ਭਾਰਤ ’ਚ ਲਾਂਚ ਹੋਈ Maserati Grecale Facelift, 530hp ਦਾ ਦਮਦਾਰ ਇੰਜਣ ਤੇ 285kmph ਦੀ ਟਾਪ ਸਪੀਡ

ਆਟੋ ਡੈਸਕ, ਨਵੀਂ ਦਿੱਲੀ: Maserati ਨੇ ਆਪਣੀ ਭਾਰਤੀ ਕਾਰ ਲਾਈਨਅੱਪ ਵਿਚ ਬਦਲਾਅ ਕਰਦਿਆਂ Grecale Facelift ਨੂੰ ਲਾਂਚ ਕਰ ਦਿੱਤਾ ਹੈ। ਇਸ ਦੀ ਸ਼ੁਰੂਆਤੀ ਐਕਸ-ਸ਼ੋਅਰੂਮ ਕੀਮਤ 1.14 ਕਰੋੜ ਰੁਪਏ ਰੱਖੀ ਗਈ ਹੈ। ਇਸ ਅਪਡੇਟਿਡ SUV ਨੂੰ ਨਵੇਂ ਰੂਪ ਵਿਚ ਪੇਸ਼ ਕੀਤੀਆਂ ਗਈਆਂ GranTurismo ਅਤੇ GranCabrio ਦੇ ਨਾਲ ਲਾਂਚ ਕੀਤਾ ਗਿਆ ਹੈ। ਇਸ ਦੇ ਨਾਲ ਹੀ ਭਾਰਤ ਵਿਚ ਬ੍ਰਾਂਡ ਦੇ ਇੰਜਣਾਂ ਦੇ ਵਿਕਲਪਾਂ ਦੀ ਰੇਂਜ ਵੀ ਪਹਿਲਾਂ ਨਾਲੋਂ ਵਧ ਗਈ ਹੈ।

ਵੇਰੀਐਂਟ ਅਤੇ ਸਪੈਸੀਫਿਕੇਸ਼ਨ

Grecale ਦੇ ਐਂਟਰੀ-ਲੈਵਲ ਵੇਰੀਐਂਟ ਵਿਚ 2.0 ਲੀਟਰ ਦਾ 4-ਸਿਲੰਡਰ ਟਰਬੋ ਪੈਟਰੋਲ ਮਾਈਲਡ ਹਾਈਬ੍ਰਿਡ ਸੈੱਟਅਪ ਦਿੱਤਾ ਗਿਆ ਹੈ, ਜੋ 300hp ਦੀ ਪਾਵਰ ਅਤੇ 450Nm ਦਾ ਟਾਰਕ ਪੈਦਾ ਕਰਦਾ ਹੈ। Maserati ਮੁਤਾਬਕ, ਇਹ ਕਾਰ ਸਿਰਫ਼ 5.6 ਸਕਿੰਟਾਂ ਵਿਚ 0 ਤੋਂ 100kmph ਦੀ ਰਫ਼ਤਾਰ ਫੜ ਸਕਦੀ ਹੈ ਅਤੇ ਇਸ ਦੀ ਟਾਪ ਸਪੀਡ 240kmph ਹੈ।

Modena ਵੇਰੀਐਂਟ ਵਿਚ ਇਸੇ ਇੰਜਣ ਦਾ 330hp ਵਾਲਾ ਵਰਜਨ ਦਿੱਤਾ ਗਿਆ ਹੈ। ਇਹ ਕਾਰ 0 ਤੋਂ 100kmph ਦੀ ਰਫ਼ਤਾਰ ਫੜਨ ਲਈ 5.3 ਸਕਿੰਟ ਲੈਂਦੀ ਹੈ।

ਉੱਥੇ ਹੀ Modena V6 ਵਿਚ Maserati ਦਾ 3.0 ਲੀਟਰ Nettuno V6 ਇੰਜਣ ਮਿਲਦਾ ਹੈ, ਜੋ 390hp ਦੀ ਪਾਵਰ ਪੈਦਾ ਕਰਦਾ ਹੈ। ਇਹ ਕਾਰ 4.9 ਸਕਿੰਟਾਂ ਵਿਚ 0 ਤੋਂ 100kmph ਦੀ ਰਫ਼ਤਾਰ ਫੜ ਸਕਦੀ ਹੈ ਅਤੇ ਇਸ ਦੀ ਟਾਪ ਸਪੀਡ 260kmph ਹੈ।

