Raksha Bandhan 2026: ਰਾਸ਼ੀ ਅਨੁਸਾਰ ਬੰਨ੍ਹੋ ਆਪਣੇ ਭਰਾ ਦੇ ਗੁੱਟ 'ਤੇ ਰੱਖੜੀ, ਜਾਣੋ ਕਿਹੜਾ ਰੰਗ ਹੈ ਸ਼ੁੱਭ

ਧਰਮ ਡੈਸਕ, ਨਵੀਂ ਦਿੱਲੀ : ਰੱਖੜੀ ਭੈਣ-ਭਰਾ ਦੇ ਪਿਆਰ ਅਤੇ ਸਨੇਹ ਭਰੇ ਪਵਿੱਤਰ ਰਿਸ਼ਤੇ ਨੂੰ ਹੋਰ ਮਜ਼ਬੂਤ ਬਣਾਉਣ ਦਾ ਤਿਉਹਾਰ ਹੈ। ਇਸ ਦਿਨ ਭੈਣਾਂ ਆਪਣੇ ਭਰਾ ਦੀ ਕਲਾਈ ’ਤੇ ਰੱਖੜੀ ਬੰਨ੍ਹ ਕੇ ਉਸ ਦੀ ਸੁੱਖ-ਸਮ੍ਰਿੱਧੀ ਅਤੇ ਲੰਬੀ ਉਮਰ ਦੀ ਕਾਮਨਾ ਕਰਦੀਆਂ ਹਨ। ਧਾਰਮਿਕ ਮਾਨਤਾਵਾਂ ਅਨੁਸਾਰ ਇਸ ਤਿਉਹਾਰ ’ਤੇ ਰੰਗਾਂ ਦਾ ਵਿਸ਼ੇਸ਼ ਮਹੱਤਵ ਹੁੰਦਾ ਹੈ।

ਇਸ ਲਈ ਅਸੀਂ ਐਸਟ੍ਰੋਪਤਰੀ ਦੇ ਜੋਤਿਸ਼ ਆਚਾਰੀਆ ਚੰਦਰਸ਼ੇਖਰ ਸ਼ਰਮਾ ਨਾਲ ਗੱਲਬਾਤ ਕੀਤੀ ਅਤੇ ਉਨ੍ਹਾਂ ਨੇ ਦੱਸਿਆ, “ਜੇ ਭਰਾ ਦੀ ਰਾਸ਼ੀ ਦੇ ਅਨੁਸਾਰ ਸ਼ੁਭ ਰੰਗ ਦੀ ਰੱਖੜੀ ਬੰਨ੍ਹੀ ਜਾਵੇ ਤਾਂ ਇਸ ਨਾਲ ਸਕਾਰਾਤਮਕ ਊਰਜਾ ਅਤੇ ਗ੍ਰਹਿਆਂ ਦੀ ਅਨੁਕੂਲਤਾ ਦਾ ਲਾਭ ਮਿਲਣ ਦੀ ਮਾਨਤਾ ਹੈ।” ਆਓ ਜਾਣਦੇ ਹਾਂ ਸਾਲ 2026 'ਚ ਰੱਖੜੀ ’ਤੇ ਕਿਸ ਰਾਸ਼ੀ ਵਾਲੇ ਭਰਾ ਨੂੰ ਕਿਸ ਰੰਗ ਦੀ ਰੱਖੜੀ ਬੰਨ੍ਹਣਾ ਸ਼ੁਭ ਰਹੇਗਾ।

ਮੇਖ ਤੇ ਬ੍ਰਿਸ਼ਚਕ ਰਾਸ਼ੀ

ਮੇਖ ਤੇ ਬ੍ਰਿਸ਼ਚਕ ਰਾਸ਼ੀ ਦੇ ਸੁਆਮੀ ਮੰਗਲ ਗ੍ਰਹਿ ਹਨ। ਇਸ ਲਈ ਇਨ੍ਹਾਂ ਦੋਵਾਂ ਰਾਸ਼ੀਆਂ ਲਈ ਲਾਲ, ਸੰਤਰੀ ਜਾਂ ਕੇਸਰੀ ਰੰਗ ਸ਼ੁਭ ਮੰਨਿਆ ਜਾਂਦਾ ਹੈ। ਭੈਣਾਂ ਇਨ੍ਹਾਂ ਰੰਗਾਂ ਦੀ ਰੱਖੜੀ ਭਰਾ ਦੀ ਕਲਾਈ ’ਤੇ ਬੰਨ੍ਹ ਸਕਦੀਆਂ ਹਨ। ਮੰਨਿਆ ਜਾਂਦਾ ਹੈ ਕਿ ਇਸ ਨਾਲ ਹਿੰਮਤ, ਆਤਮ-ਵਿਸ਼ਵਾਸ ਤੇ ਊਰਜਾ ਵਧਾਉਣ ਵਾਲੀ ਸਕਾਰਾਤਮਕਤਾ ਮਿਲਦੀ ਹੈ।

