ਨਮਕ ਡਿੱਗਣ ਤੋਂ ਕਿਉਂ ਡਰਦੀਆਂ ਸਨ ਪੁਰਾਣੀਆਂ ਪੀੜ੍ਹੀਆਂ, ਕੀ ਵਾਕਈ ਕਿਸੇ ਵੱਡੇ ਸੰਕਟ ਦਾ ਹੁੰਦਾ ਹੈ ਸੰਕੇਤ?

ਧਰਮ ਡੈਸਕ, ਨਵੀਂ ਦਿੱਲੀ : ਵਾਸਤੂ ਸ਼ਾਸਤਰ 'ਚ ਹਰ ਚੀਜ਼ ਦਾ ਆਪਣਾ ਇਕ ਵੱਖਰਾ ਮਹੱਤਵ ਹੁੰਦਾ ਹੈ। ਅਕਸਰ ਤੁਸੀਂ ਘਰ ਦੇ ਵੱਡੇ-ਬਜ਼ੁਰਗਾਂ ਨੂੰ ਇਹ ਕਹਿੰਦੇ ਸੁਣਿਆ ਹੋਵੇਗਾ ਕਿ ਨਮਕ ਨਾ ਸੁੱਟੋ, ਇਹ ਅਪਸ਼ਗੁਨ ਹੁੰਦਾ ਹੈ। ਰਸੋਈ 'ਚ ਨਮਕ ਸਿਰਫ਼ ਖਾਣੇ ਦਾ ਸੁਆਦ ਹੀ ਨਹੀਂ ਵਧਾਉਂਦਾ, ਸਗੋਂ ਇਸ ਦਾ ਸਾਡੀ ਸੰਸਕ੍ਰਿਤੀ, ਪੁਰਾਣੀਆਂ ਮਾਨਤਾਵਾਂ ਤੇ ਵਾਸਤੂ ਨਾਲ ਵੀ ਡੂੰਘਾ ਨਾਤਾ ਰਿਹਾ ਹੈ। ਪਰ ਕੀ ਸੱਚਮੁੱਚ ਨਮਕ ਡਿੱਗਣ ਨਾਲ ਕੋਈ ਵੱਡਾ ਸੰਕਟ ਆਉਂਦਾ ਹੈ? ਆਓ ਇਸ ਪੁਰਾਣੀ ਮਾਨਤਾ ਨੂੰ ਸਮਝਦੇ ਹਾਂ।

ਨਮਕ ਡਿੱਗਣਾ ਅਸ਼ੁੱਭ ਕਿਉਂ ਮੰਨਿਆ ਜਾਂਦਾ ਹੈ?

ਪੀੜ੍ਹੀਆਂ ਤੋਂ ਚੱਲੀਆਂ ਆ ਰਹੀਆਂ ਮਾਨਤਾਵਾਂ ਅਨੁਸਾਰ, ਜੇਕਰ ਹੱਥੋਂ ਅਚਾਨਕ ਨਮਕ ਡਿੱਗ ਜਾਵੇ ਤਾਂ ਇਸ ਨੂੰ ਘਰ ਵਿਚ ਆਉਣ ਵਾਲੇ ਵਿਵਾਦ, ਲੜਾਈ-ਝਗੜੇ ਜਾਂ ਤਣਾਅ ਦਾ ਸੰਕੇਤ ਮੰਨਿਆ ਜਾਂਦਾ ਹੈ। ਹਾਲਾਂਕਿ, ਵਿਗਿਆਨ ਵਿਚ ਇਸ ਦਾ ਕੋਈ ਪੁਖ਼ਤਾ ਸਬੂਤ ਨਹੀਂ ਹੈ ਅਤੇ ਨਾ ਹੀ ਵਿਗਿਆਨ ਇਸ ਗੱਲ ਨੂੰ ਮੰਨਦਾ ਹੈ। ਇਹ ਮਾਨਤਾ ਪੂਰੀ ਤਰ੍ਹਾਂ ਲੋਕ-ਵਿਸ਼ਵਾਸ ਦੇ ਅਨੁਸਾਰ ਦੱਸੀ ਜਾਂਦੀ ਹੈ। ਭਾਰਤ ਦੇ ਵੱਖ-ਵੱਖ ਹਿੱਸਿਆਂ 'ਚ ਇਸ ਮਾਨਤਾ ਨੂੰ ਲੈ ਕੇ ਵੱਖ-ਵੱਖ ਨਿਯਮ ਬਣੇ ਹੋਏ ਹਨ। ਕੁਝ ਲੋਕ ਇਸ ਨੂੰ ਅਪਸ਼ਗੁਨ ਮੰਨਦੇ ਹਨ, ਜਦਕਿ ਕੁਝ ਲਈ ਇਹ ਬਿਲਕੁਲ ਆਮ ਗੱਲ ਹੈ।

ਨਮਕ ਕਿਸ ਗੱਲ ਦਾ ਪ੍ਰਤੀਕ ਹੈ?

