ਹਰਿਆਲੀ ਤੀਜ 'ਤੇ ਪੇਕੇ ਘਰੋਂ ਕਿਉਂ ਭੇਜਿਆ ਜਾਂਦਾ ਹੈ ਸੰਧਾਰਾ? ਜਾਣੋ ਇਸ ਖ਼ਾਸ ਪਰੰਪਰਾ ਦਾ ਮਹੱਤਵ

ਧਰਮ ਡੈਸਕ, ਨਵੀਂ ਦਿੱਲੀ: ਹਰਿਆਲੀ ਤੀਜ ਦਾ ਤਿਉਹਾਰ ਕਿਸੇ ਵੀ ਔਰਤ ਲਈ ਬਹੁਤ ਖ਼ਾਸ ਮੰਨਿਆ ਜਾਂਦਾ ਹੈ। ਇਹ ਮੁੱਖ ਤੌਰ 'ਤੇ ਉੱਤਰੀ ਭਾਰਤ ਦਾ ਤਿਉਹਾਰ ਹੈ ਅਤੇ ਰਾਜਸਥਾਨ, ਝਾਰਖੰਡ, ਉੱਤਰ ਪ੍ਰਦੇਸ਼, ਪੰਜਾਬ, ਦਿੱਲੀ, ਚੰਡੀਗੜ੍ਹ, ਬਿਹਾਰ ਅਤੇ ਮੱਧ ਪ੍ਰਦੇਸ਼ ਵਰਗੇ ਰਾਜਾਂ 'ਚ ਧੂਮਧਾਮ ਨਾਲ ਮਨਾਇਆ ਜਾਂਦਾ ਹੈ।

ਹਰ ਸਾਲ ਇਹ ਤਿਉਹਾਰ ਸਾਉਣ ਮਹੀਨੇ ਦੇ ਸ਼ੁਕਲ ਪੱਖ ਦੇ ਤੀਜੇ ਦਿਨ ਮਨਾਇਆ ਜਾਂਦਾ ਹੈ। ਇਸੇ ਵਜ੍ਹਾ ਕਰਕੇ ਇਸ ਨੂੰ 'ਸਾਉਣ ਤੀਜ' ਦੇ ਨਾਂ ਨਾਲ ਵੀ ਜਾਣਿਆ ਜਾਂਦਾ ਹੈ। ਵਿਆਹੀਆਂ ਔਰਤਾਂ ਲਈ ਇਸ ਤਿਉਹਾਰ ਦਾ ਮਹੱਤਵ ਬਹੁਤ ਜ਼ਿਆਦਾ ਹੈ ਕਿਉਂਕਿ ਇਸ ਦਿਨ ਵਿਆਹੀਆਂ ਔਰਤਾਂ ਪਤੀ ਦੀ ਲੰਮੀ ਉਮਰ ਦੀ ਕਾਮਨਾ ਲਈ ਵਰਤ ਰੱਖਦੀਆਂ ਹਨ ਅਤੇ ਮਾਤਾ ਪਾਰਵਤੀ ਦੀ ਪੂਜਾ ਵਿਧੀ-ਵਿਧਾਨ ਨਾਲ ਕਰਦੀਆਂ ਹਨ।

ਇਸ ਦੌਰਾਨ ਨਿਭਾਈ ਜਾਣ ਵਾਲੀ ਇੱਕ ਰਸਮ ਹੁੰਦੀ ਹੈ ਸੰਧਾਰਾ ਦੀ ਰਸਮ, ਜੋ ਪੇਕੇ ਵਾਲੇ ਧੀ ਦੇ ਸਹੁਰੇ ਘਰ ਭੇਜਦੇ ਹਨ। ਆਓ ਤੁਹਾਨੂੰ ਦੱਸਦੇ ਹਾਂ ਆਖ਼ਰ ਕਿਉਂ ਹਮੇਸ਼ਾ ਸੰਧਾਰਾ ਲਾੜੀ ਦੇ ਪੇਕੇ ਘਰੋਂ ਆਉਂਦਾ ਹੈ ਅਤੇ ਇਸ ਦਾ ਕੀ ਮਹੱਤਵ ਹੁੰਦਾ ਹੈ?

