CWG 2026: ਰਾਸ਼ਟਰਮੰਡਲ ਖੇਡਾਂ ਦੇ ਐਥਲੈਟਿਕਸ ਪ੍ਰੋਗਰਾਮ ਅੱਜ ਤੋਂ ਸ਼ੁਰੂ, ਦੋ ਵਾਰ ਦੇ ਓਲੰਪਿਕ ਤਮਗ਼ਾ ਜੇਤੂ ਨੀਰਜ ਚੋਪੜਾ ਦੀਆਂ ਨਜ਼ਰਾਂ ਦੂਜੇ ਸੋਨ ਤਮਗ਼ੇ ’ਤੇ

ਗਲਾਸਗੋ (ਪੀਟੀਆਈ): ਸਟਾਰ ਜੈਵਲਿਨ ਥ੍ਰੋਅਰ ਨੀਰਜ ਚੋਪੜਾ ਸੋਮਵਾਰ ਤੋਂ ਸ਼ੁਰੂ ਹੋ ਰਹੇ ਰਾਸ਼ਟਰਮੰਡਲ ਖੇਡਾਂ ਦੇ ਐਥਲੈਟਿਕਸ ਮੁਕਾਬਲਿਆਂ ’ਚ ਪਾਕਿਸਤਾਨ ਦੇ ਮੌਜੂਦਾ ਓਲੰਪਿਕ ਚੈਂਪੀਅਨ ਅਰਸ਼ਦ ਨਦੀਮ ਤੇ ਸ਼੍ਰੀਲੰਕਾ ਦੇ ਰੁਮੇਸ਼ ਥਰੰਗਾ ਪਥੀਰਾਗੇ ਨਾਲ ਮੁਕਾਬਲਾ ਕਰਨਗੇ, ਜਦ ਕਿ ਭਾਰਤ ਦਾ ਟੀਚਾ ਪਿਛਲੇ ਐਡੀਸ਼ਨ ਤੋਂ ਆਪਣੀ ਤਗਮਾ ਸੂਚੀ ਨੂੰ ਪਾਰ ਕਰਨਾ ਹੈ।

ਨੀਰਜ ਤੋਂ ਇਲਾਵਾ ਸੋਨੇ ਦੇ ਇੱਕ ਮੁੱਖ ਦਾਅਵੇਦਾਰ ਲੰਬੀ ਛਾਲ ਮਾਰਨ ਵਾਲੇ ਮੁਰਲੀ ਸ਼੍ਰੀਸ਼ੰਕਰ ਹਨ, ਜਿਨ੍ਹਾਂ ਨੇ 2022 ਬਰਮਿੰਘਮ ਰਾਸ਼ਟਰਮੰਡਲ ਖੇਡਾਂ ’ਚ ਚਾਂਦੀ ਦਾ ਤਮਗ਼ਾ ਜਿੱਤਿਆ ਸੀ। ਉੱਚ ਛਾਲ ਮਾਰਨ ਵਾਲੇ ਸਰਵੇਸ਼ ਕੁਸ਼ਾਰੇ ਵੀ ਸੋਨੇ ਦੇ ਤਮਗ਼ੇ ਦੇ ਦਾਅਵੇਦਾਰ ਹਨ। ਉਨ੍ਹਾਂ ਨੇ ਹਾਲ ਹੀ ’ਚ 2.31 ਮੀਟਰ ਦੀ ਛਾਲ ਨਾਲ ਇੱਕ ਰਾਸ਼ਟਰੀ ਰਿਕਾਰਡ ਬਣਾਇਆ ਹੈ। ਭਾਰਤੀ ਟੀਮ ਪ੍ਰਬੰਧਨ ਨੂੰ ਪੁਰਸ਼ਾਂ ਦੇ ਜੈਵਲਿਨ ਥ੍ਰੋ, ਲੰਬੀ ਛਾਲ, ਉੱਚੀ ਛਾਲ ਅਤੇ ਤੀਹਰੀ ਛਾਲ ਮੁਕਾਬਲਿਆਂ ’ਚ ਦੋ-ਦੋ ਤਮਗ਼ੇ ਜਿੱਤਣ ਦੀ ਉਮੀਦ ਹੈ। ਇਸ ਤੋਂ ਇਲਾਵਾ, ਪੁਰਸ਼ਾਂ ਦੀ 10,000 ਮੀਟਰ ਦੌੜ, ਡੇਕਾਥਲੋਨ ਅਤੇ ਔਰਤਾਂ ਦੀ 10,000 ਮੀਟਰ ਦੌੜ ਵਾਕ ’ਚ ਤਮਗ਼ੇ ਜਿੱਤਣ ਦੀਆਂ ਸੰਭਾਵਨਾਵਾਂ ਹਨ।

