Pathankot News : ਚੱਕੀ ਦਰਿਆ ਰਸਤੇ ’ਤੇ ਗੁੰਡਾ ਟੈਕਸ ਵਸੂਲੀ ਮਾਮਲੇ ’ਚ ਇਕ ਗ੍ਰਿਫ਼ਤਾਰ, ਪ੍ਰਤੀ ਵਾਹਨ 200 ਰੁਪਏ ਵਸੂਲਣ ਦੇ ਦੋਸ਼

ਆਰ.ਸਿੰਘ, ਪੰਜਾਬੀ ਜਾਗਰਣ, ਪਠਾਨਕੋਟ : ਚੱਕੀ ਦਰਿਆ ਦੇ ਰਸਤੇ ਰਾਹੀਂ ਰੇਤ-ਬੱਜਰੀ ਲੈ ਕੇ ਆਉਣ-ਜਾਣ ਵਾਲੇ ਵਾਹਨਾਂ ਤੋਂ ਕਥਿਤ ਤੌਰ ’ਤੇ ਗੁੰਡਾ ਟੈਕਸ ਵਸੂਲਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਮਾਮੂਨ ਪੁਲਿਸ ਨੇ ਵਾਹਨ ਚਾਲਕਾਂ ਨੂੰ ਕਥਿਤ ਜਾਅਲੀ ਪਰਚੀਆਂ ਦੇ ਕੇ ਡਰਾ-ਧਮਕਾ ਕੇ ਪੈਸੇ ਵਸੂਲਣ ਦੇ ਦੋਸ਼ ਹੇਠ ਇਕ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਨੇ ਉਸ ਕੋਲੋਂ ਪੰਜ-ਛੇ ਪਰਚੀਆਂ ਬਰਾਮਦ ਕਰਨ ਦਾ ਦਾਅਵਾ ਕੀਤਾ ਹੈ। ਇਸ ਮਾਮਲੇ ਵਿੱਚ ਹਿਮਾਚਲ ਪ੍ਰਦੇਸ਼ ਦੇ ਪਿੰਡ ਕੰਦਵਾਲ ਵਾਸੀ ਸੁਹਪਨ ਕੁਮਾਰ ਉਰਫ਼ ਸੋਨੂੰ ਅਤੇ ਰਿਸ਼ੂ ਖ਼ਿਲਾਫ਼ ਕੇਸ ਦਰਜ ਕੀਤਾ ਗਿਆ ਹੈ।

ਪ੍ਰਤੀ ਵਾਹਨ 200 ਰੁਪਏ ਵਸੂਲਣ ਦੇ ਦੋਸ਼

ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਅਨੁਸਾਰ, ਸ਼ਿਕਾਇਤਕਰਤਾ ਜਦੋਂ ਚੱਕੀ ਦਰਿਆ ਦੇ ਪਿੰਡ ਹਰਿਆਲ ਨੇੜੇ ਪਹੁੰਚਿਆ ਤਾਂ ਉਸ ਨੇ ਦੇਖਿਆ ਕਿ ਦਰਿਆ ਵਾਲੇ ਰਸਤੇ ’ਤੇ ਕਰੈਸ਼ਰਾਂ ਤੋਂ ਰੇਤ-ਬੱਜਰੀ ਲੈ ਕੇ ਆਉਣ-ਜਾਣ ਵਾਲੇ ਟਰੱਕਾਂ, ਟਿੱਪਰਾਂ ਅਤੇ ਟਰੈਕਟਰ-ਟਰਾਲੀਆਂ ਦੇ ਚਾਲਕਾਂ ਤੋਂ ਇਕ ਵਿਅਕਤੀ ਕਥਿਤ ਤੌਰ ’ਤੇ ਜਾਅਲੀ ਪਰਚੀਆਂ ਦੇ ਕੇ ਜਬਰੀ ਪੈਸੇ ਵਸੂਲ ਰਿਹਾ ਸੀ। ਦੋਸ਼ ਹੈ ਕਿ ਹਰੇਕ ਵਾਹਨ ਤੋਂ 200 ਰੁਪਏ ਲਏ ਜਾ ਰਹੇ ਸਨ।

