- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
FIFA World Cup 2026: ਫੁੱਟਬਾਲ ਵਿਸ਼ਵ ਕੱਪ ਦੀਆਂ ਮਹਿੰਗੀਆਂ ਟਿਕਟਾਂ ਨੂੰ ਲੈ ਕੇ ਪ੍ਰਸ਼ੰਸਕਾਂ ’ਚ ਨਾਰਾਜ਼ਗੀ, ਸਟੇਡੀਅਮਾਂ ’ਚ ਜ਼ਿਆਦਾਤਰ ਲੋਕ ਉੱਚ ਵਰਗ ਦੇ
ਫ਼ੀਫ਼ਾ (FIFA) ਵਿਸ਼ਵ ਕੱਪ ਦੇ 100 ਸਾਲਾਂ ਦੇ ਇਤਿਹਾਸ ਵਿੱਚ ਟਿਕਟਾਂ ਦੇ ਲਿਹਾਜ਼ ਨਾਲ ਹੁਣ ਤੱਕ ਦੇ ਸਭ ਤੋਂ ਮਹਿੰਗੇ ਵਿਸ਼ਵ ਕੱਪ ਨੂੰ ਜੇਕਰ ਸਿਰਫ਼ ਅਮੀਰਾਂ ਦਾ ਟੂਰਨਾਮੈਂਟ ਕਿਹਾ ਜਾਵੇ ਤਾਂ ਕੋਈ ਅਤਿਕਥਨੀ ਨਹੀਂ ਹੋਵੇਗੀ। ਬੜੀ ਮੁਸ਼ਕਲ ਨਾਲ ਇਸ ਵਿਸ਼ਵ ਕੱਪ ਦੀ ਟਿਕਟ ਖ਼ਰੀਦ ਕੇ ਮੈਦਾਨ ਵਿੱਚ ਪਹੁੰਚ ਰਹੇ ਕੁਝ ਆਮ ਪ੍ਰਸ਼ੰਸਕਾਂ ਨੂੰ ਇਸ ਦਾ ਅਹਿਸਾਸ ਵੀ ਹੋ ਰਿਹਾ ਹੈ।
Posted By Anuradha Bains
Publish Date: Sat, 13 Jun 2026 01:57 PM (IST)
Updated Date: Sat, 13 Jun 2026 01:59 PM (IST)
ਜਾਗਰਣ ਨਿਊਜ਼ ਨੈੱਟਵਰਕ, ਨਵੀਂ ਦਿੱਲੀ। ਫ਼ੀਫ਼ਾ (FIFA) ਵਿਸ਼ਵ ਕੱਪ ਦੇ 100 ਸਾਲਾਂ ਦੇ ਇਤਿਹਾਸ ਵਿੱਚ ਟਿਕਟਾਂ ਦੇ ਲਿਹਾਜ਼ ਨਾਲ ਹੁਣ ਤੱਕ ਦੇ ਸਭ ਤੋਂ ਮਹਿੰਗੇ ਵਿਸ਼ਵ ਕੱਪ ਨੂੰ ਜੇਕਰ ਸਿਰਫ਼ ਅਮੀਰਾਂ ਦਾ ਟੂਰਨਾਮੈਂਟ ਕਿਹਾ ਜਾਵੇ ਤਾਂ ਕੋਈ ਅਤਿਕਥਨੀ ਨਹੀਂ ਹੋਵੇਗੀ।
