- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਚੀਨੀ ਕੰਪਨੀ BYD ਨੇ ਬਣਾਇਆ ਨਵਾਂ ਵਰਲਡ ਰਿਕਾਰਡ, ਇਲੈਕਟ੍ਰਿਕ ਸੁਪਰਕਾਰ ਨੇ 503.17 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਕੀਤੀ ਹਾਸਲ
ਕਾਰ ਵਿੱਚ ਵੱਡਾ ਕਾਰਬਨ ਫਰੰਟ ਸਪਲਿਟਰ, ਰੀਅਰ ਡਿਫਿਊਜ਼ਰ, ਡਿਊਲ-ਚੈਨਲ ਹੁੱਡ ਅਤੇ ਲੰਬਾ ਸਵਾਨ-ਨੇਕ ਰੀਅਰ ਸਪੌਇਲਰ ਵਰਗੇ ਐਰੋਡਾਇਨਾਮਿਕ ਬਦਲਾਅ ਕੀਤੇ ਗਏ ਹਨ। ਇਸ ਦਾ ਟਾਰਕ ਵੈਕਟਰਿੰਗ ਸਿਸਟਮ ਹਰ ਸਕਿੰਟ ਵਿੱਚ 100 ਵਾਰ ਤੱਕ ਐਡਜਸਟ ਹੋ ਸਕਦਾ ਹੈ।
Posted By Sandip Kaur
Publish Date: Sat, 07 Nov 2026 11:35 AM (IST)
Updated Date: Sat, 07 Nov 2026 11:39 AM (IST)
ਆਟੋ ਡੈਸਕ, ਨਵੀਂ ਦਿੱਲੀ : ਚੀਨ ਦੀ ਆਟੋਮੋਬਾਈਲ ਕੰਪਨੀ BYD ਦੀ ਇਲੈਕਟ੍ਰਿਕ ਸੁਪਰਕਾਰ Yangwang U9 Xtreme ਨੇ ਪ੍ਰੋਡਕਸ਼ਨ ਵਾਹਨਾਂ ਦੀ ਸ਼੍ਰੇਣੀ ਵਿੱਚ ਨਵਾਂ ਵਿਸ਼ਵ ਰਿਕਾਰਡ ਬਣਾਇਆ ਹੈ। ਇਸ ਕਾਰ ਨੇ ਹਾਈ-ਸਪੀਡ ਟੈਸਟ ਦੌਰਾਨ 503.17 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਹਾਸਲ ਕੀਤੀ। ਇਹ ਰਿਕਾਰਡ ਅਬੂ ਧਾਬੀ ਦੇ E11 ਹਾਈਵੇਅ ’ਤੇ ਬਣਾਇਆ ਗਿਆ। FIA ਅਤੇ Guinness World Records ਵੱਲੋਂ ਇਸ ਪ੍ਰਾਪਤੀ ਨੂੰ ਮਾਨਤਾ ਦਿੱਤੀ ਗਈ ਹੈ। ਇਸ ਦੇ ਨਾਲ ਹੀ ਇਹ 500 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਹੱਦ ਪਾਰ ਕਰਨ ਵਾਲੀ ਪਹਿਲੀ ਪ੍ਰੋਡਕਸ਼ਨ ਕਾਰ ਬਣ ਗਈ ਹੈ।
ਕਿਵੇਂ ਬਣਿਆ ਨਵਾਂ ਰਿਕਾਰਡ?
ਇਹ ਰਿਕਾਰਡ ਅਬੂ ਧਾਬੀ ਦੇ ਅਲ ਧਫਰਾ ਵਿੱਚ ਸ਼ੇਖ ਖਲੀਫਾ ਬਿਨ ਜ਼ਾਇਦ ਅਲ ਨਾਹਯਾਨ ਰੋਡ ’ਤੇ ਬਣਾਇਆ ਗਿਆ। ਪੇਸ਼ੇਵਰ ਰੇਸਿੰਗ ਡਰਾਈਵਰ Marc Basseng ਨੇ ਕਾਰ ਚਲਾਉਂਦੇ ਹੋਏ 503.17 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਹਾਸਲ ਕੀਤੀ।
