ਕਿਸਾਨਾਂ ’ਤੇ ਦੂਹਰੀ ਮਾਰ- ਝੋਨੇ ਦਾ ਝਾੜ ਘੱਟ- ਕਟਾਈ ਦੇ ਦੇਣੇ ਪੈ ਰਹੇ ਨੇ ਵੱਧ ਪੈਸੇ

ਪਰਗਟ ਸਿੰਘ, •ਪੰਜਾਬੀ ਜਾਗਰਣ, •ਪਟਿਆਲਾ : ਸਾਉਣੀ ਦੇ ਸੀਜ਼ਨ ਦੀ ਸ਼ੁਰੂਆਤ ਮੌਕੇ ਹੀ ਪਈ ਬੇਮੌਸਮੀ ਭਰਵੀਂ ਬਰਸਾਤ ਨੇ ਕਿਸਾਨਾਂ ਨੂੰ ਵਾਹਣੀ ਪਾਇਆ ਹੋਇਆ ਹੈ। ਕਿਸਾਨ ਜਿੱਥੇ ਖੇਤਾਂ ’ਚ ਖੜ੍ਹਾ ਝੋਨਾ ਸਪੈਸ਼ਲ ਕੰਬਾਇਨ (ਚਾਈਨ ਵਾਲੀ ਕੰਬਾਇਨ) ਨਾਲ ਮਹਿੰਗੇ ਭਾਅ ’ਚ ਕਟਵਾਉਣ ਕਾਰਨ ਪਰੇਸ਼ਾਨ ਹਨ ਉਥੇ ਹੀ ਮੰਡੀਆਂ ’ਚ ਪਿਆ ਝੋਨਾ ਵੀ ਧੁੱਪ ਨਿਕਲਣ ਤੋਂ ਬਾਅਦ ਸੁਕਾ ਸੁਕਾ ਕੇ ਵੇਚਣ ਲਈ ਮਜਬੂਰ ਹਨ। ਭਰਵੀ ਬਰਸਾਤ ਕਾਰਨ ਝੋਨੇ ਦੇ ਖੇਤਾਂ ’ਚ ਪਾਣੀ ਭਰ ਜਾਣ ਕਾਰਨ ਹੁਣ ਕਈ ਦਿਨ ਕੰਬਾਇਨ ਚੱਲਣ ’ਚ ਦਿੱਕਤ ਆਉਣ ਕਾਰਨ ਚਾਈਨ ਵਾਲੀ ਕੰਬਾਇਨ ਨਾਲ ਝੋਨੇ ਦੀ ਕਟਾਈ ਕੀਤੀ ਜਾ ਰਹੀ ਹੈ, ਜਿਸ ਦਾ ਰੇਟ ਪ੍ਰਤੀ ਏਕੜ ਲਗਪਗ 5500 ਤੋਂ 6000 ਤੱਕ ਪੈ ਰਿਹਾ ਹੈ ਤੇ ਪਾਣੀ ’ਚੋਂ ਟਰਾਲੀਆਂ ਆਦਿ ਬਾਹਰ ਕੱਢਣ ’ਚ ਭਾਰੀ ਪਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਦੂਜੇ ਪਾਸੇ ਬਰਸਾਤ ਤੋਂ ਪਹਿਲਾਂ ਮੰਡੀਆਂ ’ਚ ਪਏ ਝੋਨੇ ’ਚ ਪਿਛਲੇ ਦਿਨੀਂ ਪਈ ਬਰਸਾਤ ਨਾਲ ਨਮੀਂ ਵਧਣ ਕਾਰਨ ਫ਼ਸਲ ਵੇਚਣ ’ਚ ਆਉਦਾ ਅੜਿਕਾ ਸਿਰਦਰਦੀ ਬਣਿਆ ਹੋਇਆ ਹੈ ਤੇ ਕਿਸਾਨ ਝੋਨਾ ਮੰਡੀਆਂ ’ਚ ਧੁੱਪ ’ਚ ਸੁਕਾ ਕੇ ਵੇਚਣ ਲਈ ਮਜਬੂਰ ਹਨ। ਕਿਸਾਨ ਗੁਰਮਿੰਦਰ ਸਿੰਘ ਪੂਨੀਆ, ਜਸਵੀਰ ਸਿੰਘ, ਨੈਬ ਸਿੰਘ ਆਦਿ ਨੇ ਗੱਲਬਾਤ ਕਰਦਿਆਂ ਦੱਸਿਆ ਕਿ ਝੋਨਾ ਹੁਣ ਪੱਕ ਕੇ ਕੱਟਣ ਲਈ ਤਿਆਰ ਸੀ ਪਰ ਪਹਿਲਾਂ 