Garuda Purana: ਇਹ ਆਦਤਾਂ ਅਮੀਰ ਨੂੰ ਵੀ ਬਣਾ ਸਕਦੀਆਂ ਹਨ ਕੰਗਾਲ, ਮਾਂ ਲਕਸ਼ਮੀ ਹੋ ਜਾਂਦੀ ਹੈ ਨਾਰਾਜ਼

ਧਰਮ ਡੈਸਕ, ਨਵੀਂ ਦਿੱਲੀ: ਅੱਜ ਦੇ ਸਮੇਂ ਲੋਕ ਆਪਣੇ ਸੁਪਨਿਆਂ ਨੂੰ ਪੂਰਾ ਕਰਨ ਲਈ ਸਖ਼ਤ ਮਿਹਨਤ ਕਰਦੇ ਹਨ ਪਰ ਇਸ ਦੇ ਬਾਵਜੂਦ ਕਈ ਵਾਰ ਉਨ੍ਹਾਂ ਨੂੰ ਜੀਵਨ ਵਿਚ ਸਫਲਤਾ ਨਹੀਂ ਮਿਲਦੀ ਤੇ ਆਰਥਿਕ ਤੰਗੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਇਸ ਸਮੱਸਿਆ ਤੋਂ ਛੁਟਕਾਰਾ ਪਾਉਣ ਲਈ ਲੋਕ ਕਈ ਉਪਾਅ ਵੀ ਕਰਦੇ ਹਨ, ਪਰ ਫਿਰ ਵੀ ਉਨ੍ਹਾਂ ਨੂੰ ਮਨਚਾਹਾ ਨਤੀਜਾ ਨਹੀਂ ਮਿਲਦਾ।

ਹਿੰਦੂ ਧਰਮ ਦੇ ਮਹੱਤਵਪੂਰਨ ਗ੍ਰੰਥ ਗਰੁੜ ਪੁਰਾਣ ਵਿੱਚ ਜੀਵਨ ਵਿੱਚ ਕੰਗਾਲੀ ਆਉਣ ਦੇ ਕਾਰਨਾਂ ਬਾਰੇ ਵਿਸਥਾਰ ਨਾਲ ਦੱਸਿਆ ਗਿਆ ਹੈ। ਇਸ ਦੇ ਨਾਲ ਹੀ ਇਸ ਗ੍ਰੰਥ ਵਿੱਚ ਜੀਵਨ ਨੂੰ ਸੁਖੀ ਅਤੇ ਸਫਲ ਬਣਾਉਣ ਲਈ ਕਈ ਮਹੱਤਵਪੂਰਨ ਨੀਤੀਆਂ ਦਾ ਵੀ ਵਰਣਨ ਕੀਤਾ ਗਿਆ ਹੈ।

ਗਰੁੜ ਪੁਰਾਣ ਅਨੁਸਾਰ ਕੁਝ ਅਜਿਹੀਆਂ ਆਦਤਾਂ ਹਨ, ਜਿਨ੍ਹਾਂ ਕਾਰਨ ਵਿਅਕਤੀ ਨੂੰ ਜੀਵਨ ਵਿਚ ਆਰਥਿਕ ਤੰਗੀ ਤੇ ਨਕਾਰਾਤਮਕਤਾ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਇਸ ਕਾਰਨ ਉਹ ਚਾਹ ਕੇ ਵੀ ਧਨਵਾਨ ਨਹੀਂ ਬਣ ਸਕਦਾ। ਆਓ ਜਾਣਦੇ ਹਾਂ ਕਿਹੜੀਆਂ ਆਦਤਾਂ ਕਾਰਨ ਕੰਗਾਲੀ ਆਉਣ ਦੀ ਗੱਲ ਕਹੀ ਗਈ ਹੈ।

