- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਪਾਵਰਕੌਮ ਦਾ ਸਮਾਰਟ ਸਿਸਟਮ ਸਰਕਾਰੀ ਮਹਿਕਮਿਆਂ ਨੂੰ ਪਿਆ ਔਖਾ: ਸਕੂਲਾਂ ਤੇ ਸੇਵਾ ਕੇਂਦਰਾਂ ਦੀ ਬੱਤੀ ਗੁੱਲ
ਪਾਵਰਕੌਮ ਦਾ ਨਵਾਂ ਪ੍ਰੀ-ਪੇਡ (ਰੀਚਾਰਜ) ਸਿਸਟਮ ਸਰਕਾਰੀ ਮਹਿਕਮਿਆਂ ਲਈ ਪਰੇਸ਼ਾਨੀ ਦਾ ਸਬੱਬ ਬਣ ਰਿਹਾ ਹੈ। ਸਮੇਂ ਸਿਰ ਰੀਚਾਰਜ ਨਾ ਹੋਣ ਕਾਰਨ ਪਿਛਲੇ ਦਿਨਾਂ ਵਿੱਚ ਕਈ ਸਰਕਾਰੀ ਸਕੂਲਾਂ ਅਤੇ ਸੇਵਾ ਕੇਂਦਰਾਂ ਦੀ ਬੱਤੀ ਗੁੱਲ ਹੋ ਚੁੱਕੀ ਹੈ। ਅਸਲ ’ਚ ਸਮਾਰਟ ਮੀਟਰਿੰਗ ਸਿਸਟਮ ਲਾਗੂ ਹੋਣ ਨਾਲ ਹੁਣ ਲਾਈਨਮੈਨ ਜਾਂ ਫੀਲਡ ਸਟਾਫ਼ ਨੂੰ ਘਰ-ਘਰ ਜਾਂ ਦਫ਼ਤਰਾਂ ਵਿੱਚ ਜਾ ਕੇ ਕੁਨੈਕਸ਼ਨ ਕੱਟਣ ਦੀ ਲੋੜ ਨਹੀਂ ਪੈਂਦੀ।
Posted By Anuradha Bains
Publish Date: Tue, 28 Jul 2026 08:28 AM (IST)
Updated Date: Tue, 28 Jul 2026 08:31 AM (IST)
ਨਵਦੀਪ ਢੀਂਗਰਾ, ਪੰਜਾਬੀ ਜਾਗਰਣ, ਪਟਿਆਲਾ। ਪਾਵਰਕੌਮ ਦਾ ਨਵਾਂ ਪ੍ਰੀ-ਪੇਡ (ਰੀਚਾਰਜ) ਸਿਸਟਮ ਸਰਕਾਰੀ ਮਹਿਕਮਿਆਂ ਲਈ ਪਰੇਸ਼ਾਨੀ ਦਾ ਸਬੱਬ ਬਣ ਰਿਹਾ ਹੈ। ਸਮੇਂ ਸਿਰ ਰੀਚਾਰਜ ਨਾ ਹੋਣ ਕਾਰਨ ਪਿਛਲੇ ਦਿਨਾਂ ਵਿੱਚ ਕਈ ਸਰਕਾਰੀ ਸਕੂਲਾਂ ਅਤੇ ਸੇਵਾ ਕੇਂਦਰਾਂ ਦੀ ਬੱਤੀ ਗੁੱਲ ਹੋ ਚੁੱਕੀ ਹੈ। ਅਸਲ ’ਚ ਸਮਾਰਟ ਮੀਟਰਿੰਗ ਸਿਸਟਮ ਲਾਗੂ ਹੋਣ ਨਾਲ ਹੁਣ ਲਾਈਨਮੈਨ ਜਾਂ ਫੀਲਡ ਸਟਾਫ਼ ਨੂੰ ਘਰ-ਘਰ ਜਾਂ ਦਫ਼ਤਰਾਂ ਵਿੱਚ ਜਾ ਕੇ ਕੁਨੈਕਸ਼ਨ ਕੱਟਣ ਦੀ ਲੋੜ ਨਹੀਂ ਪੈਂਦੀ।
