੁਸੀਂ ਹਵਾਈ ਸਫ਼ਰ ਲਈ ਆਪਣਾ ਬੈਗ ਪੈਕ ਕਰੋ, ਤਾਂ ਇਨ੍ਹਾਂ ਨਿਯਮਾਂ ਨੂੰ ਜ਼ਰੂਰ ਯਾਦ ਰੱਖੋ। ਤੁਹਾਡੀ ਥੋੜ੍ਹੀ ਜਿਹੀ ਸਮਝਦਾਰੀ 'ਤੇ ਤੁਹਾਡੀ ਅਤੇ ਤੁਹਾਡੇ ਨਾਲ ਸਫ਼ਰ ਕਰ ਰਹੇ ਸੈਂਕੜੇ ਯਾਤਰੀਆਂ ਦੀ ਸੁਰੱਖਿਆ ਨਿਰਭਰ ਕਰਦੀ ਹੈ।