ਬੜੀ ਮੁਸ਼ਕਲ ਨਾਲ ਇਸ ਵਿਸ਼ਵ ਕੱਪ ਦੀ ਟਿਕਟ ਖ਼ਰੀਦ ਕੇ ਮੈਦਾਨ ਵਿੱਚ ਪਹੁੰਚ ਰਹੇ ਕੁਝ ਆਮ ਪ੍ਰਸ਼ੰਸਕਾਂ ਨੂੰ ਇਸ ਦਾ ਅਹਿਸਾਸ ਵੀ ਹੋ ਰਿਹਾ ਹੈ। ਸਟੇਡੀਅਮਾਂ ਦੀਆਂ ਸੀਟਾਂ 'ਤੇ ਉਨ੍ਹਾਂ ਨੂੰ ਜ਼ਿਆਦਾਤਰ ਲੋਕ ਉੱਚ ਵਰਗ ਦੇ ਨਜ਼ਰ ਆ ਰਹੇ ਹਨ, ਜਿਨ੍ਹਾਂ ਵਿੱਚੋਂ ਬਹੁਤਿਆਂ ਨੂੰ ਉਹ ਪਹਿਲਾਂ ਹੀ ਸੁਰਖੀਆਂ ਜਾਂ ਟੀਵੀ 'ਤੇ ਦੇਖ ਚੁੱਕੇ ਹਨ।
ਦੱਖਣੀ ਅਫ਼ਰੀਕਾ ਵਿਰੁੱਧ ਇਸ ਵਿਸ਼ਵ ਕੱਪ ਦੇ ਪਹਿਲੇ ਮੁਕਾਬਲੇ ਨੂੰ ਦੇਖਣ ਪਹੁੰਚੇ ਮੈਕਸੀਕੋ ਦੇ ਫੁੱਟਬਾਲ ਪ੍ਰਸ਼ੰਸਕ ਮਾਰਸੇਲੋ ਗੋਂਜ਼ਾਲੇਸ ਦੀ ਮੰਨੀਏ ਤਾਂ ਜਦੋਂ ਉਨ੍ਹਾਂ ਨੇ ਮੈਕਸੀਕੋ ਸਿਟੀ ਦੇ 'ਐਸਟਾਡੀਓ ਐਜ਼ਟੇਕਾ' ਸਟੇਡੀਅਮ ਦੇ ਐਂਟਰੀ ਗੇਟ ਵੱਲ ਜਾਂਦੇ ਹੋਏ ਹਰੇ ਰੰਗ ਦੀ ਸ਼ਰਟ ਪਾਏ ਲੋਕਾਂ ਦੀ ਭੀੜ ਦੇਖੀ, ਤਾਂ ਉਹ ਖ਼ੁਦ ਨੂੰ ਸਵਾਲ ਕਰਨ ਲੱਗੇ ਕਿ ਕੀ ਇਹ ਭੀੜ ਅਸਲੀ ਮੈਕਸੀਕੋ ਦੀ ਨੁਮਾਇੰਦਗੀ ਕਰਦੀ ਹੈ? ਕਿਉਂਕਿ ਉਨ੍ਹਾਂ ਲੋਕਾਂ ਵਿੱਚੋਂ ਬਹੁਤਿਆਂ ਨੇ ਰਾਸ਼ਟਰੀ ਟੀਮ ਦੀ ਬਿਲਕੁਲ ਨਵੀਂ ਜਰਸੀ ਪਾਈ ਹੋਈ ਸੀ।
ਗੋਂਜ਼ਾਲੇਸ ਨੇ ਮਹਿਸੂਸ ਕੀਤਾ ਕਿ ਉੱਥੇ ਮੌਜੂਦ ਜ਼ਿਆਦਾਤਰ ਲੋਕ ਮੈਕਸੀਕੋ ਦੇ ਅਮੀਰ ਅਤੇ ਉੱਚ ਵਰਗ ਨਾਲ ਸਬੰਧਤ ਸਨ, ਜਿਨ੍ਹਾਂ ਵਿੱਚ ਕਈ ਸਿਆਸਤਦਾਨ ਵੀ ਸ਼ਾਮਲ ਸਨ। ਉਨ੍ਹਾਂ ਕਿਹਾ ਕਿ ਮੈਂ ਉਨ੍ਹਾਂ ਵਿੱਚੋਂ ਲਗਪਗ 10 ਲੋਕਾਂ ਨੂੰ ਤਾਂ ਪਹਿਲਾਂ ਹੀ ਦੇਖ ਚੁੱਕਾ ਸੀ।
