ਭੱਠੇ ਦੀ ਮਾਲਕੀ ਨੂੰ ਲੈ ਕੇ ਚਚੇਰੇ ਭਰਾਵਾਂ ’ਚ ਲੜਾਈ-ਝਗੜਾ

ਨਰਿੰਦਰ ਸੈਣੀ, ਪੰਜਾਬੀ ਜਾਗਰਣ, ਸ੍ਰੀ ਕੀਰਤਪੁਰ ਸਾਹਿਬ : ਭਰਤਗੜ੍ਹ ਦੇ ਨਜ਼ਦੀਕ ਗਣਪਤੀ ਭੱਠੇ ’ਤੇ ਮਾਲਕੀ ਨੂੰ ਲੈ ਕੇ ਪਰਿਵਾਰਿਕ ਲੜਾਈ ਸਾਹਮਣੇ ਆਈ ਹੈ ਜਿਸ ਵਿੱਚ ਭੱਠੇ ਪਿਛਲੇ ਲੰਮੇ ਸਮੇਂ ਤੋਂ ਭੱਠੇ ਨੂੰ ਚਲਾਉਣ ਵਾਲੇ ਹੈਪੀ ਬਾਂਸਲ ਨੇ ਆਪਣੇ ਚਚੇਰੇ ਭਰਾਵਾਂ ’ਤੇ ਕੁੱਟ ਮਾਰ ਦੇ ਦੋਸ਼ ਲਗਾਏ ਹਨ। ਜ਼ਖਮੀ ਹੈਪੀ ਬਾਂਸਲ ਨੂੰ ਭਰਤਗੜ ਦੇ ਸਰਕਾਰੀ ਹਸਪਤਾਲ ਵਿੱਚ ਇਲਾਜ ਲਈ ਦਾਖਲ ਕਰਵਾਇਆ ਗਿਆ ਹੈ। ਜਾਣਕਾਰੀ ਦਿੰਦੇ ਹੋਏ ਹੈਪੀ ਬਾਂਸਲ ਨੇ ਦੱਸਿਆ ਕੀ ਇਹ ਭੱਠਾ ਪਰਿਵਾਰਿਕ ਵੰਡ ਵਿੱਚ ਉਨ੍ਹਾਂ ਦੇ ਹਿੱਸੇ ਆਇਆ ਹੈ, ਜਿੱਥੇ ਉਹ ਪਿਛਲੇ ਲੰਬੇ ਸਮੇਂ ਤੋਂ ਕੰਮ ਕਰ ਰਹੇ ਹਨ ਅਤੇ ਅਚਾਨਕ ਅੱਜ ਉਨ੍ਹਾਂ ਦੇ ਚਾਚੇ ਦੇ ਲੜਕੇ ਤੇ ਉਨ੍ਹਾਂ ਦੇ ਭਤੀਜੇ ਨੇ ਅਚਾਨਕ ਉਨ੍ਹਾਂ ’ਤੇ ਹਮਲਾ ਕਰ ਦਿੱਤਾ, ਜਿਸ ਵਿੱਚ ਉਹ ਜ਼ਖ਼ਮੀ ਹੋ ਗਏ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਪਰਿਵਾਰਿਕ ਵੰਡ ਵਿੱਚ ਇਨ੍ਹਾਂ ਨੂੰ ਸੁਨਾਮ ਵਾਲਾ ਭੱਠਾ ਦਿੱਤਾ ਗਿਆ ਸੀ ਤੇ ਇਹ ਸਾਡੇ ਹਿੱਸੇ ਆਇਆ ਸੀ ਜਿਸ ਦੀ ਕੋਈ ਲਿਖਤ ਨਹੀਂ ਹੈ ਪਰ ਅੱਜ ਜਮੀਨਾਂ ਦੇ ਰੇਟ ਵਧਣ ਕਰ ਕੇ ਸਾਨੂੰ ਤੰਗ ਪਰੇਸ਼ਾਨ ਕੀਤਾ ਜਾ ਰਿਹਾ ਹੈ। ਅਤੇ ਅਚਾਨਕ ਅੱਜ ਅਸ਼ੋਕ ਕੁਮਾਰ ਪੁੱਤਰ ਸੁਰਿੰਦਰ ਕੁਮਾਰ, ਜੈਕਸ ਬਾਂਸਲ ਪੁੱਤਰ ਮਨਪ੍ਰੀਤ ਬਾਂਸਲ ਤੇ ਪ੍ਰਵੀਨ ਕੁਮਾਰ ਨੇ ਭੱਠੇ ’ਤੇ ਬੈਠੇ ਹੋਏ ਹੈਪੀ ਬਾਂਸਲ ’ਤੇ ਹਮਲਾ ਕਰ ਦਿੱਤਾ ਜਿਸ ਵਿੱਚ ਉਹ ਜਖਮੀ ਹੋ ਗਿਆ। ਮੌਕੇ ’ਤੇ ਹੈਪੀ ਬੰਸਲ ਦਾ ਭਰਾ ਵੀ ਮੌਜੂਦ ਸੀ, ਪਰ ਉਹ ਪੁਲਿਸ ਚੌਂਕੀ ਮਦਦ ਲਈ ਗਿਆ ਸੀ। ਉਧਰ ਦੂਜੇ ਪਾਸੇ ਅਸ਼ੋਕ ਕੁਮਾਰ ਤੇ ਉਨ੍ਹਾਂ ਦੇ ਸਾਥੀਆਂ ਦਾ ਕਹਿਣਾ ਹੈ ਕਿ ਇਸ ਭੱਠੇ ਵਿੱਚ ਉਨ੍ਹਾਂ ਦਾ ਵੀ ਹਿੱਸਾ ਹੈ। ਇਹ ਇਕ ਪਰਿਵਾਰਕ ਮਸਲਾ ਹੈ। ਜਮੀਨੀ ਵੰਡ ਸਬੰਧੀ ਕੋਈ ਲਿਖਤ ਨਹੀਂ ਹੈ ਤੇ ਉਹ ਪਹਿਲਾਂ ਵੀ ਹਰ ਮਹੀਨੇ ਹਿਸਾਬ ਲੈਂਦੇ ਸਨ ਪਰ ਅੱਜ ਗਿਣੀ-ਮਿੱਥੀ ਸਾਜਿਸ਼ ਤਹਿਤ ਉਨ੍ਹਾਂ ’ਤੇ ਇਲਜ਼ਾਮ ਲਗਾਏ ਜਾ ਰਹੇ ਹਨ। ਇਸ ਸਬੰਧੀ ਜਦੋਂ ਪੁਲਿਸ ਚੌਕੀ ਭਰਤਗੜ੍ਹ ਦੇ ਇੰਚਾਰਜ ਅੰਗਰੇਜ ਸਿੰਘ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਕਿਹਾ ਕਿ ਇਹ ਪਰਿਵਾਰਿਕ ਲੜਾਈ ਸਬੰਧੀ ਫੋਨ ਆਇਆ ਸੀ ਅਤੇ ਦੋਵੇਂ ਧਿਰਾਂ ਨੂੰ ਚੌਂਕੀ ਭਰਤਗੜ੍ਹ ਬੁਲਾਇਆ ਗਿਆ ਸੀ ਪਰ ਅਜੇ ਤੱਕ ਕਿਸੇ ਵੀ ਧਿਰ ਦੀ ਲਿਖਤੀ ਸ਼ਿਕਾਇਤ ਨਹੀਂ ਮਿਲੀ ਤੇ ਨਾ ਹੀ ਡਾਕਟਰੀ ਰੁੱਕਾ ਪ੍ਰਾਪਤ ਹੋਇਆ ਹੈ। ਲਿਖਤੀ ਸ਼ਿਕਾਇਤ ਤੋਂ ਬਾਅਦ ਬਣਦੀ ਕਾਨੂੰਨਨ ਕਾਰਵਾਈ ਕੀਤੀ ਜਾਵੇਗੀ।