ਇਨ੍ਹਾਂ ਆਦਤਾਂ ਕਾਰਨ ਆ ਸਕਦੀ ਹੈ ਕੰਗਾਲੀ

ਰਾਤ ਨੂੰ ਜੂਠੇ ਬਰਤਨ ਛੱਡਣਾ

ਗਰੁੜ ਪੁਰਾਣ 'ਚ ਦੱਸਿਆ ਗਿਆ ਹੈ ਕਿ ਰਾਤ ਸਮੇਂ ਰਸੋਈ 'ਚ ਜੂਠੇ ਬਰਤਨ ਨਹੀਂ ਛੱਡਣੇ ਚਾਹੀਦੇ। ਭੋਜਨ ਕਰਨ ਤੋਂ ਬਾਅਦ ਬਰਤਨਾਂ ਨੂੰ ਧੋ ਕੇ ਸਾਫ਼-ਸੁਥਰਾ ਰੱਖਣਾ ਚਾਹੀਦਾ ਹੈ। ਮੰਨਿਆ ਜਾਂਦਾ ਹੈ ਕਿ ਜੋ ਲੋਕ ਰਾਤ ਨੂੰ ਜੂਠੇ ਬਰਤਨ ਛੱਡ ਦਿੰਦੇ ਹਨ, ਉਨ੍ਹਾਂ ਦੇ ਘਰ ਵਿਚ ਦਰਿਦ੍ਰਤਾ ਦਾ ਵਾਸ ਹੋ ਸਕਦਾ ਹੈ ਅਤੇ ਉਨ੍ਹਾਂ ਨੂੰ ਆਰਥਿਕ ਤੰਗੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।

ਸਵੇਰੇ ਦੇਰ ਤਕ ਸੌਣਾ

ਰੋਜ਼ਾਨਾ ਸਵੇਰੇ ਜਲਦੀ ਉੱਠਣਾ ਚਾਹੀਦਾ ਹੈ। ਗਰੁੜ ਪੁਰਾਣ ਅਨੁਸਾਰ, ਜੋ ਲੋਕ ਸਵੇਰੇ ਦੇਰ ਤੱਕ ਸੌਂਦੇ ਰਹਿੰਦੇ ਹਨ, ਉਨ੍ਹਾਂ ਨੂੰ ਜੀਵਨ ਵਿਚ ਤਰੱਕੀ ਕਰਨ ਵਿਚ ਮੁਸ਼ਕਲਾਂ ਆ ਸਕਦੀਆਂ ਹਨ ਅਤੇ ਧਨ ਦੀ ਕਮੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਇਸ ਲਈ ਸੂਰਜ ਚੜ੍ਹਨ ਤੋਂ ਪਹਿਲਾਂ ਉੱਠਣਾ ਸ਼ੁਭ ਮੰਨਿਆ ਗਿਆ ਹੈ।

ਗੰਦੇ ਤੇ ਅਸ਼ੁੱਧ ਕੱਪੜੇ ਪਹਿਨਣਾ

ਗਰੁੜ ਪੁਰਾਣ 'ਚ ਕਿਹਾ ਗਿਆ ਹੈ ਕਿ ਜੋ ਲੋਕ ਗੰਦੇ ਜਾਂ ਬਦਬੂਦਾਰ ਕੱਪੜੇ ਪਹਿਨਦੇ ਹਨ, ਉਨ੍ਹਾਂ 'ਤੇ ਮਾਂ ਲਕਸ਼ਮੀ ਦੀ ਕਿਰਪਾ ਨਹੀਂ ਰਹਿੰਦੀ। ਮਾਨਤਾ ਹੈ ਕਿ ਮਾਂ ਲਕਸ਼ਮੀ ਦਾ ਵਾਸ ਸਾਫ਼-ਸੁਥਰੀ ਥਾਂ 'ਤੇ ਹੁੰਦਾ ਹੈ। ਇਸ ਲਈ ਸਾਫ਼ ਕੱਪੜੇ ਪਹਿਨਣ ਅਤੇ ਸਫ਼ਾਈ ਰੱਖਣ ਦੀ ਸਲਾਹ ਦਿੱਤੀ ਜਾਂਦੀ ਹੈ।

ਦੂਜਿਆਂ ਦੀ ਬੁਰਾਈ ਕਰਨਾ

ਗਰੁੜ ਪੁਰਾਣ ਅਨੁਸਾਰ ਜਿਹੜੇ ਲੋਕ ਸਾਹਮਣੇ ਤਾਂ ਚੰਗਾ ਵਿਵਹਾਰ ਕਰਦੇ ਹਨ ਪਰ ਪਿੱਠ ਪਿੱਛੇ ਦੂਜਿਆਂ ਦੀ ਬੁਰਾਈ ਕਰਦੇ ਹਨ, ਉਨ੍ਹਾਂ ਤੋਂ ਮਾਂ ਲਕਸ਼ਮੀ ਨਾਰਾਜ਼ ਰਹਿੰਦੀ ਹੈ। ਮੰਨਿਆ ਜਾਂਦਾ ਹੈ ਕਿ ਅਜਿਹੇ ਸੁਭਾਅ ਕਾਰਨ ਜੀਵਨ ਵਿਚ ਦਰਿਦ੍ਰਤਾ ਤੇ ਆਰਥਿਕ ਮੁਸ਼ਕਲਾਂ ਆ ਸਕਦੀਆਂ ਹਨ।