Hockey Men's Asia Cup U18: ਚੀਨੀ ਤਾਈਪੇ ਨੂੰ 13-1 ਨਾਲ ਹਰਾ ਕੇ ਭਾਰਤ ਸੈਮੀਫਾਈਨਲ 'ਚ ਪਹੁੰਚਿਆ

ਡਿਜੀਟਲ ਡੈਸਕ, ਜਾਗਰਣ: ਭਾਰਤੀ ਪੁਰਸ਼ ਹਾਕੀ ਟੀਮ ਨੇ ਬੁੱਧਵਾਰ ਨੂੰ ਆਪਣੇ ਆਖਰੀ ਪੂਲ-ਏ ਮੈਚ ਵਿੱਚ ਚੀਨੀ ਤਾਈਪੇ ਨੂੰ 13-1 ਦੇ ਵੱਡੇ ਫਰਕ ਨਾਲ ਹਰਾ ਕੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਅਤੇ ਅੰਡਰ-18 ਏਸ਼ੀਆ ਕੱਪ 2026 ਦੇ ਸੈਮੀਫਾਈਨਲ ਵਿੱਚ ਜਗ੍ਹਾ ਪੱਕੀ ਕਰ ਲਈ ਹੈ। ਭਾਰਤ ਨੇ ਕਜ਼ਾਕਿਸਤਾਨ, ਕੋਰੀਆ ਅਤੇ ਚੀਨੀ ਤਾਈਪੇ ਖ਼ਿਲਾਫ਼ ਜਿੱਤ ਦੇ ਨਾਲ ਆਪਣੇ ਪੂਲ ਮੈਚ ਖ਼ਤਮ ਕੀਤੇ, ਜਦੋਂ ਕਿ ਮੇਜ਼ਬਾਨ ਜਾਪਾਨ ਹੱਥੋਂ ਉਸ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ।

ਇਸ ਪ੍ਰਦਰਸ਼ਨ ਬਦੌਲਤ ਟੀਮ ਨੂੰ ਚਾਰ ਮੈਚਾਂ ਵਿੱਚੋਂ ਕੁੱਲ ਨੌਂ ਅੰਕ ਮਿਲੇ। ਚੀਨੀ ਤਾਈਪੇ ਦੇ ਖ਼ਿਲਾਫ਼ ਭਾਰਤੀ ਟੀਮ ਨੇ ਸ਼ੁਰੂ ਤੋਂ ਹੀ ਹਮਲਾਵਰ ਰੁਖ਼ ਅਪਣਾਇਆ, ਜਿਸ ਵਿੱਚ ਆਸ਼ੀਸ਼ ਤਾਨੀ ਪੂਰਤੀ ਨੇ ਸ਼ਾਨਦਾਰ ਹੈਟ੍ਰਿਕ (27ਵੇਂ, 35ਵੇਂ ਅਤੇ 42ਵੇਂ ਮਿੰਟ ਵਿੱਚ) ਕਰਕੇ ਸਭ ਤੋਂ ਬਿਹਤਰੀਨ ਪ੍ਰਦਰਸ਼ਨ ਕੀਤਾ। ਇਸ ਤੋਂ ਇਲਾਵਾ ਗਾਜ਼ੀ ਖ਼ਾਨ (40ਵੇਂ, 44ਵੇਂ), ਸਿੱਧਾਰਥ ਬੇਨ (30ਵੇਂ, 52ਵੇਂ) ਅਤੇ ਰਾਹੁਲ ਯਾਦਵ (20ਵੇਂ, 54ਵੇਂ) ਨੇ ਦੋ-2 ਗੋਲ ਕੀਤੇ।

ਮੈਚ ਦੌਰਾਨ ਕਰਨ ਗੌਤਮ (7ਵੇਂ ਮਿੰਟ), ਪ੍ਰੇਮਚੰਦ ਸੋਏ (11ਵੇਂ ਮਿੰਟ), ਕਪਤਾਨ ਕੇਤਨ ਕੁਸ਼ਵਾਹਾ (13ਵੇਂ ਮਿੰਟ) ਅਤੇ ਵਰਿੰਦਰ ਸਿੰਘ (50ਵੇਂ ਮਿੰਟ) ਨੇ ਵੀ 1-1 ਗੋਲ ਦਾ ਯੋਗਦਾਨ ਪਾਇਆ। ਭਾਰਤੀ ਟੀਮ ਸ਼ੁੱਕਰਵਾਰ ਨੂੰ ਆਪਣਾ ਸੈਮੀਫਾਈਨਲ ਮੈਚ ਖੇਡੇਗੀ, ਪਰ ਟੀਮ ਦਾ ਮੁਕਾਬਲਾ ਕਿਸ ਦੇ ਖ਼ਿਲਾਫ਼ ਹੋਵੇਗਾ, ਇਸ ਦਾ ਫੈਸਲਾ ਬੁੱਧਵਾਰ ਨੂੰ ਜਾਪਾਨ ਅਤੇ ਕਜ਼ਾਕਿਸਤਾਨ ਵਿਚਾਲੇ ਹੋਣ ਵਾਲੇ ਪੂਲ-ਏ ਦੇ ਆਖਰੀ ਮੈਚ ਤੋਂ ਬਾਅਦ ਹੋਵੇਗਾ।