10 ਤੋਂ 13 ਸਤੰਬਰ ਤਕ ਅਸਤ ਰਹੇਗਾ ਚੰਦਰਮਾ, ਭੁੱਲ ਕੇ ਵੀ ਰਾਤ ਨੂੰ ਸੌਣ ਤੋਂ ਪਹਿਲਾਂ ਨਾ ਕਰਿਓ ਇਹ 3 ਕੰਮ

ਧਰਮ ਡੈਸਕ, ਨਵੀਂ ਦਿੱਲੀ : ਜੋਤਿਸ਼ ਸ਼ਾਸਤਰ 'ਚ ਚੰਦਰਮਾ ਨੂੰ ਮਨ, ਭਾਵਨਾਵਾਂ, ਮਾਨਸਿਕ ਸ਼ਾਂਤੀ ਤੇ ਨੀਂਦ ਦਾ ਕਾਰਕ ਮੰਨਿਆ ਗਿਆ ਹੈ। ਇਹੀ ਕਾਰਨ ਹੈ ਕਿ ਕੁੰਡਲੀ 'ਚ ਚੰਦਰਮਾ ਦੀ ਸਥਿਤੀ ਵਿਅਕਤੀ ਨੂੰ ਮਾਨਸਿਕ ਅਤੇ ਭਾਵਨਾਤਮਕ ਤੌਰ ’ਤੇ ਪ੍ਰਭਾਵਿਤ ਕਰਦੀ ਹੈ। ਜੋਤਸ਼ੀ ਮਾਨਤਾਵਾਂ ਅਨੁਸਾਰ, ਜਦੋਂ ਚੰਦਰਮਾ ਕਮਜ਼ੋਰ ਜਾਂ ਅਸਤ ਸਥਿਤੀ 'ਚ ਹੁੰਦਾ ਹੈ ਤਾਂ ਵਿਅਕਤੀ ਨੂੰ ਮਾਨਸਿਕ ਬੇਚੈਨੀ, ਤਣਾਅ ਤੇ ਨੀਂਦ ਨਾਲ ਜੁੜੀਆਂ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।

10 ਤੋਂ 13 ਸਤੰਬਰ ਦੇ ਵਿਚਕਾਰ ਚੰਦਰਮਾ ਫਿਰ ਤੋਂ ਅਸਤ ਹੋਣ ਵਾਲਾ ਹੈ। ਅਜਿਹੇ ਵਿਚ ਇਸ ਦੌਰਾਨ ਰਾਤ ਨੂੰ ਸੌਣ ਤੋਂ ਪਹਿਲਾਂ ਕੁਝ ਕੰਮ ਕਰਨ ਤੋਂ ਬਚਣ ਦੀ ਸਲਾਹ ਦਿੱਤੀ ਜਾਂਦੀ ਹੈ। ਆਓ ਜਾਣਦੇ ਹਾਂ ਉਹ ਕਿਹੜੇ 3 ਕੰਮ ਹਨ, ਜੋ ਸੌਣ ਤੋਂ ਪਹਿਲਾਂ ਨਹੀਂ ਕਰਨੇ ਚਾਹੀਦੇ।

