ਸ਼ਹਿਰ ’ਚ ਦਿਨ-ਦਿਹਾੜੇ ਖੋਹਾਂ ਤੇ ਚੋਰੀ ਦੀਆਂ ਵਧ ਰਹੀਆਂ ਘਟਨਾਵਾਂ

ਇੱਕੋ ਇਲਾਕੇ ਤੋਂ ਦੋ ਮੋਟਰਸਾਇਕਲ ਚੋਰੀ, ਬਿਸ਼ਨ ਨਗਰ ਵਿੱਚ ਖੋਹ ਦੀ ਕੋਸ਼ਿਸ਼ ਸੀਨੀਅਰ ਰਿਪੋਰਟਰ, ਪੰਜਾਬੀ ਜਾਗਰਣ, ਪਟਿਆਲਾ ਸ਼ਹਿਰ ਵਿੱਚ ਲੁਟੇਰਿਆਂ ਅਤੇ ਮੋਟਰਸਾਇਕਲ ਚੋਰਾਂ ਕਾਰਨ ਲੋਕਾਂ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣਿਆ ਹੋਇਆ ਹੈ। ਅਰਬਨ ਅਸਟੇਟ ਫੇਜ਼-1 ਵਿੱਚ ਵੀਹ ਦਿਨਾਂ ਦੇ ਅੰਦਰ ਇੱਕੋ ਇਲਾਕੇ ਤੋਂ ਲਗਾਤਾਰ ਦੋ ਮੋਟਰਸਾਇਕਲ ਚੋਰੀ ਹੋ ਗਏ। ਪੁਲਿਸ ਨੇ ਪਹਿਲੀ ਘਟਨਾ ਤੋਂ ਬਾਅਦ ਲਾਪਰਵਾਹੀ ਦਿਖਾਈ, ਜਿਸ ਕਾਰਨ ਉਸੇ ਇਲਾਕੇ ਤੋਂ ਦੂਜੀ ਬਾਈਕ ਵੀ ਚੋਰੀ ਹੋ ਗਈ। ਉੱਥੇ ਹੀ 10 ਅਗਸਤ ਨੂੰ ਦੋ ਜਗ੍ਹਾਂ ਤੇ ਖੋਹ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ, ਜਿਨ੍ਹਾਂ ਵਿੱਚੋਂ ਇੱਕ ਮਾਮਲੇ ਵਿੱਚ ਦੋ ਨੌਜਵਾਨਾਂ ਨੂੰ ਕਾਬੂ ਕਰ ਲਿਆ ਗਿਆ। ਡੀਲਵਾਲ ਰੋਡ ਤੇ ਫੋਨ ਖੋਹਣ ਵਿੱਚ ਨਾਕਾਮ ਰਹਿਣ ਤੇ ਬਾਈਕ ਸਵਾਰ ਕਾਗਜ਼ਾਂ ਵਾਲਾ ਬੈਗ ਲੈ ਕੇ ਫਰਾਰ ਹੋ ਗਏ, ਜਦਕਿ ਬਿਸ਼ਨ ਨਗਰ ਵਿੱਚ ਪਰਸ ਖੋਹਣ ਚ ਅਸਫਲ ਹੋ ਕੇ ਭੱਜ ਰਹੇ ਸਕੂਟੀ ਸਵਾਰ ਦੋ ਜਣਿਆਂ ਨੂੰ ਰਾਹਗੀਰਾਂ ਨੇ ਫੜ ਕੇ ਪੁਲਿਸ ਹਵਾਲੇ ਕਰ ਦਿੱਤਾ। ਬਾਈਕ ਚੋਰੀ ਦੀ ਘਟਨਾ ਸੀਸੀਟੀਵੀ ਵਿੱਚ ਕੈਦ ਹੋਈ ਹੈ, ਜਦਕਿ ਬਿਸ਼ਨ ਨਗਰ ਵਿੱਚ ਖੋਹ ਦੀ ਕੋਸ਼ਿਸ਼ ਕਰਨ ਵਾਲਿਆਂ ਦੀ ਵੀਡੀਓ ਇੰਟਰਨੈੱਟ ਤੇ ਵਾਇਰਲ ਹੋ ਗਈ ਹੈ। ਡੱਬੀ ਮੋਟਰਸਾਇਕਲ ਚੋਰੀ ਦੀਆਂ ਘਟਨਾਵਾਂ ਸੀਸੀਟੀਵੀ ਕੈਮਰੇ ’ਚ ਕੈਦ ਅਰਬਨ ਅਸਟੇਟ ਫੇਜ਼-1 ਇਲਾਕੇ ਤੋਂ ਵੀਹ ਦਿਨ ਪਹਿਲਾਂ ਪੀਜੀ ਵਿੱਚ ਰਹਿੰਦੇ ਨੌਜਵਾਨਾਂ ਦੀ ਬਾਹਰ ਖੜ੍ਹੀ ਬਾਈਕ ਚੋਰੀ ਹੋ ਗਈ ਸੀ। ਬਾਈਕ ਚੋਰੀ ਦੀ ਸ਼ਿਕਾਇਤ ਅਰਬਨ ਅਸਟੇਟ ਥਾਣੇ ਪਹੁੰਚੀ, ਪਰ ਕੇਸ ਦਰਜ ਨਹੀਂ ਕੀਤਾ ਗਿਆ। ਪੁਲਿਸ ਨੇ ਛਾਣਬੀਣ ਦਾ ਹਵਾਲਾ ਦੇ ਕੇ ਉਨ੍ਹਾਂ ਨੂੰ ਵਾਪਸ ਭੇਜ ਦਿੱਤਾ। ਹਾਲੇ ਪੁਲਿਸ ਇਨ੍ਹਾਂ ਚੋਰਾਂ ਤੇ ਕਾਰਵਾਈ ਵੀ ਨਹੀਂ ਕਰ ਸਕੀ ਸੀ ਕਿ ਉਸੇ ਇਲਾਕੇ ਤੋਂ ਦੂਜੀ ਬਾਈਕ ਵੀ ਚੋਰੀ ਹੋ ਗਈ। ਫੇਜ਼-1 ਦੇ ਰਹਿਣ ਵਾਲੇ ਹਰਮਨ ਸਿੰਘ ਦੀ ਬਾਈਕ ਚੋਰੀ ਹੁੰਦੇ ਹੀ ਸੀਸੀਟੀਵੀ ਫੁੱਟੇਜ ਖੰਗਾਲੀ ਗਈ, ਜਿਸ ਵਿੱਚ ਸਾਫ਼ ਨਜ਼ਰ ਆ ਰਿਹਾ ਹੈ ਕਿ ਚੋਰ ਬੇਖ਼ੌਫ਼ ਹੋ ਕੇ ਇਲਾਕੇ ਦੀ ਰੇਕੀ ਕਰਨ ਤੋਂ ਬਾਅਦ ਚੋਰੀ ਨੂੰ ਅੰਜਾਮ ਦੇ ਰਹੇ ਹਨ। ਬਿਨਾਂ ਮੂੰਹ ਢੱਕੇ ਇਹ ਲੋਕ ਚੋਰੀ ਕਰਨ ਤੋਂ ਬਾਅਦ ਇਲਾਕੇ ਚੋਂ ਨਿਕਲ ਗਏ। ਬਾਈਕ ਚੋਰੀ ਦੀ ਦੂਜੀ ਘਟਨਾ ਨੂੰ ਵੀ ਦੋ ਦਿਨ ਬੀਤ ਚੁੱਕੇ ਹਨ, ਪਰ ਇਸ ਵਾਰ ਵੀ ਪੁਲਿਸ ਵੱਲੋਂ ਕੇਸ ਦਰਜ ਨਹੀਂ ਕੀਤਾ ਗਿਆ। ਡੱਬੀ ਡੀਲਵਾਲ ਰੋਡ ਤੇ ਬਜ਼ੁਰਗ ਔਰਤ ਦਾ ਬੈਗ ਖੋਹਿਆ ਦਸ ਅਗਸਤ ਨੂੰ ਡੀਲਵਾਲ ਰੋਡ ਤੇ ਆਟਾ ਚੱਕੀ ਨੇੜੇ ਇੱਕ ਬਜ਼ੁਰਗ ਔਰਤ ਨਾਲ ਖੋਹ ਦੀ ਘਟਨਾ ਵਾਪਰੀ। ਸਵੇਰ ਵੇਲੇ ਪੈਦਲ ਜਾ ਰਹੀ ਸਰਬਜੀਤ ਕੌਰ ਤੋਂ ਮੁਲਜ਼ਮਾਂ ਨੇ ਮੋਬਾਈਲ ਫੋਨ ਖੋਹਣ ਦੀ ਕੋਸ਼ਿਸ਼ ਕੀਤੀ, ਪਰ ਔਰਤ ਨੇ ਫੋਨ ਨਹੀਂ ਛੱਡਿਆ, ਜਿਸ ਤੇ ਮੁਲਜ਼ਮ ਉਨ੍ਹਾਂ ਦਾ ਬੈਗ ਲੈ ਕੇ ਫਰਾਰ ਹੋ ਗਏ। ਬੈਗ ਵਿੱਚ ਪਛਾਣ ਪੱਤਰ ਸਮੇਤ ਹੋਰ ਜ਼ਰੂਰੀ ਦਸਤਾਵੇਜ਼ ਸਨ। ਕਾਲੋਨੀ ਐਸੋਸੀਏਸ਼ਨ ਦੇ ਮੈਂਬਰਾਂ ਨਾਲ ਅਰਬਨ ਅਸਟੇਟ ਥਾਣੇ ਪਹੁੰਚ ਕੇ ਔਰਤ ਨੇ ਸ਼ਿਕਾਇਤ ਦਰਜ ਕਰਵਾਈ, ਪਰ ਫਿਲਹਾਲ ਪੁਲਿਸ ਕਿਸੇ ਵੀ ਮੁਲਜ਼ਮ ਤੱਕ ਨਹੀਂ ਪਹੁੰਚ ਸਕੀ ਹੈ ਅਤੇ ਨਾ ਹੀ ਐਫਆਈਆਰ ਦਰਜ ਕੀਤੀ ਗਈ ਹੈ। ਡੱਬੀ ਬਿਸ਼ਨ ਨਗਰ ਚ ਖੋਹ ਦੀ ਕੋਸ਼ਿਸ਼ ਕਰਨ ਵਾਲੇ ਕਾਬੂ ਥਾਣਾ ਲਾਹੌਰੀ ਗੇਟ ਅਧੀਨ ਆਉਂਦੇ ਬਿਸ਼ਨ ਨਗਰ ਵਿੱਚ ਸਕੂਟੀ ਸਵਾਰ ਦੋ ਜਣਿਆਂ ਨੇ ਇੱਕ ਔਰਤ ਦਾ ਪਰਸ ਖੋਹਣ ਦੀ ਕੋਸ਼ਿਸ਼ ਕੀਤੀ। ਔਰਤ ਵੱਲੋਂ ਪਰਸ ਨਾ ਛੱਡਣ ਤੇ ਸਕੂਟੀ ਸਵਾਰ ਮੌਕੇ ਤੋਂ ਭੱਜਣ ਲੱਗੇ। ਰਾਹਗੀਰਾਂ ਨੇ ਉਨ੍ਹਾਂ ਨੂੰ ਦੇਖ ਲਿਆ ਅਤੇ ਪਿੱਛਾ ਕਰਕੇ ਕਾਬੂ ਕਰ ਲਿਆ। ਇੰਨੇ ਵਿੱਚ ਔਰਤ ਵੀ ਉੱਥੇ ਪਹੁੰਚ ਗਈ ਅਤੇ ਦੱਸਿਆ ਕਿ ਇਹ ਲੋਕ ਉਸ ਨੂੰ ਕੁਝ ਮੀਟਰ ਤੱਕ ਘੜੀਸਦੇ ਹੋਏ ਲੈ ਗਏ ਸਨ। ਰਾਹਗੀਰਾਂ ਨੇ ਦੋਵਾਂ ਨੂੰ ਫੜ ਕੇ ਛਿੱਤਰਪੋਲ਼ਾ ਕੀਤਾ ਅਤੇ ਪੁਲਿਸ ਨੂੰ ਸੂਚਿਤ ਕਰ ਦਿੱਤਾ। ਡੱਬੀ ਬਿਸ਼ਨ ਨਗਰ ਮਾਮਲੇ ਚ ਦੋਵੇਂ ਨੌਜਵਾਨ ਹਿਰਾਸਤ ਚ ਲਏ : ਥਾਣਾ ਮੁਖੀ ਥਾਣਾ ਲਾਹੌਰੀ ਗੇਟ ਦੇ ਮੁੱਖੀ ਸੌਰਵ ਸਭਰਵਾਲ ਨੇ ਦੱਸਿਆ ਕਿ ਬਿਸ਼ਨ ਨਗਰ ਮਾਮਲੇ ਵਿੱਚ ਦੋਵਾਂ ਨੌਜਵਾਨਾਂ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ ਹੈ ਅਤੇ ਉਨ੍ਹਾਂ ਕੋਲੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਜਾਂਚ ਤੋਂ ਬਾਅਦ ਅਗਲੀ ਕਾਰਵਾਈ ਕੀਤੀ ਜਾਵੇਗੀ। ਡੱਬੀ ਚੋਰਾਂ ਦੀ ਭਾਲ ਜਾਰੀ : ਜਾਂਚ ਅਧਿਕਾਰੀ ਥਾਣਾ ਅਰਬਨ ਅਸਟੇਟ ਦੇ ਜਾਂਚ ਅਧਿਕਾਰੀ ਬਲਜਿੰਦਰ ਸਿੰਘ ਨੇ ਦੱਸਿਆ ਕਿ ਬਾਈਕ ਚੋਰੀ ਦੇ ਕਈ ਮਾਮਲੇ ਧਿਆਨ ਵਿੱਚ ਆਏ ਹਨ। ਮੁਖ਼ਬਰਾਂ ਰਾਹੀਂ ਮੁਲਜ਼ਮਾਂ ਦੀ ਭਾਲ ਕੀਤੀ ਜਾ ਰਹੀ ਹੈ ਅਤੇ ਜਲਦ ਹੀ ਉਨ੍ਹਾਂ ਦੀ ਪਛਾਣ ਕਰਕੇ ਕਾਬੂ ਕਰ ਲਿਆ ਜਾਵੇਗਾ।