ਜਾਪਾਨੀ ਬ੍ਰਾਂਡਾਂ ਨੂੰ ਝਟਕਾ: ਚੀਨ ਦੀ BYD ਨੇ ਲਾਂਚ ਕੀਤੀ ਸਸਤੀ ਇਲੈਕਟ੍ਰਿਕ ਕਾਰ, ਦੋ ਹਫ਼ਤਿਆਂ ’ਚ 1,000 ਲੋਕਾਂ ਨੇ ਖਰੀਦੀ

ਆਟੋ ਡੈਸਕ, ਨਵੀਂ ਦਿੱਲੀ: ਇਕ ਸਮਾਂ ਸੀ ਜਦੋਂ ਪੂਰੀ ਦੁਨੀਆ ਵਿਚ ਜਾਪਾਨੀ ਸੱਭਿਆਚਾਰ, ਐਨੀਮੇ ਅਤੇ ਵਿਲੱਖਣ ਉਤਪਾਦਾਂ ਦਾ ਦਬਦਬਾ ਸੀ, ਪਰ ਹੁਣ ਗਲੋਬਲ ਬਾਜ਼ਾਰ ਵਿਚ ਵੱਡਾ ਬਦਲਾਅ ਦੇਖਣ ਨੂੰ ਮਿਲ ਰਿਹਾ ਹੈ। ਚੀਨੀ ਕੰਪਨੀਆਂ ਨਾ ਸਿਰਫ਼ ਦੁਨੀਆ ਭਰ ਵਿਚ ਜਾਪਾਨੀ ਸੱਭਿਆਚਾਰ ਅਤੇ ਉੱਥੋਂ ਦੀ ਜੀਵਨਸ਼ੈਲੀ ਨੂੰ ਵੱਡੇ ਪੱਧਰ ’ਤੇ ਪੇਸ਼ ਕਰ ਰਹੀਆਂ ਹਨ, ਸਗੋਂ ਖ਼ੁਦ ਜਾਪਾਨ ਦੇ ਬਾਜ਼ਾਰ ਵਿਚ ਦਾਖ਼ਲ ਹੋ ਕੇ ਉੱਥੋਂ ਦੇ ਗਾਹਕਾਂ ਨੂੰ ਉਨ੍ਹਾਂ ਦਾ ਆਪਣਾ ਸੱਭਿਆਚਾਰ ਨਵੇਂ ਅੰਦਾਜ਼ ਵਿਚ ਵੇਚ ਰਹੀਆਂ ਹਨ।

ਜਾਪਾਨੀ ਬ੍ਰਾਂਡਾਂ ਨੂੰ ਦੇ ਰਹੀਆਂ ਟੱਕਰ

ਗੇਮਿੰਗ, ਖਿਡੌਣਿਆਂ ਅਤੇ ਆਟੋਮੋਬਾਈਲ ਵਰਗੇ ਖੇਤਰਾਂ ਵਿਚ ਚੀਨੀ ਬ੍ਰਾਂਡ ਹੁਣ ਜਾਪਾਨ ਨੂੰ ਉਸ ਦੇ ਆਪਣੇ ਘਰ ਵਿਚ ਸਖ਼ਤ ਟੱਕਰ ਦੇ ਰਹੇ ਹਨ। ਇਸ ਦੀ ਸਭ ਤੋਂ ਵੱਡੀ ਉਦਾਹਰਨ ਸ਼ੰਘਾਈ ਦੀ ਕੰਪਨੀ ਮਿਹੋਯੋ (miHoYo) ਦੀ ਗੇਮ ‘ਗੇਨਸ਼ਿਨ ਇੰਪੈਕਟ’ ਹੈ। ਇਸ ਨੂੰ 2020 ਵਿਚ ਲਾਂਚ ਕੀਤਾ ਗਿਆ ਸੀ ਅਤੇ ਸਾਲ 2025 ਦੇ ਅਖੀਰ ਤੱਕ ਇਸ ਨੇ 94,955 ਕਰੋੜ ਰੁਪਏ ਦੀ ਇਤਿਹਾਸਕ ਕਮਾਈ ਕੀਤੀ।

ਗੇਮ ਦੀ ਲੋਕਪ੍ਰਿਅਤਾ

ਇਹ ਗੇਮ ਪੂਰੀ ਤਰ੍ਹਾਂ ਜਾਪਾਨੀ ਐਨੀਮੇ ਅਤੇ ਗਾਚਾ ਮਕੈਨਿਜ਼ਮ ’ਤੇ ਆਧਾਰਿਤ ਹੈ, ਜਿਸ ਨੂੰ ਜਾਪਾਨ ਦੇ ਨੌਜਵਾਨ ਬਹੁਤ ਪਸੰਦ ਕਰ ਰਹੇ ਹਨ। ਇਸ ਗੇਮ ਦੀ ਸਫ਼ਲਤਾ ਦਾ ਸਭ ਤੋਂ ਵੱਡਾ ਕਾਰਨ ਇਹ ਹੈ ਕਿ ਇਸ ਨੇ ਜਾਪਾਨੀ ਐਨੀਮੇ-ਮਾਂਗਾ ਦੀ ਨਿਜੀਗੇਨ ਵਿਜ਼ੂਅਲ ਸ਼ੈਲੀ ਅਤੇ ਗਾਚਾਪੋਨ ਕੈਪਸੂਲ ਖਿਡੌਣਿਆਂ ਵਾਲੇ ਗਾਚਾ ਖਰੀਦ ਸਿਸਟਮ ਨੂੰ ਡਿਜ਼ਿਟਲ ਤਰੀਕੇ ਨਾਲ ਦੁਨੀਆ ਭਰ ਦੇ ਦਰਸ਼ਕਾਂ ਤੱਕ ਪਹੁੰਚਾਇਆ। ਸਭ ਤੋਂ ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਇਸ ਗੇਮ ਦੇ ਕੁੱਲ ਡਾਊਨਲੋਡ ਵਿਚ ਇਕੱਲੇ ਜਾਪਾਨ ਦੀ ਹਿੱਸੇਦਾਰੀ ਸਿਰਫ਼ ਪੰਜ ਫ਼ੀਸਦੀ ਹੈ।

ਪੌਪ ਮਾਰਟ ਅਤੇ ਟੌਪਟੌਏ ਦੀ ਸਫ਼ਲਤਾ

ਚੀਨੀ ਖਿਡੌਣਾ ਨਿਰਮਾਤਾ ਕੰਪਨੀ ਪੌਪ ਮਾਰਟ ਨੇ ਜਾਪਾਨੀ ਕੈਪਸੂਲ ਖਿਡੌਣਾ ਤਕਨੀਕ ’ਤੇ ਆਧਾਰਿਤ ਬਲਾਈਂਡ ਬਾਕਸ ਰਾਹੀਂ ਲਾਬੂਬੂ (Labubu) ਡੌਲਜ਼ ਦੀ ਧੂਮ ਪੂਰੀ ਦੁਨੀਆ ਵਿਚ ਮਚਾ ਦਿੱਤੀ ਹੈ। ਸਾਲ 2022 ਵਿਚ ਜਾਪਾਨ ਵਿਚ ਦਾਖ਼ਲ ਹੋਣ ਤੋਂ ਬਾਅਦ ਇਕ ਹੋਰ ਚੀਨੀ ਬ੍ਰਾਂਡ ਟੌਪਟੌਏ ਵੀ ਇਸੇ ਫਾਰਮੂਲੇ ਦੀ ਵਰਤੋਂ ਕਰ ਕੇ ਜਾਪਾਨੀ ਬਾਜ਼ਾਰ ਵਿਚ ਤੇਜ਼ੀ ਨਾਲ ਆਪਣੀ ਪਕੜ ਮਜ਼ਬੂਤ ਕਰ ਰਿਹਾ ਹੈ।

