ਪਟਿਆਲਾ ਨੂੰ ਹਰਾ ਕੇ ਮੋਹਾਲੀ ਦੀ ਕ੍ਰਿਕਟ ਟੀਮ ਲਗਾਤਰ ਛੇਵੀਂ ਵਾਰ ਰਾਜ ਜੇਤੂ ਬਣੀ, ਸਾਫ਼ਟ ਟੈਨਿਸ ਮੁਕਾਬਲੇ 'ਚ ਦੂਜੇ ਸਥਾਨ ‘ਤੇ

ਇਨ੍ਹਾਂ ਰਾਜ ਪੱਧਰੀ ਖੇਡਾਂ ਦੌਰਾਨ ਕੁੜੀਆਂ ਦੇ 17 ਸਾਲ ਵਰਗ ਦੇ ਕ੍ਰਿਕਟ ਮੈਚ ਚੱਪੜਚਿੜੀ ਦੇ ਚੈਂਪੀਅਨਜ਼ ਕ੍ਰਿਕਟ ਅਕੈਡਮੀ ਮੈਦਾਨ 'ਚ ਮੁਕੰਮਲ ਹੋਏ। ਫਾਈਨਲ ਮੈਚ ਮੋਹਾਲੀ ਤੇ ਪਟਿਆਲਾ ਦੀਆਂ ਟੀਮਾਂ ਵਿਚਕਾਰ ਖੇਡਿਆ ਗਿਆ। ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਮੇਜ਼ਬਾਨ ਮੋਹਾਲੀ ਦੀ ਟੀਮ ਨੇ ਨਿਰਧਾਰਤ 20 ਓਵਰਾਂ 'ਚ ਛੇ ਵਿਕਟਾਂ ਗੁਆ ਕੇ 139 ਦੌੜਾਂ ਦਾ ਵਿਸ਼ਾਲ ਸਕੋਰ ਖੜ੍ਹਾ ਕੀਤਾ ਜਿਸ ਵਿਚ ਕਸ਼ਿਸ਼ ਦੀ 68 ਦੌੜਾਂ ਦੀ ਮਹੱਤਵਪੂਰਨ ਪਾਰੀ ਵੀ ਸ਼ਾਮਿਲ ਸੀ। ਪਟਿਆਲਾ ਦੀ ਹਰਨੂਰ ਨੇ ਤਿੰਨ ਵਿਕਟਾਂ ਲਈਆਂ। ਇਸ ਦੇ ਜਵਾਬ ਖੇਡਦਿਆਂ ਪਟਿਆਲਾ ਦੀ ਟੀਮ 18.1 ਓਵਰਾਂ ਵਿੱਚ ਕੇਵਲ 88 ਦੌੜਾਂ ਬਣਾ ਕੇ ਆਲ ਆਊਟ ਹੋ ਗਈ। ਮੋਹਾਲੀ ਟੀਮ ਵਲੋਂ ਵਧੀਆ ਗੇਂਦਬਾਜੀ ਕਰਦਿਆਂ ਸਹਿਜ ਅਤੇ ਕਸ਼ਿਸ਼ ਨੇ 3-3 ਵਿਕਟਾਂ ਲਈਆਂ। ਕੋਚ ਕ੍ਰਿਸ਼ਨ ਮਹਿਤਾ ਦੀ ਯੋਗ ਅਗਵਾਈ ਵਿੱਚ ਮੋਹਾਲੀ ਦੀ ਟੀਮ ਨੇ ਲਗਾਤਾਰ ਛੇਵੀਂ ਵਾਰ ਗੋਲਡ ਮੈਡਲ ਤੇ ਰਾਜ ਪੱਧਰੀ ਟਰਾਫ਼ੀ ਆਪਣੇ ਨਾਂ ਕੀਤੀ ਹੈ। ਇਸੇ ਦੌਰਾਨ ਤੀਜੇ ਤੇ ਚੌਥੇ ਸਥਾਨ ਲਈ ਖੇਡੇ ਗਏ ਮੈਚ ਵਿੱਚ ਲੁਧਿਆਣਾ ਨੇ ਸੰਗਰੂਰ ਨੂੰ 8 ਵਿਕਟਾਂ ਨਾਲ ਹਰਾ ਕੇ ਕਾਂਸੀ ਦਾ ਤਗ਼ਮਾ ਹਾਸਲ ਕੀਤਾ।