ਜ਼ਮੀਨ ਦੇ ਮਾਲਕ ਦੀ ਮਿਲੀਭੁਗਤ ਹੋਣ ਦਾ ਵੀ ਦੋਸ਼

ਸ਼ਿਕਾਇਤ ਵਿੱਚ ਦੋਸ਼ ਲਾਇਆ ਗਿਆ ਹੈ ਕਿ ਇਹ ਸਾਰਾ ਕੰਮ ਜ਼ਮੀਨ ਦੇ ਮਾਲਕ ਦੀ ਕਥਿਤ ਮਿਲੀਭੁਗਤ ਨਾਲ ਉਸ ਵੱਲੋਂ ਰੱਖੇ ਗਏ ਕਾਰਿੰਦੇ ਸੁਹਪਨ ਕੁਮਾਰ ਉਰਫ਼ ਸੋਨੂੰ ਰਾਹੀਂ ਕੀਤਾ ਜਾ ਰਿਹਾ ਸੀ। ਸ਼ਿਕਾਇਤ ਮਿਲਣ ਤੋਂ ਬਾਅਦ ਪੁਲਿਸ ਟੀਮ ਨੇ ਮੌਕੇ ’ਤੇ ਪਹੁੰਚ ਕੇ ਇਕ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਅਤੇ ਪਰਚੀਆਂ ਆਪਣੇ ਕਬਜ਼ੇ ਵਿੱਚ ਲੈ ਲਈਆਂ।

ਰੋਜ਼ਾਨਾ ਲੰਘਣ ਵਾਲੇ ਵਾਹਨਾਂ ਦੀ ਜਾਂਚ

ਮਾਮੂਨ ਕੈਂਟ ਥਾਣੇ ਵਿੱਚ ਦੋਵਾਂ ਮੁਲਜ਼ਮਾਂ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ ਹੈ। ਜਾਂਚ ਅਧਿਕਾਰੀ ਏਐਸਆਈ ਤਰਸੇਮ ਕੁਮਾਰ ਅਨੁਸਾਰ, ਗ੍ਰਿਫ਼ਤਾਰ ਵਿਅਕਤੀ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ ਪੁਲਿਸ ਰਿਮਾਂਡ ਲਿਆ ਜਾਵੇਗਾ। ਪੁਲਿਸ ਇਹ ਵੀ ਜਾਂਚ ਕਰ ਰਹੀ ਹੈ ਕਿ ਚੱਕੀ ਦਰਿਆ ਵਾਲੇ ਰਸਤੇ ਤੋਂ ਰੋਜ਼ਾਨਾ ਕਿੰਨੇ ਵਾਹਨ ਲੰਘਦੇ ਸਨ ਅਤੇ ਕਥਿਤ ਤੌਰ ’ਤੇ ਕਿੰਨੀ ਰਕਮ ਵਸੂਲੀ ਜਾਂਦੀ ਸੀ।

ਪਹਿਲਾਂ ਵੀ ਸਾਹਮਣੇ ਆ ਚੁੱਕੇ ਹਨ ਮਾਈਨਿੰਗ ਨਾਲ ਜੁੜੇ ਮਾਮਲੇ

2 ਅਕਤੂਬਰ : ਨੰਗਲਭੂਰ ਪੁਲਿਸ ਨੇ ਮੀਰਥਲ ਵਿਖੇ ਨਾਕਾਬੰਦੀ ਦੌਰਾਨ ਬਿਨਾਂ ਨੰਬਰ ਪਲੇਟਾਂ ਅਤੇ ਮਾਈਨਿੰਗ ਸਮੱਗਰੀ ਦੇ ਬਿੱਲਾਂ ਤੋਂ ਬਿਨਾਂ ਜਾ ਰਹੇ ਦੋ ਟਿੱਪਰ ਕਬਜ਼ੇ ਵਿੱਚ ਲਏ ਸਨ। ਦੋਸ਼ ਸੀ ਕਿ ਹਾਈ ਸਕਿਉਰਿਟੀ ਨੰਬਰ ਪਲੇਟਾਂ ਉਤਾਰ ਕੇ ਸਮੱਗਰੀ ਲਿਜਾਈ ਜਾ ਰਹੀ ਸੀ। ਪੁਲਿਸ ਨੇ ਦੋ ਚਾਲਕਾਂ ਨੂੰ ਮੌਕੇ ’ਤੇ ਗ੍ਰਿਫ਼ਤਾਰ ਕਰਕੇ ਨੰਗਲਭੂਰ ਥਾਣੇ ਵਿੱਚ ਛੇ ਵਿਅਕਤੀਆਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਸੀ।