ਪੁਰਾਣੇ ਸਮੇਂ ਤੋਂ ਹੀ ਨਮਕ ਨੂੰ ਜੀਵਨ ਦੀਆਂ ਸਭ ਤੋਂ ਜ਼ਰੂਰੀ ਅਤੇ ਕੀਮਤੀ ਚੀਜ਼ਾਂ ਵਿਚ ਗਿਣਿਆ ਜਾਂਦਾ ਰਿਹਾ ਹੈ। ਇਸ ਨੂੰ ਵਫ਼ਾਦਾਰੀ, ਆਪਸੀ ਭਰੋਸੇ ਅਤੇ ਰਿਸ਼ਤਿਆਂ ਦੀ ਡੂੰਘਾਈ ਨਾਲ ਜੋੜ ਕੇ ਦੇਖਿਆ ਜਾਂਦਾ ਹੈ। ਉੱਥੇ ਹੀ, ਨਮਕ ਨੂੰ ਵਾਸਤੂ ਤੇ ਜੋਤਿਸ਼ ਵਿਚ ਵੀ ਕਾਫ਼ੀ ਸ਼ਕਤੀਸ਼ਾਲੀ ਮੰਨਿਆ ਗਿਆ ਹੈ। ਇਸ ਨਾਲ ਨਜ਼ਰ ਉਤਾਰਨ ਦੀ ਪਰੰਪਰਾ ਬਾਰੇ ਵੀ ਤੁਸੀਂ ਸੁਣਿਆ ਹੋਵੇਗਾ। ਇਸ ਦੇ ਇੰਨੇ ਮਹੱਤਵ ਕਾਰਨ ਇਸ ਦਾ ਡਿੱਗਣਾ ਜਾਂ ਬਰਬਾਦ ਹੋਣਾ ਚੰਗਾ ਨਹੀਂ ਮੰਨਿਆ ਜਾਂਦਾ।

ਵਾਸਤੂ ਸ਼ਾਸਤਰ 'ਚ ਨਮਕ ਦਾ ਮਹੱਤਵ

ਵਾਸਤੂ 'ਚ ਨਮਕ 'ਚ ਘਰ ਦੀ ‘ਨੈਗੇਟਿਵ ਐਨਰਜੀ’ (ਨਕਾਰਾਤਮਕਤਾ) ਨੂੰ ਸੋਖਣ ਦੀ ਗਜ਼ਬ ਦੀ ਤਾਕਤ ਹੋਣ ਦੀ ਮਾਨਤਾ ਹੈ। ਅੱਜ ਵੀ ਕਈ ਲੋਕ ਘਰ ਵਿਚ ਸ਼ਾਂਤੀ ਬਣਾਈ ਰੱਖਣ ਲਈ ਕੋਨਿਆਂ 'ਚ ਕੱਚ ਦੀ ਕਟੋਰੀ 'ਚ ਨਮਕ ਭਰ ਕੇ ਰੱਖਦੇ ਹਨ ਜਾਂ ਪੋਚਾ ਲਗਾਉਂਦੇ ਸਮੇਂ ਪਾਣੀ ਵਿਚ ਥੋੜ੍ਹਾ ਜਿਹਾ ਨਮਕ ਮਿਲਾ ਲੈਂਦੇ ਹਨ। ਦੀਵਾਲੀ ਦੇ ਸਮੇਂ ਨੈਗੇਟਿਵ ਐਨਰਜੀ ਦੇ ਆਲੇ-ਦੁਆਲੇ ਹੋਣ ਦਾ ਖ਼ਤਰਾ ਰਹਿੰਦਾ ਹੈ। ਇਸ ਲਈ ਨਮਕ ਵਾਲੇ ਪਾਣੀ ਨਾਲ ਪੋਚਾ ਲਗਾਉਣ ਦੀ ਸਲਾਹ ਦਿੱਤੀ ਜਾਂਦੀ ਹੈ।

ਜੇਕਰ ਗਲਤੀ ਨਾਲ ਨਮਕ ਡਿੱਗ ਜਾਵੇ ਤਾਂ ਕੀ ਕਰੀਏ?

ਜੇਕਰ ਕਦੇ ਤੁਹਾਡੇ ਤੋਂ ਨਮਕ ਡਿੱਗ ਜਾਵੇ ਤਾਂ ਇਸ ਵਿਚ ਡਰਨ ਵਾਲੀ ਕੋਈ ਗੱਲ ਨਹੀਂ ਹੈ। ਸਾਫ਼-ਸਫ਼ਾਈ ਦੇ ਨਜ਼ਰੀਏ ਤੋਂ ਇਸ ਨੂੰ ਤੁਰੰਤ ਇਕੱਠਾ ਕਰ ਕੇ ਡਸਟਬਿਨ 'ਚ ਪਾ ਦੇਣਾ ਚਾਹੀਦਾ ਹੈ। ਰਵਾਇਤੀ ਤੌਰ ’ਤੇ ਸਿਰਫ਼ ਇੰਨੀ ਸਲਾਹ ਦਿੱਤੀ ਜਾਂਦੀ ਹੈ ਕਿ ਡਿੱਗੇ ਹੋਏ ਨਮਕ ’ਤੇ ਪੈਰ ਨਹੀਂ ਰੱਖਣਾ ਚਾਹੀਦਾ ਅਤੇ ਇਸ ਨੂੰ ਸਨਮਾਨ ਨਾਲ ਸਾਫ਼ ਕਰ ਦੇਣਾ ਚਾਹੀਦਾ ਹੈ।