ਪੁਲਿਸ ਨੇ ਗਊ-ਤਸਕਰੀ ਦੀ ਕੋਸ਼ਿਸ਼ ਨਾਕਾਮ ਕੀਤੀ, ਟਰੱਕ ’ਚੋਂ 15 ਗੋਵੰਸ਼ ਬਰਾਮਦ

ਆਰ.ਸਿੰਘ, ਪੰਜਾਬੀ ਜਾਗਰਣ, ਸੁਜਾਨਪੁਰ/ਪਠਾਨਕੋਟ – ਥਾਣਾ ਸੁਜਾਨਪੁਰ ਦੀ ਪੁਲਿਸ ਨੇ ਗਸ਼ਤ ਅਤੇ ਨਾਕਾਬੰਦੀ ਦੌਰਾਨ ਗਊ-ਤਸਕਰੀ ਦੀ ਕੋਸ਼ਿਸ਼ ਨੂੰ ਨਾਕਾਮ ਕਰਦਿਆਂ ਇੱਕ ਟਰੱਕ ਵਿੱਚੋਂ 15 ਗੋਵੰਸ਼ ਬਰਾਮਦ ਕੀਤੇ ਹਨ। ਇਨ੍ਹਾਂ ਵਿੱਚ 10 ਗਊਆਂ ਅਤੇ 5 ਬਲਦ ਸ਼ਾਮਲ ਹਨ। ਪੁਲਿਸ ਨੂੰ ਦੇਖ ਕੇ ਟਰੱਕ ਸਵਾਰ ਦੋ ਮੁਲਜ਼ਮ ਵਾਹਨ ਛੱਡ ਕੇ ਦਰਿਆ ਵੱਲ ਭੱਜ ਗਏ, ਜਿਨ੍ਹਾਂ ਦੀ ਭਾਲ ਲਈ ਪੁਲਿਸ ਵੱਲੋਂ ਛਾਪੇਮਾਰੀ ਕੀਤੀ ਜਾ ਰਹੀ ਹੈ। ਜਾਣਕਾਰੀ ਅਨੁਸਾਰ ਏਐੱਸਆਈ ਨਰੇਸ਼ ਕੁਮਾਰ ਪੁਲਿਸ ਪਾਰਟੀ ਸਮੇਤ ਇਲਾਕੇ ਵਿੱਚ ਗਸ਼ਤ ਕਰ ਰਹੇ ਸਨ। ਇਸ ਦੌਰਾਨ ਮੁਖ਼ਬਰ ਨੇ ਪੁਲਿਸ ਨੂੰ ਸੂਚਨਾ ਦਿੱਤੀ ਕਿ ਜਸੀਰ ਅਹਿਮਦ ਵਾਸੀ ਪਰਨੋਟੀ, ਰਾਮਬਨ, ਜ਼ਿਲ੍ਹਾ ਡੋਡਾ, ਜੰਮੂ-ਕਸ਼ਮੀਰ ਵੱਲੋਂ ਪਠਾਨਕੋਟ ਅਤੇ ਗੁਰਦਾਸਪੁਰ ਇਲਾਕਿਆਂ ਤੋਂ ਗੋਵੰਸ਼ ਇਕੱਠਾ ਕਰਕੇ ਉਨ੍ਹਾਂ ਨੂੰ ਗੋਕਸ਼ੀ ਦੇ ਇਰਾਦੇ ਨਾਲ ਜੰਮੂ-ਕਸ਼ਮੀਰ ਲਿਜਾਇਆ ਜਾ ਰਿਹਾ ਹੈ। ਮੁਖ਼ਬਰ ਨੇ ਦੱਸਿਆ ਕਿ ਗੋਵੰਸ਼ ਇੱਕ ਚਿੱਟੇ ਰੰਗ ਦੇ ਟਰੱਕ ਨੰਬਰ ਜੇਕੇ-19-ਏ-6571 ਵਿੱਚ ਲੱਦਿਆ ਹੋਇਆ ਹੈ ਅਤੇ ਟਰੱਕ ਨੂੰ ਹਾਈਵੇ ’ਤੇ ਨਾਕਿਆਂ ਤੋਂ ਬਚਾਉਂਦਿਆਂ ਲਿੰਕ ਸੜਕ ਰਾਹੀਂ ਲਿਜਾਇਆ ਜਾ ਰਿਹਾ ਹੈ। ਸੂਚਨਾ ਮਿਲਣ ’ਤੇ ਪੁਲਿਸ ਪਾਰਟੀ ਨੇ ਬਹੇੜੀ ਬੁਜ਼ੁਰਗ ਟੀ-ਪੁਆਇੰਟ ’ਤੇ ਨਾਕਾਬੰਦੀ ਕਰ ਦਿੱਤੀ। ਕੁਝ ਸਮੇਂ ਬਾਅਦ ਉਕਤ ਟਰੱਕ ਨੂੰ ਆਉਂਦਾ ਦੇਖ ਕੇ ਪੁਲਿਸ ਨੇ ਰੁਕਣ ਦਾ ਇਸ਼ਾਰਾ ਕੀਤਾ ਪਰ ਚਾਲਕ ਨੇ ਟਰੱਕ ਰੋਕਣ ਦੀ ਬਜਾਏ ਤੇਜ਼ੀ ਨਾਲ ਭਜਾ ਲਿਆ। ਪੁਲਿਸ ਪਾਰਟੀ ਨੇ ਸਰਕਾਰੀ ਵਾਹਨ ਰਾਹੀਂ ਟਰੱਕ ਦਾ ਪਿੱਛਾ ਕੀਤਾ। ਅੱਗੇ ਇੱਕ ਬੰਦ ਪਏ ਪੈਟਰੋਲ ਪੰਪ ਨੇੜੇ ਚਾਲਕ ਨੇ ਟਰੱਕ ਰੋਕ ਦਿੱਤਾ ਅਤੇ ਆਪਣੇ ਸਾਥੀ ਸਮੇਤ ਵਾਹਨ ਛੱਡ ਕੇ ਦਰਿਆ ਵੱਲ ਭੱਜ ਗਿਆ। ਪੁਲਿਸ ਵੱਲੋਂ ਪਿੱਛਾ ਕੀਤੇ ਜਾਣ ਦੇ ਬਾਵਜੂਦ ਦੋਵੇਂ ਮੁਲਜ਼ਮ ਹਨੇਰੇ ਅਤੇ ਇਲਾਕੇ ਦਾ ਫਾਇਦਾ ਉਠਾਉਂਦਿਆਂ ਫਰਾਰ ਹੋ ਗਏ। ਇਸ ਤੋਂ ਬਾਅਦ ਪੁਲਿਸ ਨੇ ਟਰੱਕ ਦੀ ਤਰਪਾਲ ਹਟਾ ਕੇ ਜਾਂਚ ਕੀਤੀ ਤਾਂ ਅੰਦਰ ਰੱਸੀਆਂ ਨਾਲ ਬੰਨ੍ਹੇ ਹੋਏ 10 ਗਊਆਂ ਅਤੇ 5 ਬਲਦ ਮਿਲੇ। ਪੁਲਿਸ ਨੇ ਤੁਰੰਤ ਰੱਸੀਆਂ ਕੱਟ ਕੇ ਸਾਰੇ ਗੋਵੰਸ਼ ਨੂੰ ਟਰੱਕ ਵਿੱਚੋਂ ਬਾਹਰ ਕੱਢਿਆ। ਟਰੱਕ ਦੇ ਕੈਬਿਨ ਦੀ ਤਲਾਸ਼ੀ ਦੌਰਾਨ ਜਸੀਰ ਅਹਿਮਦ ਦਾ ਆਧਾਰ ਕਾਰਡ, ਡਰਾਈਵਿੰਗ ਲਾਇਸੈਂਸ ਅਤੇ ਓਪੋ ਕੰਪਨੀ ਦਾ ਮੋਬਾਈਲ ਫੋਨ ਵੀ ਬਰਾਮਦ ਹੋਇਆ। ਪੁਲਿਸ ਨੇ ਟਰੱਕ, ਮੋਬਾਈਲ ਫੋਨ ਅਤੇ ਬਰਾਮਦ ਕੀਤੇ ਗੋਵੰਸ਼ ਨੂੰ ਕਬਜ਼ੇ ਵਿੱਚ ਲੈ ਲਿਆ ਹੈ। ਇਸ ਸਬੰਧੀ ਮੁਲਜ਼ਮਾਂ ਖ਼ਿਲਾਫ਼ ਦ ਪੰਜਾਬ ਪ੍ਰੋਹਿਬਿਸ਼ਨ ਆਫ਼ ਕਾਊ ਸਲਾਟਰ ਐਕਟ, 1955 ਦੀ ਧਾਰਾ 8 ਅਤੇ ਦ ਪ੍ਰੀਵੈਂਸ਼ਨ ਆਫ਼ ਕਰੂਐਲਟੀ ਟੂ ਐਨੀਮਲਜ਼ ਐਕਟ, 1960 ਦੀਆਂ ਧਾਰਾਵਾਂ 3 ਅਤੇ 11 ਤਹਿਤ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਪੁਲਿਸ ਵੱਲੋਂ ਫਰਾਰ ਮੁਲਜ਼ਮਾਂ ਦੀ ਭਾਲ ਲਈ ਅਗਲੇਰੀ ਕਾਰਵਾਈ ਜਾਰੀ ਹੈ।