Jio-T-Mobile ਦੀ ਸਾਂਝੇਦਾਰੀ ਨਾਲ ਬਦਲੇਗਾ ਰੋਮਿੰਗ ਦਾ ਤਜਰਬਾ, ਭਾਰਤ-ਅਮਰੀਕਾ ’ਚ ਮਿਲੇਗੀ 5G ਸੇਵਾ

ਟੈਕਨੋਲੋਜੀ ਡੈਸਕ, ਨਵੀਂ ਦਿੱਲੀ: ਭਾਰਤ ਦੀ ਟੈਲੀਕਾਮ ਕੰਪਨੀ Jio ਅਤੇ ਅਮਰੀਕਾ ਦੀ T-Mobile ਨੇ 5G ਰੋਮਿੰਗ ਨੂੰ ਲੈ ਕੇ ਸਾਂਝੇਦਾਰੀ ਕੀਤੀ ਹੈ। ਕੰਪਨੀਆਂ ਮੁਤਾਬਕ, ਇਸ ਸਾਂਝੇਦਾਰੀ ਰਾਹੀਂ ਭਾਰਤ ਅਤੇ ਅਮਰੀਕਾ ਦੇ 5G Standalone ਨੈੱਟਵਰਕ ਨੂੰ ਰੋਮਿੰਗ ਦੇ ਜ਼ਰੀਏ ਜੋੜਿਆ ਗਿਆ ਹੈ, ਜਿਸ ਨੂੰ ਦੋਵੇਂ ਕੰਪਨੀਆਂ ਨੇ ਆਪਣੀ ਕਿਸਮ ਦਾ ਪਹਿਲਾ ਮਾਮਲਾ ਦੱਸਿਆ ਹੈ।

ਯਾਤਰਾ ਦੌਰਾਨ ਮਿਲੇਗੀ 5G ਕਨੈਕਟੀਵਿਟੀ

ਇਸ ਪਾਰਟਨਰਸ਼ਿਪ ਤੋਂ ਬਾਅਦ ਭਾਰਤ ਤੋਂ ਅਮਰੀਕਾ ਜਾਣ ਵਾਲੇ Jio ਗਾਹਕ T-Mobile ਦੇ 5G Standalone ਨੈੱਟਵਰਕ ’ਤੇ ਰੋਮਿੰਗ ਦੀ ਵਰਤੋਂ ਕਰ ਸਕਣਗੇ। ਇਸੇ ਤਰ੍ਹਾਂ ਅਮਰੀਕਾ ਤੋਂ ਭਾਰਤ ਆਉਣ ਵਾਲੇ T-Mobile ਗਾਹਕ Jio ਦੇ 5G Standalone ਨੈੱਟਵਰਕ ਨਾਲ ਜੁੜ ਸਕਣਗੇ। ਕੰਪਨੀਆਂ ਮੁਤਾਬਕ, ਇਸ ਨਾਲ ਯਾਤਰਾ ਦੌਰਾਨ ਯੂਜ਼ਰਜ਼ ਨੂੰ ਤੇਜ਼ ਇੰਟਰਨੈੱਟ, ਘੱਟ ਲੇਟੈਂਸੀ ਅਤੇ ਵਧੇਰੇ ਭਰੋਸੇਮੰਦ ਕਨੈਕਸ਼ਨ ਦਾ ਲਾਭ ਮਿਲ ਸਕਦਾ ਹੈ।

