FIFA World Cup 2026: ਸੈਮੀਫਾਈਨਲ 'ਚ ਫਰਾਂਸ ਦੀ ਹਾਰ ਤੋਂ ਬਾਅਦ ਹੰਗਾਮਾ, ਰਾਜਧਾਨੀ ਪੈਰਿਸ 'ਚ ਭੜਕੇ ਦੰਗੇ; ਕਈ ਜ਼ਖ਼ਮੀ

ਸਪੋਰਟਸ ਡੈਸਕ, ਨਵੀਂ ਦਿੱਲੀ: FIFA World Cup 2026, France vs Spain: ਫਰਾਂਸ ਦਾ 2026 ਫ਼ੀਫ਼ਾ ਵਰਲਡ ਕੱਪ ਖ਼ਿਤਾਬ ਜਿੱਤਣ ਦਾ ਸੁਪਨਾ ਅਧੂਰਾ ਰਹਿ ਗਿਆ। ਫਰਾਂਸ ਨੂੰ ਮੰਗਲਵਾਰ ਨੂੰ ਟੈਕਸਾਸ ਦੇ ਏਟੀ ਐਂਡ ਟੀ (AT&T) ਸਟੇਡੀਅਮ ਵਿੱਚ ਸਪੇਨ ਹੱਥੋਂ ਸੈਮੀਫਾਈਨਲ ਵਿੱਚ 0-2 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਫਰਾਂਸ ਦੀ ਇਸ ਹਾਰ ਤੋਂ ਬਾਅਦ ਰਾਜਧਾਨੀ ਪੈਰਿਸ ਵਿੱਚ ਦੰਗੇ ਭੜਕ ਗਏ, ਜਿਸ ਦੀਆਂ ਵੀਡੀਓਜ਼ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋਈਆਂ।

ਸਪੇਨ ਦੂਜੀ ਵਾਰ ਫਾਈਨਲ ਵਿੱਚ ਪਹੁੰਚਿਆ

ਦੱਸ ਦੇਈਏ ਕਿ ਸਪੇਨ ਨੇ ਮਿਕੇਲ ਓਯਾਰਜ਼ਾਬਲ ਅਤੇ ਪੇਡਰੋ ਪੋਰੋ ਦੇ ਗੋਲਾਂ ਦੀ ਮਦਦ ਨਾਲ ਫਰਾਂਸ ਨੂੰ 2-0 ਨਾਲ ਪਛਾੜ ਕੇ ਦੂਜੀ ਵਾਰ ਫ਼ੀਫ਼ਾ ਵਰਲਡ ਕੱਪ ਦੇ ਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ। ਮਿਕੇਲ ਨੇ 22ਵੇਂ ਮਿੰਟ ਵਿੱਚ ਪੈਨਲਟੀ 'ਤੇ ਗੋਲ ਕੀਤਾ, ਜਦੋਂ ਕਿ ਪੋਰੋ ਨੇ 58ਵੇਂ ਮਿੰਟ ਵਿੱਚ ਗੋਲ ਕਰਕੇ ਸਪੇਨ ਦੀ ਲੀਡ ਨੂੰ ਦੁੱਗਣਾ ਕਰ ਦਿੱਤਾ।

ਫਰਾਂਸ ਨੂੰ ਆਪਣੇ ਕਪਤਾਨ ਕਿਲੀਅਨ ਐਮਬਾਪੇ ਤੋਂ ਜਾਦੂਈ ਪ੍ਰਦਰਸ਼ਨ ਦੀ ਉਮੀਦ ਸੀ, ਪਰ ਉਹ ਮੈਚ ਵਿੱਚ ਕੁਝ ਖ਼ਾਸ ਨਹੀਂ ਕਰ ਸਕੇ। ਐਮਬਾਪੇ ਖ਼ਿਲਾਫ਼ ਸਪੇਨ ਦੀ ਰਣਨੀਤੀ ਬੇਹੜ ਮਜ਼ਬੂਤ ਸੀ। ਫਰਾਂਸ ਦੇ ਸਟ੍ਰਾਈਕਰਾਂ ਨੂੰ ਗੋਲ ਕਰਨ ਦੇ ਮੌਕੇ ਨਹੀਂ ਮਿਲੇ। ਫਰਾਂਸ ਦੀ ਟੀਮ ਲਗਾਤਾਰ ਤੀਜੀ ਵਾਰ ਫ਼ੀਫ਼ਾ ਵਰਲਡ ਕੱਪ ਦੇ ਫਾਈਨਲ ਵਿੱਚ ਪਹੁੰਚਣ ਤੋਂ ਖੁੰਝ ਗਈ।

