ਪੰਜਾਬ ਦੇ ਸਿੱਖਿਆ ਮਾਡਲ 'ਤੇ ਵੱਡਾ ਸਵਾਲ: ਪਟਿਆਲਾ ਦੇ ਦੋ ਪਿੰਡਾਂ ਦੇ ਬੱਚੇ ਹਰਿਆਣਾ 'ਚ ਲੈ ਰਹੇ ਨੇ ਸਿੱਖਿਆ, 3 ਦਹਾਕਿਆਂ ਤੋਂ ਸਰਕਾਰਾਂ ਖ਼ਾਮੋਸ਼

ਪੰਜਾਬ-ਹਰਿਆਣਾ ਦੀ ਹੱਦ ’ਤੇ ਸਥਿਤ ਦੋ ਪਿੰਡਾਂ ਔਜਾਂ ਤੇ ਭਾਗੋਮਾਜਰੀ ਕਰੀਬ ਤਿੰਨ ਦਹਾਕੇ ਪਹਿਲਾਂ ਕੁਝ ਘਰਾਂ ਦੇ ਡੇਰੇ ਸਨ। ਅਬਾਦੀ ਵਧਣ ਨਾਲ ਇਹ ਪਿੰਡਾਂ ਵਜੋਂ ਅਬਾਦ ਹੋ ਗਏ। ਇਨ੍ਹਾਂ ਦੋਵਾਂ ਪਿੰਡਾਂ ਦੇ ਵਿਚਕਾਰ ਇੱਕੋ ਇਕ ਸਕੂਲ ਸੀ ਜੋ ਕਰੀਬ ਤਿੰਨ ਦਹਾਕੇ ਪਹਿਲਾਂ ਬੰਦ ਹੋ ਗਿਆ ਸੀ। ਨੇੜੇ ਕੋਈ ਹੋਰ ਸਰਕਾਰੀ ਸਕੂਲ ਨਾ ਹੋਣ ਕਾਰਨ ਇਨ੍ਹਾਂ ਪਿੰਡਾਂ ਦੇ ਕਰੀਬ ਦੋ ਦਰਜਨ ਬੱਚੇ ਹਰਿਆਣਾ ਦੇ ਵੱਖ-ਵੱਖ ਸਕੂਲਾਂ ਵਿਚ ਜਾਣ ਲਈ ਮਜਬੂਰ ਹਨ। ਇਨ੍ਹਾਂ ਦੇ ਪਿੰਡਾਂ ਦੇ ਬੱਚੇ ਯੁਵਰਾਜ, ਗੁਰਲੀਨ, ਦੀਪ ਗਿੱਲ, ਅਤੀਤ, ਅਰਸ਼, ਹਰਜੋਤ, ਅਰਮਾਨ, ਪ੍ਰਭਜੋਤ ਕੌਰ, ਨਵਜੋਤ, ਸੁਮੀਰ, ਸਮਰਪ੍ਰੀਤ, ਲਵ ਕੁਸ਼ ਤੇ ਏਕਮਜੋਤ ਕੌਰ ਸਮੇਤ ਬਹੁਤ ਸਾਰੇ ਬੱਚੇ ਇਸ ਵੇਲੇ ਪ੍ਰਾਇਮਰੀ ਸਿੱਖਿਆ ਲਈ ਪਿੰਡ ਤੋਂ ਕਰੀਬ ਚਾਰ ਕਿੱਲੋਮੀਟਰ ਦੂਰ ਹਰਿਆਣਾ ਦੇ ਪਿੰਡ ਦਾਬਣ ਖੇੜੀ ਦੇ ਸਕੂਲ ਰੋਜ਼ਾਨਾ ਪੜ੍ਹਨ ਜਾਂਦੇ ਹਨ। ਇਸੇ ਤਰ੍ਹਾਂ ਜਸ਼ਨ ਤੇ ਖੁਸ਼ੀ ਸਮੇਤ ਕਰੀਬ ਅੱਠ ਵਿਦਿਆਰਥੀ ਹਾਈ ਤੇ ਸੈਕੰਡਰੀ ਪੱਧਰ ਦੀ ਪੜ੍ਹਾਈ ਲਈ ਹਰਿਆਣਾ ਦੇ ਪਿੰਡ ਅਗੌਂਦ ਦੇ ਸਰਕਾਰੀ ਸਕੂਲ ’ਚ ਪੜ੍ਹਨ ਜਾ ਰਹੇ ਹਨ। ਇਹ ਸਕੂਲ ਪਿੰਡ ਤੋਂ ਕਰੀਬ 10 ਕਿੱਲੋਮੀਟਰ ਦੂਰ ਪੈਂਦਾ ਹੈ। ਗਰਮੀ ਤੇ ਅੱਤ ਦੀ ਠੰਢ ਦੇ ਦਿਨਾਂ ’ਚ ਇੰਨਾ ਲੰਬਾ ਸਫ਼ਰ ਤੈਅ ਕਰਨਾ ਕਿਸੇ ਤਪੱਸਿਆ ਤੋਂ ਘੱਟ ਨਹੀਂ। ਕੁਝ ਬੱਚੇ ਨਾਲ ਲੱਗਦੇ ਹਰਿਆਣਾ ਦੇ ਪਿੰਡਾਂ ਦੇ ਪ੍ਰਾਈਵੇਟ ਸਕੂਲਾਂ ’ਚ ਵੀ ਪੜ੍ਹਦੇ ਹਨ।