Trofeo ਵੇਰੀਐਂਟ ਦੀਆਂ ਖੂਬੀਆਂ

ਇਨ੍ਹਾਂ ਸਾਰੇ ਵੇਰੀਐਂਟਾਂ ਤੋਂ ਉੱਪਰ Trofeo ਵੇਰੀਐਂਟ ਹੈ। ਇਸ ਵਿਚ ਵੀ ਉਹੀ Nettuno V6 ਇੰਜਣ ਦਿੱਤਾ ਗਿਆ ਹੈ, ਜਿਸ ਨੂੰ ਟਿਊਨ ਕਰ ਕੇ 530hp ਦੀ ਪਾਵਰ ਅਤੇ 620Nm ਦਾ ਟਾਰਕ ਪੈਦਾ ਕਰਨ ਦੇ ਸਮਰੱਥ ਬਣਾਇਆ ਗਿਆ ਹੈ।

Maserati ਦਾ ਦਾਅਵਾ ਹੈ ਕਿ ਇਹ ਕਾਰ ਸਿਰਫ਼ 3.8 ਸਕਿੰਟਾਂ ਵਿਚ 0 ਤੋਂ 100kmph ਦੀ ਰਫ਼ਤਾਰ ਫੜ ਸਕਦੀ ਹੈ। ਇਸ ਦੀ ਟਾਪ ਸਪੀਡ 285kmph ਹੈ।

Maserati Grecale Facelift ਦਾ ਇਲੈਕਟ੍ਰਿਕ ਵਰਜਨ

Folgore, Grecale ਦਾ ਪੂਰੀ ਤਰ੍ਹਾਂ ਇਲੈਕਟ੍ਰਿਕ ਵਰਜਨ ਹੈ। ਇਸ ਵਿਚ ਦੋ ਇਲੈਕਟ੍ਰਿਕ ਮੋਟਰਾਂ ਦਿੱਤੀਆਂ ਗਈਆਂ ਹਨ, ਜੋ ਮਿਲ ਕੇ 550hp ਦੀ ਪਾਵਰ ਅਤੇ 820Nm ਦਾ ਟਾਰਕ ਪੈਦਾ ਕਰਦੀਆਂ ਹਨ। ਇਹ ਕਾਰ 4.1 ਸਕਿੰਟਾਂ ਵਿਚ 0 ਤੋਂ 100kmph ਦੀ ਰਫ਼ਤਾਰ ਫੜ ਸਕਦੀ ਹੈ ਅਤੇ ਇਸ ਦੀ ਟਾਪ ਸਪੀਡ 220kmph ਹੈ।

ਨਵੀਂ ਕੰਟਰੋਲ ਰਣਨੀਤੀ ਦੀ ਮਦਦ ਨਾਲ ਇਸ ਦੀ ਡਰਾਈਵਿੰਗ ਰੇਂਜ ਵਧ ਕੇ 580 ਕਿਲੋਮੀਟਰ ਤੱਕ ਹੋ ਗਈ ਹੈ।

ਡਿਜ਼ਾਈਨ ਅਤੇ ਐਕਸਟੀਰੀਅਰ

ਇਸ ਫੇਸਲਿਫਟ ਦਾ ਡਿਜ਼ਾਈਨ ਕਿਸੇ ਸੁਪਰਕਾਰ ਤੋਂ ਪ੍ਰੇਰਿਤ ਲੱਗਦਾ ਹੈ। ਇਸ ਦੇ ਫਰੰਟ ਬੰਪਰ ਨੂੰ ਸ਼ਾਰਕ-ਨੋਜ਼ ਸਟਾਈਲ ਵਿਚ ਮੁੜ ਡਿਜ਼ਾਈਨ ਕੀਤਾ ਗਿਆ ਹੈ। ਇਸ ਵਿਚ ਪਹਿਲਾਂ ਨਾਲੋਂ ਵਧੇਰੇ ਉਭਰੀ ਹੋਈ ਕਨਕੇਵ ਗ੍ਰਿਲ, ਵੱਡੇ ਏਅਰ ਇਨਟੇਕ ਅਤੇ ਏਅਰ ਕਰਟੇਨ ਦਿੱਤੇ ਗਏ ਹਨ, ਜੋ ਅਗਲੇ ਪਹੀਆਂ ਦੇ ਆਲੇ-ਦੁਆਲੇ ਹਵਾ ਦੇ ਵਹਾਅ ਨੂੰ ਸਹੀ ਦਿਸ਼ਾ ਦਿੰਦੇ ਹਨ।

