ਨਾ ਚਾਹੁੰਦੇ ਹੋਏ ਵੀ ਕਈ ਵਾਰ 'ਬੇਈਮਾਨੀ' ਕਰ ਬੈਠਦੇ ਹਨ ਇਨ੍ਹਾਂ ਜਨਮ ਤਰੀਕਾਂ ਨੂੰ ਜਨਮੇ ਲੋਕ, ਬਾਅਦ 'ਚ ਹੁੰਦੈ ਪਛਤਾਵਾ

ਧਰਮ ਡੈਸਕ, ਨਵੀਂ ਦਿੱਲੀ : ਅੰਕ ਜੋਤਿਸ਼ (Numerology) 'ਚ ਹਰ ਤਰੀਕ ਦਾ ਆਪਣਾ ਖਾਸ ਪ੍ਰਭਾਵ ਹੁੰਦਾ ਹੈ। ਕੁਝ ਤਰੀਕਾਂ ਨੂੰ ਜਨਮ ਲੈਣ ਵਾਲੇ ਲੋਕਾਂ ਦਾ ਸੁਭਾਅ ਅਜਿਹਾ ਹੁੰਦਾ ਹੈ ਕਿ ਉਹ ਦਿਲ ਦੇ ਸੱਚੇ ਹੁੰਦੇ ਹੋਏ ਵੀ ਕਈ ਵਾਰ ਅਣਜਾਣੇ 'ਚ ਗਲਤ ਰਾਹ ਚੁਣ ਲੈਂਦੇ ਹਨ। ਬਾਅਦ 'ਚ ਜਦੋਂ ਉਨ੍ਹਾਂ ਨੂੰ ਆਪਣੀ ਗਲਤੀ ਦਾ ਅਹਿਸਾਸ ਹੁੰਦਾ ਹੈ ਤਾਂ ਪਛਤਾਵੇ ਤੋਂ ਇਲਾਵਾ ਕੁਝ ਨਹੀਂ ਬਚਦਾ। ਮੁਲਾਂਕ 4 ਤੇ ਮੁਲਾਂਕ 8 ਦੇ ਲੋਕਾਂ ਨਾਲ ਅਜਿਹਾ ਸਭ ਤੋਂ ਜ਼ਿਆਦਾ ਹੁੰਦਾ ਹੈ। ਜਨਮ ਤਰੀਕ ਦੀ ਗੱਲ ਕਰੀਏ ਤਾਂ 4, 13, 22, 31, 8, 17 ਜਾਂ 26 ਵਾਲੇ ਲੋਕ ਇਸ ਵਿਚ ਸ਼ਾਮਲ ਹੁੰਦੇ ਹਨ। ਚਲੋ ਜਾਣਦੇ ਹਾਂ ਕਿ ਇਨ੍ਹਾਂ ਨਾਲ ਅਜਿਹਾ ਕਿਉਂ ਹੁੰਦਾ ਹੈ।

ਰਾਹੂ ਤੇ ਸ਼ਨੀ ਦਾ ਗੂੜ੍ਹਾ ਪ੍ਰਭਾਵ

ਅੰਕ ਜੋਤਿਸ਼ 'ਚ ਮੰਨਿਆ ਜਾਂਦਾ ਹੈ ਕਿ ਮੁਲਾਂਕ 4 ਦੇ ਸਵਾਮੀ ਰਾਹੂ ਹਨ ਤੇ ਮੁਲਾਂਕ 8 ਦੇ ਸਵਾਮੀ ਸ਼ਨੀ ਹਨ। ਦੋਵੇਂ ਹੀ ਗ੍ਰਹਿ ਵਿਅਕਤੀ ਨੂੰ ਬਹੁਤ ਖਾਹਸ਼ੀ ਬਣਾਉਂਦੇ ਹਨ। ਇਨ੍ਹਾਂ ਲੋਕਾਂ ਦੇ ਸੁਪਨੇ ਵੱਡੇ ਹੁੰਦੇ ਹਨ ਤੇ ਉਹ ਜੀਵਨ ਵਿਚ ਬਹੁਤ ਜਲਦੀ ਉੱਚਾਈਆਂ ਨੂੰ ਛੂਹਣਾ ਚਾਹੁੰਦੇ ਹਨ। ਸਫਲਤਾ ਹਾਸਲ ਕਰਨ ਦੀ ਇੱਛਾ ਕਈ ਵਾਰ ਉਨ੍ਹਾਂ ਨੂੰ ਸਹੀ-ਗਲਤ ਦੀ ਹੱਦ ਭੁਲਾ ਦਿੰਦੀ ਹੈ।