ਜਿਵੇਂ ਹੀ ਬਿੱਲ ਭਰਨ ਦੀ ਆਖਰੀ ਮਿਤੀ ਲੰਘਦੀ ਹੈ ਜਾਂ ਮੀਟਰ ਵਿੱਚ ਤੈਅ ਕੀਤਾ ਰੀਚਾਰਜ ਬੈਲੇਂਸ ਖ਼ਤਮ ਹੁੰਦਾ ਹੈ, ਸਿਸਟਮ ਆਪਣੇ-ਆਪ ਬਿਜਲੀ ਦੀ ਸਪਲਾਈ ਬੰਦ ਕਰ ਦਿੰਦਾ ਹੈ। ਬਿੱਲ ਦਾ ਭੁਗਤਾਨ ਹੁੰਦੇ ਹੀ ਸਪਲਾਈ ਆਪਣੇ-ਆਪ ਬਹਾਲ ਵੀ ਹੋ ਜਾਂਦੀ ਹੈ। ਵਿਭਾਗ ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ, ਐੱਮ.ਈ. ਲੈਬਾਂ ਤੋਂ ਜਾਰੀ ਕੀਤੇ ਗਏ ਸਮਾਰਟ ਮੀਟਰਾਂ ਵਿੱਚੋਂ ਵੱਡੀ ਗਿਣਤੀ ਮੀਟਰ ਖਪਤਕਾਰਾਂ ਦੇ ਘਰਾਂ ਅਤੇ ਸਰਕਾਰੀ ਥਾਵਾਂ 'ਤੇ ਲਗਾਏ ਜਾ ਚੁੱਕੇ ਹਨ।
ਜਾਣਕਾਰੀ ਅਨੁਸਾਰ ਸਰਕਾਰੀ ਮਹਿਕਮਿਆਂ ਵੱਲ ਪਾਵਰਕੌਮ ਦੇ ਬਿਜਲੀ ਬਿੱਲਾਂ ਦੀ 2 ਹਜ਼ਾਰ ਕਰੋੜ ਰੁਪਏ ਤੋਂ ਵੀ ਵੱਧ ਦੀ ਰਾਸ਼ੀ ਬਕਾਇਆ ਹੈ। ਇਸ ਬਕਾਏ ਨੂੰ ਹੋਰ ਵਧਣ ਤੋਂ ਰੋਕਣ ਲਈ ਪਾਵਰਕੌਮ ਨੇ ਪਹਿਲੇ ਪੜਾਅ ਵਿੱਚ ਸਰਕਾਰੀ ਵਿਭਾਗਾਂ ਦੇ ਸਮਾਰਟ ਮੀਟਰਾਂ ਨੂੰ ਪ੍ਰੀ-ਪੇਡ ਸਿਸਟਮ ਨਾਲ ਜੋੜ ਦਿੱਤਾ ਹੈ।
ਅਚਾਨਕ ਬਿਜਲੀ ਗੁੱਲ ਹੋਣ 'ਤੇ ਇਸ ਨੂੰ ਦੁਬਾਰਾ ਚਾਲੂ ਕਰਵਾਉਣ ਵਿੱਚ ਕਈ-ਕਈ ਦਿਨ ਲੱਗ ਰਹੇ ਹਨ। ਇਸ ਦਾ ਮੁੱਖ ਕਾਰਨ ਇਹ ਹੈ ਕਿ ਰੀਚਾਰਜ ਖ਼ਤਮ ਹੋਣ ਬਾਰੇ ਬਹੁਤੇ ਸਰਕਾਰੀ ਮਹਿਕਮਿਆਂ ਨੂੰ ਨਾ ਤਾਂ ਪਹਿਲਾਂ ਜਾਣਕਾਰੀ ਹੁੰਦੀ ਹੈ ਅਤੇ ਨਾ ਹੀ ਕੋਈ ਸਮੇਂ ਸਿਰ ਸੂਚਨਾ ਮਿਲਦੀ ਹੈ। ਦੂਜੇ ਪਾਸੇ, ਸਰਕਾਰੀ ਫੰਡਾਂ ਵਿੱਚੋਂ ਰੀਚਾਰਜ ਕਰਵਾਉਣ ਲਈ ਕਈ ਤਰ੍ਹਾਂ ਦੀਆਂ ਪ੍ਰਸ਼ਾਸਕੀ ਮਨਜ਼ੂਰੀਆਂ ਲੈਣੀਆਂ ਪੈਂਦੀਆਂ ਹਨ।
ਜਦੋਂ ਤੱਕ ਪਾਵਰਕੌਮ ਦੇ ਖਾਤੇ ਵਿੱਚ ਪੈਸੇ ਜਮ੍ਹਾਂ ਨਹੀਂ ਹੁੰਦੇ, ਉਦੋਂ ਤੱਕ ਦਫ਼ਤਰਾਂ ਨੂੰ ਬਿਨਾਂ ਬਿਜਲੀ ਤੋਂ ਹੀ ਦਿਨ ਕੱਟਣੇ ਪੈਂਦੇ ਹਨ। ਪਟਿਆਲਾ ਜ਼ਿਲ੍ਹੇ ਦੇ ਦਰਜਨ ਦੇ ਕਰੀਬ ਸਰਕਾਰੀ ਸਕੂਲ ਅਤੇ ਸੇਵਾ ਕੇਂਦਰ ਇਸ ਨਵੀਂ ਪ੍ਰਣਾਲੀ ਕਾਰਨ ਖੱਜਲ-ਖੁਆਰ ਹੋ ਚੁੱਕੇ ਹਨ।
