ਘਰ 'ਚ ਕਿੰਨੇ ਦਿਨਾਂ ਤੱਕ ਰੱਖੀਆਂ ਜਾ ਸਕਦੀਆਂ ਹਨ ਮ੍ਰਿਤਕ ਦੀਆਂ ਅਸਥੀਆਂ, ਗਰੁੜ ਪੁਰਾਣ 'ਚ ਛਿਪਿਆ ਹੈ ਇਹ ਰਹੱਸ

ਧਰਮ ਡੈਸਕ, ਨਵੀਂ ਦਿੱਲੀ: ਗਰੁੜ ਪੁਰਾਣ ਵਿੱਚ ਅੰਤਿਮ ਸੰਸਕਾਰ ਦੇ ਕਈ ਨਿਯਮ ਦੱਸੇ ਗਏ ਹਨ ਅਤੇ ਉਨ੍ਹਾਂ ਦਾ ਪਾਲਣ ਕਰਨਾ ਜ਼ਰੂਰੀ ਹੈ। ਜਦੋਂ ਘਰ ਵਿੱਚ ਕਿਸੇ ਦੀ ਮੌਤ ਹੁੰਦੀ ਹੈ ਤਾਂ ਮ੍ਰਿਤਕ ਦੇ ਪਰਿਵਾਰ ਵਾਲੇ ਸਭ ਤੋਂ ਪਹਿਲਾਂ ਕੁਝ ਰੀਤੀ-ਰਿਵਾਜ ਨਿਭਾਉਂਦੇ ਹਨ, ਜਿਨ੍ਹਾਂ ਵਿੱਚ ਮ੍ਰਿਤਕ ਦੇਹ ਨੂੰ ਇਸ਼ਨਾਨ ਕਰਵਾਉਣ ਤੋਂ ਲੈ ਕੇ ਨਵੇਂ ਕੱਪੜੇ ਪਹਿਨਾਉਣਾ ਸ਼ਾਮਲ ਹੈ।

ਇਸ ਤੋਂ ਬਾਅਦ ਮ੍ਰਿਤਕ ਦੇਹ ਨੂੰ ਸ਼ਮਸ਼ਾਨਘਾਟ ਲਿਜਾਇਆ ਜਾਂਦਾ ਹੈ ਤੇ ਮੁਖ ਅਗਨੀ ਦੇ ਕੇ ਦਾਹ ਸੰਸਕਾਰ ਕੀਤਾ ਜਾਂਦਾ ਹੈ ਪਰ ਸਾਰੇ ਸੰਸਕਾਰ ਇੱਥੇ ਹੀ ਪੂਰੇ ਨਹੀਂ ਹੁੰਦੇ। ਚਿਖਾ ਦੀ ਅਗਨੀ ਜਦੋਂ ਠੰਢੀ ਹੋ ਜਾਂਦੀ ਹੈ ਤਾਂ ਅਸਥੀਆਂ ਇਕੱਠੀਆਂ ਕੀਤੀਆਂ ਜਾਂਦੀਆਂ ਹਨ ਅਤੇ ਉਨ੍ਹਾਂ ਨੂੰ ਸਹੀ ਸਮੇਂ 'ਤੇ ਕਿਸੇ ਪਵਿੱਤਰ ਨਦੀ ਵਿੱਚ ਪ੍ਰਵਾਹਿਤ ਕੀਤਾ ਜਾਂਦਾ ਹੈ।

ਇਨ੍ਹਾਂ ਅਸਥੀਆਂ ਨਾਲ ਜੁੜੇ ਵੀ ਕੁਝ ਨਿਯਮ ਬਣਾਏ ਗਏ ਹਨ ਅਤੇ ਇਹ ਵਿਸਰਜਿਤ ਕਰਨ ਦਾ ਸਹੀ ਸਮਾਂ ਅਤੇ ਤਰੀਕਾ ਵੀ ਗਰੁੜ ਪੁਰਾਣ ਵਿੱਚ ਲਿਖਿਆ ਹੈ। ਆਓ ਤੁਹਾਨੂੰ ਦੱਸਦੇ ਹਾਂ ਕਿ ਤੁਸੀਂ ਮ੍ਰਿਤਕ ਦੀਆਂ ਅਸਥੀਆਂ ਕਿੰਨੇ ਦਿਨਾਂ ਤੱਕ ਆਪਣੇ ਘਰ ਵਿੱਚ ਰੱਖ ਸਕਦੇ ਹੋ ਅਤੇ ਉਨ੍ਹਾਂ ਨੂੰ ਕਿਵੇਂ ਵਿਸਰਜਿਤ ਕਰਨ ਨਾਲ ਮ੍ਰਿਤਕ ਆਤਮਾ ਨੂੰ ਮੁਕਤੀ ਮਿਲਦੀ ਹੈ।

ਮ੍ਰਿਤਕ ਦੀਆਂ ਅਸਥੀਆਂ ਕੀ ਹੁੰਦੀਆਂ ਹਨ?

ਸਕੰਦ ਪੁਰਾਣ ਅਨੁਸਾਰ, ਮੌਤ ਦੇ ਸਮੇਂ ਆਤਮਾ ਸਰੀਰ ਵਿੱਚੋਂ ਪੂਰੀ ਤਰ੍ਹਾਂ ਨਿਕਲਦੀ ਨਹੀਂ ਹੈ, ਉਹ 'ਅਤਿਵਾਹਿਕ ਸੂਖਮ ਸਰੀਰ' ਦਾ ਰੂਪ ਲੈ ਲੈਂਦੀ ਹੈ। ਇੰਨਾ ਹੀ ਨਹੀਂ, ਮ੍ਰਿਤਕ ਦੀ ਆਤਮਾ ਆਪਣੇ ਪਰਿਵਾਰ ਦੇ ਲੋਕਾਂ ਵਿਚਕਾਰ ਹੀ ਲਗਪਗ 13 ਦਿਨਾਂ ਤੱਕ ਰਹਿੰਦੀ ਹੈ। ਇਸ ਤੋਂ ਬਾਅਦ ਤੇਰ੍ਹਵੀਂ ਦਾ ਸੰਸਕਾਰ ਕੀਤਾ ਜਾਂਦਾ ਹੈ ਅਤੇ ਆਤਮਾ ਨੂੰ ਮੁਕਤੀ ਮਿਲਦੀ ਹੈ।

ਉੱਥੇ ਹੀ ਜਦੋਂ ਮ੍ਰਿਤਕ ਦੀਆਂ ਅਸਥੀਆਂ ਦੀ ਗੱਲ ਕੀਤੀ ਜਾਂਦੀ ਹੈ ਤਾਂ ਦਾਹ ਸੰਸਕਾਰ ਦੇ ਕੁਝ ਸਮੇਂ ਬਾਅਦ, ਲਗਭਗ ਦੂਜੇ ਦਿਨ ਤੱਕ ਚਿਤਾ ਦੀ ਅਗਨੀ ਪੂਰੀ ਤਰ੍ਹਾਂ ਸ਼ਾਂਤ ਹੋ ਜਾਂਦੀ ਹੈ ਅਤੇ ਮ੍ਰਿਤਕ ਦੇਹ ਦੀਆਂ ਕੁਝ ਅਸਥੀਆਂ ਹੀ ਬਚਦੀਆਂ ਹਨ ਜੋ ਸੁਆਹ ਦਾ ਰੂਪ ਲੈ ਲੈਂਦੀਆਂ ਹਨ। ਇਨ੍ਹਾਂ ਅਸਥੀਆਂ ਨੂੰ ਇੱਕ ਤਾਂਬੇ ਜਾਂ ਮਿੱਟੀ ਦੇ ਕਲਸ਼ ਵਿੱਚ ਇਕੱਠਾ ਕੀਤਾ ਜਾਂਦਾ ਹੈ ਅਤੇ ਪੂਰੇ ਨਿਯਮਾਂ ਨਾਲ ਨਦੀ ਵਿੱਚ ਪ੍ਰਵਾਹਿਤ ਕੀਤਾ ਜਾਂਦਾ ਹੈ। ਮ੍ਰਿਤਕ ਦੀਆਂ ਅਸਥੀਆਂ ਇਕੱਠੀਆਂ ਕਰਨ ਦਾ ਸਮਾਂ ਇੱਕ ਤੋਂ ਤਿੰਨ ਦਿਨਾਂ ਤੱਕ ਹੁੰਦਾ ਹੈ।

ਮ੍ਰਿਤਕ ਦੀਆਂ ਅਸਥੀਆਂ ਕਿਵੇਂ ਇਕੱਠੀਆਂ ਕੀਤੀਆਂ ਜਾਂਦੀਆਂ ਹਨ?