ਫਰਾਂਸ ਦੀ ਰਾਜਧਾਨੀ ਵਿੱਚ ਹੰਗਾਮਾ

ਫਰਾਂਸ ਦੀ ਹਾਰ ਫੁੱਟਬਾਲ ਪ੍ਰਸ਼ੰਸਕਾਂ ਨੂੰ ਹਜ਼ਮ ਨਹੀਂ ਹੋਈ। ਅਰਲਿੰਗਟਨ ਵਿੱਚ ਜਿਵੇਂ ਹੀ ਮੈਚ ਖ਼ਤਮ ਹੋਣ ਦੀ ਆਖ਼ਰੀ ਸੀਟੀ ਵੱਜੀ, ਤਾਂ ਫਰਾਂਸ ਦੀ ਰਾਜਧਾਨੀ ਪੈਰਿਸ ਵਿੱਚ ਦੰਗੇ ਭੜਕ ਗਏ। ਕਈ ਇਲਾਕਿਆਂ ਵਿੱਚ ਅੱਗਜ਼ਨੀ ਦੀਆਂ ਘਟਨਾਵਾਂ ਵਾਪਰੀਆਂ। ਇਸ ਦੀਆਂ ਵੀਡੀਓਜ਼ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਫੈਲ ਗਈਆਂ। ਫਰਾਂਸ ਦੇ ਕਪਤਾਨ ਕਿਲੀਅਨ ਐਮਬਾਪੇ ਨੇ ਹਾਰ ਦੀ ਜ਼ਿੰਮੇਵਾਰੀ ਲੈਂਦੇ ਹੋਏ ਆਪਣੇ ਦੇਸ਼ ਵਾਸੀਆਂ ਤੋਂ ਮੁਆਫੀ ਮੰਗੀ ਹੈ।

ਹੁਣ ਫਰਾਂਸ ਲਈ ਅੱਗੇ ਕੀ?

ਫਰਾਂਸ ਦੀ ਟੀਮ ਹੁਣ ਤੀਜੇ ਸਥਾਨ ਲਈ 18 ਜੁਲਾਈ ਨੂੰ ਮੈਦਾਨ ਵਿੱਚ ਉਤਰੇਗੀ। ਫਰਾਂਸ ਦਾ ਮੁਕਾਬਲਾ ਦੂਜੇ ਸੈਮੀਫਾਈਨਲ ਵਿੱਚ ਹਾਰਨ ਵਾਲੀ ਟੀਮ ਨਾਲ ਹੋਵੇਗਾ। ਦੂਜਾ ਸੈਮੀਫਾਈਨਲ ਅਰਜਨਟੀਨਾ ਅਤੇ ਇੰਗਲੈਂਡ ਵਿਚਕਾਰ ਖੇਡਿਆ ਜਾਵੇਗਾ। ਫਰਾਂਸ ਦੀ ਕੋਸ਼ਿਸ਼ ਤੀਜਾ ਸਥਾਨ ਹਾਸਲ ਕਰਕੇ ਆਪਣਾ ਸਨਮਾਨ ਬਚਾਉਣ ਦੀ ਹੋਵੇਗੀ। ਜ਼ਿਕਰਯੋਗ ਹੈ ਕਿ ਫਰਾਂਸ ਨੇ ਦੋ ਵਾਰ ਫ਼ੀਫ਼ਾ ਵਰਲਡ ਕੱਪ ਦਾ ਖ਼ਿਤਾਬ ਆਪਣੇ ਨਾਂ ਕੀਤਾ ਹੈ। ਉਸ ਨੇ 1998 ਅਤੇ 2018 ਵਿੱਚ ਇਹ ਖ਼ਿਤਾਬ ਜਿੱਤਿਆ ਸੀ।