ਕੀ AI ਹੋ ਰਹੀ ਹੈ ਬੇਕਾਬੂ? ਹੁਣ ਜੈਮਿਨੀ ਨੇ ਖ਼ੁਦ-ਬਖ਼ੁਦ ਤਿੰਨ ਕੰਪਨੀਆਂ ਦੀਆਂ ਸਾਈਟਾਂ ਕੀਤੀਆਂ ਹੈਕ

ਸਾਨ ਫ੍ਰਾਂਸਿਸਕੋ- ਕਈ ਮਾਹਿਰ ਏਆਈ ਨੂੰ ਮਨੁੱਖੀ ਸੱਭਿਆਚਾਰ ਲਈ ਖ਼ਤਰਾ ਦੱਸ ਰਹੇ ਹਨ। ਇਸ ਦੌਰਾਨ, ਅਜਿਹੀਆਂ ਘਟਨਾਵਾਂ ਸਾਹਮਣੇ ਆ ਰਹੀਆਂ ਹਨ, ਜੋ ਇਹ ਦਰਸਾ ਰਹੀਆਂ ਹਨ ਕਿ ਏਆਈ ਬੇਕਾਬੂ ਹੋ ਰਹੀ ਹੈ। ਗੂਗਲ ਦੀ ਏਆਈ ਜੈਮਿਨੀ ਨੇ ਮਈ ਵਿਚ ਇਕ ਟੈਸਟ ਦੌਰਾਨ ਆਪਣੀ ਸੀਮਾ ਤੋਂ ਅੱਗੇ ਵਧਦੇ ਹੋਏ ਤਿੰਨ ਕੰਪਨੀਆਂ ਦੇ ਨੈੱਟਵਰਕ ’ਚ ਸੰਨ੍ਹ ਲਾ ਦਿੱਤੀ।

ਗੂਗਲ ਮੁਤਾਬਕ, ਇਹ ਘਟਨਾਵਾਂ ਜੈਮਿਨੀ ਦੀਆਂ ਸਾਈਬਰ-ਸੁਰੱਖਿਆ ਸਮਰੱਥਾਵਾਂ ਦੀ ਪਰਖ ਕਰਨ ਲਈ ਕੀਤੇ ਜਾ ਰਹੇ ਟੈਸਟ ਦੌਰਾਨ ਹੋਈਆਂ। ਤਿੰਨੋਂ ਕੰਪਨੀਆਂ ਦੇ ਨੈੱਟਵਰਕ ਵਿਚ ਲਾਗਇਨ ਕਰਨ ਤੋਂ ਬਾਅਦ, ਏਆਈ ਮਾਡਲ ਨੇ ਖ਼ੁਦ ਹੀ ਆਪਣੇ ਹਮਲੇ ਰੋਕ ਦਿੱਤੇ। ਇਨ੍ਹਾਂ ਹੈਕਿੰਗ ਦੀਆਂ ਘਟਨਾਵਾਂ ਦਾ ਪਤਾ ਲੱਗਣ ਤੋਂ ਪਹਿਲਾਂ, ਐਂਥਰੋਪਿਕ, ਓਪਨਏਆਈ ਅਤੇ ਮੈਟਾ ਵਰਗੀਆਂ ਹੋਰ ਪ੍ਰਮੁੱਖ ਏਆਈ ਲੈਬਜ਼ ਵਿਚ ਵੀ ਅਜਿਹੀਆਂ ਹੀ ਘਟਨਾਵਾਂ ਹੋ ਚੁੱਕੀਆਂ ਹਨ, ਜਿਸ ਨਾਲ ਇਹ ਡਰ ਵਧ ਗਿਆ ਹੈ ਕਿ ਇਹ ਟੈਕਨਾਲੋਜੀ ਮਨੁੱਖ ਦੇ ਕੰਟਰੋਲ ਤੋਂ ਬਾਹਰ ਹੋ ਸਕਦੀ ਹੈ। ਐਂਥਰੋਪਿਕ ਦੇ ਸੀਈਓ ਡਾਰਿਓ ਅਮੋਦੇਈ ਵਰਗੇ ਕੁਝ ਉਦਯੋਗ ਦੇ ਨੇਤਾਵਾਂ ਨੇ ਇਸ ਦੇ ਜਵਾਬ ਵਿਚ ਏਆਈ ਦੇ ਵਿਕਾਸ ਦੀ ਰਫ਼ਤਾਰ ਨੂੰ ਹੌਲੀ ਕਰਨ ਦੀ ਮੰਗ ਕੀਤੀ ਹੈ। ਦੂਜੇ ਪਾਸੇ, ਚਿਪ ਬਣਾਉਣ ਵਾਲੀ ਕੰਪਨੀ ਐਨਵੀਡੀਆ ਦੇ ਸੀਈਓ ਜੇਨਸਨ ਹੂਆਂਗ ਵਰਗੇ ਹੋਰ ਲੋਕਾਂ ਦਾ ਕਹਿਣਾ ਹੈ ਕਿ ਏਆਈ ਦਾ ਵਿਕਾਸ ਤੇਜ਼ੀ ਨਾਲ ਜਾਰੀ ਰਹਿਣਾ ਚਾਹੀਦਾ ਹੈ।