ਹਰਿਆਲੀ ਤੀਜ ਦਾ ਤਿਉਹਾਰ ਕਿਉਂ ਹੈ ਖ਼ਾਸ

ਹਰਿਆਲੀ ਤੀਜ ਦਾ ਤਿਉਹਾਰ ਹਰ ਔਰਤ ਲਈ ਬਹੁਤ ਖ਼ਾਸ ਮੰਨਿਆ ਜਾਂਦਾ ਹੈ, ਚਾਹੇ ਉਹ ਵਿਆਹੀ ਹੋਵੇ ਜਾਂ ਕੁਆਰੀ। ਜਿੱਥੇ ਇੱਕ ਪਾਸੇ ਸੁਹਾਗਣ ਔਰਤਾਂ ਪਤੀ ਦੀ ਲੰਮੀ ਉਮਰ ਦੀ ਕਾਮਨਾ ਲਈ ਇਹ ਵਰਤ ਕਰਦੀਆਂ ਹਨ, ਉੱਥੇ ਹੀ ਕੁਆਰੀਆਂ ਕੁੜੀਆਂ ਚੰਗੇ ਜੀਵਨ ਸਾਥੀ ਦੀ ਚਾਹਤ 'ਚ ਇਹ ਵਰਤ ਰੱਖਦੀਆਂ ਹਨ।

ਇਸ ਦਿਨ ਭਗਵਾਨ ਸ਼ਿਵ ਅਤੇ ਮਾਤਾ ਪਾਰਵਤੀ ਦੀ ਪੂਜਾ ਕਰਨ ਦੀ ਮਾਨਤਾ ਤਾਂ ਹੈ ਹੀ, ਨਾਲ ਹੀ ਹਰਿਆਲੀ ਤੀਜ ਦੇ ਦਿਨ ਨਵ-ਵਿਆਹੀਆਂ ਔਰਤਾਂ ਲਈ 16 ਸ਼ਿੰਗਾਰ ਕਰਨਾ ਜ਼ਰੂਰੀ ਮੰਨਿਆ ਜਾਂਦਾ ਹੈ। ਹਰਿਆਲੀ ਤੀਜ ਨਾਲ ਜੁੜੀ ਇੱਕ ਅਜਿਹੀ ਪਰੰਪਰਾ ਵੀ ਹੈ ਜੋ ਅੱਜ ਵੀ ਸਦੀਆਂ ਤੋਂ ਕਾਇਮ ਹੈ। ਉਹ ਪਰੰਪਰਾ ਹੈ ਪੇਕੇ ਘਰੋਂ ਸੰਧਾਰਾ ਭੇਜਣ ਦੀ।

ਹਰਿਆਲੀ ਤੀਜ 'ਤੇ ਪੇਕੇ ਘਰੋਂ ਕਿਉਂ ਆਉਂਦਾ ਹੈ ਸੰਧਾਰਾ?

ਸਦੀਆਂ ਤੋਂ ਹਿੰਦੂ ਧਰਮ 'ਚ ਹਰ ਵਿਆਹੀ ਧੀ ਦੇ ਘਰ ਪੇਕਿਆਂ ਵੱਲੋਂ ਸੰਧਾਰਾ ਭੇਜਣ ਦੀ ਪਰੰਪਰਾ ਚੱਲੀ ਆ ਰਹੀ ਹੈ। ਇਸ 'ਚ ਪੇਕੇ ਪਰਿਵਾਰ ਵੱਲੋਂ ਸੰਧਾਰਾ 'ਚ ਕੱਪੜੇ, ਮਿਠਾਈਆਂ ਅਤੇ ਸੁਹਾਗ ਦਾ ਸਾਮਾਨ ਭੇਜਿਆ ਜਾਂਦਾ ਹੈ ਅਤੇ ਇਸ 'ਚ ਆਉਣ ਵਾਲੀਆਂ ਮਿਠਾਈਆਂ ਨੂੰ ਸਹੁਰੇ ਪਰਿਵਾਰ 'ਚ ਨੇੜਲੇ ਰਿਸ਼ਤੇਦਾਰਾਂ ਨੂੰ ਵੰਡਿਆ ਜਾਂਦਾ ਹੈ।