ਗੋਂਜ਼ਾਲੇਸ ਅਤੇ ਉਨ੍ਹਾਂ ਦੇ ਇੱਕ ਦੋਸਤ ਨੂੰ ਸਿਰਫ਼ ਤਿੰਨ ਦਿਨ ਪਹਿਲਾਂ ਹੀ ਟਿਕਟਾਂ ਮਿਲੀਆਂ ਸਨ ਅਤੇ ਹਰੇਕ ਟਿਕਟ ਲਈ ਲਗਭਗ 3.32 ਲੱਖ ਰੁਪਏ (3,500 ਅਮਰੀਕੀ ਡਾਲਰ) ਖ਼ਰਚ ਕਰਨ ਤੋਂ ਬਾਅਦ ਵੀ, ਇਨ੍ਹਾਂ ਹਾਲਾਤਾਂ ਵਿੱਚ ਗੋਂਜ਼ਾਲੇਸ ਨੂੰ ਲੱਗ ਰਿਹਾ ਹੈ ਕਿ ਸ਼ੁਕਰ ਹੈ ਉਨ੍ਹਾਂ ਨੂੰ ਟਿਕਟ ਸਸਤੀ ਮਿਲ ਗਈ।
ਮਾੜੀ ਆਰਥਿਕ ਹਾਲਤ ਵਾਲੇ ਮੈਕਸੀਕੋ ਦੇ ਸਟੇਡੀਅਮ ਵਿੱਚ ਮਹਿੰਗੀ ਬੀਅਰ
ਮੈਚ ਦੇਖਣ ਪਹੁੰਚੇ ਇੱਕ ਹੋਰ ਆਮ ਪ੍ਰਸ਼ੰਸਕ 40 ਸਾਲਾ ਅਲਫੋਂਸੋ ਐਸੇਵੇਜ਼ ਨੇ ਦੱਸਿਆ ਕਿ ਇੱਕ ਪਾਸੇ ਮੈਕਸੀਕੋ ਵਿੱਚ ਅਧਿਆਪਕ ਯੂਨੀਅਨਾਂ ਤਨਖ਼ਾਹਾਂ ਅਤੇ ਪੈਨਸ਼ਨਾਂ ਲਈ ਪ੍ਰਦਰਸ਼ਨ ਕਰ ਰਹੀਆਂ ਹਨ ਅਤੇ ਕਿਸਾਨ ਪਰੇਸ਼ਾਨ ਹਨ, ਜਦਕਿ ਦੂਜੇ ਪਾਸੇ ਸਟੇਡੀਅਮ ਵਿੱਚ ਅਮੀਰ ਲੋਕ ਕਰੀਬ 2000 ਰੁਪਏ ਦੀ ਬੀਅਰ ਦਾ ਆਨੰਦ ਲੈ ਰਹੇ ਹਨ। ਅਲਫੋਂਸੋ ਅਨੁਸਾਰ, ਅਸਲ ਵਿੱਚ ਇਨ੍ਹਾਂ ਵਿੱਚੋਂ ਬਹੁਤ ਸਾਰੇ ਲੋਕ ਮੈਕਸੀਕਨ ਮੂਲ ਦੇ ਅਮਰੀਕੀ ਹਨ, ਜੋ ਟੂਰਨਾਮੈਂਟ ਦੇ ਮੈਕਸੀਕਨ ਪੜਾਅ ਵਿੱਚ ਆਪਣੀ ਹਮਾਇਤ ਦੇ ਨਾਲ-ਨਾਲ ਖ਼ਰਚ ਕਰਨ ਦੀ ਸਮਰੱਥਾ ਦਾ ਦਿਖਾਵਾ ਕਰਨ ਆਏ ਹਨ।