ਵੀਡੀਓ ਸਟ੍ਰੀਮਿੰਗ ਤੋਂ ਆਫਿਸ ਵਰਕ ਤੱਕ ਫਾਇਦਾ

5G ਰੋਮਿੰਗ ਦੀ ਸਹੂਲਤ ਨਾਲ ਭਾਰਤ ਅਤੇ ਅਮਰੀਕਾ ਵਿਚਕਾਰ ਯਾਤਰਾ ਕਰਨ ਵਾਲੇ ਗਾਹਕ ਵੀਡੀਓ ਸਟ੍ਰੀਮਿੰਗ, ਵੀਡੀਓ ਕਾਲਿੰਗ ਅਤੇ ਆਨਲਾਈਨ ਕੰਮ ਵਰਗੀਆਂ ਸਰਵਿਸਾਂ ਦੀ ਵਰਤੋਂ ਕਰ ਸਕਣਗੇ। ਦੋਵੇਂ ਕੰਪਨੀਆਂ ਦਾ ਕਹਿਣਾ ਹੈ ਕਿ ਇਹ ਕਨੈਕਟੀਵਿਟੀ ਗਾਹਕਾਂ ਦੇ ਰੋਮਿੰਗ ਤਜਰਬੇ ਨੂੰ ਹੋਰ ਸੁਚੱਜਾ ਬਣਾਉਣ ਵਿੱਚ ਮਦਦ ਕਰੇਗੀ।

Jio ਅਤੇ T-Mobile ਨੇ ਕੀ ਕਿਹਾ?

T-Mobile ਦੇ ਚੀਫ ਨੈੱਟਵਰਕ ਅਫਸਰ ਅੰਕੁਰ ਕਪੂਰ ਨੇ ਕਿਹਾ ਕਿ ਇੱਕ ਦੇਸ਼ ਤੋਂ ਦੂਜੇ ਦੇਸ਼ ਪਹੁੰਚਣ ਦੇ ਬਾਵਜੂਦ ਗਾਹਕ 5G ਸਪੀਡ ਦਾ ਲਾਭ ਲੈ ਸਕਣਗੇ। ਉਨ੍ਹਾਂ ਨੇ ਇਸ ਨੂੰ ਟੈਕਨੋਲੋਜੀ ਦੀ ਵੱਡੀ ਸਮਰੱਥਾ ਨਾਲ ਜੋੜਿਆ। ਉੱਥੇ ਹੀ Jio ਦੇ ਹੈੱਡ-ਇੰਟਰਨੈਸ਼ਨਲ ਨੈੱਟਵਰਕ, ਪਾਰਟਨਰਸ਼ਿਪ ਐਂਡ ਸਰਵਿਸਿਜ਼ ਮਾਰਕ ਯਾਰਕੋਵਸਕੀ ਨੇ ਕਿਹਾ ਕਿ ਇਹ ਉਪਲਬਧੀ ਸਿਰਫ਼ ਰੋਮਿੰਗ ਤੱਕ ਸੀਮਿਤ ਨਹੀਂ ਹੈ। ਉਨ੍ਹਾਂ ਮੁਤਾਬਕ, ਦੋਵੇਂ ਕੰਪਨੀਆਂ ਦੇ 5G Standalone ਨੈੱਟਵਰਕ ਦੇ ਇਕੱਠੇ ਆਉਣ ਨਾਲ ਗਾਹਕਾਂ ਅਤੇ ਕਾਰੋਬਾਰਾਂ ਲਈ ਨਵੀਆਂ ਸਰਵਿਸਾਂ ਅਤੇ AI-ਅਧਾਰਿਤ ਸੇਵਾਵਾਂ ਦੇ ਰਾਹ ਖੁੱਲ੍ਹ ਸਕਦੇ ਹਨ।

Syniverse ਨੇ ਨਿਭਾਈ ਅਹਿਮ ਭੂਮਿਕਾ

Jio ਅਤੇ T-Mobile ਵਿਚਕਾਰ ਇਸ 5G Standalone ਰੋਮਿੰਗ ਕਨੈਕਸ਼ਨ ਨੂੰ ਸੰਭਵ ਬਣਾਉਣ ਵਿੱਚ Syniverse ਦੇ ਪਲੇਟਫਾਰਮ ਦੀ ਵੀ ਅਹਿਮ ਭੂਮਿਕਾ ਰਹੀ। ਕੰਪਨੀਆਂ ਮੁਤਾਬਕ, ਇਸ ਪਲੇਟਫਾਰਮ ਨੇ ਦੋਵੇਂ ਨੈੱਟਵਰਕਾਂ ਨੂੰ ਸੁਰੱਖਿਅਤ ਢੰਗ ਨਾਲ ਆਪਸ ਵਿੱਚ ਜੋੜਨ ਵਿੱਚ ਮਦਦ ਕੀਤੀ ਹੈ।