ਪੁਲਿਸ ਨੱਕ ਹੇਠ ਵੱਡੀ ਵਾਰਦਾਤ: ਕਿਰਾਏਦਾਰ ਬਣ ਕੇ ਆਏ ਸ਼ਾਤਰ ਲੁਟੇਰਿਆਂ ਨੇ ਘਰ 'ਚ ਇਕੱਲੀ ਬਜ਼ੁਰਗ ਔਰਤ ਨੂੰ ਲੁੱਟਿਆ

ਔਰਤ ਚੰਪਾ ਖੰਨਾ ਅਨੁਸਾਰ ਉਨ੍ਹਾਂ ਦੀ ਕੋਤਵਾਲੀ ਥਾਣੇ ਨੇੜੇ ਦੁਕਾਨ ਸੀ। ਕੁਝ ਸਮਾਂ ਪਹਿਲਾਂ ਪਤੀ ਦੀ ਮੌਤ ਹੋਣ ਕਾਰਨ ਉਹ ਘਰ ’ਚ ਇਕੱਲੀ ਰਹਿੰਦੀ ਸੀ। ਬੇਟਾ ਦਿੱਲੀ ਰਹਿੰਦਾ ਹੈ, ਜਦਕਿ ਮਕਾਨ ਦੇ ਉੱਪਰਲੇ ਹਿੱਸੇ ’ਚ ਇਕ ਬੰਗਾਲੀ ਕਾਰੀਗਰ ਰਹਿੰਦਾ ਹੈ ਜੋ ਘਟਨਾ ਵਾਲੇ ਦਿਨ ਆਪਣੇ ਕੰਮ ’ਤੇ ਗਿਆ ਹੋਇਆ ਸੀ। ਬੇਟੇ ਦੇ ਕਹਿਣ ’ਤੇ ਉਨ੍ਹਾਂ ਮਕਾਨ ਦੇ ਹੋਰ ਕਮਰੇ ਕਿਰਾਏ ’ਤੇ ਦੇਣ ਦਾ ਮਨ ਬਣਾਇਆ ਸੀ। 17 ਅਗਸਤ ਦੀ ਸ਼ਾਮ ਜਦੋਂ ਉਹ ਘਰ ’ਚ ਇਕੱਲੀ ਸੀ, ਤਾਂ ਦੋ ਵਿਅਕਤੀ ਆਏ। ਲਗਭਗ 35 ਤੋਂ 40 ਸਾਲ ਦੀ ਉਮਰ ਦੇ ਇਨ੍ਹਾਂ ਦੋਵਾਂ ਨੇ ਕਮਰਾ ਕਿਰਾਏ ’ਤੇ ਲੈਣ ਦੀ ਗੱਲ ਕਰਦਿਆਂ ਉਨ੍ਹਾਂ ਨੂੰ ਬੰਧਕ ਬਣਾ ਲਿਆ। ਉਨ੍ਹਾਂ ਦੇ ਹੱਥ-ਪੈਰ ਅਤੇ ਮੂੰਹ ਬੰਨ੍ਹਣ ਤੋਂ ਬਾਅਦ ਕੰਨਾਂ ਦੀਆਂ ਵਾਲੀਆਂ, ਹੱਥਾਂ ਦੀਆਂ ਮੁੰਦਰੀਆਂ ਅਤੇ ਹੋਰ ਗਹਿਣੇ ਲੁੱਟ ਕੇ ਫ਼ਰਾਰ ਹੋ ਗਏ। ਘਰੋਂ ਫ਼ਰਾਰ ਹੁੰਦਿਆਂ ਦੀ ਸੀਸੀਟੀਵੀ ਫੁਟੇਜ ਪੁਲਿਸ ਦੇ ਹੱਥ ਲੱਗ ਗਈ ਹੈ। ਔਰਤ ਨੇ ਕਿਸੇ ਤਰ੍ਹਾਂ ਆਪਣੇ ਹੱਥ-ਪੈਰ ਖੋਲ੍ਹ ਕੇ ਇਕ ਜਾਣਕਾਰ ਨੂੰ ਮਦਦ ਲਈ ਬੁਲਾਇਆ, ਪਰ ਸ਼ੁਰੂਆਤ ’ਚ ਪੁਲਿਸ ਨੂੰ ਸ਼ਿਕਾਇਤ ਨਹੀਂ ਦਿੱਤੀ ਸੀ। ਜਾਣਕਾਰ ਵੱਲੋਂ ਘਟਨਾ ਦੀ ਸੀਸੀਟੀਵੀ ਫੁਟੇਜ ਇੰਟਰਨੈੱਟ ’ਤੇ ਵਾਇਰਲ ਕੀਤੇ ਜਾਣ ਤੋਂ ਬਾਅਦ ਮਾਮਲਾ ਪੁਲਿਸ ਥਾਣੇ ਤੱਕ ਪਹੁੰਚਿਆ।