ਇਸ ਨੂੰ ਵੀ ਇੱਕ ਰਸਮ ਦੇ ਰੂਪ ਵਿੱਚ ਹੀ ਦੇਖਿਆ ਜਾਂਦਾ ਹੈ ਅਤੇ ਇਸ ਵਿੱਚ ਪਰਿਵਾਰ ਦੇ ਸਾਰੇ ਮੁੱਖ ਮੈਂਬਰ ਸ਼ਮਸ਼ਾਨਘਾਟ ਜਾਂਦੇ ਹਨ। ਰਾਖ ਦੇ ਨਾਲ ਅਸਥੀਆਂ ਦੇ ਵੱਡੇ ਟੁਕੜਿਆਂ ਨੂੰ ਮਿੱਟੀ ਦੇ ਨਵੇਂ ਬਰਤਨ ਜਾਂ ਕੁਝ ਪਰੰਪਰਾਵਾਂ ਵਿੱਚ ਬਾਂਸ ਦੀਆਂ ਲੱਕੜੀਆਂ ਦਾ ਇਸਤੇਮਾਲ ਕਰਕੇ ਇਕੱਠਾ ਕੀਤਾ ਜਾਂਦਾ ਹੈ। ਇਨ੍ਹਾਂ ਅਸਥੀਆਂ ਨੂੰ ਇਕੱਠਾ ਕਰਨ ਤੋਂ ਪਹਿਲਾਂ, ਕਈ ਵਾਰ ਰਾਖ 'ਤੇ ਦੁੱਧ ਅਤੇ ਪਾਣੀ ਪਾਇਆ ਜਾਂਦਾ ਹੈ, ਜਿਸ ਨਾਲ ਅਗਨੀ ਪੂਰੀ ਤਰ੍ਹਾਂ ਸ਼ਾਂਤ ਹੋ ਜਾਂਦੀ ਹੈ ਅਤੇ ਇਹ ਸ਼ੁੱਧੀਕਰਨ ਦੀ ਅੰਤਿਮ ਪ੍ਰਕਿਰਿਆ ਹੁੰਦੀ ਹੈ।

ਕਿੰਨੇ ਸਮੇਂ ਬਾਅਦ ਅਸਥੀਆਂ ਵਿਸਰਜਿਤ ਕਰਨੀਆਂ ਚਾਹੀਦੀਆਂ ਹਨ?

ਗਰੁੜ ਪੁਰਾਣ ਵਿੱਚ ਦੱਸਿਆ ਗਿਆ ਹੈ ਕਿ ਮ੍ਰਿਤਕ ਦੀਆਂ ਅਸਥੀਆਂ ਨੂੰ ਅੰਤਿਮ ਸੰਸਕਾਰ ਦੇ ਤਿੰਨ ਦਿਨਾਂ ਤੋਂ ਲੈ ਕੇ ਤੇਰ੍ਹਵੇਂ ਦਿਨ ਦੇ ਵਿਚਕਾਰ ਕਦੇ ਵੀ ਵਿਸਰਜਿਤ ਕੀਤਾ ਜਾ ਸਕਦਾ ਹੈ। ਅਸਥੀਆਂ ਨੂੰ ਜੇਕਰ ਗੰਗਾ ਨਦੀ ਵਿੱਚ ਵਿਸਰਜਿਤ ਕੀਤਾ ਜਾਂਦਾ ਹੈ, ਤਾਂ ਇਹ ਮੋਖਸ਼ ਦਾ ਸਭ ਤੋਂ ਆਸਾਨ ਰਸਤਾ ਮੰਨਿਆ ਜਾਂਦਾ ਹੈ। ਅਸਥੀ ਵਿਸਰਜਨ ਤੋਂ ਬਾਅਦ ਮ੍ਰਿਤਕ ਦਾ ਆਪਣੇ ਪਰਿਵਾਰ ਪ੍ਰਤੀ ਮੋਹ-ਮਾਇਆ ਦਾ ਲਗਾਅ ਪੂਰੀ ਤਰ੍ਹਾਂ ਸਮਾਪਤ ਹੋ ਜਾਂਦਾ ਹੈ। ਅੰਤਿਮ ਸੰਸਕਾਰ ਦੀਆਂ ਰਸਮਾਂ ਵਿੱਚੋਂ ਇੱਕ ਅਸਥੀਆਂ ਨੂੰ ਨਦੀ ਵਿੱਚ ਵਿਸਰਜਿਤ ਕਰਨਾ ਹੈ। ਮ੍ਰਿਤਕ ਦੇ ਪਰਿਵਾਰ ਵਾਲਿਆਂ ਨੂੰ ਸਹੀ ਸਮੇਂ 'ਤੇ ਹੀ ਅਸਥੀਆਂ ਵਿਸਰਜਿਤ ਕਰਨ ਦੀ ਸਲਾਹ ਦਿੱਤੀ ਜਾਂਦੀ ਹੈ।