7 ਲੱਖ 47 ਹਜ਼ਾਰ 564 ਸਮਾਰਟ ਮੀਟਰ ਲੱਗੇ
ਪਾਵਰਕੌਮ ਇਕ ਰਿਪੋਰਟ ਮੁਤਾਬਕ ਐਮ.ਈ. ਲੈਬਾਂ ਤੋਂ ਕੁੱਲ 7,84,408 ਸਮਾਰਟ ਮੀਟਰ ਜਾਰੀ ਕੀਤੇ ਗਏ ਸਨ, ਜਿਨ੍ਹਾਂ ਵਿੱਚੋਂ 7,47,564 ਮੀਟਰ ਸਫਲਤਾਪੂਰਵਕ ਲਗਾਏ ਜਾ ਚੁੱਕੇ ਹਨ। ਇਨ੍ਹਾਂ ਵਿੱਚ ਜ਼ਿਆਦਾਤਰ ਸਿੰਗਲ ਫੇਸ ਮੀਟਰ ਸ਼ਾਮਲ ਹਨ, ਜਿਨ੍ਹਾਂ ਦੀ ਗਿਣਤੀ 6,44,893 ਹੈ, ਜਦਕਿ ਥ੍ਰੀ-ਫੇਸ ਮੀਟਰ 99,138 ਅਤੇ ਹੋਰ ਸ੍ਰੇਣੀਆਂ ਦੇ 3,533 ਮੀਟਰ ਲਗਾਏ ਗਏ ਹਨ। ਇਨ੍ਹਾਂ ਵਿਚੋਂ ਸਮਾਰਟ ਮੀਟਰ ਵਿਚ ਵੈਸਟ ਜੋਨ ਸਭ ਤੋਂ ਅੱਗੇ ਤੇ ਬਾਰਡਰ ਜੋਨ ਪੱਛੜਿਆ ਹੈ।
ਵੈਸਟ ਜ਼ੋਨ ਲਈ 4,50,203 ਸਮਾਰਟ ਮੀਟਰ ਜਾਰੀ ਕੀਤੇ ਗਏ ਜਿਨਾਂ ਵਿਚੋਂ 4,24,816 ਮੀਟਰ ਲਗਾਏ ਜਾ ਚੁੱਕੇ ਹਨ। ਇਨਾਂ ਵਿਚੋਂ ਬਠਿੰਡਾ ਵਿੱਚ 1,67,070, ਮੁਕਤਸਰ ਵਿੱਚ 1,24,407, ਫਰੀਦਕੋਟ ਵਿੱਚ 97,260 ਅਤੇ ਫਿਰੋਜ਼ਪੁਰ ਵਿੱਚ 68,120 ਮੀਟਰ ਲਗਾਏ ਗਏ ਹਨ। ਈਸਟ ਜ਼ੋਨ ਲਈ 3,34,205 ਮੀਟਰ ਜਾਰੀ ਹੋਏ ਤੇ 3,22,748 ਖਪਤਕਾਰਾਂ ਨੂੰ ਲਗਾ ਦਿੱਤੇ ਗਏ। ਜਿਨਾਂ ਵਿਚ ਰੋਪੜ 'ਚ 1,56,812, ਮੋਹਾਲੀ 'ਚ 1,04,419 ਅਤੇ ਜ਼ੀਰਕਪੁਰ 'ਚ 91,069 ਸਮਾਰਟ ਮੀਟਰ ਲੱਗੇ ਹਨ। ਨੌਰਥ ਜ਼ੋਨ ਅਧੀਨ ਜਲੰਧਰ 'ਚ 1,66,293, ਹੁਸ਼ਿਆਰਪੁਰ 'ਚ 1,37,116, ਕਪੂਰਥਲਾ 'ਚ 81,776 ਅਤੇ ਨਵਾਂਸ਼ਹਿਰ 'ਚ 73,112 ਮੀਟਰ ਲੱਗ ਚੁੱਕੇ ਹਨ। ਸਾਊਥ ਜ਼ੋਨ ਅਧੀਨ ਪਟਿਆਲਾ 'ਚ 1,16,506, ਸੰਗਰੂਰ 'ਚ 1,07,244 ਅਤੇ ਬਰਨਾਲਾ 'ਚ 78,788 ਸਮਾਰਟ ਮੀਟਰ ਲਗਾਏ ਗਏ।