11 ਅਕਤੂਬਰ ਤੇ ਫਿਰ 14 ਅਕਤੂਬਰ ਨੂੰ ਪਏ ਭਰਵੇਂ ਮੀਂਹ ਨਾਲ ਖੇਤਾਂ ’ਚ ਪਾਣੀ ਭਰ ਗਿਆ ਤੇ ਕਟਾਈ ਕਰਨ ਲਈ ਹੁਣ ਕਈ ਦਿਨ ਇੰਤਜ਼ਾਰ ਕਰਨਾ ਪੈ ਰਿਹਾ ਹੈ ਜਦੋਂ ਕਿ ਫਸਲ ਪੱਕ ਕੇ ਧਰਤੀ ਨਾਲ ਵਿਛਣ ਲੱਗ ਪਈ ਹੈ, ਜਿਸਦੇ ਚਲਦਿਆਂ ਪਾਣੀ ’ਚ ਚੱਲਣ ਵਾਲੀ ਚਾਈਨ ਵਾਲੀ ਸਪੈਸ਼ਲ ਕੰਬਾਇਨ ਨਾਲ ਝੋਨੇ ਦੀ ਕਟਾਈ ਕਰਵਾਉਣੀ ਪੈ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਸਪੈਸ਼ਲ ਕੰਬਾਇਨ ਵਾਲੇ ਨੂੰ 5500 ਤੋਂ 6 ਹਜ਼ਾਰ ਰੁਪਏ ਤੱਕ ਪ੍ਰਤੀ ਏਕੜ ਰੇਟ ਦੇਣਾ ਪੈ ਰਿਹਾ ਹੈ ਜਦੋਂਕਿ ਆਮ ਕੰਬਾਇਨਾਂ ਨਾਲ ਪਹਿਲਾਂ ਕਟਾਈ 1500 ਤੋਂ 1700 ਰੁਪਏ ਪ੍ਰਤੀ ਏਕੜ ਤੱਕ ਹੁੰਦੀ ਸੀ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਜਿੱਥੇ ਮਜਬੂਰੀ ਵਸ ਵੱਧ ਪੈਸੇ ਦੇਣੇ ਪੈ ਰਹੇ ਹਨ ਉਥੇ ਹੀ ਖੇਤਾਂ ’ਚ ਖੱਡੇ ਬਣਨ ਕਾਰਨ ਅਗਲੀ ਫਸਲ ਦੀ ਤਿਆਰੀ ਲਈ ਵੀ ਵੱਧ ਡੀਜ਼ਲ ਖਰਚ ਕਰਨਾ ਪਵੇਗਾ ਤੇ ਦੂਹਰੀ ਮਾਰ ਪਵੇਗੀ। - ਮੰਡੀਆਂ ’ਚ ਸੁਕਾ ਕੇ ਝੋਨਾ ਵੇਚਣ ਲਈ ਮਜਬੂਰ ਕਿਸਾਨ ਬੇਮੌਸ਼ਮੀ ਬਰਸਾਤ ਕਾਰਨ ਮੰਡੀਆਂ ’ਚ ਪਈ ਝੋਨੇ ਦੀ ਫਸਲ ’ਚ ਨਮੀ ਵਧਣ ਕਾਰਨ ਕਿਸਾਨ ਡਾਹਢੇ ਪਰੇਸ਼ਾਨ ਹਨ ਕਿਉਂਕਿ ਉਨ੍ਹਾਂ ਨੂੰ ਝੋਨਾ ਲੈ ਕੇ ਮੰਡੀਆਂ ’ਚ ਬੈਠਿਆਂ ਨੂੰ ਕਈ ਕਈ ਦਿਨ ਹੋ ਗਏ ਹਨ। ਵੱਧ ਨਮੀ ਹੋਣ ਕਾਰਨ ਝੋਨਾ ਨਾ ਵਿਕਣ ’ਤੇ ਉਹ ਆਪਣਾ ਝੋਨਾ ਬਰਸਾਤ ਤੋਂ ਬਾਅਦ ਖੁੱਲ੍ਹੀ ਮੰਡੀ ’ਚ ਖਿਲਾਰ ਕੇ ਸੁਕਾਉਣਾ ਪੈ ਰਿਹਾ ਹੈ ਤਾਂ ਕਿ ਨਮੀ ਘਟਣ ’ਤੇ ਵੇਚਿਆ ਜਾ ਸਕੇ। ਕਿਸਾਨ ਗੁਰਮੀਤ ਸਿੰਘ ਦਾ ਕਹਿਣਾ ਸੀ ਕਿ ਉਸਨੇ 13 ਅਕਤੂਬਰ ਨੂੰ ਫਸਲ ਕੱਟੀ ਸੀ ਪਰ 14 ਅਕਤੂਬਰ ਨੂੰ ਅਚਾਨਕ ਬਰਸਾਤ ਪੈਣ ਕਾਰਨ ਝੋਨੇ ’ਚ ਨਮੀਂ ਦੀ ਮਾਤਰਾ ਵੱਧ ਗਈ , ਜਿਸ ਕਾਰਨ ਦੋ ਦਿਨਾਂ ਤੋਂ ਝੋਨਾ ਸੁਕਾਉਣਾ ਪੈ ਰਿਹਾ ਹੈ।ਇਸ ਨਾਲ ਸੁਕਾਈ ਦੀ ਲੇਵਰ ਦੇ ਵੱਖਰੇ ਪੈਸੇ ਦੇਣੇ ਪੈ ਰਹੇ ਹਨ। ਕਿਸ਼ਾਨਾਂ ਦਾ ਕਹਿਣਾ ਹੈ ਕਿ ਝੋਨੇ ਦੀ ਖਰੀਦ ਲਈ ਨਮੀ ਦੀ ਮਾਤਰਾ 17 ਫਸਦੀ ਤੋਂ ਵਧੇ ਕੇ 20 ਫੀਸਦ ਕੀਤੀ ਜਾਵੇ। - ਅਗੇਤੀਆਂ ਫਸਲਾਂ ਦੇ ਘੱਟ ਝਾੜ ਨੇ ਝੰਬੇ ਕਿਸਾਨ ਸਾਉਣੀ ਦੇ ਸੀਜਨ ਦੌਰਾਨ ਪਹਿਲਾਂ ਸੋਕੇ ਤੇ ਹੁਣ ਡੋਬੇ ਨੇ ਜਿੱਥੇ ਕਿਸਾਨਾਂ ਨੂੰ ਪਰੇਸ਼ਾਨ ਕੀਤਾ ਹੋਇਆ ਹੈ ਉਥੇ ਹੀ ਝੋਨੇ ਦੀਆ ਅਗੇਤੀਆਂ ਪੱਕੀਆਂ ਫਸਲਾਂ ਦਾ ਝਾੜ ਵੀ ਪਿਛਲੇ ਸਾਲਾਂ ਦੇ ਮੁਕਾਬਲੇ ਘੱਟ ਨਿਕਲਣ ਕਾਰਨ ਕਿਸਾਨਾਂ ਨੂੰ ਵੱਡਾ ਆਰਥਿਕ ਨੁਕਸ਼ਾਨ ਹੋਇਆ ਹੈ। ਕਿਸਾਨ ਮਨਜੀਤ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੇ 12 ਏਕੜ ਪੀਆਰ-126 ਕਿਸ਼ਮ ਲਗਾਈ ਸੀ, ਜਿਸਦਾ ਝਾੜ ਪਿਛਲੇ ਸਾਲ ਦੇ ਮੁਕਾਬਲੇ ਲਗਪਗ 5 ਕੁਵੰਟਲ ਘੱਟ ਨਿਕਲਿਆ ਹੈ। ਅਜਿਹਾ ਹੀ ਹਾਲ ਕਈ ਹੋਰਨਾਂ ਕਿਸਾਨਾਂ ਦਾ ਵੀ ਹੈ, ਜਿਨ੍ਹਾਂ ਦਾ ਝਾੜ ਕਾਫੀ ਘਟਿਆ ਹੈ। ਕਿਸਾਨਾਂ ਨੂੰ ਆਸ਼ ਸੀ ਕਿ ਹੁਣ ਪੱਕਣ ਵਾਲੀਆਂ ਕਿਸਮਾਂ ਦਾ ਝਾੜ ਵਧੀਆਂ ਨਿਕਲੇਗਾ ਪ੍ਰੰਤੂ ਬੇਮੌਸ਼ਮੀ ਬਰਸਾਤ ਨਾਲ ਰੂਕੀ ਝੋਨੇ ਦੀ ਕਟਾਈ ਨਾਲ ਵੀ ਝਾੜ ’ਤੇ ਕਾਫੀ ਅਸਰ ਪਵੇਗਾ ਕਿਉਂਕਿ ਫਸਲ ਕੱਟਣ ’ਚ ਦੇਰੀ ਹੋਣ ਕਾਰਨ ਝੋਨਾ ਜਿਆਦਾ ਪੱਕਣ ਦੇ ਆਸਾਰ ਹਨ।