ਜੈਮਿਨੀ ਨੇ ਡਮੀ ਕੰਪਨੀ ਦੀ ਥਾਂ ਅਸਲੀ ਕੰਪਨੀ ’ਤੇ ਕੀਤਾ ਹਮਲਾ

ਗੂਗਲ ਨੇ ਕਿਹਾ ਕਿ ਹਰ ਘਟਨਾ ਵਿਚ, ਉਸ ਦੇ ਏਆਈ ਮਾਡਲ ਨੂੰ ਇਕ ਡਮੀ ਕੰਪਨੀ ’ਤੇ ਹਮਲਾ ਕਰਨ ਦਾ ਹੁਕਮ ਦਿੱਤਾ ਗਿਆ ਸੀ। ਪਰ ਟੈਸਟ ਵਿਚ ਵਰਤੀ ਗਈ ਡਮੀ ਕੰਪਨੀ ਦਾ ਨਾਂ ਇਕ ਅਸਲੀ ਕੰਪਨੀ ਵਰਗਾ ਸੀ। ਜਦੋਂ ਜੈਮਿਨੀ ਨੂੰ ਇੰਟਰਨੈੱਟ ਦਾ ਐਕਸੈਸ ਮਿਲਿਆ, ਤਾਂ ਉਸ ਨੇ ਉਸ ਅਸਲੀ ਕੰਪਨੀ ਵਿਚ ਸੰਨ੍ਹ ਲਗਾਉਣ ਦੀ ਕੋਸ਼ਿਸ਼ ਸ਼ੁਰੂ ਕਰ ਦਿੱਤੀ।

ਏਆਈ ਮਾਡਲ ਨੇ ਇੰਟਰਨੈੱਟ ’ਤੇ ਉਪਲਬਧ ਪਾਸਵਰਡ ਤੇ ਅਨੁਮਾਨ ਦੇ ਆਧਾਰ ’ਤੇ ਕੀਤਾ ਲਾਗਇਨ

ਜੈਮਿਨੀ ਮਾਡਲ ਨੇ ਟਾਰਗੈਟ ਕੀਤੀ ਗਈ ਕੰਪਨੀ ਅਤੇ ਦੋ ਹੋਰ ਕੰਪਨੀਆਂ ਦੇ ਆਨਲਾਈਨ ਇੰਫ੍ਰਾਸਟਰਕਚਰ ਵਿਚ ਲਾਗਇਨ ਕਰਨ ਲਈ ਅਜਿਹੇ ਪਾਸਵਰਡ ਦਾ ਇਸਤੇਮਾਲ ਕੀਤਾ ਜੋ ਉਨ੍ਹਾਂ ਨੂੰ ਆਨਲਾਈਨ ਮਿਲੇ ਸਨ ਜਾਂ ਜਿਨ੍ਹਾਂ ਦਾ ਉਨ੍ਹਾਂ ਨੇ ਅਨੁਮਾਨ ਲਗਾਇਆ ਸੀ। ਗੂਗਲ ਨੇ ਦੱਸਿਆ ਕਿ ਲਾਗਇਨ ਕਰਨ ਤੋਂ ਬਾਅਦ, ਜੈਮਿਨੀ ਮਾਡਲ ਨੂੰ ਇਹ ਅਹਿਸਾਸ ਹੋਇਆ ਕਿ ਉਹ ਅਸਲੀ ਕੰਪਨੀਆਂ ਦੇ ਇੰਫ੍ਰਾਸਟਰਕਚਰ ਨੂੰ ਅਕਸੈਸ ਕਰ ਰਹੇ ਹਨ, ਨਾ ਕਿ ਉਹ ਨਕਲੀ ਮਾਹੌਲ ਜੋ ਉਨ੍ਹਾਂ ਦੇ ਟੈਸਟ ਦਾ ਹਿੱਸਾ ਸਨ, ਅਤੇ ਉਨ੍ਹਾਂ ਨੇ ਹਮਲੇ ਰੋਕ ਦਿੱਤੇ। ਗੂਗਲ ਨੇ ਇਹ ਵੀ ਕਿਹਾ ਕਿ ਉਸ ਦੀ ਤਕਨਾਲੋਜੀ ਨਾਲ ਉਨ੍ਹਾਂ ਕੰਪਨੀਆਂ ਨੂੰ ਕੋਈ ਨੁਕਸਾਨ ਨਹੀਂ ਪਹੁੰਚਿਆ ਜਿਨ੍ਹਾਂ ਨੂੰ ਉਸ ਨੇ ਹੈਕ ਕੀਤਾ ਸੀ।