ਸ਼ਾਰਟਕੱਟ ਅਪਣਾਉਣ ਦੀ ਆਦਤ

ਮੁਲਾਂਕ 4 ਤੇ 8 ਵਾਲੇ ਲੋਕ ਮਿਹਨਤੀ ਹੁੰਦੇ ਹਨ, ਪਰ ਉਨ੍ਹਾਂ ਦੇ ਅੰਦਰ ਜਲਦੀ ਸਭ ਕੁਝ ਪਾ ਲੈਣ ਦੀ ਬੇਚੈਨੀ ਵੀ ਹੁੰਦੀ ਹੈ। ਕਰੀਅਰ, ਪੈਸਾ, ਨਾਮ ਜਾਂ ਰਿਸ਼ਤਿਆਂ 'ਚ ਅੱਗੇ ਵਧਣ ਲਈ ਉਹ ਕਈ ਵਾਰ ਸ਼ਾਰਟਕੱਟ ਲੱਭਣ ਲੱਗਦੇ ਹਨ। ਇਸੇ ਜਲਦਬਾਜ਼ੀ 'ਚ ਉਹ ਕੋਈ ਅਜਿਹਾ ਫੈਸਲਾ ਲੈ ਲੈਂਦੇ ਹਨ ਜੋ ਨੈਤਿਕ ਰੂਪ ਨਾਲ ਸਹੀ ਨਹੀਂ ਹੁੰਦਾ। ਉਸ ਸਮੇਂ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਇਹ ਸਿਰਫ਼ ਇਕ ਛੋਟਾ ਸਮਝੌਤਾ ਹੈ, ਪਰ ਬਾਅਦ 'ਚ ਉਹੀ ਗੱਲ ਉਨ੍ਹਾਂ ਲਈ ਪਰੇਸ਼ਾਨੀ ਬਣ ਜਾਂਦੀ ਹੈ।

ਹਾਲਾਤ ਤੇ ਗੁੱਸੇ ਦਾ ਦਬਾਅ

ਇਹ ਲੋਕ ਸੁਭਾਅ ਤੋਂ ਜ਼ਿੱਦੀ ਤੇ ਸਪੱਸ਼ਟਵਾਦੀ ਹੁੰਦੇ ਹਨ। ਜਦੋਂ ਇਨ੍ਹਾਂ 'ਤੇ ਕਿਸੇ ਕੰਮ ਦਾ ਦਬਾਅ ਆਉਂਦਾ ਹੈ ਜਾਂ ਕੋਈ ਇਨ੍ਹਾਂ ਨੂੰ ਗਲਤ ਸਮਝਦਾ ਹੈ ਤਾਂ ਗੁੱਸੇ ਵਿਚ ਆ ਕੇ ਇਹ ਕੋਈ ਕਦਮ ਚੁੱਕ ਲੈਂਦੇ ਹਨ। ਕਈ ਵਾਰ ਪੈਸਿਆਂ ਦੀ ਤੰਗੀ, ਦਫ਼ਤਰ ਦਾ ਪ੍ਰੈਸ਼ਰ ਜਾਂ ਰਿਸ਼ਤਿਆਂ ਦੀ ਖਿੱਚੋਤਾਣ ਵੀ ਇਨ੍ਹਾਂ ਨੂੰ ਗਲਤ ਨਿਰਣਾ ਲੈਣ 'ਤੇ ਮਜਬੂਰ ਕਰ ਦਿੰਦੀ ਹੈ। ਉਸ ਸਮੇਂ ਉਨ੍ਹਾਂ ਦਾ ਇਰਾਦਾ ਬੁਰਾ ਨਹੀਂ ਹੁੰਦਾ, ਪਰ ਕੰਮ ਹੋ ਜਾਣ ਤੋਂ ਬਾਅਦ ਜਦੋਂ ਉਹ ਸ਼ਾਂਤੀ ਨਾਲ ਸੋਚਦੇ ਹਨ ਤਾਂ ਉਨ੍ਹਾਂ ਨੂੰ ਸਮਝ ਆਉਂਦਾ ਹੈ ਕਿ ਜੋ ਕੀਤਾ ਉਹ ਗਲਤ ਸੀ। ਮੁਲਾਂਕ 4 ਤੇ 8 ਵਾਲੇ ਲੋਕ ਬੁਰੇ ਨਹੀਂ ਹੁੰਦੇ। ਉਨ੍ਹਾਂ ਦੀ ਸਭ ਤੋਂ ਵੱਡੀ ਤਾਕਤ ਉਨ੍ਹਾਂ ਦੀਆਂ ਖਾਹਸ਼ਾਂ ਹੀ ਕਈ ਵਾਰ ਉਨ੍ਹਾਂ ਦੀ ਕਮਜ਼ੋਰੀ ਬਣ ਜਾਂਦੀ ਹੈ।