ਖ਼ੁਦ ਨੂੰ ਜਾਪਾਨੀ ਅੰਦਾਜ਼ ਵਿਚ ਪੇਸ਼ ਕਰਨ ਵਾਲਾ ਚੀਨੀ ਰਿਟੇਲ ਬ੍ਰਾਂਡ ਮਿਨੀਸੋ ਅੱਜ 110 ਦੇਸ਼ਾਂ ਵਿਚ 8,000 ਤੋਂ ਵੱਧ ਸਟੋਰ ਚਲਾ ਰਿਹਾ ਹੈ। ਜਿਨ੍ਹਾਂ ਅਫ਼ਰੀਕੀ ਅਤੇ ਦੱਖਣੀ ਅਮਰੀਕੀ ਦੇਸ਼ਾਂ ਤੱਕ ਜਾਪਾਨੀ ਕੰਪਨੀਆਂ ਨਹੀਂ ਪਹੁੰਚ ਸਕੀਆਂ, ਉੱਥੇ ਮਿਨੀਸੋ ਨੇ ਹੈਲੋ ਕਿੱਟੀ ਅਤੇ ਚੀਕਾਵਾ ਵਰਗੇ ਪ੍ਰਸਿੱਧ ਜਾਪਾਨੀ ਕਿਰਦਾਰਾਂ ਦੇ ਲਾਇਸੈਂਸ ਲੈ ਕੇ ਉਨ੍ਹਾਂ ਨੂੰ ਲੋਕਪ੍ਰਿਅ ਬਣਾਇਆ ਹੈ। ਦੱਸਿਆ ਜਾਂਦਾ ਹੈ ਕਿ ਇਹ ਬ੍ਰਾਂਡ ਹਰ ਸਾਲ 900 ਤੋਂ 1,000 ਨਵੇਂ ਸਟੋਰ ਖੋਲ੍ਹ ਰਿਹਾ ਹੈ।

ਕਾਰ ਸੈਗਮੈਂਟ ਵਿਚ BYD ਦੀ ਐਂਟਰੀ

ਚੀਨ ਦੀ ਪਹੁੰਚ ਹੁਣ ਸਿਰਫ਼ ਖਿਡੌਣਿਆਂ ਅਤੇ ਗੇਮਾਂ ਤੱਕ ਸੀਮਤ ਨਹੀਂ ਰਹੀ, ਸਗੋਂ ਜਾਪਾਨ ਦੇ ਖ਼ਾਸ ਛੋਟੀਆਂ ਕਾਰਾਂ ਵਾਲੇ ਸੈਗਮੈਂਟ ਵਿਚ ਵੀ ਚੀਨੀ ਕੰਪਨੀਆਂ ਅੱਗੇ ਵਧ ਰਹੀਆਂ ਹਨ। ਚੀਨ ਦੀ ਕੰਪਨੀ BYD ਪਹਿਲੀ ਅਜਿਹੀ ਵਿਦੇਸ਼ੀ ਕੰਪਨੀ ਬਣ ਗਈ ਹੈ, ਜਿਸ ਨੇ ਜਾਪਾਨੀ ਬਾਜ਼ਾਰ ਵਿਚ BYD Racco ਦੇ ਨਾਂ ਨਾਲ ਇਲੈਕਟ੍ਰਿਕ ਕੇਈ ਕਾਰ ਪੇਸ਼ ਕੀਤੀ ਹੈ। ਇਸ ਗੱਡੀ ਨੂੰ ਲਾਂਚ ਕਰਨ ਦੇ ਸਿਰਫ਼ ਦੋ ਹਫ਼ਤਿਆਂ ਦੇ ਅੰਦਰ ਹੀ 1,000 ਤੋਂ ਵੱਧ ਲੋਕਾਂ ਨੇ ਖਰੀਦ ਲਿਆ।