ਭਾਰਤ ਨੂੰ ਪੁਰਸ਼ਾਂ ਦੀ 100 ਮੀਟਰ ਰੁਕਾਵਟ ਦੌੜ, ਸ਼ਾਟ ਪੁੱਟ ਤੇ ਔਰਤਾਂ ਦੀ 3000 ਮੀਟਰ ਸਟੀਪਲਚੇਜ਼ ’ਚ ਵੀ ਤਮਗ਼ਿਆਂ ਦਾ ਦਾਅਵੇਦਾਰ ਮੰਨਿਆ ਜਾ ਰਿਹਾ ਹੈ। ਜੇਕਰ ਅਜਿਹਾ ਹੁੰਦਾ ਹੈ ਤਾਂ ਭਾਰਤ ਬਰਮਿੰਘਮ ’ਚ ਜਿੱਤੇ ਗਏ ਕੁੱਲ ਅੱਠ ਤਮਗ਼ਿਆਂ (ਇੱਕ ਸੋਨ, ਚਾਰ ਚਾਂਦੀ ਤੇ ਤਿੰਨ ਕਾਂਸੀ) ਨੂੰ ਪਾਰ ਕਰ ਸਕਦਾ ਹੈ। ਹਾਲਾਂਕਿ ਸੋਨੇ ਦੇ ਤਮਗ਼ਿਆਂ ਦੀ ਗਿਣਤੀ ਬਾਰੇ ਕੋਈ ਨਿਸ਼ਚਤਤਾ ਨਹੀਂ ਹੈ, ਕਿਉਂਕਿ ਵਿਸ਼ਵ ਪੱਧਰੀ ਐਥਲੀਟ ਜ਼ਿਆਦਾਤਰ ਐਥਲੈਟਿਕਸ ਮੁਕਾਬਲਿਆਂ ’ਚ ਹਿੱਸਾ ਲੈ ਰਹੇ ਹਨ।

ਨੀਰਜ ਸਤੰਬਰ 2025 ਤੋਂ ਪਿੱਠ ਦੇ ਹੇਠਲੇ ਦਰਦ ਤੋਂ ਪ੍ਰੇਸ਼ਾਨ ਹੈ। ਨਤੀਜੇ ਵਜੋਂ ਉਸ ਨੇ ਇਸ ਸਾਲ ਆਪਣੇ ਸੀਜ਼ਨ ਦੀ ਸ਼ੁਰੂਆਤ ’ਚ ਦੇਰੀ ਕੀਤੀ, ਪਹਿਲੀ ਵਾਰ 19 ਜੂਨ ਨੂੰ ਦੋਹਾ ਡਾਇਮੰਡ ਲੀਗ ’ਚ ਹਿੱਸਾ ਲਿਆ। ਉੱਥੇ, ਉਹ 85.69 ਮੀਟਰ ਦੇ ਥਰੋਅ ਨਾਲ ਚੌਥੇ ਸਥਾਨ 'ਤੇ ਰਿਹਾ ਇੱਕ ਪ੍ਰਦਰਸ਼ਨ ਜੋ ਉਸ ਦੇ ਆਮ ਮਿਆਰਾਂ ਤੋਂ ਘੱਟ ਮੰਨਿਆ ਜਾਂਦਾ ਹੈ। ਇਸ ਤੋਂ ਬਾਅਦ, ਉਸ ਨੇ ਸਵਿਸ ਸ਼ਹਿਰ ਬੀਲ ’ਚ ਇੱਕ ਮਹੀਨੇ ਲਈ ਪੁਨਰਵਾਸ ਤੇ ਸਿਖਲਾਈ ਲਈ। ਹੁਣ 28 ਸਾਲ ਦਾ, ਦੋ ਵਾਰ ਦਾ ਓਲੰਪਿਕ ਤਮਗ਼ਾ ਜੇਤੂ ਨੀਰਜ 2018 ਗੋਲਡ ਕੋਸਟ ਰਾਸ਼ਟਰਮੰਡਲ ਖੇਡਾਂ ਤੋਂ ਆਪਣੇ ਪ੍ਰਦਰਸ਼ਨ ਨੂੰ ਦੁਹਰਾਉਣ ਦਾ ਟੀਚਾ ਰੱਖੇਗਾ, ਜਿੱਥੇ ਉਸ ਨੇ ਸੋਨ ਤਗਮਾ ਜਿੱਤਿਆ ਸੀ। ਉਹ ਸ਼ੁੱਕਰਵਾਰ ਨੂੰ ਸਵਿਟਜ਼ਰਲੈਂਡ ਤੋਂ ਗਲਾਸਗੋ ਪਹੁੰਚਿਆ। ਨੀਰਜ ਨੇ 2018 ਦੀਆਂ ਰਾਸ਼ਟਰਮੰਡਲ ਖੇਡਾਂ ’ਚ 86.47 ਮੀਟਰ ਦੇ ਜੈਵਲਿਨ ਥਰੋਅ ਨਾਲ ਸੋਨ ਤਮਗਾ ਜਿੱਤਿਆ ਸੀ। ਹਾਲਾਂਕਿ ਉਹ ਸੱਟ ਕਾਰਨ 2022 ਦੀਆਂ ਰਾਸ਼ਟਰਮੰਡਲ ਖੇਡਾਂ ਤੋਂ ਬਾਹਰ ਹੋ ਗਿਆ। ਭਾਰਤੀ ਐਥਲੈਟਿਕਸ ਟੀਮ ਦੇ ਮੁੱਖ ਕੋਚ ਰਾਧਾਕ੍ਰਿਸ਼ਨਨ ਨਾਇਰ ਦਾ ਕਹਿਣਾ ਹੈ ਕਿ ਨੀਰਜ ਪੂਰੀ ਤਰ੍ਹਾਂ ਫਿੱਟ ਹੈ। ਉਸ ਨੂੰ ਉਮੀਦ ਹੈ ਕਿ 32 ਮੈਂਬਰੀ ਭਾਰਤੀ ਟੀਮ ਇਸ ਵਾਰ ਪਿਛਲੀਆਂ ਰਾਸ਼ਟਰਮੰਡਲ ਖੇਡਾਂ ਨਾਲੋਂ ਜ਼ਿਆਦਾ ਤਮਗ਼ੇ ਜਿੱਤੇਗੀ।