ਬਾਰਡਰ ਜ਼ੋਨ ਅਧੀਨ ਗੁਰਦਾਸਪੁਰ 'ਚ 1,44,567, ਸਬ-ਅਰਬਨ 'ਚ 1,05,649, ਤਰਨਤਾਰਨ 'ਚ 63,186 ਅਤੇ ਅੰਮ੍ਰਿਤਸਰ ਸ਼ਹਿਰ 'ਚ 52,032 ਮੀਟਰ ਲਗਾਏ ਗਏ ਹਨ। ਸੈਂਟਰਲ ਜ਼ੋਨ ਅਧੀਨ ਲੁਧਿਆਣਾ (ਸਿਟੀ ਵੈਸਟ) 'ਚ 1,31,080, ਸਿਟੀ ਈਸਟ 'ਚ 1,00,414, ਸਬ-ਅਰਬਨ 'ਚ 80,466 ਅਤੇ ਖੰਨਾ 'ਚ 66,837 ਮੀਟਰ ਸਥਾਪਤ ਕੀਤੇ ਜਾ ਚੁੱਕੇ ਹਨ।
ਇਕ ਕਲਿੱਕ ’ਤੇ ਪ੍ਰੀ-ਪੇਡ ’ਚ ਬਦਲੇ ਜਾ ਸਕਦੇ ਹਨ ਸਮਾਰਟ ਮੀਟਰ
ਪੰਜਾਬ ਰਾਜ ਪਾਵਰ ਕਾਰਪੋਰੇਸ਼ਨ ਲਿਮਟਿਡ ਵੱਲੋਂ ਸੂਬੇ ਭਰ ਵਿੱਚ ਬਿਜਲੀ ਪ੍ਰਣਾਲੀ ਨੂੰ ਆਧੁਨਿਕ ਬਣਾਉਣ ਲਈ ਸਮਾਰਟ ਮੀਟਰ ਲਾਉਣ ਦੀ ਪ੍ਰਕਿਰਿਆ ਤੇਜ਼ੀ ਨਾਲ ਚਲਾਈ ਜਾ ਰਹੀ ਹੈ। ਪਾਵਰਕੌਮ ਨੇ ਫਿਲਹਾਲ ਸਰਕਾਰੀ ਮਹਿਕਮਿਆਂ ਦੇ ਸਮਾਰਟ ਮੀਟਰਾਂ ਨੂੰ ਰੀਚਾਰਜ (ਪ੍ਰੀ-ਪੇਡ) ਪ੍ਰਣਾਲੀ ਨਾਲ ਜੋੜਿਆ ਹੈ।
ਹਾਲਾਂਕਿ, ਸਿਸਟਮ ਤਿਆਰ ਹੋਣ ਕਾਰਨ ਪਾਵਰਕੌਮ ਜਦੋਂ ਚਾਹੇ, ਆਮ ਖਪਤਕਾਰਾਂ ਦੇ ਘਰਾਂ ਜਾਂ ਵਪਾਰਕ ਇਕਾਈਆਂ ਵਿੱਚ ਲੱਗੇ ਸਮਾਰਟ ਮੀਟਰਾਂ ਨੂੰ ਵੀ ਮਹਿਜ਼ ਇੱਕ ਕਲਿੱਕ ਨਾਲ ਪ੍ਰੀ-ਪੇਡ ਸਿਸਟਮ ਵਿੱਚ ਬਦਲ ਸਕਦਾ ਹੈ। ਅੰਕੜਿਆਂ ਤੋਂ ਸਪੱਸ਼ਟ ਹੈ ਕਿ ਫੀਲਡ ਸਟਾਫ਼ ਵੱਲੋਂ ਲੈਬਾਂ ਤੋਂ ਆਏ ਮੀਟਰਾਂ ਨੂੰ ਤੇਜ਼ੀ ਨਾਲ ਸਥਾਪਤ ਕੀਤਾ ਜਾ ਰਿਹਾ ਹੈ ਅਤੇ ਵਿਭਾਗ ਦਾ ਮੁੱਖ ਮਕਸਦ ਬਾਕੀ ਰਹਿੰਦੇ ਮੀਟਰਾਂ ਨੂੰ ਵੀ ਜਲਦ ਲਗਾ ਕੇ ਯੋਜਨਾ ਨੂੰ ਪੂਰੀ ਤਰ੍ਹਾਂ ਅਮਲ ਵਿੱਚ ਲਿਆਉਣਾ ਹੈ।