ਮੈਕਸੀਕੋ ਦੀ ਰਾਸ਼ਟਰਪਤੀ ਨਹੀਂ ਆਈ ਸਟੇਡੀਅਮ
ਮੈਕਸੀਕੋ ਦੀ ਰਾਸ਼ਟਰਪਤੀ ਕਲਾਉਡੀਆ ਸ਼ਿਨਬਾਮ ਨੇ ਮਹੀਨੇ ਪਹਿਲਾਂ ਹੀ ਫ਼ੈਸਲਾ ਕਰ ਲਿਆ ਸੀ ਕਿ ਉਹ ਉਦਘਾਟਨੀ ਮੈਚ ਵਿੱਚ ਸ਼ਾਮਲ ਨਹੀਂ ਹੋਣਗੇ। ਸ਼ਿਨਬਾਮ ਨੂੰ ਇਸ ਮੁਕਾਬਲੇ ਲਈ ਫ਼ੀਫ਼ਾ ਦੇ ਪ੍ਰਧਾਨ ਜਿਆਨੀ ਇਨਫੈਂਟਿਨੋ ਦੇ ਬਿਲਕੁਲ ਬਗ਼ਲ ਵਾਲੀ ਸੀਟ ਦੀ ਟਿਕਟ ਮਿਲੀ ਸੀ, ਪਰ ਸ਼ਿਨਬਾਮ ਨੇ ਆਪਣੇ ਦੇਸ਼ ਦੀ ਇੱਕ ਆਦਿਵਾਸੀ ਐਥਲੀਟ 'ਵੇਰਾਕ੍ਰੂਜ਼' ਨੂੰ ਇਹ ਟਿਕਟ ਦੇ ਦਿੱਤੀ। ਸ਼ਿਨਬਾਮ ਨੇ ਸ਼ਹਿਰ ਵਿੱਚ ਆਮ ਪ੍ਰਸ਼ੰਸਕਾਂ ਦੇ ਨਾਲ ਸਕ੍ਰੀਨ 'ਤੇ ਮੈਚ ਦੇਖਿਆ ਅਤੇ ਸ਼ਾਇਦ ਇਸ ਤਰ੍ਹਾਂ ਉਨ੍ਹਾਂ ਨੇ ਫ਼ੀਫ਼ਾ ਦੀਆਂ ਆਮ ਲੋਕਾਂ ਦੀ ਪਹੁੰਚ ਤੋਂ ਦੂਰ ਮਹਿੰਗੀਆਂ ਟਿਕਟਾਂ ਦਾ ਇੱਕ ਖ਼ਾਮੋਸ਼ ਵਿਰੋਧ ਕੀਤਾ।
ਅਮਰੀਕਾ ਵਿੱਚ ਹੋ ਰਹੀ ਕਾਨੂੰਨੀ ਕਾਰਵਾਈ
ਫ਼ੀਫ਼ਾ ਨੇ ਮੁਕਾਬਲਿਆਂ ਲਈ ਟਿਕਟਾਂ ਦੀਆਂ ਕੀਮਤਾਂ ਨੂੰ ਸਹੀ ਠਹਿਰਾਉਂਦੇ ਹੋਏ ਕਿਹਾ ਹੈ ਕਿ ਉਸ ਨੂੰ ਵਿਸ਼ਵ ਪੱਧਰੀ ਫੁੱਟਬਾਲ ਲਈ ਆਪਣੀਆਂ ਫੰਡਿੰਗ ਲੋੜਾਂ ਨੂੰ ਪੂਰਾ ਕਰਨ ਲਈ ਇਸ ਕਮਾਈ ਦੀ ਲੋੜ ਹੈ। ਹਾਲਾਂਕਿ, ਇਨ੍ਹਾਂ ਕੀਮਤਾਂ ਕਾਰਨ ਨਾ ਸਿਰਫ਼ ਪ੍ਰਸ਼ੰਸਕ ਨਾਰਾਜ਼ ਹੋਏ ਹਨ, ਸਗੋਂ ਅਮਰੀਕਾ ਵਿੱਚ ਕਾਨੂੰਨੀ ਕਾਰਵਾਈ ਵੀ ਸ਼ੁਰੂ ਹੋ ਗਈ ਹੈ।