Trofeo ਵੇਰੀਐਂਟ ਵਿਚ ਮੈਟ੍ਰਿਕਸ LED ਹੈੱਡਲਾਈਟਾਂ ਮਿਲਦੀਆਂ ਹਨ, ਜਦਕਿ ਬਾਕੀ ਵੇਰੀਐਂਟਾਂ ਵਿਚ ਫੁੱਲ-LED ਯੂਨਿਟਾਂ ਦਿੱਤੀਆਂ ਗਈਆਂ ਹਨ।

ਇਸ ਤੋਂ ਇਲਾਵਾ ਪਹੀਆਂ ਦੇ ਵਿਕਲਪਾਂ ਵਿਚ ਵੀ ਵਾਧਾ ਕੀਤਾ ਗਿਆ ਹੈ। ਇਨ੍ਹਾਂ ਵਿਚ ਨਵੇਂ 20-ਇੰਚ ਦੇ Asteria ਅਤੇ 21-ਇੰਚ ਦੇ Crono ਡਿਜ਼ਾਈਨ ਸ਼ਾਮਲ ਹਨ।

ਇੰਟੀਰੀਅਰ ਅਤੇ ਫੀਚਰਜ਼

ਕਾਰ ਦੇ ਇੰਟੀਰੀਅਰ ਵਿਚ ਨਵਾਂ ਅਸ਼ਟਕੋਣੀ (Octagonal) ਸਟੀਅਰਿੰਗ ਵ੍ਹੀਲ ਦਿੱਤਾ ਗਿਆ ਹੈ, ਜੋ ਪਰਫੋਰੇਟਿਡ ਲੈਦਰ ਜਾਂ ਅਲਕੈਂਟਾਰਾ ਵਿਚ ਉਪਲਬਧ ਹੈ। ਇਸ ਦੇ ਪਿੱਛੇ ਐਲੂਮੀਨੀਅਮ ਪੈਡਲ ਸ਼ਿਫਟਰ ਵੀ ਦਿੱਤੇ ਗਏ ਹਨ।

ਡੈਸ਼ਬੋਰਡ ’ਤੇ ਲੱਗੀ ਡਿਜ਼ਿਟਲ ਘੜੀ ਨੂੰ ਵੀ ਅਪਡੇਟ ਕੀਤਾ ਗਿਆ ਹੈ। ਹੁਣ ਇਸ ਵਿਚ ਮਿਨਰਲ ਕ੍ਰਿਸਟਲ ਡਾਇਲ ਅਤੇ ਮੈਟਲ ਬੇਜ਼ਲ ਦੇ ਨਾਲ ਨਵਾਂ ਰੂਪ ਦੇਖਣ ਨੂੰ ਮਿਲਦਾ ਹੈ।

ਇਸ ਦੇ ਸਾਰੇ ਵੇਰੀਐਂਟਾਂ ਵਿਚ 12.3 ਇੰਚ ਦੀ ਟੱਚਸਕ੍ਰੀਨ, ਕਲਾਈਮੇਟ ਕੰਟਰੋਲ ਲਈ 8.8 ਇੰਚ ਦੀ ਹੇਠਲੀ ਸਕ੍ਰੀਨ, ਵਾਇਰਲੈੱਸ Apple CarPlay ਅਤੇ Android Auto ਦੇ ਨਾਲ Maserati Intelligent Assistant ਦਿੱਤਾ ਗਿਆ ਹੈ।

ਐਂਟਰੀ-ਲੈਵਲ Grecale ਨੂੰ ਛੱਡ ਕੇ ਬਾਕੀ ਸਾਰੇ ਵੇਰੀਐਂਟਾਂ ਵਿਚ 14-ਸਪੀਕਰ ਵਾਲਾ Sonus Faber ਆਡੀਓ ਸਿਸਟਮ, ਥ੍ਰੀ-ਜ਼ੋਨ ਕਲਾਈਮੇਟ ਕੰਟਰੋਲ, ਮਲਟੀ-ਕਲਰ ਐਂਬੀਐਂਟ ਲਾਈਟਿੰਗ ਅਤੇ ਹੀਟਿਡ ਫਰੰਟ ਸੀਟਾਂ ਵਰਗੇ ਫੀਚਰਜ਼ ਮਿਲਦੇ ਹਨ।