ਸੌਣ ਤੋਂ ਪਹਿਲਾਂ ਡਰਾਉਣੀਆਂ ਜਾਂ ਨਕਾਰਾਤਮਕ ਚੀਜ਼ਾਂ ਨਾ ਦੇਖੋ

ਅੱਜਕੱਲ੍ਹ ਸੌਣ ਤੋਂ ਪਹਿਲਾਂ ਮੋਬਾਈਲ ਚਲਾਉਣਾ ਤੇ ਸੋਸ਼ਲ ਮੀਡੀਆ ’ਤੇ ਰੀਲਾਂ ਦੇਖਣਾ ਆਮ ਗੱਲ ਹੋ ਗਈ ਹੈ। ਕਈ ਲੋਕ ਬਿਸਤਰੇ ’ਤੇ ਜਾਣ ਤੋਂ ਬਾਅਦ ਘੰਟਿਆਂਬੱਧੀ ਵੀਡੀਓ ਦੇਖਦੇ ਰਹਿੰਦੇ ਹਨ। ਕੁਝ ਲੋਕ ਇਸ ਦੌਰਾਨ ਡਰਾਉਣੀਆਂ ਫ਼ਿਲਮਾਂ, ਅਪਰਾਧ ਨਾਲ ਜੁੜੀਆਂ ਖ਼ਬਰਾਂ ਜਾਂ ਨਕਾਰਾਤਮਕ ਵੀਡੀਓ ਵੀ ਦੇਖਦੇ ਹਨ। ਜੋਤਿਸ਼ੀ ਮਾਨਤਾ ਅਨੁਸਾਰ, ਚੰਦਰਮਾ ਦਾ ਸਬੰਧ ਮਨ ਅਤੇ ਭਾਵਨਾਵਾਂ ਨਾਲ ਹੁੰਦਾ ਹੈ। ਇਸ ਲਈ ਚੰਦਰਮਾ ਦੇ ਕਮਜ਼ੋਰ ਹੋਣ ਦੀ ਸਥਿਤੀ ਵਿਚ ਸੌਣ ਤੋਂ ਪਹਿਲਾਂ ਨਕਾਰਾਤਮਕ ਚੀਜ਼ਾਂ ਦੇਖਣ ਨਾਲ ਮਨ ਹੋਰ ਅਸ਼ਾਂਤ ਹੋ ਸਕਦਾ ਹੈ। ਅਜਿਹੇ ਵਿਚ ਸੌਣ ਤੋਂ ਠੀਕ ਪਹਿਲਾਂ ਮੋਬਾਈਲ ਦੀ ਜ਼ਿਆਦਾ ਵਰਤੋਂ ਨੀਂਦ ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ। ਇਸ ਲਈ ਕੋਸ਼ਿਸ਼ ਕਰੋ ਕਿ ਸੌਣ ਤੋਂ ਕੁਝ ਸਮਾਂ ਪਹਿਲਾਂ ਫ਼ੋਨ ਦੂਰ ਰੱਖ ਦਿਓ। ਜੇ ਕੁਝ ਦੇਖਣਾ ਹੀ ਹੈ ਤਾਂ ਹਲਕਾ ਅਤੇ ਸਕਾਰਾਤਮਕ ਕੰਟੈਂਟ ਚੁਣੋ।

ਰਾਤ ਨੂੰ ਦੇਰ ਨਾਲ ਭਾਰੀ ਭੋਜਨ ਤੇ ਦੁੱਧ ਨਾ ਪੀਓ

ਦੇਰ ਰਾਤ ਬਹੁਤ ਜ਼ਿਆਦਾ ਖਾਣਾ ਜਾਂ ਸੌਣ ਤੋਂ ਠੀਕ ਪਹਿਲਾਂ ਦੁੱਧ ਪੀਣਾ ਤੁਹਾਡੀ ਨੀਂਦ ਨੂੰ ਪ੍ਰਭਾਵਿਤ ਕਰ ਸਕਦਾ ਹੈ। ਵੈਸੇ ਵੀ ਦੁੱਧ ਨੂੰ ਚੰਦਰਮਾ ਦਾ ਪ੍ਰਤੀਨਿਧੀ ਮੰਨਿਆ ਜਾਂਦਾ ਹੈ। ਅਜਿਹੇ ਵਿਚ ਜਦੋਂ ਚੰਦਰਮਾ ਅਸਤ ਸਥਿਤੀ ਵਿਚ ਹੋਵੇ ਤਾਂ ਚੰਦਰਮਾ ਦਾ ਨੁਮਾਇੰਦਗੀ ਕਰਨ ਵਾਲੀਆਂ ਚੀਜ਼ਾਂ ਦਾ ਸੇਵਨ ਕਰਨ ਤੋਂ ਬਚਣਾ ਚਾਹੀਦਾ ਹੈ, ਨਹੀਂ ਤਾਂ ਪਰੇਸ਼ਾਨੀ ਖੜ੍ਹੀ ਹੋ ਸਕਦੀ ਹੈ। ਜੋਤਿਸ਼ ਸ਼ਾਸਤਰ ਵਿਚ ਦੱਸਿਆ ਗਿਆ ਹੈ ਕਿ ਕਮਜ਼ੋਰ ਚੰਦਰਮਾ ਮਾਨਸਿਕ ਸ਼ਾਂਤੀ ਅਤੇ ਸਰੀਰ ਦੀ ਸਹਿਜਤਾ ਨੂੰ ਘੱਟ ਕਰਦਾ ਹੈ। ਅਜਿਹੇ ਵਿਚ ਇਸ ਦੌਰਾਨ ਰਾਤ ਨੂੰ ਹਲਕਾ ਭੋਜਨ ਹੀ ਕਰਨਾ ਚਾਹੀਦਾ ਹੈ।