ਬ੍ਰਿਖ ਤੇ ਤੁਲਾ ਰਾਸ਼ੀ

ਬ੍ਰਿਖ ਅਤੇ ਤੁਲਾ ਰਾਸ਼ੀ ਦੇ ਸਵਾਮੀ ਸ਼ੁੱਕਰ ਗ੍ਰਹਿ ਹਨ। ਇਨ੍ਹਾਂ ਰਾਸ਼ੀਆਂ ਲਈ ਚਿੱਟਾ, ਸਿਲਵਰ ਅਤੇ ਹਲਕਾ ਨੀਲਾ ਰੰਗ ਅਨੁਕੂਲ ਮੰਨਿਆ ਜਾਂਦਾ ਹੈ। ਇਸ ਲਈ ਭਰਾ ਲਈ ਰੇਸ਼ਮੀ ਚਿੱਟੇ, ਚਾਂਦੀ ਵਰਗੇ ਰੰਗ ਜਾਂ ਨੀਲੇ ਧਾਗੇ ਵਾਲੀ ਰੱਖੜੀ ਚੁਣਨਾ ਸ਼ੁਭ ਹੋ ਸਕਦਾ ਹੈ। ਇਹ ਰੰਗ ਪਿਆਰ, ਸਦਭਾਵਨਾ ਅਤੇ ਸੁੱਖ-ਸਮ੍ਰਿੱਧੀ ਨਾਲ ਜੁੜੇ ਮੰਨੇ ਜਾਂਦੇ ਹਨ।

ਮਿਥੁਨ ਤੇ ਕੰਨਿਆ ਰਾਸ਼ੀ

ਮਿਥੁਨ ਤੇ ਕੰਨਿਆ ਰਾਸ਼ੀ ਦੇ ਸੁਆਮੀ ਬੁੱਧ ਗ੍ਰਹਿ ਹਨ। ਬੁੱਧ ਨਾਲ ਜੁੜਿਆ ਹਰਾ ਰੰਗ ਇਨ੍ਹਾਂ ਦੋਵਾਂ ਰਾਸ਼ੀਆਂ ਲਈ ਸ਼ੁਭ ਮੰਨਿਆ ਜਾਂਦਾ ਹੈ। ਭਰਾ ਦੇ ਗੁੱਟ ’ਤੇ ਹਰੇ ਜਾਂ ਤੋਤੇ ਰੰਗੀ ਰੱਖੜੀ ਬੰਨ੍ਹਣਾ ਵਧੀਆ ਵਿਕਲਪ ਹੋ ਸਕਦਾ ਹੈ। ਜੋਤਿਸ਼ੀ ਮਾਨਤਾ ਅਨੁਸਾਰ ਇਹ ਰੰਗ ਬੁੱਧੀ, ਸੰਚਾਰ ਅਤੇ ਸਕਾਰਾਤਮਕ ਸੋਚ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ।

ਕਰਕ ਰਾਸ਼ੀ

ਕਰਕ ਰਾਸ਼ੀ ਦੇ ਸੁਆਮੀ ਚੰਦਰਮਾ ਹਨ। ਇਸ ਰਾਸ਼ੀ ਲਈ ਚਿੱਟਾ ਅਤੇ ਪੀਲਾ ਰੰਗ ਸ਼ੁਭ ਮੰਨਿਆ ਜਾਂਦਾ ਹੈ। ਭਰਾ ਦੀ ਕਲਾਈ ’ਤੇ ਪੀਲੇ ਜਾਂ ਚਿੱਟੇ ਰੰਗ ਦੀ ਰੱਖੜੀ ਬੰਨ੍ਹੀ ਜਾ ਸਕਦੀ ਹੈ। ਮੋਤੀਆਂ ਨਾਲ ਸਜੀ ਰੱਖੜੀ ਵੀ ਕਰਕ ਰਾਸ਼ੀ ਵਾਲੇ ਭਰਾ ਲਈ ਸੁੰਦਰ ਤੇ ਸ਼ੁਭ ਵਿਕਲਪ ਮੰਨੀ ਜਾਂਦੀ ਹੈ।

ਸਿੰਘ ਰਾਸ਼ੀ

ਸਿੰਘ ਰਾਸ਼ੀ ਦੇ ਸੁਆਮੀ ਸੂਰਜ ਦੇਵ ਹਨ। ਸੂਰਜ ਨਾਲ ਜੁੜਿਆ ਸੁਨਹਿਰੀ ਅਤੇ ਪੀਲਾ ਰੰਗ ਇਸ ਰਾਸ਼ੀ ਲਈ ਸ਼ੁਭ ਮੰਨਿਆ ਜਾਂਦਾ ਹੈ। ਅਜਿਹੇ ਵਿਚ ਸਿੰਘ ਰਾਸ਼ੀ ਵਾਲੇ ਭਰਾ ਲਈ ਸੁਨਹਿਰੀ, ਪੀਲੇ ਜਾਂ ਤਾਂਬੇ ਰੰਗ ਦੀ ਰੱਖੜੀ ਚੁਣੀ ਜਾ ਸਕਦੀ ਹੈ। ਮਾਨਤਾ ਹੈ ਕਿ ਇਹ ਰੰਗ ਆਤਮ-ਵਿਸ਼ਵਾਸ ਤੇ ਮਾਣ-ਸਨਮਾਨ ਨਾਲ ਜੁੜੇ ਹੁੰਦੇ ਹਨ।

ਧਨੁ ਰਾਸ਼ੀ

ਧਨੁ ਰਾਸ਼ੀ ਦੇ ਸੁਆਮੀ ਗੁਰੂ ਗ੍ਰਹਿ ਹਨ। ਗੁਰੂ ਦਾ ਸਬੰਧ ਪੀਲੇ ਰੰਗ ਨਾਲ ਮੰਨਿਆ ਜਾਂਦਾ ਹੈ। ਇਸ ਲਈ ਇਸ ਰਾਸ਼ੀ ਵਾਲੇ ਭਰਾ ਦੇ ਗੁੱਟ ’ਤੇ ਪੀਲੇ ਰੰਗ ਦਾ ਰੇਸ਼ਮੀ ਰੱਖਿਆ ਸੂਤਰ ਬੰਨ੍ਹਣਾ ਸ਼ੁਭ ਮੰਨਿਆ ਜਾਂਦਾ ਹੈ। ਮਾਨਤਾ ਅਨੁਸਾਰ ਇਸ ਨਾਲ ਭਰਾ ਦੇ ਜੀਵਨ ਵਿਚ ਗਿਆਨ, ਸਮ੍ਰਿੱਧੀ ਅਤੇ ਸਕਾਰਾਤਮਕਤਾ ਦਾ ਵਿਸਥਾਰ ਹੁੰਦਾ ਹੈ।

ਮਕਰ ਤੇ ਕੁੰਭ ਰਾਸ਼ੀ

ਮਕਰ ਤੇ ਕੁੰਭ ਰਾਸ਼ੀ ਦੇ ਸੁਆਮੀ ਸ਼ਨੀ ਗ੍ਰਹਿ ਹਨ। ਇਨ੍ਹਾਂ ਦੋਵਾਂ ਰਾਸ਼ੀਆਂ ਲਈ ਗੂੜ੍ਹਾ ਨੀਲਾ ਅਤੇ ਬੈਂਗਣੀ ਰੰਗ ਅਨੁਕੂਲ ਮੰਨਿਆ ਜਾਂਦਾ ਹੈ। ਭਰਾ ਲਈ ਇਨ੍ਹਾਂ ਰੰਗਾਂ ਦੀ ਰੱਖੜੀ ਚੁਣਨਾ ਸ਼ੁਭ ਹੋ ਸਕਦਾ ਹੈ। ਗੂੜ੍ਹੇ ਰੰਗਾਂ ਨੂੰ ਸਥਿਰਤਾ, ਅਨੁਸ਼ਾਸਨ ਅਤੇ ਗੰਭੀਰਤਾ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ।

ਮੀਨ ਰਾਸ਼ੀ

ਮੀਨ ਰਾਸ਼ੀ ਦੇ ਸੁਆਮੀ ਗੁਰੂ ਹੁੰਦੇ ਹਨ। ਇਸ ਲਈ ਇਸ ਰਾਸ਼ੀ ਲਈ ਪੀਲਾ ਰੰਗ ਵਿਸ਼ੇਸ਼ ਤੌਰ ’ਤੇ ਸ਼ੁਭ ਮੰਨਿਆ ਜਾਂਦਾ ਹੈ। ਮੀਨ ਰਾਸ਼ੀ ਵਾਲੇ ਭਰਾ ਲਈ ਪੀਲੇ ਜਾਂ ਗੋਲਡਨ ਰੰਗ ਦੀ ਰੱਖੜੀ ਬੰਨ੍ਹਣਾ ਵਧੀਆ ਵਿਕਲਪ ਹੋ ਸਕਦਾ ਹੈ। ਮਾਨਤਾ ਹੈ ਕਿ ਇਹ ਰੰਗ ਸੁੱਖ, ਸਮ੍ਰਿੱਧੀ ਅਤੇ ਸਕਾਰਾਤਮਕ ਊਰਜਾ ਦਾ ਪ੍ਰਤੀਕ ਹੈ।