6 ਅਕਤੂਬਰ : ਅਖਵਾੜਾ ਨੇੜੇ ਧੁੱਸੀ ਬੰਨ੍ਹ ’ਤੇ ਨਾਕਾਬੰਦੀ ਦੌਰਾਨ ਪੁਲਿਸ ਨੇ ਰਾਵੀ ਦਰਿਆ ਦੇ ਕੱਚੇ ਰਸਤੇ ਤੋਂ ਰੇਤ ਨਾਲ ਭਰੇ ਦੋ ਟਿੱਪਰ ਫੜੇ ਸਨ। ਜਾਂਚ ਦੌਰਾਨ ਨੰਬਰ ਪਲੇਟਾਂ ’ਤੇ ਚਿੱਕੜ ਅਤੇ ਕਾਲੀ ਟੇਪ ਲੱਗੀ ਮਿਲੀ ਸੀ। ਪੁਲਿਸ ਨੇ ਦੋਵੇਂ ਵਾਹਨ ਕਬਜ਼ੇ ਵਿੱਚ ਲੈ ਕੇ ਚਾਰ ਵਿਅਕਤੀਆਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਸੀ।

15 ਅਕਤੂਬਰ : ਮਾਈਨਿੰਗ ਵਿਭਾਗ ਅਤੇ ਪੁਲਿਸ ਦੀ ਟੀਮ ਨੇ ਪਿੰਡ ਜਸਬਾਂ ਵਿੱਚ ਕਥਿਤ ਨਾਜਾਇਜ਼ ਮਾਈਨਿੰਗ ਲਈ ਵਰਤੀ ਜਾ ਰਹੀ ਇਕ ਪੋਕਲੇਨ ਮਸ਼ੀਨ ਅਤੇ ਟਿੱਪਰ ਜ਼ਬਤ ਕੀਤਾ ਸੀ। ਟੀਮ ਅਨੁਸਾਰ, ਟਿੱਪਰ ਵਿੱਚ ਲਗਭਗ 400 ਘਣ ਫੁੱਟ ਬੱਜਰੀ ਲੱਦੀ ਹੋਈ ਸੀ। ਇਸ ਸਬੰਧੀ ਤਾਰਾਗੜ੍ਹ ਥਾਣੇ ਵਿੱਚ ਮਨਵਾਲ ਬਾਗ ਵਾਸੀ ਖ਼ਿਲਾਫ਼ ਮਾਮਲਾ ਦਰਜ ਕੀਤਾ ਗਿਆ ਸੀ।

21 ਅਕਤੂਬਰ : ਮਾਮੂਨ ਪੁਲਿਸ ਨੇ ਹਿਮਾਚਲ ਪ੍ਰਦੇਸ਼ ਤੋਂ ਕਥਿਤ ਨਾਜਾਇਜ਼ ਮਾਈਨਿੰਗ ਦੀ ਸਮੱਗਰੀ ਪੰਜਾਬ ਲਿਆ ਰਹੇ ਬਿਨਾਂ ਨੰਬਰ ਪਲੇਟਾਂ ਵਾਲੇ ਤਿੰਨ ਟਿੱਪਰ ਕਬਜ਼ੇ ਵਿੱਚ ਲੈ ਕੇ ਛੇ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਇਸ ਮਾਮਲੇ ਵਿੱਚ ਅੱਠ ਵਿਅਕਤੀਆਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਗਿਆ ਸੀ, ਜਦਕਿ ਦੋ ਵਿਅਕਤੀਆਂ ਦੇ ਫ਼ਰਾਰ ਹੋਣ ਦੀ ਗੱਲ ਕਹੀ ਗਈ ਸੀ।