ਇਸ ਤੋਂ ਪਹਿਲਾਂ 496.22 ਕਿਲੋਮੀਟਰ ਪ੍ਰਤੀ ਘੰਟਾ ਦਾ ਰਿਕਾਰਡ ਸੀ, ਜੋ ਨਵੰਬਰ 2025 ਵਿੱਚ ਜਰਮਨੀ ਦੀ ATP Papenburg ਟੈਸਟਿੰਗ ਸਹੂਲਤ ਵਿੱਚ ਬਣਾਇਆ ਗਿਆ ਸੀ। ਨਵੀਂ ਕਾਰ ਨੇ ਪੁਰਾਣੇ ਰਿਕਾਰਡ ਨੂੰ 6.95 ਕਿਲੋਮੀਟਰ ਪ੍ਰਤੀ ਘੰਟਾ ਨਾਲ ਪਿੱਛੇ ਛੱਡ ਦਿੱਤਾ। ਇਸ ਰਫ਼ਤਾਰ ’ਤੇ ਕਾਰ ਇਕ ਸਕਿੰਟ ਵਿੱਚ ਲਗਪਗ 140 ਮੀਟਰ ਦੀ ਦੂਰੀ ਤੈਅ ਕਰਦੀ ਹੈ।
2,977 ਹਾਰਸ ਪਾਵਰ ਦੀ ਤਾਕਤ
Yangwang U9 Xtreme ਨੂੰ 1,200V ਹਾਈ-ਵੋਲਟੇਜ ਪਲੇਟਫਾਰਮ ’ਤੇ ਤਿਆਰ ਕੀਤਾ ਗਿਆ ਹੈ। ਇਸ ਵਿੱਚ ਚਾਰ ਇਲੈਕਟ੍ਰਿਕ ਮੋਟਰਾਂ ਦਿੱਤੀਆਂ ਗਈਆਂ ਹਨ, ਜੋ 30,000 RPM ਤੱਕ ਦੀ ਰਫ਼ਤਾਰ ਨਾਲ ਕੰਮ ਕਰ ਸਕਦੀਆਂ ਹਨ। ਇਨ੍ਹਾਂ ਦਾ ਕੁੱਲ ਆਉਟਪੁੱਟ 2,220kW ਜਾਂ 2,977hp ਹੈ।
ਇੰਨੀ ਤੇਜ਼ ਰਫ਼ਤਾਰ ’ਤੇ ਕਾਰ ਦੀ ਸੁਰੱਖਿਆ ਅਤੇ ਸੰਤੁਲਨ ਬਣਾਈ ਰੱਖਣ ਲਈ ਇਸ ਦੇ ਟਾਇਰਾਂ, ਕੂਲਿੰਗ ਸਿਸਟਮ ਅਤੇ ਬਾਡੀ ਕੰਟਰੋਲ ਸਿਸਟਮ ਨੂੰ ਖ਼ਾਸ ਤੌਰ ’ਤੇ ਤਿਆਰ ਕੀਤਾ ਗਿਆ ਹੈ।
Nürburgring ’ਤੇ ਵੀ ਬਣਾ ਚੁੱਕੀ ਹੈ ਰਿਕਾਰਡ
ਅਗਸਤ 2025 ਵਿੱਚ ਇਸ ਕਾਰ ਨੇ Nürburgring Nordschleife ਟਰੈਕ ਦਾ ਚੱਕਰ 6 ਮਿੰਟ ਅਤੇ 59.157 ਸਕਿੰਟ ਵਿੱਚ ਪੂਰਾ ਕੀਤਾ ਸੀ। ਇਸ ਤਰ੍ਹਾਂ ਇਹ ਸੱਤ ਮਿੰਟ ਤੋਂ ਘੱਟ ਸਮੇਂ ਵਿੱਚ ਇਹ ਟਰੈਕ ਪੂਰਾ ਕਰਨ ਵਾਲੀ ਪਹਿਲੀ ਮਾਸ-ਪ੍ਰੋਡਿਊਸਡ ਇਲੈਕਟ੍ਰਿਕ ਸੁਪਰਕਾਰ ਬਣੀ ਸੀ।
ਕਾਰ ਵਿੱਚ ਵੱਡਾ ਕਾਰਬਨ ਫਰੰਟ ਸਪਲਿਟਰ, ਰੀਅਰ ਡਿਫਿਊਜ਼ਰ, ਡਿਊਲ-ਚੈਨਲ ਹੁੱਡ ਅਤੇ ਲੰਬਾ ਸਵਾਨ-ਨੇਕ ਰੀਅਰ ਸਪੌਇਲਰ ਵਰਗੇ ਐਰੋਡਾਇਨਾਮਿਕ ਬਦਲਾਅ ਕੀਤੇ ਗਏ ਹਨ। ਇਸ ਦਾ ਟਾਰਕ ਵੈਕਟਰਿੰਗ ਸਿਸਟਮ ਹਰ ਸਕਿੰਟ ਵਿੱਚ 100 ਵਾਰ ਤੱਕ ਐਡਜਸਟ ਹੋ ਸਕਦਾ ਹੈ। ਕਾਰ ਵਿੱਚ ਪ੍ਰਤੀ ਟਨ 1,200hp ਦੀ ਪਾਵਰ ਦਾ ਦਾਅਵਾ ਵੀ ਕੀਤਾ ਗਿਆ ਹੈ।
BYD ਨੇ ਪੁਸ਼ਟੀ ਕੀਤੀ ਹੈ ਕਿ Yangwang U9 Xtreme ਦਾ ਉਤਪਾਦਨ ਸੀਮਤ ਰੱਖਿਆ ਜਾਵੇਗਾ ਅਤੇ ਦੁਨੀਆ ਭਰ ਵਿੱਚ ਇਸ ਦੀਆਂ ਸਿਰਫ਼ 30 ਯੂਨਿਟਾਂ ਹੀ ਬਣਾਈਆਂ ਜਾਣਗੀਆਂ।