ਖ਼ਾਕੀ ਵਰਦੀ ’ਚ ਮਿਲਿਆ ਸੱਚਾ ਰੱਖਿਅਕ, ਏਐੱਸਆਈ ਨੇ ਲੁਟੇਰੇ ਨੂੰ ਦਬੋਚ ਕੇ ਔਰਤ ਨੂੰ ਮੋੜਿਆ ਬੈਗ; ਗੁੱਟ ’ਤੇ ਰੱਖੜੀ ਬੰਨ੍ਹ ਬਣਿਆ ਧਰਮ ਦਾ ਭਰਾ

ਜਾਣਕਾਰੀ ਅਨੁਸਾਰ ਜਸਵੀਰ ਕੌਰ ਵਾਸੀ ਪਿੰਡ ਕੌਲੀ 24 ਅਗਸਤ ਨੂੰ ਕਿਸੇ ਕੰਮ ਲਈ ਪਟਿਆਲਾ ਬੱਸ ਅੱਡੇ ’ਤੇ ਪਹੁੰਚੀ ਸੀ। ਜਿਵੇਂ ਹੀ ਉਹ ਬੱਸ ਤੋਂ ਉਤਰੀ, ਇਕ ਮੋਟਰਸਾਈਕਲ ਸਵਾਰ ਝਪਟਮਾਰ ਉਸ ਦੇ ਹੱਥੋਂ ਬੈਗ ਖੋਹ ਕੇ ਤੇਜ਼ ਰਫ਼ਤਾਰ ਨਾਲ ਫ਼ਰਾਰ ਹੋ ਗਿਆ। ਬੇਵੱਸ ਔਰਤ ਵੱਲੋਂ ਮਦਦ ਲਈ ਮਾਰੇ ਗਏ ਵੈਣਾਂ ਨੂੰ ਸੁਣ ਕੇ ਉੱਥੋਂ ਆਪਣੀ ਨਿੱਜੀ ਕਾਰ ਰਾਹੀਂ ਲੰਘ ਰਹੇ ਪੰਜਾਬ ਪੁਲਿਸ ਦੇ ਏਐਸਆਈ ਭੁਪਿੰਦਰ ਸਿੰਘ ਤੁਰੰਤ ਹਰਕਤ ਵਿਚ ਆ ਗਏ। ਭੁਪਿੰਦਰ ਸਿੰਘ, ਜੋ ਉਸ ਸਮੇਂ ਪਿੰਡ ਘੱਗਾ ਵਿਖੇ ਵੀਆਈਪੀ ਡਿਊਟੀ ਲਈ ਰਵਾਨਾ ਹੋ ਰਹੇ ਸਨ, ਨੇ ਆਪਣੇ ਫ਼ਰਜ਼ ਨੂੰ ਪਹਿਲ ਦਿੱਤੀ। ਉਨ੍ਹਾਂ ਪਿੰਡ ਚੌਰਾ ਦੀਆਂ ਭੀੜੀਆਂ ਗਲੀਆਂ ਤੱਕ ਲੁਟੇਰੇ ਦਾ ਪਿੱਛਾ ਜਾਰੀ ਰੱਖਿਆ। ਖ਼ੁਦ ਨੂੰ ਪੁਲਿਸ ਅਧਿਕਾਰੀ ਦੇ ਸ਼ਿਕੰਜੇ ’ਚ ਫਸਦਾ ਦੇਖ ਝਪਟਮਾਰ ਬੈਗ ਜ਼ਮੀਨ 'ਤੇ ਸੁੱਟ ਕੇ ਤੰਗ ਗਲੀਆਂ ’ਚੋਂ ਭੱਜ ਨਿਕਲਿਆ। ਏਐੱਸਆਈ ਨੇ ਤੁਰੰਤ ਬੈਗ ਸੁਰੱਖਿਅਤ ਚੁੱਕਿਆ ਅਤੇ ਬੱਸ ਅੱਡੇ ਪਹੁੰਚ ਕੇ ਰੋਂਦੀ ਹੋਈ ਜਸਵੀਰ ਕੌਰ ਦੇ ਹਵਾਲੇ ਕਰ ਦਿੱਤਾ।