ਸੌਣ ਤੋਂ ਪਹਿਲਾਂ ਵਿਵਾਦ ਤੇ ਪੈਸਿਆਂ ਦਾ ਹਿਸਾਬ-ਕਿਤਾਬ ਨਾ ਕਰੋ

ਦਿਨਭਰ ਦੇ ਕੰਮ ਤੋਂ ਬਾਅਦ ਰਾਤ ਦਾ ਸਮਾਂ ਮਨ ਨੂੰ ਸ਼ਾਂਤ ਕਰਨ ਦਾ ਹੋਣਾ ਚਾਹੀਦਾ ਹੈ। ਪਰ ਕਈ ਵਾਰ ਲੋਕ ਬਿਸਤਰੇ ’ਤੇ ਜਾਣ ਤੋਂ ਬਾਅਦ ਪਰਿਵਾਰਕ ਵਿਵਾਦ, ਦਫ਼ਤਰ ਦਾ ਤਣਾਅ, ਅਗਲੇ ਦਿਨ ਦੀ ਚਿੰਤਾ ਜਾਂ ਪੈਸਿਆਂ ਨਾਲ ਜੁੜੇ ਮਾਮਲਿਆਂ ਬਾਰੇ ਸੋਚਦੇ ਰਹਿੰਦੇ ਹਨ। ਜੋਤਿਸ਼ 'ਚ ਚੰਦਰਮਾ ਨੂੰ ਮਨ ਦਾ ਕਾਰਕ ਮੰਨਿਆ ਗਿਆ ਹੈ। ਇਸ ਲਈ ਮਾਨਤਾ ਹੈ ਕਿ ਚੰਦਰਮਾ ਦੇ ਕਮਜ਼ੋਰ ਹੋਣ ਤੇ ਸੌਣ ਤੋਂ ਪਹਿਲਾਂ ਤਣਾਅਪੂਰਨ ਗੱਲਬਾਤ ਜਾਂ ਵਿਵਾਦ ਕਰਨ ਨਾਲ ਮਾਨਸਿਕ ਅਸ਼ਾਂਤੀ ਵਧ ਸਕਦੀ ਹੈ।

ਇਸੇ ਤਰ੍ਹਾਂ ਰਾਤ ਨੂੰ ਬੈਠ ਕੇ ਖਰਚਿਆਂ ਦਾ ਲੰਮਾ ਹਿਸਾਬ-ਕਿਤਾਬ ਕਰਨਾ, ਕਰਜ਼ੇ ਜਾਂ ਪੈਸਿਆਂ ਨੂੰ ਲੈ ਕੇ ਚਿੰਤਾ ਕਰਨਾ ਵੀ ਤਣਾਅ ਵਧਾ ਸਕਦਾ ਹੈ। ਇਸ ਲਈ 10 ਤੋਂ 13 ਸਤੰਬਰ ਦੌਰਾਨ ਜੇਕਰ ਤੁਸੀਂ ਕੁੰਡਲੀ 'ਚ ਚੰਦਰਮਾ ਨੂੰ ਮਜ਼ਬੂਤ ਬਣਾਉਣਾ ਚਾਹੁੰਦੇ ਹੋ ਤਾਂ ਇਸ ਦੌਰਾਨ ਹਰ ਰਾਤ ਮੈਡੀਟੇਸ਼ਨ ਕਰੋ।

ਡਿਸਕਲੇਮਰ: ਇਸ ਲੇਖ 'ਚ ਦੱਸੇ ਗਏ ਉਪਾਅ/ਫਾਇਦੇ/ਸਲਾਹ ਅਤੇ ਕਥਨ ਸਿਰਫ਼ ਆਮ ਜਾਣਕਾਰੀ ਲਈ ਹਨ। ਪੰਜਾਬੀ ਜਾਗਰਣ ਇਸ ਲੇਖ 'ਚ ਲਿਖੀਆਂ ਗੱਲਾਂ ਦਾ ਸਮਰਥਨ ਨਹੀਂ ਕਰਦਾ। ਇਸ ਲੇਖ 'ਚ ਸ਼ਾਮਲ ਜਾਣਕਾਰੀ ਵੱਖ-ਵੱਖ ਸਰੋਤਾਂ/ਜੋਤਿਸ਼ੀਆਂ/ਪੰਚਾਂਗ/ਪ੍ਰਵਚਨਾਂ/ਮਾਨਤਾਵਾਂ/ਧਾਰਮਿਕ ਗ੍ਰੰਥਾਂ/ਦੰਤਕਥਾਵਾਂ ਤੋਂ ਇਕੱਠੀ ਕੀਤੀ ਗਈ ਹੈ। ਪਾਠਕਾਂ ਨੂੰ ਬੇਨਤੀ ਹੈ ਕਿ ਲੇਖ ਨੂੰ ਅੰਤਿਮ ਸੱਚ ਜਾਂ ਦਾਅਵਾ ਨਾ ਮੰਨਣ ਅਤੇ ਆਪਣੇ ਵਿਵੇਕ ਦੀ ਵਰਤੋਂ ਕਰਨ।