ਪਲੇਠੀ ਮੀਟਿੰਗ ’ਚੋਂ ਹੀ ਆਜ਼ਾਦ ਕੌਂਸਲਰ ਹੇਮਰਾਜ ਉੱਠ ਤੁਰੇ

ਯਾਦਵਿੰਦਰ ਸਿੰਘ ਭੁੱਲਰ, ਪੰਜਾਬੀ ਜਾਗਰਣ, ਬਰਨਾਲਾ : ਨਗਰ ਨਿਗਮ ਬਰਨਾਲਾ ਦੀ ਪਲੇਠੀ ਹਾਊਸ ਮੀਟਿੰਗ ’ਚ ਹੀ ਵਾਰਡ-32 ਤੋਂ ਆਜ਼ਾਦ ਜਿੱਤੇ ਕੌਂਸਲਰ ਹੇਮਰਾਜ ਗਰਗ ਨੇ ਆਪਣੇ ਤਿੱਖੇ ਤੇਵਰ ਦਿਖਾ ਦਿੱਤੇ। ਦੱਸ ਦੇਈਏ ਕਿ ਨਗਰ ਨਿਗਮ ਬਰਨਾਲਾ ਦੀ ਵੀਰਵਾਰ ਨੂੰ ਪਹਿਲੀ ਮੀਟਿੰਗ ਮੇਅਰ ਹਸਨਪ੍ਰੀਤ ਭਾਰਤਵਾਜ ਦੀ ਪ੍ਰਧਾਨਗੀ ਹੇਠ ਹੋ ਰਹੀ ਸੀ। ਜਿਸ ’ਚ ਸ਼ਹਿਰ ਦੇ 50 ਵਾਰਡਾਂ ਦੇ ਕੌਂਸਲਰ ਸ਼ਾਮਿਲ ਹੋ ਰਹੇ ਸਨ, ਪਰ ਮੀਟਿੰਗ ਸ਼ੁਰੂ ਹੋਣ ਤੋਂ ਕੁਝ ਮਿੰਟ ਬਾਅਦ ਹੀ ਸਥਿੱਤੀ ਉਸ ਵੇਲੇ ਅਜੀਬ ਜਿਹੀ ਬਣ ਗਈ ਜਦੋਂ ਵਾਰਡ ਨੰਬਰ 32 ਤੋਂ ਆਜ਼ਾਦ ਕੌਂਸਲਰ ਹੇਮਰਾਜ ਗਰਗ ਮੀਟਿੰਗ ਸ਼ੁਰੂ ਹੁੰਦੇ ਸਾਰ ਹੀ ਉੱਠ ਕੇ ਬਾਹਰ ਆ ਗਏ। ਮੀਟਿੰਗ ਤੋਂ ਬਾਹਰ ਆ ਕੇ ਪੰਜਾਬੀ ਜਾਗਰਣ ਨਾਲ ਗੱਲਬਾਤ ਕਰਦੇ ਹੋਏ ਕੌਂਸਲਰ ਹੇਮਰਾਜ ਗਰਗ ਨੇ ਨਿਰਾਜਗੀ ਦਾ ਕਾਰਨ ਦੱਸਦੇ ਇਹ ਕਿਹਾ ਕਿ ਇਸ ਹਾਊਸ ਦੀ ਇਸ ਮੀਟਿੰਗ ’ਚ ਉਨ੍ਹਾਂ ਦੇ ਵਾਰਡ ਨਾਲ ਸੰਬੰਧਿਤ ਕੋਈ ਵੀ ਵਿਕਾਸ ਕਾਰਜ ਦਾ ਏਜੰਡਾ ਨਹੀਂ ਰੱਖਿਆ ਗਿਆ। ਜਿਸ ਕਰਕੇ ਉਨ੍ਹਾਂ ਨੇ ਇਸ ਮੀਟਿੰਗ ’ਚੋਂ ਉੱਠਣਾ ਹੀ ਮੁਨਾਸਿਫ਼ ਸਮਝਿਆ। ਕੌਸਲਰ ਹੇਮਰਾਜ ਗਰਗ ਨੇ ਕਿਹਾ ਕਿ ਉਨ੍ਹਾਂ ਦੇ ਵਾਰਡ ਦੇ ਅਨੇਕਾਂ ਅਜਿਹੇ ਕੰਮ ਹਨ ਜਿਹੜੇ ਪਹਿਲ ਦੇ ਅਧਾਰ ਤੇ ਹੋਣੇ ਬਣਦੇ ਹਨ। ਜਿਸ ਸਬੰਧੀ ਮੇਅਰ ਤੇ ਸੱਤਾਧਿਰ ਬਾਖੂਬੀ ਜਾਣੂ ਹੈ। ਉਸ ਨੇ ਕਿਹਾ ਕਿ ਉਨ੍ਹਾਂ ਨੂੰ ਜਾਣ ਬੁੱਝ ਕੇ ਆਜ਼ਾਦ ਕੌਂਸਲਰ ਹੋਣ ਦੇ ਨਾਤੇ ਅੱਖੋਂ ਪਰੋਖੇ ਕੀਤਾ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਨਗਰ ਕੌਂਸਲ ਤੋਂ ਨਗਰ ਨਿਗਮ ਬਣਨ ਤੋਂ ਬਾਅਦ ਨਗਰ ਨਿਗਮ ਦੀ ਇਹ ਪਹਿਲੀ ਮੀਟਿੰਗ ਹੋਈ ਸੀ। ਪਹਿਲੀ ਹੀ ਮੀਟਿੰਗ ’ਚ ਕਿਸੇ ਆਜ਼ਾਦ ਕੌਂਸਲਰ ਵੱਲੋਂ ਮੀਟਿੰਗ ਦਾ ਬਾਈਕਾਟ ਕੀਤੇ ਜਾਣ ਦੀ ਮਿਸਾਲ ਵੀ ਨਗਰ ਨਿਗਮ ਦੇ ਇਤਿਹਾਸ ਨਾਲ ਜੁੜ ਗਈ ਹੈ। ਗੌਰ ਹੋਵੇ ਕਿ ਕੌਂਸਲਰ ਹੇਮਰਾਜ ਗਰਗ ਲੰਮੇਂ ਸਮੇਂ ਤੋਂ ਬਤੌਰ ਕੌਂਸਲਰ ਨਗਰ ਕੌਂਸਲ ਤੇ ਹੁਣ ਨਗਰ ਨਿਗਮ ’ਚ ਇਸ ਵਾਰੀ ਵੀ 32 ਨੰਬਰ ਵਾਰਡ ਤੋਂ ਅਜਾਦ ਕੌਂਸਲਰ ਵਜੋਂ ਹਾਊਸ ’ਚ ਹਾਜ਼ਰ ਹੋਏ ਹਨ। ਪਰ ਸਿਆਸਤ ’ਚ ਉਨ੍ਹਾਂ ਦਾ ਵੀ ਇੱਕ ਮੁਕਾਮ ਹੈ, ਉਨ੍ਹਾਂ ਦਾ ਇਸ ਤਰ੍ਹਾਂ ਮੀਟਿੰਗ ਸ਼ੁਰੂ ਹੁੰਦਿਆਂ ਹੀ ਉੱਠ ਕੇ ਜਾਣਾ ਸਿਆਸੀ ਚੂੰਝ ਚਰਚਾ ਦੀ ਸਿਖ਼ਰ ਬਣ ਗਿਆ ਹੈ।