ਸੰਧਾਰਾ 'ਚ ਆਉਣ ਵਾਲੀਆਂ ਚੀਜ਼ਾਂ ਸੁਹਾਗਣ ਔਰਤਾਂ ਨੂੰ ਦਿੱਤੀਆਂ ਜਾਂਦੀਆਂ ਹਨ ਅਤੇ ਲਾੜੀ ਲਈ ਇਸ ਨੂੰ ਖ਼ੁਸ਼ਹਾਲੀ ਤੇ ਚੰਗੀ ਕਿਸਮਤ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ। ਵੈਸੇ ਤਾਂ ਵਿਆਹੀਆਂ ਔਰਤਾਂ ਆਪਣੇ ਸਾਰੇ ਤਿਉਹਾਰ ਸਹੁਰੇ ਘਰ ਮਨਾਉਂਦੀਆਂ ਹਨ, ਪਰ ਹਰਿਆਲੀ ਤੀਜ 'ਤੇ ਵਿਆਹੀਆਂ ਧੀਆਂ ਪੇਕੇ ਘਰ ਆਉਂਦੀਆਂ ਹਨ।

ਸੰਧਾਰਾ ਨੂੰ ਮੰਨਿਆ ਜਾਂਦਾ ਹੈ ਵਿਸ਼ੇਸ਼ ਤੋਹਫ਼ਾ

ਹਰਿਆਲੀ ਤੀਜ ਹਰ ਸਾਲ ਸਾਉਣ ਮਹੀਨੇ ਦੇ ਸ਼ੁਕਲ ਪੱਖ ਦੀ ਤੀਜ ਤਿਥੀ ਨੂੰ ਮਨਾਈ ਜਾਂਦੀ ਹੈ ਅਤੇ ਇਹ ਤਿਉਹਾਰ ਪੂਰਨ ਰੂਪ 'ਚ ਸ਼ਿਵ ਜੀ ਅਤੇ ਮਾਤਾ ਪਾਰਵਤੀ ਦੀ ਪੂਜਾ ਲਈ ਸ਼ੁੱਭ ਮੰਨਿਆ ਜਾਂਦਾ ਹੈ। ਸੰਧਾਰਾ ਨੂੰ ਪੇਕਿਆਂ ਦੀ ਤਰਫ਼ੋਂ ਆਉਣ ਵਾਲਾ ਇੱਕ ਅਜਿਹਾ ਤੋਹਫ਼ਾ ਮੰਨਿਆ ਜਾਂਦਾ ਹੈ ਜਿਸ 'ਚ ਵਿਆਹੀ ਧੀ ਲਈ ਖ਼ੁਸ਼ਹਾਲੀ ਅਤੇ ਸੌਭਾਗ ਦਾ ਆਸ਼ੀਰਵਾਦ ਛਿਪਿਆ ਹੁੰਦਾ ਹੈ।

ਇਸ 'ਚ ਧੀ ਨੂੰ ਸੋਲ੍ਹਾਂ ਸ਼ਿੰਗਾਰ ਤੋਹਫ਼ੇ 'ਚ ਦਿੱਤੇ ਜਾਂਦੇ ਹਨ ਅਤੇ ਇਹ ਪੇਕੇ ਵਾਲਿਆਂ ਵੱਲੋਂ ਧੀ ਦੇ ਸੁਹਾਗ ਅਤੇ ਚੰਗੀ ਕਿਸਮਤ ਦੇ ਆਸ਼ੀਰਵਾਦ ਦਾ ਪ੍ਰਤੀਕ ਮੰਨਿਆ ਜਾਂਦਾ ਹੈ। ਵਿਆਹੀ ਧੀ ਨੂੰ ਸ਼ਿੰਗਾਰ ਦੀ ਸਮੱਗਰੀ ਦੇ ਨਾਲ ਸੰਧਾਰਾ ਦੇਣਾ ਇੱਕ ਪੁੰਨ ਦਾ ਕੰਮ ਮੰਨਿਆ ਜਾਂਦਾ ਹੈ ਜੋ ਪੇਕੇ ਅਤੇ ਸਹੁਰੇ ਦੋਵਾਂ ਪਰਿਵਾਰਾਂ ਦੀ ਖ਼ੁਸ਼ਹਾਲੀ ਲਈ ਜ਼ਰੂਰੀ ਹੁੰਦਾ ਹੈ।

ਹਰਿਆਲੀ ਤੀਜ 'ਤੇ ਪੇਕੇ ਘਰੋਂ ਸੰਧਾਰਾ ਭੇਜਣ ਦੀ ਪਰੰਪਰਾ ਬਹੁਤ ਮਹੱਤਵਪੂਰਨ ਹੈ ਅਤੇ ਇਸ ਨਾਲ ਵਿਆਹੁਤਾ ਜੀਵਨ 'ਚ ਖ਼ੁਸ਼ਹਾਲੀ ਦਾ ਆਸ਼ੀਰਵਾਦ ਮਿਲਦਾ ਹੈ।