ਏਸ਼ਿਆਈ ਖੇਡਾਂ ਦਾ ਮਹਾਕੁੰਭ ਅੱਜ ਤੋਂ ; 501 ਭਾਰਤੀ ਖਿਡਾਰੀ 37 ਮੁਕਾਬਲਿਆਂ ’ਚ ਪੇਸ਼ ਕਰਨਗੇ ਚੁਣੌਤੀ

ਜਾਗਰਣ ਨਿਊਜ਼ ਨੈੱਟਵਰਕ, ਨਵੀਂ ਦਿੱਲੀ : ਜਾਪਾਨ ਦੇ ਆਇਚੀ-ਨਾਗੋਯਾ ਸ਼ਹਿਰ ਵਿਚ ਸ਼ਨੀਵਾਰ ਤੋਂ ਏਸ਼ਿਆਈ ਖੇਡਾਂ ਦਾ ਮਹਾਕੁੰਭ ਸ਼ੁਰੂ ਹੋ ਰਿਹਾ ਹੈ। ਹਾਂਗਝੂ ਵਿਚ ਤਿੰਨ ਸਾਲ ਪਹਿਲਾਂ ਭਾਰਤੀ ਖੇਡਾਂ ਨੇ ਜਿਸ ਉੱਚਾਈ ਨੂੰ ਛੂਹਿਆ ਸੀ, ਹੁਣ ਉਸ ਤੋਂ ਅੱਗੇ ਵਧਣ ਦੀ ਚੁਣੌਤੀ ਹੈ। ਚੀਨ ਵਿਚ ਹੋਈਆਂ ਏਸ਼ਿਆਈ ਖੇਡਾਂ ਵਿਚ 106 ਤਗਮਿਆਂ ਦੇ ਰਿਕਾਰਡ ਨਾਲ ਭਾਰਤ ਨੇ ਸਾਬੱਤ ਕੀਤਾ ਸੀ ਕਿ ਉਸ ਦੀ ਤਾਕਤ ਕੁਝ ਚੋਣਵੀਆਂ ਖੇਡਾਂ ਤੱਕ ਸੀਮਤ ਨਹੀਂ ਰਹੀ। ਹੁਣ ਆਇਚੀ-ਨਾਗੋਯਾ ਵਿਚ 20ਵੀਆਂ ਏਸ਼ਿਆਈ ਖੇਡਾਂ ਵਿਚ 501 ਮੈਂਬਰਾਂ ਵਾਲਾ ਭਾਰਤੀ ਦਲ ਉਸ ਨਵੇਂ ਵਿਸ਼ਵਾਸ ਨੂੰ ਪ੍ਰਦਰਸ਼ਨ ਵਿਚ ਬਦਲਣ ਲਈ ਤਿਆਰ ਹੈ। ਅਗਲੇ 15 ਦਿਨ ਭਾਰਤ ਲਈ ਸਿਰਫ਼ ਮੈਡਲਾਂ ਦੀ ਗਿਣਤੀ ਨਹੀਂ, ਸਗੋਂ ਇਹ ਪਰਖਣ ਦਾ ਵੀ ਮੌਕਾ ਹੋਵੇਗਾ ਕਿ 2036 ਤੱਕ ਦੁਨੀਆ ਦੇ ਮੋਹਰੀ 10 ਖੇਡ ਮੁਲਕਾਂ ਵਿਚ ਸ਼ਾਮਲ ਹੋਣ ਦੇ ਉਸ ਦੇ ਸੁਪਨੇ ਦੀ ਦਿਸ਼ਾ ਸਹੀ ਹੈ ਜਾਂ ਨਹੀਂ।

ਲਗਪਗ 11,000 ਖਿਡਾਰੀ ਅਤੇ 43 ਖੇਡਾਂ ਦੀ ਭਾਗੀਦਾਰੀ ਵਾਲੀਆਂ ਏਸ਼ਿਆਈ ਖੇਡਾਂ ਕਈ ਮਾਅਨਿਆਂ ਵਿਚ ਓਲੰਪਿਕ ਤੋਂ ਵੀ ਵੱਡਾ ਆਯੋਜਨ ਹਨ। ਭਾਰਤ ਲਈ ਚੁਣੌਤੀ ਵੀ ਓਨੀ ਹੀ ਵੱਡੀ ਹੈ। ਹਾਂਗਝੂ ਵਿਚ ਮਿਲੇ 106 ਮੈਡਲ ਹੁਣ ਨਵਾਂ ਮਾਪਦੰਡ ਬਣ ਗਏ ਹਨ ਅਤੇ ਨਾਗੋਯਾ ਵਿਚ ਹਰ ਭਾਰਤੀ ਖਿਡਾਰੀ ਤੋਂ ਉਸੇ ਵਿਰਾਸਤ ਨੂੰ ਅੱਗੇ ਵਧਾਉਣ ਦੀ ਉਮੀਦ ਹੋਵੇਗੀ।

ਐਥਲੈਟਿਕਸ ਤੇ ਨਿਸ਼ਾਨੇਬਾਜ਼ੀ ’ਚ ਸਭ ਤੋਂ ਵੱਧ ਉਮੀਦਾਂ : ਭਾਰਤ ਦੀਆਂ ਮੈਡਲ ਉਮੀਦਾਂ ਦਾ ਵੱਡਾ ਹਿੱਸਾ ਐਥਲੈਟਿਕਸ ਅਤੇ ਨਿਸ਼ਾਨੇਬਾਜ਼ੀ ਨਾਲ ਜੁੜਿਆ ਹੈ। ਸ਼ੂਟਿੰਗ ਵਿਚ 30 ਮੈਂਬਰਾਂ ਵਾਲੇ ਦਲ ਕੋਲ ਰਾਈਫਲ, ਪਿਸਟਲ ਅਤੇ ਸ਼ਾਟਗਨ ਵਿਚ ਮੈਡਲ ਜਿੱਤਣ ਦੇ ਕਈ ਮੌਕੇ ਹਨ। ਐਥਲੈਟਿਕਸ ਵਿਚ ਭਾਰਤ ਨੂੰ ਵੱਡਾ ਝਟਕਾ ਨੀਰਜ ਚੋਪੜਾ ਦੇ ਬਾਹਰ ਹੋਣ ਨਾਲ ਲੱਗਾ ਹੈ। ਸੱਟ ਕਾਰਨ ਦੋ ਵਾਰ ਦੇ ਚੈਂਪੀਅਨ ਇਸ ਵਾਰ ਆਪਣੇ ਤੀਜੇ ਲਗਾਤਾਰ ਸੋਨੇ ਦੇ ਮੈਡਲ ਲਈ ਮੈਦਾਨ ਵਿਚ ਨਹੀਂ ਹੋਣਗੇ। ਇਸ ਦੇ ਬਾਵਜੂਦ 74 ਮੈਂਬਰਾਂ ਵਾਲੇ ਭਾਰਤੀ ਐਥਲੈਟਿਕਸ ਦਲ ਵਿਚ ਮੈਡਲ ਦੇ ਦਾਅਵੇਦਾਰਾਂ ਦੀ ਕਮੀ ਨਹੀਂ ਹੈ।

ਮਨੂ ਭਾਕਰ ਅਤੇ ਤਜਿੰਦਰ ਪਾਲ ਤੂਰ ਹੋਣਗੇ ਝੰਡਾਬਰਦਾਰ

ਓਲੰਪਿਕ ਮੈਡਲ ਜੇਤੂ ਨਿਸ਼ਾਨੇਬਾਜ਼ ਮਨੂ ਭਾਕਰ ਅਤੇ ਸ਼ਾਟਪੁੱਟਰ ਤਜਿੰਦਰ ਪਾਲ ਸਿੰਘ ਤੂਰ ਸ਼ਨੀਵਾਰ ਨੂੰ ਹੋਣ ਵਾਲੇ ਉਦਘਾਟਨ ਸਮਾਰੋਹ ਵਿਚ ਭਾਰਤ ਦੇ ਝੰਡਾਬਰਦਾਰ ਹੋਣਗੇ। ਤੂਰ ਦੋ ਵਾਰ ਦੇ ਸਾਬਕਾ ਚੈਂਪੀਅਨ ਹਨ। ਉਦਘਾਟਨ ਸਮਾਰੋਹ ਪਾਲੋਮਾ ਮਿਜੁਹੋ ਸਟੇਡੀਅਮ ਵਿਚ ਭਾਰਤੀ ਸਮੇਂ ਮੁਤਾਬਕ ਦੁਪਹਿਰ 2:30 ਤੋਂ ਸ਼ਾਮ 4:30 ਵਜੇ ਤੱਕ ਹੋਵੇਗਾ।